ɛMacu 26
26
Kɛ Rop Yaa Phoo ɛYɛso Ye
(ɛMar 14.1-2; ɛLuk 22.1-2; ɛYoh 11.45-53)
1Ne sɛ ɛYɛso gha kɛ taal ivol lɛdaa wo gbik, ne ɛ yaak ninɔn ne icwam ɛbhɛ na, 2“Ɛ yɛɛ ɛn idira ne Tes iDee de Tsak ko kɛ mak nituk ifaa, sɛ ne nang ɛNgɔn ɛNyi i bhɛ gangat ɛbhɛ.”
3Nten nɛdee nggyɛ wo, nindiinday nibo na nɛ ninu nikɔɔn ne igbagha na ne tuma en ne ijwee ɛKayafa ne ɛbhɛ kaa soye ɛgɔm nibo gha. 4Nibhɛ ne rop ɛnu ɛli nɛ nibhɛ yaa wum ɛYɛso yegha gying nibhɛ phoo ɛbhɛ. 5Nibhɛ ne yɔngɔ, “Sɔng njwɛɛn yaa ne wum ɛbhɛ ndɔ nituk ne idira gha nang, ɛlɔ nɛ ninyi na sɛ yung tum irywen.”
Kɛ Sit ɛYɛso yegha ne Inɔɔy Ndɔ ne iBɛtani
(ɛMar 14.3-9; ɛYoh 12.1-8)
6ɛYɛso gha kaa so ne iBɛtani, ne ijwee ɛnyi wo ne bok ɛbhɛ ɛSimɔn ne ɛ kaa so ɛkparong. 7ɛDɛ ɛkuk ka ne yɛɛs ne ikum ne kɛ ryɔng ne idɛ ikɛɛ de ne bok iphɛ ɛlibasita. iKum be kaa ne bok inɔɔy ne mpɛ bok ɛnkyinkyɔp, mpɛ ta bok ijam gbom. Ne ɛ sit ɛbhɛ nɛ da ne ito nten ne ɛ re ire de. 8Ne sɛ ninɔn ne icwam ma kɛ yaang, nibhɛ ne tes njenjek, nibhɛ bo, “Kɛ mɔn ɛli bees inɔɔy yɛda wo ɛlɛ wo? 9Sɛɛ yɔng kɛ rɛp inɔɔy yɛdaa wo ne ijam gbom i naas nihala ijam mɛ.”
10ɛYɛso gha ne seng ɛkɔn na nɛ nibhɛ tas so, ne ɛ yaak nibhɛ, “iKyee iphɛ kɛ te ɛ tak ɛn ɛkuk kɛgha wo iyɔm be? Ɛ kɛ mɔn me ɛkɔn ɛyɛnɛng. 11Ninyi nihala na so ɛbɛ wo ne nyinɛn, sɔng naa ne maa i shɛɛ ne nyinɛn no nang. 12Ɛ kɛ sit me inɔɔy da ne ibek nge de te ɛ ryɔng me ɛli ne sɛ rɛɛ me. 13Nzi tɔng nyini itin nɛ gbik ɛlɔ gha ne sɛ bhɛ sanga ne ibol iyɛnɛng ngɛ de wo ndɔ ɛzay ya, sɛ ne ma phyii ɛ tɔng ɛkɔn na ne ɛkuk kɛwo kɛ mɔn no te ne maa tas ne ɛbhɛ.”
ɛYahuza gha kɛ Rɛp ɛYɛso Ye
(ɛMar 14.10-11; ɛLuk 22.3-6)
14ɛDɛng ndɔ ninɔn ne icwam ɛnduwubɔ nɛ ninyi ifaa ɛYɛso na ne kaa bok ɛbhɛ ɛYahuza ne iSikɔrɔti ne ɛ phɛ ɛlɔ nindiinday nibo niYahodawa na, 15ɛbhɛ yaak nibhɛ, “Aa nang ɛn mɛɛn ikyee wu nggɛ nang nyini ɛYɛso yegha?” Nibhɛ ne nang ɛbhɛ ijam kyɔsɔk ne kɛ ryɔng ne ɛzurufa nzuwubɔ icwat. 16Ne lenɛ ɛlɛy, ɛYahoda gha ne yaa tɔk ikpɛk kɛ ne aa sɛ ɛ roos ɛ rɛp ɛYɛso yegha nɛ.
