ɛMacu 24
24
ɛYɛso gha kɛ Mɔng ɛli ne sɛ Tobhos iDeng Ngge
(ɛMar 13.1-2; ɛLuk 21.5-6)
1Kɛ nɛ sɛ ɛYɛso gha kɛ wuru ne iDeng ngge ɛ hyel ɛ phɛɛs gɔɔ, ninɔn ne icwam ɛbhɛ na ne yɛɛs ɛlɔ ɛbhɛ nibhɛ yaa tɔɔsel ɛbhɛ ɛli ne kɛ ryɔng idee ne ideng ngge. 2ɛYɛso gha ne kyii nibhɛ nɛ, ɛ yɔngɔ, “Ɛ yaang ɛn idee yɛdee woo? Nzi ne tɔng nyini itin nɛ, sɔng i sɛ tek ikɛɛ iphɛ idaan daa ne ihak tang kɛ top nang.”
Nyu ne Taal ɛZay
(ɛMar 13.3-13; ɛLuk 21.7-19)
3Kɛ ne sɛ ɛYɛso gha kɛ soos daa ne iGol Niphaa de, ninɔn ne icwam ɛbhɛ na ne bhɛ sɛ ɛbhɛ gying, nibhɛ phom ɛbhɛ nibhɛ yɔngɔ, “Tɔng njwii, nggyibhii nɛ nikɔn nɛnaa wo sɛ tes soo? ɛYakɔn ɛbhɛ sɛ ne tɔɔrek nyu ne yɛɛs mo de ne izee ne taal ɛzay dee?”
4ɛYɛso gha ne kyii nɛ ɛ yaak nibhɛ, “Wɛɛ ɛn nyini iyɛnɛng, sɔng ɛ sim ɛn ɛnyi luk nyini nang. 5Ninyi na gbom sɛ yɛɛset ndɔ ne irywɛɛk nge wo, nibhɛ yɔngɔ, ‘Mee nzo me ɛKiriti gha,’ nibhɛ ne luk ninyi na gbom. 6Ɛ sɛ ne phok ɛn ngka ne itsom ne i ta cɛcɛk, ne ɛ phok ɛn ngka ne izee ne i ta kyakyak. Sɔng ne ɛ sap ɛn nang, iphɛ so ngbingbing nikɔn nɛnaa tes, itaal ɛzay da sɛ ne kyi tɔ. 7iGbagha so sɛ hal le ne gbagha, igbɔm ne hal le ne igbɔm. iYɔm sɛ ne lel nilɔ na kang-ka-kang, ivel da ne rungket nilɔ na kang-ka-kang. 8Nikɔn nɛnaa wo sɛ ne soye nggbang ne tsa yɛ.
9“Sɛ ne wumus nyini i naas ninyi nɛ ninaa ne baasek nyini nggbang, nibhɛ ne phobho nyini. iGbagha wo gbik sɛ ne mbaray nyini ɛlɔ me wo. 10Nten nɛdee nggyɛ wo itin ne ibol ninyi de gbom sɛ ne te ntsenteng, nibhɛ ne naas isap nigwaa nibhɛ, nibhɛ ne ta mbaray nigwaa nibhɛ. 11Ninabawa ne irywɛɛk sɛ ne yɛɛset gbom nibhɛ ne luk ninyi na gbom. 12iBebhe de sɛ ne hantey yɛ, iphɛ ne te ishwim ninyi da ne te ntsentseng. 13ɛNyi gha ne ɛ kɛ ne rop iku i bhɛ phyii taal, ɛbhɛ sɛ ne iphɔrɔt. 14Sɛ ne sanga iBol iYɛnɛng ne iGbɔm ɛTaanggbey da ɛzay ya gbik, tɛ igbagha ɛzay yo phok nyɛɛn, ɛzay ya ne ji kyi taal le.
