ɛMacu 21
21
ɛYɛso gha kɛ Lel ne iYɛrushɛlɛm te ɛGɔm
(ɛMar 1.1-11; ɛLuk 19.28-40; ɛYoh 12.12-19)
1Kɛ ne sɛ ɛli ne ɛYɛso gha nɛ ninɔn ne icwam ɛbhɛ yek cɛcɛk ne iYɛrushɛlɛm be, nibhɛ kaa so ne iBatafaji daa ne iGol Niphaa. ɛYɛso gha ne shɛɛ nggyɛ wo ɛ tom nidɛng ninɔn ne icwam ɛbhɛ na nibhɛ ifaa, 2ɛ yaak nibhɛ, “Cwi ɛn ndɔ ɛgyigyaarang nga ne ɛ so ɛyisɛ mon na, aa ne bhɛ sɛ ɛn ɛjaakyi ne kɛ rop, ne ɛngɔn ɛbhɛ. Biri ɛn te ɛ yɛɛs ɛn mɛɛn nɛ. 3Wu ɛnyi kɛ boote ne nyinɛn, yaak ɛn ɛbhɛ, ‘ɛDaray ɛbhɛ sim, aa ne phyɔngɔle ɛbhɛ kyii nɛ.’ ”
4Kɛ mɔn ɛlɛ wo te shwaak ibol de ne ɛnɛbi gha kaa bol lo ɛ yɔngɔ,
5“Mɔng ɛn ninyi ne iSihiyɔɔna na,
‘ɛGɔm mon nɛghaa ɛ yaaso!
Ɛ so lyaak, ɛ kɛ taay daa ɛjaakyi,
daa ɛngɔn ɛjaakyi ne ɛ sonɛ.’ ”
6Ninɔn ne icwam ifaa na ne phɛ, nibhɛ bhɛ mɔn ɛli ne ɛYɛso gha kɛ mɔng nibhɛ wo. 7Nibhɛ ne yɛɛs ne ɛjaakyi gha ne ɛngɔn ɛbhɛ gha, nibhɛ ne ji bo itsura nibhɛ, nibhɛ gyura ɛjaakyi gha nɛ, ɛYɛso gha ne ji taay yɛ. 8Ninyi na gbom ne bɛɛ itsura nibhɛ ne nkiinɛ yɛ, ɛbyin nɛ bhɛ tɛm ivee nihon nibhɛ bɛɛ nkiinɛ wo. 9ɛGbaang ne idira ninyi wo nɛ nibhɛ so ɛyisɛ ɛYɛso gha gbik ninaa nɛ nibhɛ so ɛtsim ɛbhɛ gha ne tɔk izɔlɔs nibhɛ bo,
“Hosana#21.9 Hosana: Ndɔ ne iLem ne iHyiburu de, Hosana de ka so phɔt njwii! Ninyi na kaa ne mɔɔng nibhɛ bo iphɛ nibhɛ yaa dɛp ɛTaanggbey ye nɛ. ne ɛNgɔn ɛDoda gha!
ɛHaa ɛwɛng ngaa nggyɛy
ne ɛ yaaso ndɔ ne irywɛɛk ɛDaray yo.
Hosana ne ɛTaanggbey ɛdaa nyu ne irywa!”
10Ne sɛ ɛYɛso gha kɛ bhɛ lel ne iYɛrushɛlɛm be, ɛgarang ngɛ ne te buruburu, ne yaa phomos i bo, “Ji so ɛhay ya woo?”
11iDira ninyi de ne kyii nɛ, nibhɛ yɔngɔ, “ɛYɛso ghaa wo ne ɛ so ɛnɛbi ne ɛ le ne iNazarat ne iGalili.”
ɛYɛso gha Kɛ bhɛ Lel ndɔ ne iDeng
(ɛMar 11.15-19; ɛLuk 19.45-48; ɛYoh 2.13-22)
12ɛYɛso gha ne bhɛ lel ndɔ ɛsaa ne iDeng nga ne ɛ roos ninyi na nɛ nibhɛ bol iza de nɛ ndɔ yɛwo, ɛ tobhos nitɛɛbul ninaa ne sunusi ijam be gbik nɛ nilɔ ne soos ninaa ne lɛbhɛl ngwingit da. 13Ne ɛ ji yaak nibhɛ,
“Kɛ ku haa ndɔ ne ɛWee ne ibol ɛTaanggbey yo, i bo,
‘Yaa yel-le ijwee nge wo ɛlɔ ne bol ne ɛTaanggbey.’
iPhɛ dee ˆɛ kɛ ne hyere ɛn ifɛ,
ifɛ kɛ teye icwak ninaa ɛyi.”