ɛYɛso gha kɛ Re iDira ne Tes iDee Tsak nɛ Ninɔn ne iCwam Ɛbhɛ
(ɛMar 14.12-21; ɛLuk 22.7-13,21-23; ɛYoh 13.21-30)
17Kaa ne sɛ ɛtuk ne ɛyisɛ ne iDira ne iBɛrɛdi ne Sang iYis de, ninɔn ne icwam ɛYɛso na ne yɛɛs ɛlɔ ɛbhɛ, nibhɛ phom ɛbhɛ nibhɛ yɔng, “ɛYalɔ ne ɛɛ sim njwi sɛ ɛbhɛ ryɔng ngɛ ne ire ne idira ne Tes iDee de tsak koo?”
18ɛYɛso gha ne yaak nibhɛ, “Cwi ɛn ndɔ ɛgarang nga ɛlɔ ɛdɛ ɛnyi gha te ne ɛbhɛ yaak ɛn ɛbhɛ, ɛKyɛɛ ne iCwam ma i bo te njwi yaak kɛ wu nten nɛ yek cɛcɛk, wu yaa ne re ire ne idira ne Tes iDee de tsak ko ne ijwee mo nɛ ninɔn ne icwam ɛbhɛ.” 19Ninɔn ne icwam ma ne mɔn ɛli ne ɛYɛso gha kɛ tɔng nibhɛ wo, nibhɛ ne bhɛ ryɔng ire ne idira ne Tes iDee de tsak ko.
20Ne sɛ ɛlɔ yɛ kɛ teye irwirywɛ, ɛYɛso gha ne soos ɛlɔ ne re ire gha nɛ ninɔn ne icwam ɛbhɛ na. 21Ne sɛ nibhɛ so re ire de, ɛYɛso gha ne yaak nibhɛ, “Nzi tɔng nyini itin nɛ, ɛdɛ mon yaa rɛp me.” 22Ninɔn ne icwam ma ne yɛk irway ishwii gbom, nibhɛ ne tum nibhɛ ya phomos ɛYɛso yegha nidaan-nidaan, ɛrɔngɔ ne i yɔngɔ, “ɛDaray, hang yung some ye?”
23ɛYɛso gha ne kyii nɛ ɛ yaak nibhɛ, “ɛNyi gha ne ɛ kɛ cwaak iwɔ wo ɛkyee ɛdaan ne me wo, ɛbhɛ aa rɛp me. 24ɛNgɔn ɛNyi gha yaa ku ɛli ne kɛ ku haa ibol ɛbhɛ de, gbik ne iphɛ ɛlɛy iphɛ ne so ɛkɔn ne ɛnik daa ɛnyi gha ne ɛ kɛ sim ɛ rɛp ɛngɔn ɛnyi gha! Sɛɛ ma yung yɔng kɛ ku shɛɛ tang yɛk ɛnyi yɛghaa nggyɛ wo, iphɛ sɛ ne phyin ɛbhɛ ne yɛnɛng.”
25ɛYahuza gha ne ɛ kɛ rɛp ɛYɛso yegha, ne ɛ ma yɔng, “ɛNdiinday, hang yung some na?”
ɛYɛso gha ne yaak ɛYahoda yegha, “Ɛ kɛ ku mɔng.”
ɛYɛso gha Kɛ Re iRe ɛTsim Mɛ nɛ Ninɔn ne iCwam Ɛbhɛ
(ɛMar 14.22-26; ɛLuk 22.14-20; 1iKɔr 11.23-25)
26Kɛ ne sɛ nibhɛ so ne re ire de, ɛYɛso gha ne bo ibɛrɛdi de ɛ tɔɔrek ɛTaanggbey ye irway ihwala, ne ɛ ji kpɛl, ɛ nang ninɔn ne icwam ɛbhɛ na, ɛ yɔngɔ, “Ngga ɛn ɛ re ɛn, ibek ngedee wo.”