ɛGbaang ne Nggbang
(ɛMar 13.14-23; ɛLuk 21.20-24)
15“Ɛ sɛ ne yaang ɛn ɛkɔn ne ishis ne ɛ yɛɛs ne iku ɛli ne ɛnɛbi ɛDanyɛl la kaa ku mɔng ngo, ɛ kɛ kyinak ndɔ ne iDeng ɛTaanggbey de ne iphɛ so kang ngo. Sɛ́ ne sɛ ɛ yaang ɛn no, te ɛhaa ne tɔng nga ne seng nge. 16Sɛ ne sɛ ˆɛ kɛ yaang ɛn no, te ninyi na nɛ nibhɛ so ndɔ ivel ne iYahudiya gha ne tel nibhɛ phɛ daa ne ne ibarang. 17ɛNyi gha ne ɛ so daa ɛco ne ijwee nang, sɔng ɛ tom wu yaa bo ɛkɔn ndɔ ne ijwee nang. 18ɛNyi gha ne so ɛhay, sɔng ɛ kyii wu yaa bhɛ bo ɛgbaang ɛtura ɛbhɛ nang. 19iPhɛ sɛ ne soye ɛkɔn ne san iyɔm daa nikuk ne iswik nɛ ninaa ne sunga ninɔn! 20Roo ɛn ɛTaanggbey te nggbiy yɛdaa nggyɛ wo sang yɛɛs nyini nten ntsentseng gbik ne ɛTuk iWɛsɛ. 21Daa ɛli ne nggbang ne nten nɛdee nggyɛ wo sɛ kat gbom, sɔng kɛ ku yaang ihywee mpɛ ne ile ne tum ɛzay de nang, sɔng sɛ ne tang ta yaang ihywee mpɛ dɔng nang. 22Sɛ́ sang yɔng ɛTaanggbey ya kɛ tɛ nituk kɛnaa nggyɛ wo, sɔng ɛnyi ne sonɛ ne ɛ saa ne shɛɛ ɛken nang. ɛTaanggbey ya kɛ ne ku tɛ nituk kɛ nibhɛ te ncɛt ɛlɔ ninyi na ne kɛ kasa wo. 23Nten nɛdee nggyɛ wo, sɛ ne sɛ ɛnyi kɛ yaak nyini, ‘Yaang ɛn! ɛKiriti yegha!’ ɛDɛng ta yaak nyini, ‘Ɛbhɛ ghaa gɔɔ ɛnggyɛ!’ Sɔng ɛ nang ɛn ne itin nɛ nang. 24Daa ɛli nɛ nikiriti ne irywɛɛk ka nɛ ninabawa ne irywɛɛk ka sɛ wuusi, nibhɛ tɔɔsel nyu ne igbaang nikɔn ne kparat tɛ nibhɛ luk ninyi na ne ɛTaanggbey ya kɛ ku kasa wo, wu nibhɛ yaa yɛɛ nɛ. 25Phok ɛn, nggɛ ne ku tɔng nyini nten nɛ tɔ.
26“Sɛ ne sɛ ɛdɛ ɛnyi gha kɛ yaak nyini, ‘ɛKiriti yɛghaa ndɔ ɛhay.’ Sɔng ne ɛ phɛ ɛn nang. Wu ɛdɛng kɛ ta yaak nyini, ‘Ɛbhɛ ghaa bɛ ndɔ ɛduk ne ijwee.’ Sɔng ɛ nang ɛn ne itin nɛ nang. 27ɛTuk ne yɛɛs ɛNgɔn ɛNyi gha so te irywa ne te derep ne ifɛ te derep ifɛ tolte ɛzay gbik, ifɛ le daa ne iwap ɛdak ifɛ bhɛ hɔn iwap ɛkɔrɔk. 28Ɛlɔ gha ne ikom ɛkɔn de sonɛ, ɛlɔ yɛ ne nggbɔluk ga yaa ne tumɛ yɛ.
iYaaso ɛNgɔn ɛNyi Da
(ɛMar 13.24-27; ɛLuk 21.25-28)
29“ɛTsim ne gbaang nggbang nituk kɛnaa nggyɛ wo,
‘iRoy de sɛ ne te gbyik,
ifɛl lo ne kɔɔng tang tɔ tol.
niYiyɔrɔ na ne les daa ne irywa nibhɛ hoghɛse
igbaang nikɔn ɛdaa ne irywa da sɛ ne sunkit.’
30“Nɛ nten nɛ ne nyu ne yɛɛs ɛNgɔn ɛNyi de ne ji wuru daa ne inɔp. iLwem ɛzay da sɛ ne sirit niyilis daa ɛli nɛ nibhɛ kɛ yaang ɛNgɔn ɛnyi gha yaaso ndɔ ne inɔp ndɔ ne igbom ne ito-ndiinday. 31Sɛ ne wuute ɛntuntuung, ne ɛ tom nimalɛka ɛbhɛ ndɔ ne ibap naas ɛzay de. Nibhɛ sɛ ne bhɛ tumɛ ninyi ɛbhɛ ne ɛ kɛ ku kasa wo ne ibap naas ɛzay de gbik. Nibhɛ sɛ ne tsa ne iwap ɛdak nibhɛ te ɛzay ya gyɔɔ gbik.
Te Mɛmɛ nɛ ne ɛPharang Nga
(ɛMar 13.28-31; ɛLuk 21.29-33)
32“Mɛmɛ ɛn ne ɛkɔn ne ɛpharang nga, i sɛ ɛ kɛ yaa tuwusiy ɛ ta i tuul ivee ifas, ne ˆɛ seng ɛn ikos yek cɛcɛk. 33Ɛlɛy ne mang, sɛ ne sɛ ˆɛ kɛ yaang ɛn nikɔn nɛnaa kɛ yaa tes so, ne ˆɛ seng ɛn wu nten yek cɛcɛk, iphɛ ma yung so ɛnu ne izuk. 34Nzi tɔng nyini itin nɛ sɔng ninyi ne izam mɛnaa so sɛ kus gbik nyɛɛn nikɔn nɛnaa wo kyi tes sang. 35iRywa ne ɛzay ya sɛ phebhe gbik, sɔng ibol nge de sɛ ne ma phee nang.
