Matius 24

Huba Mokoikoi Ya Na Iwau

(Mrk. 13:1-2; Luk. 21:5-6)

1Nebeisa Allahre ei mom-mom imae na kaban sele kiyaera Yesus eukuke aloungekoke. Ewole hee, na moisa orowate yo mekate Allahre ei mom-mom imae na kaban sele kiyae reufira reufira kelaeinye. 2Yesus yae nda yore weumi, “Mayae nebei ainyunuke nanemene eraube? Reyae na helebe wamale, Nebei imaere ainyunuke ruka nemene fomene kelanaikonde.”

3Nebeisa Zaitun mokone ikate Yesus angken nuweuboke nekewole hee, na moisa orowate yo na mo-mo nekewate yae are hinenainyehinderene Yesusle bokore mekate mo hinainye, “Maere yakaimebone, nda a eleyae makei hee yae nanemene enaibende enaiyakande? Rahe iwau wae Waei mele naei ya bele nda kani kela huba mokoungele naei ya bele yen kolonde?”

4Yesus yae weumi, “Ro miyae yae mare ame-ame wabenayengkombe bele kayaa foi yae hebembe. 5Rabuhine ban ro miyae helen Raei ro yae kelenayembe ungayembe, ‘Reyae Wali Ondofolo niyae’. Nebei u mekai yae ro miyae helen ame-ame wabenaimile. 6Buloo fela kulun relennele nane merau fela oinyaibonde relenainyele a yo-yo mayae emborombe, nebeibe uwa mekai bele nekembe, isasa alalobe okoijae. Rabuhine ban nda a wamale nanemene enaijembonde, nebeibe huba mokoikoi ya namman. 7Yo hi yo hi bele kani hi kani hi bele fela oinyaibonde releneinyele, anuwau helen moni mai nende konate, oinyeu hinenate. 8Nebei benate rambun huba mokoikoi ya naei hengkelenbe raufike baete, miyae fa honoise hiyau buhae bere releunge wanen.

9“Raei moisa hakaufekoke aerene nda kani kelana ro miyae helen sele ikele konayembe. Nebei hee mare ikilenayembe, weitasi konayembe, nane merau honayembe. 10Nebei hee Rare hila rabo halaeise ro miyae helen bena wali niki belere bukenaibonde, hi yae hire kelai nenende, nane merau hi yae hire ikele konnele. 11Yenjo kayaayo na hele ban helen sele menaiyakande ro miyae helen wabenaimile. 12U mekai wa mekai beko fendulun nelau ranna wanen mae yakanatene nebei aerene ro miyae naeise naeise yanekoi yase u inyaibonde. 13Nebeibe ro miyae naendae wanen horo wali beko hubanainyele Raei a elalere hila rabo halenayende, nebei ya huba enainyemokondena, na wali Reyae hole eremimolombonde. 14Nane merau Raei me kelee u keleene nekenate yo holone ro miyae na hului enayembonde, wali hena bona yaronaikonde naei a foi faeu foi nda kani kelana ro miyae boronaibonde naeise, enaisuwengkonde huba enainyemokongkondera, nebeisa wa huba mokoikoi ya menyakambonde.

15“Yendo kayaalo Daniel are eleukoke huluinye ro mbai Yesus a elelere mehauwae kelande horonde kiyae menyakambonde. Nda ro Allahle ro be ro yoinye na beko hele nane merau Allahre ei mom-mom imae na kaban sele kiyaene u mekai u nenere koi-koi ma mokongkonde. Nebei ro Allah heere neufake anuwaunge mensebenunde. Nde yae nda homo kongkondena, nda rambun erengkondena foi yae nou hennebonde. 16Nebei hee Yudea kanina ro miyae uwa hole moloiboise elure u hale me hale yae habelemembe. 17Holokare okoi ma imae bumana ro miyae rambun imae einya roweise oijae. 18Hekere embe ro miyae malo roweise imaere ebukei eijae. 19Nebei ya emale miyae holona bele wayeu miyae holona bele uwa hole moloiboise na beko hele enainyehubande, rabuhine ban ehabelei suluinye. 20Mai uwa hole moloiboise habelemembe ya naei ebeli ennebombe hin manse meinyele hee bele Sabat ya bele ebeijae hele. 21Rabuhine ban nebei hee ro miyae beko hele hubanainyele, nebei wanen roko mbai eyeiboi mo nda kani kela mokoubokera meke nda heene nane merau benen nebei wanen eibei. 22Allah yae nebei ya wanen fofo eimokoiboinya, walire nekande yo wali hole omoloiboi sului. Nebeibe Allah yae eleukoke holona ro miyae aerene nebei ya fofo mokonnebonde. 23Nebei hee ro miyae hi yae mare ungembe, ‘Erembo, Wali Ondofolo ndine Nare yakauboke, ndane Nare yakauboke.’ Ro miyae nebei ma elenatere na hele yae eleijae. 24Rabuhine ban wali ondofolo na hele ban bele yenjo kayaayo na hele ban bele helen menaiyakande. Iwau mahi-mahi, rambun emere-emere nda yo mokonate, na huluinya Allah yae eleukoke holona ro miyaere mokonaimibonde naei nibi bekone enaisakongkonde. 25Nebeinye u bene nekenayembe, nebei ma eyeiboi yae na bere wanen mae mare nda naeise Reyae isaeyaemale.