27ɛYɛso gha ne ta bo ɛhyihyangas ne inɛn ɛnap ba, ɛ tɔɔrek ɛTaanggbey ye irway ihwala ɛ nang ninɔn ne icwam ɛbhɛ na ɛ yɔngɔ, “Sɔ ɛn gbik mon. 28Neyi nge naa wo ne kɛ lok tɛ nibhɛ yaa shwaak ìtsɛm ihywas daa ninyi na gbom. 29Nzi tɔng nyini, sɔng naa tang sɔ inɛn ɛnap ba dɔng nang, kang ne ɛtuk ka ne nzɛ sɛ sɔ mpas sɛ ne nyinɛn no ne igbɔm ɛKyɛɛ nge da.”
30Ne sɛ nibhɛ kɛ yaak ne iywel, nibhɛ ne wuru nibhɛ phɛ daa ne iGol Niphaa.
ɛYɛso gha i Bo wu ɛBiturus Yaa Re iShamas Ne
(ɛMar 14.27-31; ɛLuk 22.31-34; ɛYoh 13.36-38)
31ɛYɛso gha ne yaak ninɔn ne icwam ɛbhɛ na, “Gbik mon no aa tel ɛn ɛ tek ɛn mɛɛn daa ɛkɔn na ne aa te ne mee wo, te ne shwaak ibol de ne kɛ haa i bo,
‘Naa hale ɛhaa ne hyep ᐩigyol la
ᐩigyol lɛ teye shwaa.’
32Ɛtsim mɛ ne sɛ ne sɛ nggɛ yilitsik ndɔ ne ikpuu da, nzɛ ne bhɛ tuu iGalili de ɛyisɛ mon.”
33ɛBiturus sa ne yaak ɛYɛso yegha, “Sɛɛ kyi yɔng yaa tel gbik i tek kɛ, sɔng naa ne ma tel nang.”
34ɛYɛso gha ne yaak ɛBiturus segha, “Nzi tɔng ngɛ itin nɛ ne ɛtuk ne izenge gha, aa re ishamas ɛ yɔng wu hang i yɛɛ me ɛtat, ɛrom ne kyi tɛpeey ɛdaan.”
35ɛBiturus sa ne yaak ɛYɛso yegha, “Sɛɛ kyi yɔng yaa phoo me te igyɛ wo, sɔng naa ne mɔn ɛlɛ wo nang.” Gbik ninɔn ne icwam ma ne ma bol ɛlɛy.
ɛYɛso gha kɛ bhɛ Roo iGyɛsamani
36ɛYɛso gha ne bo ninɔn ne icwam ɛbhɛ na ɛ phɛ nɛ ɛdɛ ɛlɔ gha ne bok ɛbhɛ iGyɛsamani. Ne sɛ ɛ kɛ bhɛ tuu, ne ɛ yaak ninɔn ne icwam ɛbhɛ na, “Soos ɛn ɛbɛ te ne mbɛ gɔɔ ɛnggyɛ, te mbɛ roo.” 37ɛYɛso gha ne bo ɛBiturus se nɛ ninɔn ɛZɛbɛdi na ifaa ne ɛ kyii yaa bees irway ɛbhɛ ɛ yɛk irway ishwii. 38ɛYɛso gha ne yaak nibhɛ, “iRway ishwii da ne ifɛ some wo i mɔn te ifɛ yaa phoo me. Shɛɛ ɛn ɛbɛ ɛ shɛɛ ɛn ɛkanang nga ne mee.”
39ɛYɛso gha kɛ shompeey gyigyɔɔ, ɛ ho ne ivel, ɛyisɛ ɛbhɛ ne so ne ivel da, ne ɛ roo ɛ yɔngɔ, “ɛKyɛɛ nge, sɛɛ yɔng ˆaa sim ˆɛ sɛɛ ne ba me ɛhyihyangas nggbang ngɛdaa wo, gbik ne iphɛ ɛlɛy, sɔng nzi ne bo wu te ɛ roos idee nge nang, idee mo ne yaa roos.”
