JUAN 5

Mana cuyuri tucuj runata Betesdapi alliyachishcami

1Chashna rurashca q'uipami Jesusca Jerusalenpi Taita Diosta adorangapaj judiocuna tandanacushcaman rirca.

2Jerusalenpica, Ovejacunata yaicuchina pungu c'uchupimi, shuj cucha tiyan. Chai cuchaca, hebreo rimaipica, Betesda shutimi. Chai cucha c'uchupica pichca corredorcunami tiyan. 3Chai corredorcunapica achca ungushcacunami mana ricujcuna, cojocuna, mana cuyurijcunapish yacu cuyurijta shuyacurcacuna. 4Shuj angelmi yacuta cuyuchinaman huaquin huaquinllapi uriyamuj carca. Yacuta cuyuchijpi maijanpish cuchaman punta huashicujmi, ima ungüimantapish alliyaj carca. 5Chaipica, shuj runami quimsa chunga pusaj huatacunata ungushca carca. 6Jesusca pai siricujta ricushpami, achca huatacunata ungushca cashcata yachashcamanta:

–¿Alliyasha ninguichu?– nijpi,

7ungushca runaca:

–Amito, yacu cuyurijpi ñucata yacuman uriyachijca pi mana tiyanchu. Ñuca yaicusha ningacamaca, shujtajrajmari mishashpa yaicunlla– nirca.

8Chaimi Jesusca:

–Jatari, can mantashpa siricushcata apashpa ri– nirca.

9Chashna ninca, chai runa alliyashpaca, pai mantashpa siricushcata apashpa rircallami. Chai punllaca samana punllami carca.

10Aparishpa ricujpimi judiocunaca chai alliyashca runataca:

–Samana punllamari, mandashcapi nishca shinaca can siricushcataca mana aparishpa rina punllachu– nircacuna.

11Chaimi chai runaca:

–Ñucata alliyachijmari: “Can mantashpa siricushcata aparishpa rilla” nirca– nishpa huillajpica:

12–“Can mantashpa siricushcata aparishpa rilla” nijca ¿pitagari?– nishpami tapurcacuna.

13Alliyachishca runaca achcacuna chaipi cashcamanta, Jesuspish chaimanta ña llujshishpa rishcamanta, paita alliyachijca pi cashcata mana yachashpa judiocunamanca imata mana ni tucurcachu. 14Chai q'uipami Jesusca, chai runataca Taita Diospaj huasipi tupashpa:

–Riqui, cunanca ñamari alli cangui. Cutinca millaita ama rurangui. Ñataj caita yalli ashtahuan jatun llaqui tucunguiman– nirca.

15Chaimi chai runaca, ñucata alliyachijca Jesusmari cashca nishpa judiocunaman huillagrirca. 16Samana punllapi alliyachishca cashcamantami judiocunaca, p'iñarishpa Jesustaca ima shinapish huañuchinata yuyacurcacuna. 17Chaimi Jesusca:

–Ñuca Yayaca, trabajanataca mana saquinchu. Ñucapish trabajanataca mana saquinichu– nirca.

18Samana punllapi ungushcata alliyachishpa mana cazushcallamantaca mana carcachu. Taita Dios shina tucushpa Taita Diostapish ñuca quiquin Yayami nishcamantami judiocunaca ima shinapish huañuchinata yuyarcacuna.

Taita Diosca Jesuspaj maquipi tucui mandanata churashcami

19Shina nishcamanta cutichishpami Jesusca paicunataca:

–Churi cashpapish pai quiquin yuyaillamantaca imata mana rurai tucunchu. Ashtahuanpish Yaya imallata rurajta ricushpami, Yaya rurashca shinallataj Churipish ruran. Chaica chashnatajmi. 20Yayaca paipaj Churitaca c'uyanmi. Chaimantami Churimanca tucui imallata pai ruracushcataca ricuchin. Chaimanta cunan ruracushcacunamanta yallitapishmi rurachishpa cancunamanca ricuchinga. Chaita ricushpaca cancunaca mancharinguichijmi. 21Ima shinami Yayaca, huañushcacunataca causaita cushpa causachin, chashnallatajmi Churipish pai cusha nishcacunaman causaita cun. 22Cai pachapi causajcunataca Yayaca pita paicuna imalla rurashcacunataca mana ricunchingachu. Imalla rurashcacunata ricuchichunca paipaj Churimanmi tucuita curca. 23Tucuicuna Yayata jatunyachij shinallataj, paipaj Churita jatunyachichunmi paiman curca. Pipish paipaj Churita mana jatunyachijca, paita cachaj Yayatami mana jatunyachin.