26“Mare ro miyae yae ungayembe, ‘Eren, Wali Ondofolo ndi a kala-kalane eke nekele.’ Mayae nebeise eijae hele. Nane merau ungayembe, ‘Ndi yowa einye eke nekele.’ Nebei are na hele yae eleijae. 27Rabuhine ban Reyae Allahle bokora mekale ro miyae uware yeubokale Kiyae, Raei merele ya wili enaa reufira wele na hehe ifale reufine bele ole naeikoyole wanen mae yembonde. 28Makeinye ro miyae na u mekai beko nekatene here no kaka honole ijen wanen yembonde. Allah nebei ro miyaere emmihubayengkonde, here nore anate aye hubayeikoyate wanen. 29‘Reyae na bere huwekokamale ro miyae beko hele hubanaimile ya baensondera,

Hu hehe wende ouben yembonde,

oko na hehe kebengkonde,

findelau yoni-yoni yakuna balenate onate,

yakune hebate yoni-yoni kusenate.’#24:29 Yesaya 13:10, 34:4

30“Reyae Allahle bokora mekale ro miyae uware yeubokale Kiyae benen merele hee yae, yakura Raei iwau yakambondera nda kani kela nanemene naei ro miyae ele kali rime ayan buyan konate. Rare erenaisele elae wake bele nane merau one hengko bele yae uwa kitensebonde yakuna mangko randa merele. 31Raei malaikat yoni-yoni ufemile amin rannaibonde. Nebei malaikat yoni-yoni nda kani kela na huba kelina Allahle holone me baeuboke yore arilenaimile, huba hira ende huba hine.

32“Ara none ahuneubokale ane mo hamennele. Hebate onsi fawate maensa rimi-rimi baete hee Israel kanine mayae isaeyeiboyaube yakama nobeungeboke. 33Nebei sului mbai are wamale, kun waunge iwau emere-emere enaibende nanemene mayae emerembena, isaeyembombe. Reyae benen merele ya nobeungeboke, nebei wanen mbai ro romau bena meke hebele na heki ban imae eise enensinde. 34Reyae mare wamale, nana hesele nda holona yo nanemene ehereiboi yae nda wamale enaiyembonde. 35Yaku bele nda kani kela bele nundenaibonde, nebeibe Raei ako faeuko mbai sambai enundeiboi.

36“Raei merele ya na hu hului bele hi yae ha yae naeisaei ban mo, malaikat surgane nekate nane merau Reyae Na Kelu isian, Maeko Allah mbai naeisaei nekele. 37Reyae Allahle bokora mekale ro miyae uware yeubokale Kiyae merele ya na mekai na bere hele Nuh nekewole heena wanen. 38Bu kabande ufewole ya namman mae, ro miyae bulau kaban mokayeke anayeke nane merau ro miyae yarowate, maengke rore ewate. Nebei mekai kaimeke Nuh kai kaban mokouboke einye eweufike. 39Nebei heena ro miyae yembonde rambun na isian mae nekewate, meke bu yae ufeukoke nanemene riyau weumiboke. Naei mekai mbai Reyae Allahle bokora mekale ro miyae uware yeubokale Kiyae merele yane benate. 40Nebei hee ro bee hekene eneimokonde, hire rowende, hire nukennebonde. 41Miyae bee gandumne ruka yae yalenete, hire rowende, hire nukennebonde.

42“Nebeinye kayaa hebembe, rabuhine ban mai Tuhan mende ya mayae isianne. 43Nda niyae bene nekenayembe, imae rowa yoko rorele huae mende hee isaeyeiboyolene, kayaa hebende hele, naei imaena rambun yoko yo yae eyaroikoi sului. 44Nebeinye mayae uwa mokoisa-mokoisa yae nekembe, rabuhine ban Reyae Allahle bokora mekale ro miyae uware yeubokale Kiyae mayae isian nekembe ya yae merele.”

45Benen Yesus a ahuneuboke weumi, “Yebaei bubaei na ijenne nekeyele, isaei hebaen bele ma yae uwa haraungeboke kiyae, na rowa yae yunde kaeuboke nekewole, nebei imae einya kalia mokate ro miyaere raman na huluinye yemmile anenatere naeise. 46Nebei imaena rowa bensonde mende hee, nebei yebaei bubaei nebei rowa naei ukeunge kaliane mokonde yae hubainyeikonde ro onomi foka hubannele. 47Reyae wamale, nana hesele na rowa nda yebaei bubaei ranenjende na imae einya rambun nemene me mokoise yembonde. 48Nebeibe na hului nda yebaei bubaei na u mekai bekona nda wanen mae na kenara elende, ‘Raei rowa wabengkonde mende lonbe, naei a ukeufe moi ufoyonde.’ 49Nebeinye na yebaei bubaei hiwa yore rahuae eyole meyole olemmile, raman bulau keu bure anate yo bele anenate konate. 50Na rowa mende ya huluise nebei yebaei bubaei u benere enekeise ya yae mende. 51Nebei yebaei bubaei na rowa yae rahuae bongkonde hombonde, nane merau nebei ro mokonnebonde ro miyaere faeu kai bee holona yo bele nangkele enainyekende. Naei nekenate anuwaunge beko hubanainyelene rime, heraa kili-kili enaikonde.”

موجودہ انتخاب:

Matius 24: setDBL

سرخی

شئیر

کاپی