40ɛYɛso gha ne kyii ɛ yɛɛs ɛlɔ ninɔn ne icwam ɛbhɛ na, ne ɛ sɛ nibhɛ so inwa. ɛYɛso gha ne yaak ɛBiturus segha, “iKyee iphɛ kɛ te aa sang yɛɛ ne shɛɛ ɛn semey ne me wo iphɛ hɔn ɛwa ɛdaan naa? 41Shɛɛ ɛn seme, te ˆɛ roo ɛn, ˆaa yung ho ɛn itɛrɛk ga. iKabyik mon de i sim, ibek mon de phɛ ne so kyɔkyɔt.” 42ɛYɛso gha ne ta kyii, ikyii ne ifaa yɛ ɛbhɛ boote ne ɛTaanggbey ya ɛ yɔngɔ, “ɛKyɛɛ nge, wu phɛ so ngbingbing te ne roos ibol mo de.”
43ɛYɛso gha ne ta kyii ɛlɔ ninɔn ne icwam ɛbhɛ na, ne ɛ ta bhɛ sɛ nibhɛ wumus nwa da dɔng, nwa da kaa kat nibhɛ ne irwisɛ da gbom. 44ɛYɛso gha ne ta tek nibhɛ, ɛ kyii ɛbhɛ boote ne ɛTaanggbey ya ɛhaa ne itwat tɛ daa ne ibol yɛ.
45ɛYɛso gha ne kyii, ɛ yɛɛs ɛlɔ ninɔn ne icwam ma ɛ yaak nibhɛ, “Ɛ ma tɔ phɔng ɛn, ɛ wumus ɛn nwa daa? iPhɛ dee nten nɛ kɛ ne tuu ne yaa nang ɛNgɔn ɛNyi ne iwɔ ninaa ne ɛfɔt to. 46Yili ɛn tsik te njwɛɛn hyel, yaang ɛn ɛNyi gha ne ɛ kɛ rɛp me wo kɛ tuu.”
Kɛ wum ɛYɛso Yegha
(ɛMar 14.43-50; ɛLuk 22.47-53; ɛYoh 18.3-12)
47Kɛ ne sɛ ɛYɛso gha ne tɔ ndɔ ne ivol da, ɛYahuza gha ne ɛ kaa so ɛdaan ndɔ ninɔn ne icwam ɛnduwubɔ nɛ ninyi ifaa ɛYɛso gha ne i tuu ne ɛgbaang ne idira ninyi nibhɛ bok ihywa nɛ nikɔn ne itsom. Nindiinday nibo ne niYahodawa na, nɛ nindiinday ne igbagha nibhɛ bhɛ kaa tom nibhɛ. 48ɛHaa ne rɛp ɛYɛso yegha kaa ne ku mɔng nibhɛ, ɛ yɔngɔ, “ɛNyi gha ne nggɛ bhɛ kumure ɛbhɛ n kyili ɛbhɛ wo, ɛbhɛ so ɛnyi gha ne aa wum ɛn no, ne ɛ wum ɛ ɛbhɛ.” 49ɛYahoda gha ne ku phee tsik ɛ phɛ ɛlɔ ɛYɛso gha, ɛbhɛ yaak ɛbhɛ, “Te irway ne laal shɛɛ ne igyɛ ɛkyɛɛ ne iCwam ɔɔy,” ne ɛ ji kumure ɛYɛso yegha.
50ɛYɛso gha ne yaak ɛbhɛ, “ɛSaa, mɔn ɛkɔn na ne ɛ kɛ yɛɛs ne mɔn no.”
Ninyi na ne ji shii yɛɛs nibhɛ wum ɛYɛso yegha gɛgɛy nibhɛ hyel lɛ. 51ɛDaan ndɔ ninaa nɛ nibhɛ kɛ sonɛ ɛYɛso gha ne sɔnɔ ihywa ɛbhɛ ɛ tɛmɛ ɛkpuru ɛgɔm nibo niYahodawa gha ne itsoro, itsoro yɛ ho.
