Locya 22
22
Apyahen na ni Yota a ipanazang si Yeso
(Matay 26:1-5,14-16; Make 14:1-2,10-11; Yowani 11:45-53)
1Masngen rana o ngaranan da Iyeci a ipamaring da so kanen am koman rana sira so ji nimimway a pang. 2O panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to am naknakmen da o ahahapan da si Yeso do limanan da sya. Am ikanyahey da o aro a tao. 3No kano nang am nikovotan ni Satan o onowned na no tao do Isecyadi a meyngaran so Yota. Iya rana am ikararwa da so ikakarwan no macinanao ji Yeso. 4Meyratateng am mangay si Yota do panipanirsirngen no mapatanatanang so nakem da si Ama ta do to a kano panipanirsirngen no omzat do rako a panaralayan a macisirsiring no kahap na si Yeso a itoro jira. 5So nisarayan da nya. Meyratateng am ipeysirsiring da o itoro da jya nizpi. 6Apyahen na ni Yota o kapanta da nya so nizpi am sapahen na rana do araraw do ikabo no tao a irakep da si Yeso.
Tomalakanen sira so pamaringan da so kanen
(Matay 26:17-25; Make 14:12-16)
7No mamaring sira so kanen do ngaranan da Iyeci am koman sira so ji nimimway a pang a kapangap da so asa ka kagling. 8Am ori o nitovoyan na ni Yeso si Pite a kani Yowani. Maniring jira am, “Mangay kamo pa manita so pamaringan ta so kanen an.” 9Maniring sira am, “Do wanjin mo pancyan nyamen a tomalakanen so pamaringan ta so kanen.” 10Maniring si Yeso am, “Mangay kamo do ili a kapakasinmo nyo so asa ka mahakay a misson so peraranom. Si masinmo nyo ori am to nyo ngonoci ori a kasdep nyo do vahay da. 11Si maniring kamo do mapeyvahay sya am, ‘Na ipanahes jimo no amnanao jyamen do wanjin o pamaringan namen so kanen a vahay,’ kwan nyo an, 12a kangay na ninyo do cinavat no vahay na a kapeysinsinmo nyo do dang so pamaringan ta so kanen.” 13Mangay sira am todey mangononong o ciring ni Yeso. Am ori o niyan da rana do dang a mapeykakasa so yaven da.
Ney manowji rana pamaringan da so kanen ni Yeso a kano macinanao jya
(Matay 26:26-30; Make 14:22-26; 1 Kedinto 11:23-25)
14Maseyrem am macihanghang si Yeso do nipamnekan na amlivolivon no ciriciring na. 15Maniring jira si Yeso am, “Ko isaray o ko kapacihanghang jinyo do na yanam no alalaw ko. 16Ko pa ciring jinyo am jyabo kapacihanghang ko pa jinyo a mamaring so kanen do ji na pa mangononongi no peypeypangayan no tanyo kapamaring so kanen do talamozongan na ninyo ni Ama ta do to a.”
17Ahapen na ni Yeso o kopo a yanan no potaw cyo am isaray na ji Ama ta do to. Meyratateng am maniring jira am, “Oya rana ya am ahapen nyo a kavonong nyo sya ayopen. 18Ko ipanci jinyo am papwen ko sicyaraw eya o kaji ko na ngyopan so potaw cyo mangay no si papwen na ni Ama ta do to o katalamozong na rana ninyo.”
19Meyratateng am ahapen na o pang a kasaray na nya ji Ama ta do to a kakcikcil na sya vonongen jira. Maniring am, “Oya rana am kataotao ko ya a mapatazadang jinyo do teyngato. So to nyo na amwamooni sya a iyapapaw nyo jyaken.” 20Mateyka sira koman am akman so sang, ta ahapen na ni Yeso o kopo a yanan no potaw cyo. Maniring am, “Oya rana am rala ko a nimvoyog a omaing jinyo a yongkad no vayo a pangozayan a ciring na ni Ama ta do to. 21Am cittey kamo o yamanazang nyaken a tao a yamacihanghang jyaten. 22Ta to ko mangozai a Nipamnekan na ni Ama ta do to do kawakwak da jyaken. Am o manazang nyaken a tao am to makasi an.” 23Am ori o nipeysingsingkad da do keyyan no tao jira a mapeyvazay so akman sang.