14Ninaa niwil la, nɛ nilɔɔm ne yɛɛs ɛlɔ ɛYɛso gha ndɔ ne iDeng ngge, ne ɛ tes nibhɛ niken. 15Kɛ ne sɛ nindiinday nibo niYahodawa gha nɛ ninaa ne kpɛl ɛshara gha kɛ yaang nikɔn ne kparat ta ne ɛYɛso gha kɛ mɔn no, nibhɛ ta yaang ninɔn na nɛ nibhɛ so ndɔ ne ideng ngge, nibhɛ dɛp ne ɛgbaang ne izɔlɔs so nibhɛ bo, “Hosana ne ɛNgɔn ɛDoda,” nibhɛ ne te njenjek.
16Nibhɛ ne yaak ɛYɛso yegha, “Ɛ phok ɛkɔn na nɛ ninɔn nɛnaa wo ibol lee?”
ɛYɛso gha ne kyii nɛ ɛ yaak nibhɛ, “Ɛɛy, ɛ kɛ ku shɛɛ tang tɔng ɛn ɛWee ne iBol ɛTaanggbey ne ɛbhɛ bo,
‘Ɛ kɛ mɛmɛ ninɔn nishɛrɛng ngɛ,
nɛ ninɔn nishesheng,
tɛ nibhɛ dɛp pɛ wo naa?’ ”
17ɛYɛso gha ne tek nibhɛ, ɛ phɛ ne iBɛtani, ɛbhɛ ra nɛ.
ɛYɛso gha kɛ Nang ɛPharang ɛNu ɛBebhe
(ɛMar 11.12-14,20-24)
18Kɛ ne cwiil ne ihwɛlɛ, ɛYɛso gha kyii ɛ phɛɛs ndɔ ne ɛgarang nga, ne yaa phok ikpyak. 19Ne ɛ yaang ɛpharang cɛcɛk ne nkiinɛ ne ɛ phɛ ne ɛlɔ yɛ, sɔng ne ɛbhɛ sɛ ikpam nang, ɛbebee zɔng ne ɛ kaa bhɛ sɛ. ɛYɛso gha ne nang ɛpharang nga ɛnu ɛbebhe, ɛ yɔngɔ, “Sɔng aa tang yɛk ikpam mang ishay-ishay!” ɛPharang nga ne shii howo nɛ nten nɛ.
20Ne sɛ ninɔn ne icwam ma kɛ yaang ɛlɛ wo, nibhɛ ne wum en zii, nibhɛ yɔngɔ, “Kɛ mɔn ɛli ɛpharang nga shii howo ɛlɛ woo?”
21ɛYɛso gha ne kyii nibhɛ nɛ, ne ɛ yɔngɔ, “Nzi tɔng nyini itin nɛ, wu ɛ bok ɛn ìnang ne itin tang ɛ to ɛn irway daa ne iphɛ, ɛ sɛ ne mɔn ɛn ɛkɔn na ne ɛ phyin ɛhaa ne nggɛ mɔn ɛpharang ngɛghaa wo nɛ wo. Ɛ sɛɛ ma yung yaak ɛn ɛwarang ngɛ wo, ‘Yilitsik te ɛbhɛ ho ndɔ ɛling,’ iphɛ sɛɛ ne te ɛlɛy. 22Wu ˆɛ kɛ nang ɛn ne itin nɛ, aa ne sɛ ɛn gbik ɛkɔn na ne ɛ kɛ roo ɛn.”
iPhom daa ne iGbɔm ɛYɛso
(ɛMar 11.27-33; ɛLuk 20.1-8)
23ɛYɛso gha ne lel ndɔ ne ideng ngge, kɛ ne ɛ so ndɔ ne imɛmɛ ninyi na nɛ wo, nindiinday nibo na nɛ ninu nikɔɔn ne igbagha na ne yɛɛs ɛlɔ ɛbhɛ, nibhɛ yaak ɛbhɛ, “Ne ncwincway ɛhay ne ɛ mɔn nɛ nikɔn nɛnaa woo? ɛHay ɛbhɛ kɛ tom mɛɛ?”