52ɛYɛso gha ne yaak ɛbhɛ, “Sɔɔl ihywa mo de nɛ ne ifaran nɛ, ɛnyi gha ne ɛ lɛng irywen da ne ihywa de, ihywa de ne sɛ phoo ɛbhɛ nɛ. 53Hang ɛ doo te nzɛ roo ɛKyɛɛ nge gha te ɛ phyik me wo, ɛ sɛ ne shii tom me nɛ nimalɛka na nɛ phyin iba ɛnduwubɔ nɛ nibhɛ ifaa da naa? 54Wu nggɛ ne mɔn ɛlɛ wo sɛ ne mɔn ɛlii i shwaak iBol ne iWee de ne kɛ ku haa i bo wu iphɛ so ngbingbing ɛlɛy yoo?”
55ɛYɛso gha ne boote ne idira ninyi de, ɛ yaak nibhɛ, “Ɛ kɛ bo ɛn ihywa nɛ nikɔn ne itsom, ɛ yɛɛs ne wum ɛn mɛɛn nɛ te nzo ɛhaa ɛyi naa? Nggɛ shɛɛ ɛbɛ wo nɛ nyinɛn ndɔ ne iDeng ngge cɛcɛɛy nzi mɛmɛ ninyi na nɛ, sɔng ɛ kɛ wum ɛn mɛɛn nang. 56Nikɔn nɛnaa wo kaa ne tes gbik ɛlɛ wo, te shwaasek ivol da ninabawa na kaa ku haa ndɔ ne ɛWee ne iBol ɛTaanggbey yo.” Ninɔn ne icwam ma ne tek ɛYɛso yegha nibhɛ tel.
Kɛ Phɛ ne ɛYɛso gha iTɔrɔng niYahodawa
(ɛMar 14.53-65; ɛLuk 22.54-55,63-71; ɛYoh 18.13-14,19-24)
57Ninyi na nɛ nibhɛ kaa wum ɛYɛso yegha ne phɛ ne ɛbhɛ ne ijwee ɛKayafa ne ɛbhɛ soye ɛgɔm nibo niYahodawa gha, ɛlɔ yɛnɛ ninaa ne kpɛl ɛShara gha nɛ ninu nikɔɔn ne igbagha na kaa tumɛy nɛ. 58ɛBiturus sa ne kungus ɛYɛso yegha kyakyak, ɛbhɛ hɔn ɛsaa ne ijwee ɛgɔm nibo niYahodawa na. Ne ɛbhɛ lel ndɔ ɛsaa gha ɛ soos nɛ ninaa ne hyep pa, te ɛ yaang ɛkɔn na ne aa te. 59Nindiinday nibo na gbik ne itɔrɔng ge ne tɔk ɛli nɛ nibhɛ sɛɛ rop ɛYɛso yegha ne ihyoo tɛ nibhɛ phoo ɛbhɛ. 60Sɔng nibhɛ ne sɛ ɛbhɛ ne ɛkɔn nang, gbik ne iphɛ ɛlɛy nidɛng ne yilitsik nibhɛ robhos ɛbhɛ ne ihyoo de gbom. Ɛtsim mɛ ninyi ifaa ne ji yɛɛs ɛnu ɛyisɛ, 61nibhɛ ne yɔngɔ, “Ɛnyi yɛghaa wo bo, ‘Naa yɛɛ ne tobhos iDeng ɛTaanggbey de ne nggyi ta lɔl ndɔ nituk itwat.’ ”
62ɛGɔm nibo gha ne yilitsik ne ɛ yaak ɛYɛso yegha, “Ɛ ma bok ɛkɔn ne aa kyii nɛ daa ne ibol lɛdee wo ne i bol daa ne ito mo dee?” 63ɛYɛso gha ne i shɛɛ nggbyak.
ɛGɔm nibo gha ne yaak ɛbhɛ, “Nzi bol ne igyɛ ndɔ ne irywɛɛk ɛTaanggbey, mɔng njwii, igyɛ so ɛKiriti ghaa, ne ɛ soye ɛNgɔn ɛTaanggbey yaa?”
