PIENCILNA 6
6
Mihing Gitlona
1Leisiet maitangah mite pun a kipat ciengun amate in tanute a nei vua, 2Pasien’ tapate in amate hoi a sa uhi. Tuale amate in a dei zosie uh telin zi-in a la uhi. 3Tua ciengin Topa in, “Mihingte sungah ka hlagau a teng#6:3 Heb ah a khietna kicien lo hi. den sih ding hi, azieh pen amate cilesa ahi uhi; amau’ khan kum pen kum za le sawmni hi ding hi,” a ci hi. 4Khum hun lai-in leitungah Nephilim a kici mite om a, tuale khum zaw ciengin zong Pasien’ tapate in mihing’ tanute a luppi ciengun ta a nei uhi. Tamte pen khanglui lai-a mi thahat mi minthangte ahi uhi. #Job 1:6; 2:1#Gam 13:33
5Leitungah mihing gitlona lien mama a, tuaci’n Topa in mihing lungsim ngaisutna poma a sie ngentang ahina thu a mu hi. 6Mihing a siemkhah pen Topa a kisia a, tua thu in a lungsim a dasah hi. 7Tuaci’n Topa in, “Ka siemsa mihing, ganhing, a bawhva ganhingte le vana leng vate tawh ka sumaimang ding hi. Azieh pen amate ka siemkhah ka kisia hi,” a ci hi. 8Ahi vangin Noah in Topa’ maipha a mu hi.#Mat 24:37; Luk 17:26; 1Pet 3:20
Noah in Pasien Lungdamsah
9Tam teng pen Noah’ suonlehlahte ahi hi. Noah a thuman mi khat ahi a, a khan sungin paubaang lo hi; Pasien tawh Noah a zawhton hi.#2Pet 2:5 10Tuale Noah in tapa thum nei a, Shem, Ham, le Japheth-te ahi uhi.
11Tu-in Pasien’ muna-ah leitung kisiegawp a, leitung pen tatsietna tawh a kidim hi. 12Tuale Pasien in leitung pen a kisie-in a mu hi; bangzieh ahei cile leitungah mi zosie a siehuoi-in a gamta uhi. 13Pasien in Noah kungah, “Mi zosie suhmaimang dingin ka khentat zo hi, azieh pen amate ziehin tatsietna tawh leitung a kidim hi; tu-in leitung tawh amate ka susie ton ding hi. 14Nang mama in taasing#6:14 Heb ah a khietna kicien lo hi. tawh tembaw khat bawl in; tua tembaw sungah khan a dan danin omsah inlen, a sung le a pu singnai tawh hubih in. 15Na bawl dan ding tam bang ahi hi: Tembaw a dung tong zathum, a vai tong sawmnga, le a sanna tong sawmthum hi ding hi. 16Tembaw adingin a innkhum#6:16 Ahi sihle “tawlet” khat bawl inlen, tua tung tong khat ciengah hiel bawl in; tembaw pangah kotpi khat bul in; a dan neita, a ni na, le a thumnate bawl in. 17Kei lam panin vansin nei-a om zosie, a sunga a husang thei zosie a susie dingin leitungah tuizin ka tungsah ding hi; leitunga om zosie a si ding uhi. 18Ahi vangin keima in nangma tawh ka thuciemna ka kipsah ding hi; nangma, na tapate, na zi le na tapate’ zite tawh tembaw sungah na lut ding uhi. 19Tuale hinna nei zosie, mi zosie lah panin nangma tawh a hington dingin nam khatah ni ciet tembaw sungah na peipi ding hi; tuate anu le apa hi ding hi. 20Vate lah panin amau’ nam cietin, lei-ah a bawhva ganhing zosie amau’ nam cietin nam khatah ni ciet na kungah ang pei ding vua, tuate a hin nadingin na kem ding hi. 21A kine thei an namcin zong la inlen tuate khol in; tuate pen nangma le amate adingin an hi ding hi,” a ci hi. 22Noah in tuate a bawl hi; Pasien in ama tunga a thupieh zosie ama in a bawl hi.#Heb 11:7
موجودہ انتخاب:
PIENCILNA 6: ZBOTF01
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Zo Bible © Bible Society of Myanmar, 2018.