24Pipish ñuca shimita uyashpa, ñucata cachaj Yayata crijca huiñai causaitami charin. Huañushca cashpapish huiñai causaiman ch'imbashca cashcamanta jatun llaquimanca manataj ringachu. Chaica chashnatajmi. 25Taita Diospaj Churi rimashcata huañushcacuna uyana chayamunmi. Chaica cunanmari. Paita uyajcunaca causangacunami. Chaica chashnatajmi. 26Yayaca paillapitajmi causaita charin. Shinallatajmi Churimanpish, paillapitaj causaita charichun curca. 27Runa Aichayuj cajpimi, tucuicuna imalla rurashcata ricuchinatapish paiman curca. 28Chashna nishcamanta ama mancharichijchu. Tucui pambashcacuna Runa Aichayuj rimashcata uyana chayamucunmi. 29Chaipica allita rurajcunaca, huiñaita causangapajmi causaringacuna. Ashtahuanpish mana allita rurajcunaca, jatun llaquiman ringapajmi causaringacuna.

Jesús pi cashcata picunalla huillashcami

30Ñucaca ñuca yuyaillamantaca imata mana rurai tucunichu. Alli cashcata, mana alli cashcata ima shina ricuchinataca ñuca Yaya ricuchichun mandashca shinami ricuchini. Chaimanta alli cashcata mana alli cashcata ñuca ricuchishcaca mana pandachu. Ñuca munaita ruranataca mana mashcanichu. Ashtahuanpish ñucata cachaj Yayapaj munaitami rurani. 31Ñucallamantataj huillarijpica, ñuca huillarishcaca yangallami canman. 32Shujtajmi ñucamantaca huillacun. Pai ñucamanta huillashcaca mana llullachu. 33Cancunaca ñuca pi cashcata tapuchunca Juanpajmanmi cacharcanguichij. Paica mana llullashpami ñucamantaca huillarca. 34Shujtajcuna ñuca pi cashcata huillachunca mana ninichu. Cancuna quishpirichunllami, Juan ñucamanta huillashcataca yuyachini. 35Juanca nina sindi shinami achijyachirca. Cancunaca paipaj luzpimi ashacama cushicurcanguichij. 36Ñuca Yaya rurai nishcatami ñucaca ruracuni. Chaita ñuca rurashcacunallatajmi Juan huillashcatapish yalli ñucataca ñuca Yaya cachashca cashcata ricuchicun. 37Ñucata cachaj Yayapish ñucamantaca huillarcami. Pai rimashcataca manataj uyashcanguichijchu. Pai ima shina cajtapish manataj ricushcanguichijchu. 38Ñuca Yaya ñucata cachashcata mana crishcamantami, paipaj Shimicunapish cancunapaj shungupica mana saquirin. 39Quillcachishcacunata yachashpami huiñai causaita charishun yuyanguichijmi. Chai Quillcallatataj callarishpa alli ricuichij. Chai Quillcachishcacunaca ñucamantamari huillacun. 40Chashna cajpipish huiñai causaita charingapajca, manamari ñucapajman shamushun ninguichijchu.

41Runacunalla alli nichunca mana munanichu. 42Cancunataca allimi rijsini. Taita Diospaj c'uyaitaca mana charinguichijchu. 43Ñucaca ñuca Yaya cachajpimi shamurcani, mana chasquishun ninguichijchu. Maijanpish manapish cachajpi shamujtarajmi chasquinguichijlla. 44Caishuj chaishuj alli nishca canallatami cancunaca munanguichij. Shujlla Taita Dios alli nishca canataca mana munanguichijchu. Chashna yuyashpaca ¿ima shinataj ñucataca cri tucunguichigari? 45Ñuca Yayapaj ñaupajpi cancunata ñuca juchachishpa huillana cashcataca ama yuyaichijchu. Shujtajmari juchachij tiyan. Cancuna shunguta churashca Moisesmari juchachicun. 46Moisesca ñucamantami quillcarca. Pai quillcashcata crishpaca, ñucatami cringuichijman. 47Pai quillcashcacunata mana crishpaca ¿ima shinataj ñuca huillashcataca cringuichigari?– nircami.

موجودہ انتخاب:

JUAN 5: QCHI04

سرخی

شئیر

کاپی