مَاتِيُ 9

يٜىٰسُ يَمْطِتِنِي جَرَاطٛ

1سٜيْ يٜىٰسُ نَتِّ کٛمِوَلْ حُولِ سٛعِّي غَرِيرِ مُوطُمْ؞ 2سٜيْ وٛٻّٜ نغَدَّنِمٛ غٛطّٛ جَرَاطٛ دٛوْ دَاغٛ؞ ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، ‏«‏تَاع وَنُّ، حِغٛ اَمْ، اَ يَافَنَامَ حَکّٜىٰجِ مَاطَ؞»‏

3ندٜ وٛٻّٜ مٛودِٻّٜ اَتَّوْرَ نَنِ نٛنْ، ٻٜ ڤُطِّ مٜتِتَاکِ حَکُّندٜ مَٻّٜ، اٜ ٻٜ مبِعَ، ‏«‏اٛعٛ نٜطّٛ اٛ فٛتِّدِنِ حٛورٜ مَاکٛ اٜ اَللَّه؞ کَعَ حَالَ کَ کَلُّکَ؞»‏

4اَمَّا يٜىٰسُ فَامِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِٻٜ، ‏«‏نغَمْ طُمٜ ݧُمٛتٛنْ ݧُمٛ کَلُّنغٛ ندٜرْ ٻٜرْطٜ مٛوطٛنْ؟ 5کٛ ٻُرِ حٛيْکِ، طُمْ وِعَ، ‏‹‏اَ يَافَنَامَ حَکّٜ مَاطَ،›‏ کٛو طُمْ وِعَ، ‏‹‏اُمَّ يَاٻُ؟›‏ 6اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞»‏ سٜيْ اٛ وِعِ جَرَاطٛ اٛنْ، ‏«‏اُمَّ کٛشَّا دَاغٛ مَاطَ، کٛوتَا وُرٛ؞»‏

7سٜيْ جَرَاطٛ اٛنْ اُمِّي حٛوتِ وُرٛ؞ 8ندٜ کَوْرُتُٻٜ طٛنْ نغِعِ نٛنْ، ٻٜ کُلِ، ٻٜ مَنْتِ اَللَّه، کٛکُّطٛ يِمْٻٜ اِرِ طٜعٜ بَوْطٜ؞

يٜىٰسُ نٛدِّي مَاتِيُ

9يٜىٰسُ اٜ اَلَ وِغٜىٰرٜ ندٜنْ، سٜيْ يِعِ غٛطّٛ جَٻٛووٛ شٜىٰدٜ لٜيْدِ بِعٜتٜىٰطٛ مَاتِيُ اٜ جٛوطِي تٛ طُمْ جَٻَتَ شٜىٰدٜ لٜيْدِ؞ سٜيْ يٜىٰسُ وِعِمٛ، ‏«‏تٛکَّمْ؞»‏

سٜيْ مَاتِيُ اُمِّي، تٛکِّمٛ؞

10غَطَ طٛنْ يٜىٰسُ يَحِ وُرٛ مَاتِيُ، جٛوطِي اٜ ݧَامَ حِرَاندٜ، سٜيْ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ نغَرِ نجٛوطِي تٛ مَاکٛ اٜ تٛکُّٻٜمٛ؞ 11ندٜ فَارِسَنْکٛعٜنْ نغِعِ نٛنْ، ٻٜ مبِعِ تٛکُّٻٜمٛ، ‏«‏نغَمْ طُمٜ مٛودِبّٛ مٛوطٛنْ ݧَمْدَتَ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟»‏

12ندٜ يٜىٰسُ نَنِ نٛنْ، وِعِ، ‏«‏نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ 13نجَحٜىٰ، اٜکِّتٛوطٛنْ مَعَنَ اَايَارٜ بِيندٜ، ‏‹‏اٜ مِ يِطِ کٛلّٛنْ يُرْمٜىٰندٜ، نَاع سَکُّکِ شَکِّرِ؞›‏ مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ؞»‏

پَمٛلْ دٛوْ سُومَاکِ

14سٜيْ تٛکُّٻٜ يَحَيَ غَطٛووٛ بَڤْتِسْمَ نغَرِ تٛ يٜىٰسُ ٻٜ پَمِمٛ، ٻٜ مبِعِ، ‏«‏نغَمْ طُمٜ مِنٛنْ اٜ فَارِسَنْکٛعٜنْ اٜ مِنْ شُومٛو، اَمَّا تٛکُّٻٜمَ شُومَتَاکٛ؟»‏