Sɔng ɛNyi Yɛɛ ɛTuk kɛ ne Nten nɛ Nang
(ɛMar 13.32-37; ɛLuk 17.26-30,34-36)
36“Sɔng ɛnyi i yɛɛ ɛtuk kɛ ne nten nɛ nang, sɔng nimalɛka ɛdaa ne irywa nang, sɔng ɛNgɔn na ma yung yɛɛ nang, ɛkyɛɛ gha zɔng ɛbhɛ yɛɛ ɛtuk kɛ. 37Te ɛli ne iphɛ kaa te nten ɛNuhu de, ɛlɛy ne iphɛ sɛ ne te, sɛ́ sɛ ɛngɔn ɛNyi gha yaaso wo. 38Ndɔ nituk ka ne inɛn ne taal ɛzay da kaa tang yɛɛs so, ninyi na kaa ne i re nibhɛ sɔ, nibhɛ ne i tuul nikuk, nibhɛ ne ma naas ninɔn nibhɛ nɛ ninyi, maa phɛɛs ne hɔn ɛtuk ka ne ɛNuhu gha kɛ lel lɛ ndɔ ne ɛgyirigyi inɛn da. 39Nibhɛ ne yɔng wu te i seng en, ɛgbaang inɛn no kɛ ku yɛɛs ɛbhɛ ne kpuusi nibhɛ. ɛLɛy ne iphɛ sɛ ne so nten ne yɛɛs ɛNgɔn ɛNyi de. 40Nten nɛdee nggyɛ wo, ninyi ifaa sɛ ne so ɛhay sɛ ne bo ɛdaan i tek ɛbhɛ ɛdɛng. 41Nikuk ifaa sɛ ne so ɛlɔ ne hɔng nkpana nibhɛ hɔng nkpana ne ikɛɛ, sɛ ne bo ɛbhɛ ɛdaan i tek ɛdɛng.
42“iPhɛ ɛlɛy, ne ɛ shɛɛ ɛn ɛkanang, daa ɛli ne sɔng ɛ yɛɛ ɛn ɛtuk kɛgha ne ɛDaray mon na sɛ yɛɛs sang. 43Seng ɛn ɛlɛ: sɛɛ yɔng ɛnyi ne ijwee gha i yɛɛ ɛtuk ka ne nten de ne ɛhaa ɛyi gha yaa yɛɛs so, ɛ sɛ ne shɛɛ semey ɛ ring ɛbhɛ ne lel ndɔ ne ijwee ɛbhɛ wo. 44iPhɛ ɛlɛy, iphɛ ne so nggbinggbing ɛ ryɔng ɛn nyini daa ɛli ne ɛNgɔn ɛNyi gha sɛ yɛɛs nten de ne hame ɛ yɛɛn ɛn.
ɛKpuru Ntin ne ɛKpuru ne Nggyuk
(ɛLuk 12.41-48)
45“ɛHay ɛbhɛ soye ɛkpuru ne itin na ne ɛhaa ne ntsɛntsɛng nga? ɛHaa ne ɛkyɛɛ ne ijwee ɛbhɛ gha sɛɛ tek ɛbhɛ ne ijwee wu te ɛ wɛɛ ɛbyin nikpuru gha, ɛ ji naas nibhɛ ire de nɛ nten nɛ woo? 46ɛKpuru yɛghaa nggyɛ wo ne so ɛwɛng ne ɛkyɛɛ ne ijwee ɛbhɛ gha kɛ bhɛ kyii ɛ sɛ ɛbhɛ ɛ mɔn ɛlɛ wo. 47Nzi tɔng nyini, ɛkyɛɛ ne ijwee ɛbhɛ gha yaa ne yɛk ɛbhɛ nɛ ɛ teye ɛhaa ne wɛɛ ɛbhɛ nikɔn ɛbhɛ na gbik. 48Wu ɛkpuru yɛghaa nggyɛ wo ne so ɛbebhe, aa ne yaak ito ɛbhɛ de, ‘Sɔng ɛkyɛɛ ne ijwee nge gha yaa wɔɔ ne bhɛ kyii nang.’ 49Ne ɛ ji yaa hal ɛbyin nitay ɛbhɛ nikpuru na, ɛ yaa sɔ ɛɛ re nɛ ninaa ne sɔ igbuut. 50Wu ɛ kɛ mɔn ɛlɛ wo, ɛkyɛɛ ne ijwee ɛbhɛ gha sɛ ne bhɛ kyii ɛtuk ka ne nten de ne hame ɛ yɛɛ. 51ɛKyɛɛ ne ijwee ɛkpuru yɛghaa nggyɛ wo sɛ ne bak ɛbhɛ nggbang gbom, ɛ cwaak ɛbhɛ ɛlɔ gha ne ku kɛ tek niluk ghe nɛ. ɛNggyɛ wo ne ɛ sɛ bhɛ san ɛ re izinɛ.
موجودہ انتخاب:
ɛMacu 24: etxNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
