Yn. 1

Elomo eekhola aaba Omundu

1Mu khurakikha, Elomo aabao, mala Elomo aaba ne Wele, lundi Elomo aaba Wele. 2Khukhwama mu khurakikha, Elomo aaba ne Wele. 3Wele abuumba bibiindu bioosi khubirira mu niye, se siliio sisiindu na silala mu bibuumbe bioosi sisiakholwa niye ne akhaliio tawe. 4Elomo aaba sinoko sie bulamu ne bulamu buno bwareera buwaanga mu baandu. 5Buwaanga bukhosianga mu siilima ne sisiilima se siabuminyile tawe.

6 # Mat. 3.1; Mk. 1.4; Lk. 3.1-2 Wele aruma omurumwa wewe Yoana, 7owecha khuboolela babaandu ke buwaanga, nio boosi baulile burume mala basuubile. 8Niye omwene se aba buwaanga tawe; echa khuboola ke buwaanga. 9Buno bwaba buwaanga bwa ng'ali, buwaanga bubwiicha mu sibala ne khukhosia khu buli mundu.

10Elomo aaba mu sibala ne akhaba Wele ne abuumba sibala khubirira mu niye, sibala se siamumanya tawe. 11Eecha mu sibala siewe sisiene ne kakhali babaandu bewe se bamwakaanila tawe. 12Kakhaba kario balala bamwakaanila mala basuubila mu niye nio abaelesia bunyali bwe khuba babaana ba Wele. 13Se baba ba Wele mu ngila eya busiele, eye khusaalwa nga babaana bo mundu tawe; Wele omwene niye owaba Raarawabwe.

14Elomo oyo eekhola aaba Omundu mala eechula kumwalaalo ne bung'ali, aamenya mwifwe. Khwabona luyali lwewe, luyali nilwo anyoola nga Omwana Omuteelwa owa Paapa.

15Niye Yoana aalomalomakho ali, “Yuno niye naloma ndi, ‘Alikho eecha enyuma wase, ne kakhali ali omukali khu khukhila ese sikila aabao ese ne khasaalwa tawe.’ ”

16Akhubiitanga efwe fweesi chikhabi chingali khukhwama mu bwichufu bwe kumwalaalo kwewe. 17Wele aana Lilaka khubirira khu Musa ne kakhali kumwalaalo ne bung'ali biechela mu Yesu Kristo. 18Se aliio Omundu owabonakho Wele tawe, ne akhali Omwana ooli Wele, lundi ooli ne Paapa, omwene oyo niye oomanyisia Wele khwifwe.

Burume bwa Yoana Omubatiisi

(Mat. 3.1-12; Mk. 1.1-8; Lk. 3.1-18)

19Bayaudi be bunyali mu Yerusalemu baruma basaayi balala ne Balawi khu Yoana bamureebe bali, “Ewe niwe naanu?” 20Yoana se aloba khu bakobosia tawe, ne kakhali alomaloma busa abuwaanga ali, “Ese se ndi Kristo tawe.” 21#Likh. 18.15,18; Mal. 4.5 Bamureeba bali, “Nono ewe niwe naanu? Ewe oli Elicha?” Yoana abakobosia ali, “Se ndi niye tawe.” Bamureeba bali, “Ewe niwe omung'oosi chana?” Abakobosia ali, “Tawe.” 22Bamuboolela bali, “Nono khuboolele, Khwenyekha khukobosele bakhurumire likhuwa. Ewe wamwene welanga oli naanu?” 23#Isa. 40.3 Yoana aabakobosia mu khurumikhira kamakhuwa niko omung'oosi Isaya aaloma:

“Ese ndi kumumilo kwo mundu oboola ne ali mu sichiimi ali,

‘Kololosia engila Omwami abirirekho.’ ”

24Barumwa barumirwe ne Bafarisayo, 25bareeba Yoana bali, “Waaba ne okhali Kristo, namwe Elicha namwe omung'oosi tawe, siina sikila ne obatiisia?” 26Yoana aabakobosia ali, “Ese mbatiisia ne kameechi, ne kakhali omundu mulala aamwimilemo niye enywe mukhamanyile tawe. 27Alikho echa enyuma wase, ne ese se nolaana aakhaba khukangulula biraaro biewe tawe.” 28Kano koosi kakholekha mu Betania, ebukwe we luluuchi lwa Yoritani, niio Yoana aabatiisilianga.

