Luka 16
16
1Wia nouro nou himia kitomudio mereido ina iaowa; Na’u nana‐horohoro‐dubui naibaha emidio, keauri dubu nou badiri, ina oubi amidao pai‐dubuido naibaha orowaduoumo, nou himia nana, nouri duburo gooa aibo imeheretuti. 2Wia pai‐duburo nou naibaha otua nouido o’ui, ina nouido naiba iaowa, Touna wade norowai mo ro kidia’i? Ro moni pepa auwoha moido taiwateairo, mabu nouri doihabuo roro kiauri nou oboiri. 3Ina keauri dubu nou himiaro naiba iaowa, Mo touna niaiidai mabu nouri pai‐dubu mo kowaati keaurii nouro mo nou aueudo ainotateai. Mo hopu owaatiwa mo pupuo biahai, wia mo orowaro‐diowa mo hipo auwori. 4Mo umori mo touna nododiaidai, ina nou ta’uwa mo keauri kowaati oboiri, nei himia motowa neiio mo ainaimo‐oobuai. 5Nouri pai‐dubu wiha kiwaiwai biahai oubi nouro nei naibaha itua nouido o’umoi; wia opuito dubuido nouro naiba iatodoi, Taiba nanari mo pai‐dubuido roro iwaiwai tato? 6Nouro naiba omowameai, 100 auwo wauraubu diomo ramu; ina nouro nouido naiba iaowa, Ro wiha pepa tamidai, tamiro hagohagoha wia 50 wauraubu titi taiati. 7Ina dubu ataido nou naiba iaowa, Taiba nana roro iwaiwai biahai? Nou naiba omowameaiwa, 100 auwo koimu koni ramu. Wia nouro nouido naiba iaowa, Ro wiha pepa tamidai wia 80 auwo koimu titi taiati. 8Wia nouri gamoo biahai keauri dubu, pai‐duburo wade mea nouido naibaha iaowa, mabu nouri, nouro nana nou aibo tau idodiai imini mea ramu. Wia batibati mere’i, nei himia aramio hiwiowa, nei auwo imini ramu, wia pida mere nei imini auwo nou aibo biahai. 9Ina mo rioido ainiao, Rioo mabu oubi rio himiaido naibaha taidodiaumo, moni horohoro uba na nou aibo, nou ramu. Ina nouri, nou ta’uwa rio himia moni oropoiio nei karae karae moto’i neiio rio aiwaimo‐iobuai 10Dubu nou naihehari keke nana ramu, nana godogodo ramu nou naihehari; wia dubu nou mea biahai keke nana ramu ina nana godogodo ramu nou mea biahai. 11Ina rio naiheha biahai ubauba moni nou ramu, boti duburo rioido naiheha mea nana horohoro aiwamaati rioo iaurimoi? 12Ina dubu ata nana, nou ramu, rioo naiheha biahai, botiro waimaati rio himia nana rioido? 13Dubu ata auwo‐dubu neewa nouro imotoimama raihe, mabu nouri na’u nouro oriha aiwa‐eauri wia ata nouro niainiai aiwamahebidioi; wia na’u nouro noumu naiheha aiwamidioi wia ata nouro nouido aiwa‐meibeiuuai. Iehova wia moni nana, na’u ta’u neitido imotoimama, rioo naibaha idodiaimo raihe.
14Wia Parisea oubi nei moni godo auwo niroi, ina nouri nana neiio naibaha irovidiowaumo, neiio nouido aiomobuoumo. 15Wia nou neido naiba iaowa; Riovia rio himiaido meaha naibaha orowaimowa oubi hohowa, wia Iehovaro rio imini auwo umori; mabu nouri, nana oubio riraromodiodumo nei meahari, nouri nana nei tiaha ubari Iehova hohowa. 16Bubui wia peroveta oubii naibaha emidiowaumo, Ioane ta’ui nouowa wia ta’ui noudo Iehova bububati totomu iaowa, wia nouido odoroi oubio naibaha roroho’ioutidumo. 17Toboro wia hopu oropoiiowa nou pauwo biahai, na’u keke keke wade bubudo omoawa nou pauwo auwori. 18Nouri dubu nou himia o’boa ahoioutiwa wia o’boa ata emidaiwa, nou siwokoriri; wia dubu nou kahoiouti o’boanu idabuaiwa, nou siwokoriri.
19Ina na’u dubu aiemidiotuti, nou nana horohoro iworohotuti. Kaikarawi hipura wia tamatama hipura nou iamitidiotuti, wia hiwio auwoha, meamea nana godogodo nouro naibaha ihodiotuti. 20Wia na’u nana korowarodio dubu, paina Lasaro aiemidiotuti, nouro nana horohoro dubu kodoruti biri mabuwa naibaha oroutituti, nou himia tama, uma godogodo iwarabututi. 21Wia nouri nana horohoro dubu dodooudo koromoouti dou huopii nouro iho niroi; wia kaukau naibaha o’uwaumo, nou himia uma naibaha ohomewaumo. 22Wia doo hiwio, nouri korowarodio dubui naibaha oihiaiwa wia Aberahamo bodorowa ioro, wia nana horohoro dubui naibaha oihiaiwa wia gabidi batiwa naibaha orou. 23Ina Gehenawa nou tiaha temeteme ramu wia nou idomai nouro naibaha irawodai wia Aberahamo auudo nouro naibaha eauriwa, Lasaro nou himia bodorowa atei. 24Wia nou eamo gema iridiowa naibaha iaowa, Aba Aberahamo, mo niainiai tanemahebidioro wia Lasaro tatiodoiro, nouri nou tu obowa taidoubia wia mo mototobe uuto owai; mabu nouri mo tiaha enaena wia temeteme, nouri kupowa. 25Ina Aberahamo naiba iaowa, Mo mere, tararomo ro nou ta’uwa ro kiirori, mea nana godo godo roro tau iworohotuti naiba Lasaro ubauba nana tau iworohotuti. Wia doihabuo nou koroiio tau owea wia ro tiaha temeteme owea. 26Wia ata na, auwo bobo airoua imo turinu nouowa, mabu nouri oubi nei niro o’ui imo batiudo rio batito, nave oa biahai; wia oubi nei niro o’ui ro mabudo, imo mabuito nei nave oa biahai. 27Ina nou naiba iaowa, Mabu nouri, Aba e, moro ro hobo natodoi, nou tatiodoi mo abea motoito. 28Mabu nouri mo 5 niamamiori, ina nou meaha nou neido iatomuai nei mo bati noito o’umo tore, nouri nou ubauba temeteme batiri. 29Wia Aberahamo nouido naiba iaowa, Mose wade wia peroveta oubi wade neiio airiworohodumo, nou meaha neiio neido mirovidioumo. 30Ina nou naiba iaowa, O’o Aba Aberahamo, ina dubu koihiai batiudo neido naibaha o’u, nei imini aiwaimo‐imowai. 31Wia nouro nouido naiba iaowa, Ina neiio Mose wade wia peroveta oubi wade irovidioumo tatowa neiio irovidioumo raihe ina dubu kohiaiudo aiwa‐roitorai.
موجودہ انتخاب:
Luka 16: KXW1941
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society in 1941.
