Markus 3

Ro Mbai Na Me Reufi Kingkouboke

(Mat. 12:9-14; Luk. 6:6-11)

1Kapernaum yone nekewate hee yae Sabat ya mbai Allahre ei mom-mom imaere Yesus eweufike. Hokoumeke nolone ro mbai na me reufi kingkouboke nangkele meweufike. 2Ro miyae hiwa Yesusre kemere nenainyebonderene Nare ijoko raisike erewainye Sabat ya ndi rore onomi yei bele era. 3Yesus yae nda rore weunge, “Nda ro miyae bene meisebeinyu!”

4Nebeinya yore Yesus hineumi, “Musale walora wali heere foloukoke a huluinye rahebe Sabat ya mokomale? Beko yae foi yae? Hole yae molomamile, hoi-soi yae homale?” Nebei yo a ban faeu ban mo nekewate.

5Na yun elae katene Yesus kena bekore yeuboke. Na kena ikele yae a hire a hire ereukoke wa nda rore weunge, “Wa me neinye!” Na mena nekeunge bele na hibi onomi rouke. 6Farisi holona Allahre ei mom-mom imaera aibaleke, ekate Yesusre honaibonde naei ane Ondofolo Herodesle holona yo bele ekayelewate.

Ro Miyae Helen Buhaeinye Hokowole

7-8Kapernaum yora Yesus na moisa orowate yo bele Galilea bukobare ewate. Yesus rambun emere-emere mokowole borowatene ro miyae helen bolen hakainyekoke. Galilea kanira, Yudea kanira, Yerusalem yora, Idumea kanira, Yordan wi enaa reufira, Tirus yo bele Sidon yo bele yo honatera hokoumeke. 9Ro miyae helen hokoumeke uwa yae ainyainyekonde belene, Yesus yae na moisa orowate yore ukeumi kaikai mbai mokonainyehande are huwemmilere. 10Yesus yae ro miyae helen onomi iwoumine, erana buloona yo Yesusle uwa bokore eikinye meikinye Naei uware me ferere ramenainyehindere relewainye. 11Ro uwa miyae uwana walobo Yesusre ereungene na bene meutuwele kali yae kaenele, “Weyae Allahle kelu!” 12Nebeibe Yesus nda walobo yoni-yonire oku yae rorowoumi, Nauwa naei are eyakai yae uwoumi.

Yesus Abu Ako Me Bee Oro Nen Bee Bele Eleukoke

(Mat. 10:1-4; Luk. 6:12-16)

13Yesus elune ike yae kenare kowoumi yore mo kaeneumikoke mekate. 14Yesus yae ro me bee oro nen bee bele eleukoke, abu ako yae roumiboke weumi, “Reyae mangkele oromalere nane merau ufembe Raei ako faeukobe huwembere mare elembokamale. 15Walobore hukemmile naei elae arembombe.” 16Ro me bee oro nen bee bele eleukoke na ro nda niyae: Simon (Yesus Petrus yae roungeboke kiyae), 17Zebedeusle kelu wa Yakobus nauwake Yohanes (nda ro bee Yesus Boanerges yae roumikoke, na mekai kule kelu wa), 18Andreas, Filipus, Bartolomeus, Matius, Tomas, Alfeusle fa Yakobus, Tadeus, Simon Zelot holona fa, 19Yudas Iskariot, Yesusre kelaise mokouboke kiyae.

Yesusle Beelzebulle

(Mat. 12:22-32; Luk. 11:14-23; 12:10)

20Yesus naei elura bukaiboke imaere mekate, ro miyae helen hokoumekene eramande anenaikondere kabewainyele hele. 21Yesus na aka baeke wa Yesusle a boraikokene mekate yaungainyehondere, rabuhine ban ro miyae naeisa borokate Yesus na u bene beko yeuboke.

22Yerusalem yora mekate Musale walora wali heere foloukoke are isaeyaeiboke kelaeimi holona yo yae elate, “Beelzebul (walobo yun) Yesusre helaukeunge. Nebei walobo yun mae walobo hiware hukeumi.”

23Nda a mekai elaeikokene, Yesus nebeinya ro miyaere kaeneumikoke wa, a ahuneuboke weumi, “Walobo yun na walobo akobaere ehukeyei! 24Yo yan mbai na ro miyae han soi-soi wanen nekenatena, nebei yo yan here ware wembonde. 25Imae mbainya na ro miyae naeise naeise kena ikele nekenatena, nebei imaera here ware wembonde. 26Naei mekai mbai Setan naei yo waku wahenaikonde nenaei mo relenainyelena, naendae wanen mae elae hebende? Naei yo waku here wembonde. 27Elae ro wake ro ha ikileikoinya, naei imaene rambunde yoko yae yaroukondere na hului ban sele. Nebei ro rineungekonde helere na hului.”

28“Na helebe Reyae wamale, u hila wa hila mahi-mahi koyate yo bele ro miyaere aukaka koyaimile bele Allah na hului faeinyemmile. 29Nebeibe nde naei yae Allahle Rohre aukaka konainyelena, Allah nebei yore efaeinyeiboi mo huba ban haei ban nekenende.”#3:29 Isaei bele holona yo hiwa u bene nekaimi Allahle Rohre aukaka konainyele nda merau mokonate: Yesus yae rambun emere-emere mokondere walobo elae walora mokole yae elembe.

30Yesus walobo yae helaukeunge elewatene, nebeinye nda a mekai yae ukeumi.

Yesus Nenake Nauwake Wa Bele

(Mat. 12:46-50; Luk. 8:19-21)

31Nebei imaene Yesus ane elewole hee, nenake nauwake wa bele mekate, imae moinye hebewate, ro hire ukainyele Yesusre kaenenengkondere. 32Ro miyae helen Yesusre yanainyekoke nekatera wainye, “Guru, ana, wauwake wa bele mekate wangkele hubayengkombere moinye nare ekaisebate.”

33Yesus nebei yore hineumi, “Menake bele Raei aka baeke bele nde naei?” 34Na bokone yanainyekoke ro miyae helende Yesus ereumi mo elele, “Raei menake raei aka baeke nda niyae! 35Ro miyae Allah kenare kole huluise mokonate nebei holona yo niyae Raei aka baeke wa remaen wa menake naei.”

موجودہ انتخاب:

Markus 3: setDBL

سرخی

شئیر

کاپی