24ɛYɛso gha ne kyii nibhɛ nɛ, ɛ yɔngɔ, “Naa ne ma phom nyini idɛ ibol de, yaa ne sɛ ɛ kɛ mɔng ɛn mɛɛn, ne ma n ji mɔng nyini ncwincway ɛnyi yɛda ne nzi mɔn nɛ nikɔn nɛnaa wo. 25ɛHay ɛbhɛ kaa tom ɛYohana yegha te yaak ninyi na ibatisima dee? ɛTaanggbey ye? Hang ɛten ɛsii?”
Nibhɛ ne yaa bol ndɔ nibhɛ, nibhɛ bo, “Wu njwɛɛn kɛ yɔng wu ɛTaanggbey, aa ne yaak njwɛɛn, ‘iKyee iphɛ kaa ne te ɛ shɛɛ ɛn tang nang ɛn ne itin nɛ ne ɛbhɛ woo?’ 26Wu njwɛɛn kɛ ne ta yɔngɔ, ‘Wu ɛten ɛsii,’ njwɛɛn ne bok ɛnik ninyi ɛkɔn na nɛ ninyi na yaa mɔn, daa ɛli nɛ ninyi na ku yɛɛ wu ɛYohana gha kaa soye ɛnɛbi.”
27Nibhɛ ne yaak ɛYɛso yegha, “Sɔng njwi yɛɛ nang.”
ɛYɛso gha ne ma yaak nibhɛ, “Sɔng naa ne ma mɔng nyini ncwincway ɛnyi yɛda ne nzi mɔn nɛ nikɔn nɛnaa wo nang.
iBol Ninɔn niRas iFaa
28“Ɛɛ yaang ɛn ibol lɛdee wo ɛli lɛɛ? Ɛdɛ ɛnyi gha bok ninɔn niras ifaa, ne ɛ phɛ ɛlɔ ɛkɔɔn nɛ, ɛbhɛ yaak ɛbhɛ, ‘ɛNyɛn, cwi ɛbhɛ mɔn ɛtomɛ izenge wo ndɔ ne ihwap ɛnap ba.’
29“ɛNgɔn na ne yaak ɛkyɛɛ gha, ‘Sɔng naa phɛ nang,’ ne ɛ kyi mɔɔng ɛ sunu irway ɛbhɛ ɛ phɛ ɛhay ya.
30“ɛKyɛɛ gha ne phɛ ɛlɔ ɛngɔn ne ifaa gha ɛ ta bhɛ mɔn ɛbhɛ ibol idaan nɛ. Ne ɛ yaak ɛkyɛɛ gha, ‘Naa phɛ ɛtaa yɔɔy,’ sɔng ne ɛ kyii tang phɛ nang.
31“ɛYaphɛɛ yɛ ndɔ ninɔn ifaa yɛnaa wo ɛbhɛ kɛ mɔn ɛkɔn na ne ɛkyɛɛ gha sim me?
“Nibhɛ ne yaak ɛYɛso yegha, ‘ɛKɔɔn na.’
“ɛYɛso gha ne yaak nibhɛ nzi tɔng nyini itin nɛ, ninaa ne saasel ijam ne ivel nɛ nikuk ne re shwaa na sɛ bhɛ leesel ne igbɔm ɛTaanggbey da ɛyisɛ mon. 32Daa ɛli ne ɛYohana gha kaa yɛɛs ɛ tɔɔrek nyini ɛnkiinɛ ɛcik ko, sɔng ɛ kaa ne nang ɛn ne itin nɛ ne ɛbhɛ nang. Ninaa ne saasel ijam nvel la, nɛ nikuk ne re shwaa na ne nang ne itin nɛ ne ɛbhɛ. ɛLi ne ɛ kɛ jung ta yaang ɛn ɛlɛ wo, sɔng ɛ kɛ ne kyii ɛn ɛ san ɛn ɛbɔk ɛ nang ɛn ne itin nɛ ne ɛbhɛ nang.”
iBol Ninaa ne Wɛɛ iHwap
(ɛMar 12.1-12; ɛLuk 20.9-19)
33ɛYɛso gha ne yɔngɔ, “Tenes ɛn idɛ ibol ne igɔrɔp be. ɛDɛ ɛnyi gha kaa bok ihwap ɛnap. Ɛ kaa ne gan ifɛ, ɛ tɛm ɛyek ne sɛ pharak ne ikpam ɛnap ba, ɛ ji lɔl ɛlɔ ne yaa wara i shɛɛ nɛ i ta ɛkanang ne ihwap ba. Ɛ ji nang nidɛng ninyi na ihwap ba wu tɛ nibhɛ wɛɛ ɛbhɛ nɛ, ɛ ji hyel ihywel. 34Kɛ ne sɛ nten ne bon ikpam ba kɛ tuu, ɛnyi gha ne tom nikpuru ɛbhɛ ɛlɔ ninaa ne wɛɛ ihwap ba, wu tɛ nibhɛ bhɛ say ɛbhɛ ihop ne ikpam ba.