15سٜيْ يٜىٰسُ نٛوتِي وِعِٻٜ، ‏«‏اٜ يِيکِ مٛوطٛنْ حِغٛوٻٜ اَنْغٛوجٛ نَنَيْ بٜلْطُمْ شَرٜلْ نغٜلْ اَنْغٛوجٛ اٛنْ وٛنْدِ اٜ مَٻّٜ؟ اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، اٜ شَرٜلْ نغٜلْ ٻٜ شُومٛتٛ؞

16‏«‏وَلَا ݧٛوتَيْطٛ لٜفٜلْ کٜسٜلْ تٛ لِمْشٜرٜ کِيندٜ، نغَمْ لٜفٜلْ نغٜلْ نغٜلْ سٜىٰکَيْ لِمْشٜرٜ کِيندٜ ندٜنْ؞ نٛنْ وَطَيْ ندٜ ٻُرَ نٛ ندٜنّٛ سٜىٰکُکِ؞ 17نٛنْ مَا وَلَا غَطَيْطٛ ندِيَمْ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ، طَمْ ڤُسَ فَاندُ ندُنْ، طَمْ رُفَ، فَاندُ ندُنْ بٛو لَلِّ وٛنْ طٛنْ؞ اَمَّا ندِيَمْ اِنَبٛجَمْ کٜسَمْ اٜ وَطٜىٰ ندٜرْ فَاندُ حٜيْرُ نغَمْ تٛع طُمْ دُلَّطَمْ طُمْ دُلَّ فَاندُ ندُنْ؞»‏

ٻِطّٛ جَايِرُسْ اٜ دٜبّٛ مٛ پِيپَمْ رُفَنْتَ

18يٜىٰسُ اٜ ندٜرْ وِيکِٻٜ نٛنْ، سٜيْ غٛطّٛ اَرْدِيطٛ سُودُ دٛعَارٜ بِعٜتٜىٰطٛ جَايِرُسْ وَرِ؞ اٛ دِشِّي يٜىٰسٛ يٜىٰسُ، اٛ وِعِ، ‏«‏ٻِطّٛ اَمْ سُرْبَاجٛ مَايِي جٛونِ‑جٛونِ، اَمَّا وَرٛيْ نجَحٜنْ مٜىٰمَامٛ، اٛ اُمّٛتٛ؞»‏

19يٜىٰسُ اُمّٛدِي اٜ تٛکُّٻٜمٛ ٻٜ ندِلِّدِ اٜ مَاکٛ؞

20تٛو، اٜ وٛودِ غٛطّٛ دٜبّٛ طٛنْ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ اٛ پِوٛيِ غَطَ يٜىٰسُ، اٛ مٜىٰمِ شِلْمبِ تٛغّٛورٜ مَاکٛ؞ 21نغَمْ اٛ وِعِي ندٜرْ ٻٜرْندٜ مَاکٛ، ‏«‏کٛو تٛغّٛورٜ مَاکٛ تَنْ مٜىٰمُمِ، مِ يَمْطِتَيْ؞»‏

22ندٜ يٜىٰسُ وَيْلِتِي، يِعِمٛ، وِعِ، ‏«‏تَاع وَنُّ، بَنْدِرَاوٛ؞ حٛولَارٜ مَاطَ يَمْطِتِنِيمَ؞»‏ طٛنْ اٜ طٛنْ دٜبّٛ اٛنْ يَمْطِتِ؞

23ندٜ يٜىٰسُ يٛتِّي وُرٛ جَايِرُسْ اٛنْ، يِعِ دُودٛوٻٜ دُودَالِ اٜ حَوْرُتُٻٜ اٜ ٻٜ نغُلَّ سٜمْبٜىٰ، 24سٜيْ اٛ وِعِٻٜ، ‏«‏اَلٜىٰ طٛعٛ، نغَمْ سُرْبَاجٛ اٛنْ مَايَايِ، اَمَّا اٛ طَانِ؞»‏ سٜيْ ٻٜ نجَلِمٛ؞ 25اَمَّا غَطَ اٛ وُرْتِنِي کٛو مٛيٜ يَاسِ، اٛ نَتِّ، اٛ جٛغِي جُنْغٛ سُرْبَاجٛ اٛنْ، سٜيْ سُرْبَاجٛ اٛنْ اُمِّي؞ 26حَبَرُ طُمْ بٛو سَنْکِتِي کٛو تٛيٜ ندٜرْ لٜيْدِ ندِنْ؞