Ikazyak da o pakarakehen da jira
24Meyratateng am ikazyak da no macinanao jya, “Sino paro jyaten o pakarakehen ta.” 25Maniring si Yeso jira am, “O panirsirngen rana do karawan am abo ji ngamizing so akman sang a tao an. So pancyan da no nang makayokod nira tao. 26Am ji kamo akman so sang an. Ta o pakarakehen nyo am ji na pahama o nakem na. O panirsirngen am inarahen na o kakma ney lamlamsoy a manidong so tao. 27Omlisna koman a kano peylamlamsoin da tao am sino meyneynakem jira. O amlisna am ori. Am yaken rana am yako akmey kahanhanan nyo a tao.
28“No myan so alalaw ko am kamo macikaop jyaken. 29Am ori o torwan ko nya jinyo so na nitoro jyaken ni Ama oyowyat na. 30So ipacihanghang nyo jyaken do teyngato no makwa a kalisna nyo do lilisnan no pakaizain a tomalamozong no sivosivovoong da no rarwa so ikakarwan a ananak na ni Yakebo.”
Pazimanen na ni Yeso ji Pite o kalalas na jya
(Matay 26:31-35; Make 14:27-31; Yowani 13:36-38)
31Maniring pa si Yeso am, “Mo Simong, cittey si Satan a nipya ni Ama ta do to a mangay a omlita jinyo. 32Am ko na nipeynozi imo. So ji na ablisi no nakenakem mo jyaken. No mamlis ka so nakenakem am vavagan mo sira o akma moy kakteh do cinai an.” 33Maniring si Pite jya am, “Mo Panirsirngen, ko na ninakenakem o kapacihza ko jimo do pamemtengan, kapeynanod ta mawakwak do dang.” 34Maniring si Yeso am, “Mo Pite, ko pa ciring jimo am sicyamahep rana do itazokokok no manok am ipitlo ka omalalas jyaken.”
35Maniring pa si Yeso jira am, “No kakwa pa am nitovoy ko inyo a ji mapalolo so peyninizpyan a kano aywayob nyo a kano tokap nyo. Am ikongo pa yabo jinyo.” Maniring sira am, “Yabo rana o namen kalahen.” 36Maniring si Yeso am, “Am o na yanan no peyninizpyan na kano ayob sicyaikwaya am palolwen da. O abo so ipangan am ipanazang da o aywayob da kapangap da so ipangan. 37Ko pa ciring jinyo am o ciriciring rana do Seysyo am, ‘Iya am da nipavilang do meyraraten a tao.’#22:37 Isayya 53:12. O ciriciring rana ori am mangay do kataotao ko ori. Ta o nivatvatkan da ciriciring da jyaken am yamasasnad rana jyaken.” 38Maniring o macinanao jya am, “Mo Panirsirngen, cittey o yadwa ka cinalolot do jya.” Maniring si Yeso am, “Cyana ori.”
Meynozi si Yeso do Kanlan a tokon
(Matay 26:36-46; Make 14:32-42)
39Makowbot si Yeso do ili am akman sang a mangay do Kanlan a tokon a kapacihza da no macinanao jya. 40Makaranes sira do dang am ipanci na jira ni Yeso. Maniring am, “Meynozi kamo an, ta kalittan kamo an.”
41Meyratateng am karwan na sira ni Yeso so kabneng no keytan so karairai a kapeylilitod na meynozi. 42Maniring am, “Mo Ama, no si apyahen mo am pakarwen mo o yamasagpaw a alalaw ko an. Am ji mo mangozai o nakenakem ko, ta kapangozay mo do nakenakem mo.” 43Amyan so asa ka tinsi a nimapo do teyngato a nimangay a omait do oyowyat na. 44Ta no kapeynozi na am tey meyngen o onowned na. So icyakman na so rala no anngennget na amiteng. Am arakorako pa o pasyasyan na ni Yeso ji Ama ta do to.
45Teyka meynozi am meytatanek si Yeso a mangay do macinanao jya. Makaranes jira am macita na sira meycyaititkeh, ta mapoo sira do kapakanakem da so yaomanam a alalaw ni Yeso. 46Maniring jira am, “Ikongo nyo ipeykaititkeh. Kayokay kamo na kapeynozi nyo, ta kalittan kamo.”