35“Ninaa ne wɛɛ ihwap ba ne bhɛ wum nikpuru ɛnyi na, nibhɛ hal ɛdɛng, nibhɛ phoo ɛdɛng, nibhɛ ji phengɛ ɛdɛng ne ikpɛɛ. 36Ɛnyi gha ne ta tom nidɛng nikpuru ɛbhɛ na nɛ nibhɛ bhɛ phyin ninaa ɛyisɛ na, ninaa ne wɛɛ ihwap ba ne ta bhɛ mɔn nibhɛ te ninaa ɛyisɛ na dɔng. 37Ɛtsim mɛ gbik, ɛnyi gha ne ji ta tom ɛngɔn ɛbhɛ ɛlɔ nibhɛ, ɛ bo, ‘Nibhɛ yaa bhɛ yaang ɛngɔn nge gha, nibhɛ nang ɛbhɛ ne ndiinday.’
38“Kɛ ne sɛ ninaa ne wɛɛ ihwap pa kɛ yang ɛngɔn ɛbhɛ gha, nibhɛ ne boote ndɔ nibhɛ, nibhɛ yɔngɔ, ‘ɛNgɔn ɛbhɛ ghaa wo ne ɛ sɛ re isha yɛdee wo, yɛɛs ɛn te njwɛɛn phoo ɛbhɛ, te isha yɛ teye izee njwɛɛn.’ 39Nibhɛ ne wum ɛngɔn na, nibhɛ tul ɛbhɛ ndɔ ne ihwap ba nibhɛ phoo ɛbhɛ.
40“ɛLyilyɛghaa wo, yaa ne sɛ ɛnyi ne ihwap ɛnap ba kɛ yɛɛs, ikyee ne aa mɔn ninaa ne wɛɛ ihwap pɛdaa wo nɛɛ?”
41Nibhɛ ne kyii nɛ nibhɛ ne yaak ɛYɛso yegha, “iPhɛ ku so nggbinggbing ɛ phobho nibebhe ninyi yɛnaa nggyɛ wo, ɛ ji nang nihak ninyi ihwap pɛ nɛ nibhɛ sɛ yaa nang ɛbhɛ ihop ɛbhɛ nten ne bon ikpam ba.”
42ɛYɛso gha ne yaak nibhɛ, “Ɛ ku shɛɛ tang tɔng ɛn ɛkɔn na ne ɛWee ne iBol ɛTaanggbey yo bo lo naa? Ɛbhɛ bo,
‘iKɛɛ de nɛ ninaa ne lɔl ijwee na kɛ mbaray yo,
iphɛ phɛ kɛ kyii teye ɛkangashi yɛ.
ɛTaanggbey ɛbhɛ kɛ mɔn ɛlɛy,
iphɛ ne so njwɛɛn ɛkɔn ne wɛɛ zii.’
43“iPhɛ ɛlɛy, nzi ne tɔng nyini, yaa ne phɔt igbɔm ɛTaanggbey ba ne nyinɛn no, i nang ninyi na nɛ nibhɛ yaa yɛk ɛTaanggbey yegha ikpam iywɛnɛng. 44Ɛhiha ɛnyi ne ɛ kɛ ne ho dak ne ikɛɛ yɛdee wo aa ne tselem me, ɛhaa ne ikɛɛ de kɛ ne ho daa ɛbhɛ, iphɛ yaa ne nzɛngke ɛbhɛ ɛ teye mbut tɛ.”#21.44 Sɔng ɛbyin iWee ne ile da kaa bok ne ikɛn 44 de nang. 45Ne sɛ nindiinday nibo niYahodawa na, nɛ niFarisawa na kɛ phok ibol ne igɔrɔp ɛYɛso de, nibhɛ ne seng wu nibhɛ ne ɛYɛso gha i bol lɛ. 46Nibhɛ ne i tɔk ɛli nɛ nibhɛ sɛɛ wum ɛYɛso yegha, nibhɛ ne kyii phok ɛnik ne idira ninyi wo, daa ɛli nɛ ninyi na ku bo wu ɛYɛso gha soye ɛnɛbi.
موجودہ انتخاب:
ɛMacu 21: etxNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