يٜىٰسُ يَمْطِتِنِي وُمْٻٜ

27يٜىٰسُ اٜ اَلَ وِغٜىٰرٜ ندٜنْ، سٜيْ وٛٻّٜ وُمْٻٜ طِطٛ تٛکِّمٛ اٜ نٛدَّ سٜمْبٜىٰ، اٜ مبِعَ، ‏«‏ٻِطّٛ دَوْدَ، يُرْمِنَنْمِنْ!‏»‏

28ندٜ يٜىٰسُ نَتِّ وٛنْغٛ وُرٛ، سٜيْ وُمْٻٜ ٻٜنْ نغَرِ تٛ مَاکٛ، اٛ پَمِٻٜ، اٛ وِعِ، ‏«‏اٛنْ نجَٻِي مِ وَاوَيْ يَمْطِتِنْکِعٛنْ؟»‏ ٻٜ مبِعِمٛ، ‏«‏اٜىٰ، مٛودِبّٛ؞»‏

29سٜيْ يٜىٰسُ مٜىٰمِ غِتٜ مَٻّٜ، وِعِ، ‏«‏نٛنْ نٛ کٛولٛرِيطٛنْيَمْ مِ يَمْطِتِنَيْعٛنْ؞»‏ 30طٛنْ اٜ طٛنْ غِتٜ مَٻّٜ مبُمْتِي؞ سٜيْ يٜىٰسُ وَغِّنِٻٜ، وِعِ، ‏«‏تٛع اٛنْ مبِعُکَ غٛطّٛ؞»‏

31اَمَّا ٻٜ ندِلِّ ٻٜ شَنْکِتِ حَبَرُ مَاکٛ کٛو تٛيٜ ندٜرْ لٜيْدِ ندِنْ؞

يٜىٰسُ يَمْطِتِنِي ڤَحٛ

32وُمْٻٜ ٻٜنْ اٜ ندِلَّ، سٜيْ طُمْ وَدَّنِ يٜىٰسُ غٛطّٛ غٛودُطٛ غِنّٛلْ غَرْتِرْنغٛلْمٛ ڤَحٛ؞ 33غَطَ يٜىٰسُ وُرْتِنِي غِنّٛلْ نغٛلْ، نٜطّٛ اٛنْ فُطِّ مٜتُکِ؞ يِمْٻٜ طُطْٻٜ کَوْرُتُٻٜ طٛنْ کَيْطِنِ، مبِعِ، ‏«‏طُمْ مٜىٰطَايِ يِيکِ غٛطُّمْ اِرِ طُعُمْ ندٜرْ لٜيْدِ اِسْرَاعِيلَ؞»‏

34اَمَّا فَارِسَنْکٛعٜنْ مبِعِ، ‏«‏اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ؞»‏

يٜىٰسُ يُرْمِنَنِي يِمْٻٜ

35يٜىٰسُ يَحِ غَرِيجٜ مَوْطٜ اٜ نغَرِحٛيْ ڤَمَرٛيْ فُو، اٜ اٜکِّتِنَ ندٜرْ شُوطِ دٛعَارٜ طِ يَحُودَنْکٛعٜنْ، اٜ وَعَجِنَ حَبَرُ بٜلْطُمْ دٛوْ لَامُ اَللَّه، اٜ مٛ يَمْطِتِنَ يِمْٻٜ غٛودُٻٜ کٛو اِرِ طُمٜ ݧَوُ، اٜ کٛو اِرِ طُمٜ شِيَ نجَمُ؞ 36ندٜ اٛ يِعِ يِمْٻٜ طُطْٻٜ کَوْرِتِي، سٜيْ اٛ نَنِ جُرُمْطُمْ مَٻّٜ، نغَمْ اٜ ٻٜ تٛرّٛو، وَلَا بَلَّيْطٛٻٜ، بٛ بَالِ طِ نغَلَا غَيْنَاکٛ؞ 37سٜيْ اٛ وِعِ تٛکُّٻٜمٛ، ‏«‏غٜسٜ ٻٜنْدُطٜ اٜ طُوطِ، اَمَّا حُوٛوٻٜ طُوطَا؞ 38تٛرٜىٰ جٛومُ غٜسٜ طٜنْ لِلٛيَ حُوٛوٻٜ ندٜرْ غٜسٜ مَاکٛ؞»‏

موجودہ انتخاب:

مَاتِيُ 9: fuv

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

اَلْکَوَلْ کٜسَلْ ندٜرْ فُلْفُلْدٜ شَکَ نَاجٜىٰرِيَ کے بارے میں مزید معلومات حاصل کریں