Lk. 21

Siianwa nisio Namulekhwa arusia

(Mk. 12.41-44)

1Yesu aloleelela baiinda ne bara biianwa biabwe mu libiikhilo lie mu Lukaangu, 2mala abona namulekhwa omutaambi naramo bisimiri bia koopa bitiiti bibili. 3Nio aloma ali, “Ng'ali ese muboolela enywe ndi, namulekhwa omutaambi yuno arusiisie sikali khukhila boosi. 4Sikila babaandi boosi barusiisie sitiiti khu nibio bali nabio, ne niye mu butaambi bwewe, arusiisie sioosi nisio abeele nasio.”

Yesu aloma ke lilionakwa lie Lukaangu

(Mat. 24.1-2; Mk. 13.1-2)

5Babeeka balala balomaloma ke Lukaangu nga lwaba lwombakhwa ne kamabaale kamamiliiu lukali ne biianwa nibio baana khu Wele. Yesu aloma ali, 6“Ng'ali ese muboolela enywe ndi, kamabaale niko mubona kano se lilikhoo lilirama khu liindi tawe. Buli libaale likhamwaatwe aasi.”

Khu khupisibwa siibi

(Mat. 24.3-14; Mk. 13.3-13)

7Nio bamureeba bali, “Omwekisia, kano kaliba liina? Ne sisiekesia sili kano kali siimbi khukholekha sili siina?”

8Yesu ababoolela ali, “Ba meso bakhamutiimia tawe; sikila bakali bakheeche mu lisina liase ne baboola bali, ‘Ese niye Kristo! Lundi siise siolile!’ Ne kakhali enywe mukhabaloondakho tawe. 9Ne nga muulila ke kamae ne chingoyaani, mukharia tawe, sikila khukhwola kano kanyoe kekholekhe ne se kali bali aba siieli siolile tawe.”

10Nio Yesu achiililila khu baboolela ali, “Bibala bilapana, bubwami bulebwaakalana, 11lilabao literema likali lie sibala, enjala elabao ne lufu buli abuundu. Bibiindu bie kamakana biliikha khukhwama mwikulu. 12Ne bino bioosi ne bikhekholekha tawe, balimuaamba enywe ne khumupia sibi bamuyile mu chisinakooki ne mu siboe. Ne mulireerwa ebweeni we babaami ne baruki sikila lisina liase. 13Sino siliba siise sienywe sie khurusia buloli bwenywe. 14#Lk. 12.11-12 Mukhembeelela mu mebaasio kenywe niko mucha khuloma tawe, 15sikila ndimuelesia kamakhuwa ne limanya nilio basiku benywe bakhanyala khumanya namwe bakambuusiamo tawe. 16Basaasi benywe, bawandaayenywe, balebe ne basaale bakhachaame balala mwinywe mala mwirwe. 17Bakali balimubiila sikila lisina liase. 18Ne kakhaba kario, akhaba lichuune lilala lie khumurwe se likharusibwekho tawe. 19Mulionia bulamu bwenywe khulwe khukhwikhaliilikha.

Yesu aloma ke lilionakwa lia Yerusalemu

(Mat. 24.15-21; Mk. 13.14-19)

20“Nga mukhabone Yerusalemu ne lubotookhelelwe ne banamae, abwenao mu khamanye muli khukhwonakwa khwalwo khwolile. 21Nio abo bali mu Buyuda khukhwola belukhile mu bikulu, ne abo bali mu lukoba khukhwola baruremo, ne abo bali enje bakhakobolamo tawe. 22#Hos. 9.7 Sikila echo chikhabe chindaalo che siiukuumo, khukhwola koosi kakaandikwa kekholekhe. 23Buliba bubi bukali khu bakhasi be chinda nende baliba ne banuunia! Sikila sibi sikali siliba khu sibala ne siiukuumo sia Wele khu baandu bano. 24Balala bakhebwaakalwe beerwe, ne babaandi baliiyilwa mu mbaambe mu bibala bioosi, nende Be Chikholo baliswalakilila Yerusalemu khukhwola nga biise biabwe ne biliwa.

Liliicha lio Mwana wo Mundu

(Mat. 24.29-31; Mk. 13.24-27)

25 # Isa. 13.10; Esek. 32.7; Yoe. 2.31; Lif. 6.12-13 “Bibiindu bie kamakana bikhekhole khu nyanga, khu mwesi ne khu ng'enieesi. Ne khu sibala khulibakho siibi sie bibala mu khwiembeelela khulwe khuoloola khwe nyanja ne bibuli bisiuukha. 26Babaandu baliiochaocha sikila buuri nga baliba ne baliindiilile siliba ne silikho sicha khukholekha khu sibala, sikila bunyali bwe mu ngaaki bulisiisiikhwa. 27#Dan. 7.13; Lif. 1.7 Bakhabone Omwana wo Mundu ne echela mwileesi ne bunyali ne luyali lukali. 28Khwako nga bibiindu bino birakikha khukhwikholekha musute chimoni chenywe, sikila buonia bwenywe buliba buli siimbi.”

Kamekisio khuloondekhana ne kumutuli

(Mat. 24.32-35; Mk. 13.28-31)

29Nio Yesu ababoolela lukano luno ali, “Lolela khu mutuli ne kimirongooro kikiindi kioosi. 30Ne nga mubona ne kusisiine kamasaafu kamatoro mumanya muli aba chindaalo che siimiyu chili siimbi. 31Khwako, ne mubona bibiindu bino ne bikholekha, mumanye muli Bubwami bwa Wele buli siimbi.

32“Ng'ali muboolela enywe ndi eselukho yino se labira, bibiindu bino ne bikhekholekha tawe. 33Likulu ne liloba biliwao, ne Elomo yase se eliwao tawe.”

Bukhala bwe khuuba Meeso

34“Ba meeso! Mukhalekha kimiooyo kienywe kiaba khu naikara engali ne bumeesi ne liliembeelela lie bulamu likali mala Endaalo eyo emunyoolelesie emuambe 35nga kumureko tawe. Sikila kaliicha khu baandu boosi bamenyile buli abuundu khu sibala. 36Ba meso mala muchiililile khusaba buli siise, nio mube ne kamaani ke khuona mu biindu bikhekholekhe, mala mwime ebweeni wo Mwana wo Mundu.”

37Buli ndaalo Yesu ekisiaanga mu Lukaangu, ne siilo achichanga enje we lukoba khukona khu sikulu silaangwa Miseituni. 38Ne buli kumutikhinyi babaandu boosi beechanga niio ali mu Lukaangu khumurekeeresia.

موجودہ انتخاب:

Lk. 21: LUBUKUSU

سرخی

شئیر

کاپی