Limeeme lia Wele

29Endaalo eloondakho Yoana abona Yesu ne echa niio ali. Aloma ali, “Lola Limeeme lia Wele lirusiao bubwoni bwe sibala! 30Yuno niye nalomalomengekho nga naboolile ndi, Omundu alikho echa enyuma wase, mala ali omukali khukhukhila ese, sikila abao ese ne khasaalwa tawe. 31Ese samwene se namumanya tawe, ne kakhali necha ne mbatiisia ne kameechi nio mumanyisie niye khu baandu ba Isiraeli.”

32Ne Yoana arusia buloli bwewe ali: “Nabona Roho ne eekha nga liuusi khukhwama mwikulu mala aamubaakho. 33Naba siili khumanya ndi niye tawe, ne kakhali Wele, owanduma khubatiisia ne kameechi aba aambooleele ali, ‘Olabona Roho ne eekha khu mundu; Omundu oyo niye oobatiisia ne Roho Omutakatifu.’ ” 34Yoana aloma ali, “Namuboone niye, lundi ndusia buloli ndi ali Omwana owa Wele.”

Babeeka ba Yesu be khunyoa

35Endaalo eloondakho Yoana aba emile ao lundi ne babeeka bewe babili, 36nga abona Yesu ne alikho aabira aaloma ali, “Lola, elio lili Limeeme lia Wele!”

37Babeeka babili chana baaulila ne aloma kano mala baloonda khu Yesu. 38Yesu ekhebukha ababona ne bamuloondilekho, mala abareeba ali, “Mulikho muyiima siina?”

Bamukobosia bali, “Rabii, omenyile waena?” (Likhuwa Rabii liboola lili, “Omwekisia.”)

39Abakobosia ali, “Yiicha mubone.” (Chaba embi chisa ekhumi che ekolooba.) Nio bacha naye babona niio amenya mala bekhala naye endaalo eyo yoosi. 40Mulala khwaabo aba Andereya wandaaye owa Simoni Petero. 41Ao ne nao anyoola wandaaye Simoni mala amuboolela ali, “Khwanyoolile Masiiya.” (Masiiya liboola, “Kristo.”) 42Mala ayila Simoni khu Yesu.

Yesu alola Simoni mala aloma ali, “Lisina liowo lili Simoni okhwa Yoana, ne kakhali okhalangwe Kefa.” (Lisina Kefa nilio Petero sifuno sialio “Lulwanda.”)

Yesu alaanga Filipo ne Natanieli

43Endaalo eloondakho Yesu arura khucha Kalilaya. Anyoola Filipo mala amuboolela ali, “Nondekho!” 44Filipo aba ama mu Betesaita, mu lukoba nimwo Andereya ne Petero bamenya. 45Filipo anyoola Natanieli mala amuboolela ali, “Khwanyoolile oyo niye Musa aandikakho mu sitabu sie Lilaka, bang'oosi bosi baandika khu makhuwa kewe. Ali Yesu okhwa Yosefu, khukhwama e Nasareti.”

46Natanieli naye areeba ali, “Silayi siosi siosi sinyala siama Nasareti ku?” Filipo akobosia ali, “Yiicha mala obone.”

47Nga Yesu ne abona Natanieli namwichakho aboolela Natanieli ali, “Lola Omuisiraeli wa ng'ali okhalimo bubacha tawe!” 48Natanieli amureeba ali, “Umanyile oriena?” Yesu akobosia ali, “Khubone nga obeele ne wikhaale aasi we kumutuli Filipo nakhakhulaanga tawe.”

49Natanieli amukobosia ali, “Omwekisia, ewe oli Omwana owa Wele! Ewe oli Omwami owa Isiraeli!”

50Yesu amukobosia ali, “Ewe osuubila sikila namakhuloma ndi khubone ne wikhaale aasi we kumutuli? Olabona bibiindu bikali biboofu khukhila lino!” 51#Lir. 28.12 Mala ababoolela ali, Ndikho muboolela bung'ali mulabona likulu liekuukhe mala Malaika ba Wele baniina ne beekha khu Mwana wo Mundu.

موجودہ انتخاب:

Yn. 1: LUBUKUSU

سرخی

شئیر

کاپی