64ɛYɛso gha ne yaak ɛbhɛ, “Ɛ kɛ mɔng ɛlɛy. Nzi ne tɔng nyini, yaa tsa izenge wo aa yaang ɛNgɔn ɛNyi gha kɛ soos ne iwɔ ne irwye ɛHaa ne iTo Gbik ka ne ɛ yaaso ndɔ ne inɔp ɛdaa ne irywa.”
65Ne sɛ ɛgɔm nibo gha kɛ phok ɛlɛ wo, ne ɛ kpɛrɛ ɛtura ɛ yɔngɔ, “ɛNyi yeghaa wo kɛ bo ito ɛbhɛ te ɛ soye ɛTaanggbey! iKyee ne njwɛɛn ji ta to tɔk ghe? Ɛ ma phok ɛn ivol ne bɛɛs ɛTaanggbey yegha! 66Ɛ bo ɛn ɛli?”
Ninyi na ne yɔngɔ, “Ɛ kɛ ben, iphɛ so nggbinggbing aa ku.”
67Nibhɛ ne tuk ɛbhɛ ne ncwincway ɛyisɛ, nibhɛ hal ɛbhɛ, nidɛng ne babha ɛbhɛ. 68Ninaa ne babha ɛbhɛ Nibhɛ ne yɔngɔ, “Mɔng njwii ɛKiriti yɔɔy, ɛhay ɛbhɛ kɛ hale yɛwoo?”
ɛBiturus sa kɛ Re iShamas ɛYɛso
(ɛMar 14.66-72; ɛLuk 22.56-62; ɛYoh 18.15-18,25-27)
69ɛBiturus sa kaa ne soos ne izay ndɔ ɛsaa ne ijwee ɛgɔm nibo gha. ɛNgɔn ɛlyilyap ne ɛ mɔn ɛtomɛ ɛnggyɛ wo ne phɛ ɛlɔ ɛbhɛ gha ɛ yaak ɛbhɛ, “Ɛ ma so ɛdaan ndɔ ninyi ɛYɛso ne iGalili gha.”
70ɛBiturus sa ne re ne ishamas ɛnu ɛyisɛ nibhɛ gbik, ɛ yɔngɔ, “Sɔng nzi yɛɛ ibol de ne ɛ bol nang.”
71ɛBiturus sa ne phɛ ne izay, ɛnu ne izuk ne i roos i lel ndɔ ne ijwee wo. ɛDɛ ɛngɔn ɛlyilyap pa ne ta yaang ɛbhɛ ne ɛ yaak ninyi na nɛ nibhɛ sonɛ ne ɛlɔ yɛwo, “ɛNyi yɛghaa wo kaa sonɛ ɛYɛso ne iNazarat ta.”
72ɛBiturus sa ne ta re ne ishamas de dɔng ɛ lɛlɛm ihywa ɛ yɔngɔ, “Sɔng nzi yɛɛ ɛnyi yɛghaa wo nang!”
73Ne sɛ kɛ phyɔngɔle ncɛt ninyi na nɛ nibhɛ kɛ kyinasek ne ɛlɔ yɛwo ne yɛɛs, nibhɛ yaak ɛbhɛ, “Ɛtsak, ɛ so ɛdaan ndɔ ninyi yɛnaa wo, njwi kɛ seng ngɛ dak ne ihywee ne ivol da ne ɛ bol.”
74ɛBiturus sa ne ta yaa bo, “Nzi tɔng nyini itin nɛ, ne ɛTaanggbey, te iroy wɛɛ me wu nzi yɛɛ ɛkɔn, sɔng nzi yɛɛ ɛnyi yɛghaa wo nang!”
ɛRom mo ne ji shii tɛpeey. 75ɛBiturus sa ne ji shii taate ne ibol de ne ɛYɛso gha kɛ mɔng ɛbhɛ, ɛ yɔngɔ, “Aa bhɛ re ishamas wu hang ɛ yɛɛ mo wo ɛtat nyɛɛn, ɛrom kyii tɛpeey.” ɛBiturus sa ne wuru ne izay ɛbhɛ san gbom.
موجودہ انتخاب:
ɛMacu 26: etxNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
