LUKA 17
17
Mvrax
(Mat 18:6-7,21-22; Mak 9:42)
1Yesu rueq vpiq sangac hez muex, “Mvrax tvyaungc kuq yaq lvmx htenc kuex vsuing vhttax, yuq muinz miq muex mvrax tvyaungc kuy jix waz kuex kvhiz juing lvp yaq. 2Kvruex waz rueq vruex nosaz rulx vwawc washiz shiz muex mvrax tvshuimc ruiux yuq, piq duingx nuex lunghtuimz yunghvlc pauk vtueq, svmuktvrax nuex dvy wvnc ruiux kuex piq tvkoc pinhtumc vhvlx rvtuex. 3Kvkhoc rvtueq mnoz rueq shuimx shuiux kuex honc lvmz hvt maq lawc shuiuz!
“Mphuz mnox waz rueq mnoz muex yaq kuq ruiux yuq, piq muex tharc jungx kuq shuiuz, piq thuinz layc wvnc ruiux yuq mvrax kuex dawc kuq shuiuz.#Lew 19:17; Dw 17:10; Mat 18:15,21; Yak 5:19 4Raungnuiyq shiz nuex dvyx mnoz muex tumc mvshix yaq kuq ruiux, lauk mvshix mnoz muex ‘Ngvy thuinz kvlayc tauk shex,’ ngoz tueq jungx ruiux yuq, mnoz rueq piq mvrax kuex dawc kuy rax.”
Kvmluimx Thuinz
5Kamx waz hez rueq Taungjix muex, “Nuiyshiq kvmluimx thuinz tvpaung kuq koq,” ngoz tueq thoz tueq.
6Taungjix rueq, “Nuimshiq kvmluimx thuinz kuex yekex lix tanc saz httax ruiux yuq, nuimshiq rueq vruex ruiybanc jungx lex, ‘Vruingx maq kvbaungc wvnc vtueq, svmuktvrax nuex kemkaz kuiuz!’ ngoz ruiux yuq nuimshiq kvjaz kuex tay shuex.
Nvrc Waz Yauk Shuimc
7“Nuimshiq phungc wawc mruex jix rueq lac miqmac wuik shuimc kuy jix nvrc waz, rvmuq ngoz ruiux khelbuenx remc kuy jix waz kuex nax maq yek waung ruiux yuq, piq muex yauk lox maq ngaungc vtueq dungc saq shuiuz, ngoz tueq nuimshiq rueq ngoz ruiux shuinx haz? 8Vsuing kvkhoc ngoz muit, nuimshiq rueq piq muex, ‘Ngvy tvkoc raungyac dungc tvyoalc shuiuz, ngaz rueq phauk saq yaq baunglaung mkhez kuex shuit vtueq ngaz muex tvhungx htaungx kuq wvnc loq; kvruex yimaq jix mnoz rueq phauk saq shuiuz,’ ngoz tueq ngoz vshuinx. 9Jiyungx waz rueq nvr shuex rulc rv-ngvlc shuimc kuy ningkhvnc nuex jiyungx waz rueq nvrc waz muex kejux vyungx ngoz shuex haz? 10Kvrulc rv-ngvlc nuimshiq rueq muinz miqmac muex nvr kv-phuinx yauk shuimc lotlaz shuimx kuq lot vtueq, ‘Naungshiq kuex kvjaz tay kuy lvmlvmc nvrc waz dvyx rvtiq, naungshiq rueq shuimc juing yauk shuimc kvruex dvyx shuimc kuy juing rvtueq,’ ngoz shuinz,” ngoz tueq jungx kuq tueq.
Yesu rueq Miq Waz Rokshiz Tvhvlc tueq
11Yesu kuex Yerusalem ghaq nuex kaz tueq nuex Samaria mungx nuiyc Galile mungx ruiy lvmx maq kaz wvnc tueq. 12Miqghaq ghaqshiz nuex nyuip wvnc koq tueq vshungx miq waz rokshiz rueq vpiq malc tueq. Tsuingshiq kuex vluz maq dvyx jvp vtueq, 13“Taungjix! Yesu lex! Nuiyshiq muex menjenc kuq koq!” ngoz tueq ramc wuez tueq.
14Yesu rueq tsuingshiq kuex khiz vtueq, “Waung kuinz nuimshiq shauk vgvnz kuex shomc waz bix muex tvkhic waung kuinz,” ngoz tueq.
Tsuinghez lvmx nuex waung yaq nuex dvyx hvlx wvnc tueq.#Lew 14:1-32 15Tsuinghez phungc wawc washiz kuex piq gvnz wawc hvlx wvnc tueq kuex khiz vtueq, yek waung yek ruiux, yunghvlc maq guyc vtueq Tishox muex tvtsvmc kvmc tueq. 16Yesu yaz phaungx nuex bumx vtueq, vpiq muex kejux vyungx ngoz kuq tueq. Kvruex waz kuex Samaria miqsaz rvtueq. 17Yesu rueq, “Miq waz rokshiz vshungx hvlx wvnc tueq rvmuq haz; waz tvkuiuz kuex mnuex lac? 18Tishox ngauz vngax kuex tvtsvmc kvmc tvkoc Pungnuk phvnx miqsaz washiz maq lvy vtueq, vyek kay jix washiz muinz vguez haz?” ngoz tueq wiz tueq. 19Kvruex yimaq Yesu rueq piq muex, “Kvtenc vtueq waung wvnc kuiuz; mkvmx luimx thuinz rueq mnoz tvhvlc kuq kv-phux,” ngoz kuq tueq.