Rakpen da rana si Yeso
(Matay 26:47-56; Make 14:43-50; Yowani 18:3-11)
47Ji pa nikomavos o ciring ni Yeso am mangay sira o aro a tao a palolwen na no asa ka macinanao jya a meyngaran so Yota. Iya rana am to manmanma a mangay omrapong si Yeso. 48Maniring si Yeso jya am, “Mo Yota, mo rapongen yaken a mo kapanazang rana nyaken a Nipamnekan na ni Ama ta do to?” 49Macita da no karwan da no macinanao ji Yeso am ipanci da, “Mo Panirsirngen, apya kapanavaz namen no takzes?” 50Patavazen no asa ka tao jira o takzes na do lamlamsoy na no panirsirngen no mapatanatanang so nakem da si Ama ta do to. Am ori o nikakteb no talinga na do wanan na. 51Maniring si Yeso am, “Ji mo macilimanan nyaken.” Meyratateng am pinanan na o talinga no tao ori am apya rana.
52Meyratateng am maniring si Yeso do amrakep sya panipanirsirngen no mapatanatanang so nakem da si Ama ta do to a kano panipanirsirngen da no omzat do rako a panaralayan a kano kamanrarakehan da am, “Kamo mapalolo so takzes nyo a kano sisipzot nyo a yamrakep jyaken? Nyo patpehan jyaken do manakaw a tao? 53Ko mangday so araraw a yamacitovong jinyo do rako a panaralayan am yanyo ji ngapa yaken. Am na karateng rana no araraw a yanyo yahap jyaken do na katalamozong ninyo ni Satan.”
Alalasan ni Pite si Yeso
(Matay 26:57-58,69-75; Make 14:53-54,66-72; Yowani 18:12-18,25-27)
54No kanang am rakpen da si Yeso a kangay da nya do vahay da no panirsirngen no mapatanatanang so nakem da si Ama ta do to. To na macyazizazawi si Yeso ni Pite. 55Meyratateng am manangdang sira do inaorod no vahay da amlimot so apoy. Si Pite rana am macikaop do aro a tao a manangdang. 56Macita na no asa ka tobang da si Pite a macipanangdang am to na ningkaji. Maniring am, “Kapacihcihza no nya ji Yeso asyo am.” 57Maniring si Pite am, “Ko jyasingkaji ori.” 58Ji pa meyyonownay am to ngyan pa so tao a tomita sya. Maniring am, “Kapacihcihza mo ji Yeso asyo am.” Maniring si Pite am, “Ko jyatenngi mo ipanci ang.” 59Hatasen na o asa ka vatvatek no toki am to ngyan pa so asa ka tao a to rana mapatopos so ciring na a manci no, “Jyabo kalas na. Beken a imo eya o yanimacihza ji Yeso? Ta ka macikeylyan jya.” 60Maniring si Pite am, “Ko jyatenngi o mo ipanci ang.” Ji na pa teyka o ciring na am nitazokokokan na rana no manok. 61Meyvazingowngaw si Yeso a tomita si Pite am manakem na o mina ciring na jya ni Yeso a manci no, “Do itazokokok no manok am ipitlo ka omalalas jyaken.” 62Manakem na ori ni Pite am makowbot rana omzezezeng a amlavi.
Peyyaliliman da si Yeso
(Matay 26:67-68; Make 14:65)
63O tomita si Yeso a tao am peyyaliliman da kasipsipzot da jya, 64kabengbeng da so mata na a pacicin. Maniring sira am, “Pancyan pala. Sino jyamen o yambakbak jimo ang.” 65Aro ciring da a ipeyleylak da sya.
Pacicin da si Yeso do tangain no aro a panipanirsirngen
(Matay 26:59-66; Make 14:55-64; Yowani 18:19-24)
66Madagdag am meysinsinmo rana sira o kamanrarakehan da no tao do Yotay a meysirisiring nya. Sira rana ori am panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to, kangay da ni Yeso do peykeykaygyan da. 67Maniring sira ji Yeso am, “Pancyan pala jyamen. Manngwa, ka manoyong a si Kizisto an?” Maniring si Yeso jira am, “Tana ipeypanci ko jinyo am jyabo kanoyong nyo jyaken a. 68No si myan so ipacici ko jinyo am jyabo kapasapa nyo jyaken a. 69Am makeykai ko rana amlisna do wanan na ni Ama ta do to a ney mowyat na an.” 70Maniring sira o aro a tao am, “Anak na imo saon ni Ama ta do to?” Maniring si Yeso jira am, “O nipanci nyo rana am yamanoyong.” 71Maniring sira am, “Tana ji ta makakala so ciring a iraherahet ta sya am cyaha, ta ta na nimamizing o na iraherahet si Ama ta do to.”
موجودہ انتخاب:
Locya 22: snt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The Bible Society in Taiwan
