JUAN 3

Jesushuan Nicodemo parlagrishcami

1Judiocunata mandajcunapuramanta Nicodemo shuti shuj runami tiyarca. Paica fariseomi carca. 2Paimi Jesuspajman tuta shamushpaca:

–Rabí, canca ñucanchijta yachachichun Taita Dios cachajpi shamushcatami yachanchij. Taita Dios mana paihuan cajpica, pi cashpapish can rurashpa ricuchishca shinataca, mana rurai tucunchu– nirca.

3Chaimi Jesusca:

–Pipish mana cutin huacharijca, Taita Dios mandacujpica mana ricungacunachu. Chashnatajmi canga– nircami.

4Chaimi Nicodemoca:

–¿Ima shinataj yuyaj runaca, cutin huacharingari? Cutin huacharingapajca ¿ima shinataj mamapaj huijsamanca yaicungari?– nirca.

5Chaimi Jesusca:

–Pipish yacuhuan, Taita Diospaj Espirituhuan mana huacharijca, Taita Dios mandacujpica mana yaicui tucungachu. Chashnatajmi canga. 6Aichayujmanta huacharijca, aichayujmi. Pipish Espiritumanta huacharijca, espiritumi. 7“Cutin huacharinami cangui” nishcamantaca, ama mancharichu. 8Huairaca, maimantapish p'ucunllami. Huajiajta uyashpapish maimanta shamucujta, maiman ricujta mana yachanguichu. Espiritumanta maijanpish huacharijca chai shinallatajmi– nircami.

9Nicodemoca:

–¿Ima shinataj chashnaca canga?– nijpimi,

10Jesusca cashna nirca:

–Canca, israelcunata yachachij cashca jahuachu ¿caitaca mana yachangui? 11Ñucanchijca imata yachashcataca chaitatajmi huillanchij. Imata ricushcatapish chaitatajmi parlanchij. Chashna cajpipish ñucanchij huillashcataca, mana chasquinguichijchu. Chashnatajmi canguichij. 12Cai pachapi tiyajcunamanta huillajpipish, mana cringuichu. Jahua pachapi tiyajcunamanta huillajpicarin ¿ima shinataj cringuiyari? 13Jahua pachamanca pi mana huichiyarcachu. Ashtahuanpish Runa Aichayujmi jahua pachapi cashpa uriyamurca. 14Ima shinami shitashca pambapi Moisesca culebratajllata rurashpa caspipi jahuaman huarcurca. Chai shinallatajmi Runa Aichayujpish caspipi huarcushcataj cana can. 15Pipish paita crijca ama chingarishpa, ashtahuanpish huiñai causaita charichunmi chashnaca tucunga.

Cai pachapi causajcunata Taita Dios c'uyashcami

16Taita Diosca, cai pachapi causajcunataca yallitaj c'uyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca. 17Taita Diosca paipaj Churitaca, cai pachapi causajcunata jatun llaquiman cachachunca mana cacharcachu. Ashtahuanpish cai pachapi causajcunaca, paillamanta quishpirichunmi cacharca. 18Taita Diospaj Churita crijtaca, jatun llaquiman rina nishcaca mana cangachu. Ashtahuanpish paipaj shujlla Churita mana crijtami jatun llaquiman rinatajmi can nishca. 19Luzca cai pachamanmi shamurca. Cai pachapi causajcunaca paicunapaj rurashcacuna millai cashcamantami luztaca p'iñashpa amsata munarcacuna. Chashnami jatun llaquiman rina cashcata ricuchircacuna. 20Millaita rurajcunaca, tucuicunami luztaca p'iñancuna. Paicuna rurashcacuna ama ricurichunmi luzmanca mana c'uchuyashun nincuna. 21Ashtahuanpish mana llullapi causacujcunaca paicuna rurashcacuna Taita Dios munashcata ruracushca tucuicunapaj ñaupajpi alli ricurichun luzman c'uchuyanllacunami– nircami.

Jesusca bautizaj Juanpaj alli amigomi

22Chai q'uipami Jesusca, paipaj yachacujcunandij Judea llajtaman shamurca. Paicunahuan chaipi cashpami bautizarca. 23Juanpish, Salim pueblo c'uchupi caj Enonpimi, achca yacucuna tiyashcamanta bautizachun paipajman shamujpica bautizarca. 24Chaicamaca, manaraj Juantaca carcelashcachu carca.

25Chaipimi Juanpaj yachacujcunahuan, maijan judiocunahuan Taita Diospaj ñaupajpi alli ricuringapaj maillarinamanta rimanacui callarishca carca. 26Paicuna Juanpajman shamushpaca:

–Rabí, canhuan Jordán yacu ch'imbanijpi cajta, ñucanchijman can huillacushca runapish bautizacunmari. Tucuicunami paipajman ricuncuna– nircacunami.

27Chaimi Juanca cashna nirca:

–Jahua pachamanta mana cushca cajpica, runaca imata mana chasqui tucunchu. 28“Ñucaca mana Cristochu cani. Paita ñaupashpa richun cachashcallami cani” nishpa ñuca huillashcataca cancunallataj yachanguichijmi. 29Cazamento bodapi amigoca noviohuan cashpa novio rimajta uyashpaca achcatami cushicun. Noviaca noviopajmari, mana amigopajchu. Chashnallatajmi ñucaca noviopaj amigo shina cashpa, chashna nijta uyashpaca achcata cushicuni. 30Jesusca ashtahuan alli nishca tucushpa catinatajmi. Ñucaca yangalla tucunami cani– nircami.

Jahua pachamanta shamujca Taita Dios ima shina cashcatami huillan

31Jahua pachamanta shamujmi, tucuita rurai tucuj. Cai pachamanta cajca, cai pachapajllami. Chaimantami cai pachapi tiyajcunallata riman. Jahua pachamanta shamujmi, tucuita rurai tucuj. 32Paica imata ricushcata, uyashcatami huillan. Ashtahuanpish pai ricushcata huillajpipish, pi mana chasquinchu. 33Maijanpish pai ricushcata huillajpi chasquijca, Taita Diosca mana llulla cashcatami ricuchin. 34Chaimanta paica Taita Dios cachashca cashcamantami, Taita Diospaj Shimimanta riman. Taita Diosca paipaj Espiritutaca, mana medishpalla cunchu. 35Yayaca Churita c'uyashpami, tucui imatapish paipaj maquipi churarca.

36Maijanpish Churita crijca, huiñai causaitami charin. Ashtahuanpish Churita mana crijca, huiñai causaitaca mana charinchu. Taita Diosca paitaca p'iñacunllami.

موجودہ انتخاب:

JUAN 3: QCHI04

سرخی

شئیر

کاپی