Mungtan Httuiuc Wvnc yaq
(Mat 24:23-28,37-41)
20Pharise wvyvmc rueq Yesu muex Tishox Mungtan kuex mruex kaq httuiuc wvnc juing lac ngoz tueq wiz tueq. Yesu rueq, “Tishox Mungtan kuex muik lawc raungraung nuex httuiuc kaz tuex rvmuq. 21‘Lawc shuinz, vyuq httax yaq! rvmuq ngoz ruiux, nuex kvyuq httax yaq!’ ngoz tueq muinz jungx lot miq; yvmx khoc lac ngoz ruiux lec Tishox Mungtan kuex nuimshiq mungx nuex httax yaq,” ngoz tueq.#Rom 14:17
22Yesu rueq sangac bix muex, “Miq Saz raungnuiyq htenc wawc nuiyqshiz kuex nuimshiq rueq khiz aungx yaq vkhing httuiuc wvnc tuex, yuq muinz nuimshiq rueq khiz lvp shuinx rvmuq. 23Kvruex raungnuiyq miq rueq, ‘Lawc shuinz, nuex kvyuq httax yaq! rvmuq ngoz ruiux, vruex yuq httax yaq!’ ngoz tueq jungx ruiux yuq muinz nauk thuiyx kaz. 24Raunglep koq yuq raungsamx kox maq, raungsamx kox nuex httuiuc laz raungx nuex tv-phez yaq ikhoc Miq Saz vpiq raungnuiyq nuex yaungx wvnc tuex. 25Yuq muinz Miq Saz vruex kuex bac hvlc vkuilc vdaz muinz, vruex pat wawc miq rueq tvdux gay muinz kungkhux rvhumc wvnc tuex. 26Noa pat nuex yaungx wvnc tueq ikhoc Miq Saz vruex httuiuc kay nuex muinz kvkhoc yaungx wvnc tuex.#V.V 6:5-8 27Noa kuex svngpholix mungx nuex nyuip wvnc yix, miq htenc kuex yuix htup yuix nyuing rueq tvmoz maq tvthueyc gay tueq raungnuiyq max httuiuc nuex, miq htenc kuex joal nuingc dungc svy, miqlvmc miq tvwaungc httax wuez tueq.#V.V 7:6-24 28Kvkhoc hulawx Lot pat nuex muinz miq htenc kuex joal nuingc dungc svy, taungrez taungshaungc nuiyc khikhic yuingyuingc vtueq httax wuez tueq. 29Lot kuex Sodom ghaq wawc dung wvnc tueq raungnuiyq nuex raungwawc wvr raungx tvyunc vtueq miq lotlaz kuex thvt gay tueq.#V.V 18:20—19:25 30Miq Saz vruex httuiuc kay raungnuiyq muinz kvrulc rv-ngvlc yaungx wvnc tuex.
31“Kvruex raungnuiyq kvkaq yuimx wux khux nuex httaz jix waz kuex miqmac yuimx mungx nuex httax yaq hup svmx kuex lvmc kay nauk svt kaz, kvkhoc wuik vnax nuex httaz jix waz muinz yuimx nuex nauk yek waung kaz.#Mat 24:17-18; Mak 13:15-16 32Lot taungnyuiuz kuex rvwvl tvmaung wuez shuinz!#V.V 19:26 33Miqmac rullungx kvpalc wvnc roc jix waz kuex miqmac rullungx momaq wvnc tuex. Miqmac rullungx tvmoz maq gay jix waz kuex rullungx kvpalc wvnc tuex.#Mat 10:39; 16:25; Mak 8:35; Luk 9:24; Yoh 12:25 34Nuimshiq muex ngaz rueq jungx kuq ix, kvruex raungwvrx woalchuing vshiz nuex miq wanueyc vwoalc wawc washiz kuex shvlx wvnc ruiux, washiz kuex tvjungx gay shec shuex. 35Htuimz nuex tsvmz vhtuiuz yalxjuik nyuiuz nueyc wawc muinz nyuiuz shiz kuex shvlx wvnc ruiux nyuiuz shiz kuex tvjungx gay shec shuex. 36Nax ruix nuex miq wanueyc kvwawc washiz kuex shvlx wvnc ruiux, washiz kuex tvjungx gay shec shuex.”
37Sangac bix rueq, “Taungjix lex, mruex baung nuex lac kvkhoc yaungx wvnc tvnx?” ngoz tueq wiz tueq.
Yesu rueq, “Vmaungx httax yaq baung nuex lawtawx htenc muinz rvtuimx tuex,” ngoz tueq jungx kuq tueq.
موجودہ انتخاب:
LUKA 17: HNOT01
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Hawa Naga Bible © Bible Society of Myanmar, 2014.
