Лукара йибкьыд Шадды Хабар 9

ЦӀыкьӀунийды гвалахбыр

1Сес выъыр джухда ЦӀыкьӀваӀр, ГьӀасара вылцӀара гьабишис кьуувет не яхӀ иблисмар йигас на ядалбыр хъаъас. 2Гьание сидилгара мибыр Аллагьад ПагьӀчаалыгъаклаа хабар ваъас, гьӀуьзир кидбыр хъадаъас.

3– Шешин рыкъӀа лаӀмаӀбуш: я кӀар, я хваб, я хьыв, я танга, я валгымыд дегишлыгъ – рухьура Миние гьабишде. – 4Гьилды хала аӀчӀурди, гьади сыкьӀа гьадаа гъаъ аӀхъӀдаӀбчӀумаа. 5Нагагь ваӀ гьили-га аджадгъухьна, шегьердаа гъаъ аӀхъӀдаӀрчӀведи, гъилябаклаа руг ки кине темиз хъаъ. Гьа гьабишис гедкьасды лышан йикихь.

6Шагыртар гьаадхӀыри, мукъӀмаа мукъӀма, Шадды Хабар ваъара, сиене джигима едедбыр хъадаъара,

7Ми кардымыклаа ун йишир, тетрарх Иродды келле кывылхӀаӀре: са-сабише рухьура, гьа ЯхӀйе-пайгъампар йиъи сыраа лухъузур ад, 8тимбыйдыбише рухьура – Ильяс йиъи, хьибыдхьусдыбише – са эвелды пайгъампар йиъи хъиркьыр ад. 9Амма Ирода рухьура: ЯхӀйед за кьул луубкьури. Мидухъунды ихтилатбыр бес гьаъад гьалыклаа идихь? Гьанийис ГьӀасахда гакъас йигара руъура.

Хьуб хьыв

10Хъидкьыр, ЦӀыкьӀунды шагыртара ГьӀасас джвер шыв гьыъырди ихтилат гьаъара. ГьӀаса, гьабыр ки хана, Вифсаид хьур шегьерди руъура, мутагьӀлимешихьван текды джигиди гьалгас йишин бадаана. 11Халкь хьуйне, гьадиклаа хабар вишир, хъуна вуруъура. ГьӀасара гьабишис ки хьесым ачых гьаъара, Йинчид пачаагьӀлыгъаклаа ихтилатбыр гьаъара, едебыр хъадаъара.

12НахӀ руъуд каалды гедеэне, ЦӀыкьӀунды мутагьӀлимере, бейде йидкьыр, рухьура ГьӀасада:

– Сихъивга халкь, аа-уу гид мукъӀма на сывыма дыхьыр, садхасды джыгаа на улесды гьагухь. Ми кеэйид джыгаа йиъи.

13– Улесды ваӀ кивияъ гьабишис, – рухьура ГьӀасара,

– Еде шешин хадиш, хьуб хьыв на кьӀваб балугъ виъи, – джываб хъывылцӀара тимбише. – Е лешусиме гьамыъ дыхьыр гьабишис улесды? 14Илсанар ки ай хьуд гьагъзыр духъунды кас.

– Гьабыр кӀабалбырна садугъ, гьӀар кӀабала хьуцӀцӀура дикисне, – рухьура ГьӀасара.

15Тимбише ки гьааса гьаъара – хьуцӀцӀура садубгъура. 16Луьвшур хьуб хьыв на кьӀваб балугъ, улабыр хӀалыы лихьир, ГьӀасара дугьӀа гьаъара улесдыдыы уу, шукур ваъара Йинчихьде, кьатӀ гьыъыр мутагьӀлимешде вылцӀара, тимбишде гвал гьаъ хьур илсанашис. 17Сиенебише луьъур, тух дишири, гьала цӀыкьӀваӀд зембил улесдыдид ки адгыри.

ГьӀаса Йинчид Мусуд йиъи

18Сада, ГьӀасара текне дугьӀа кьыле гьаъад гедеэне, дуруъура Минийихда мутагьӀлимер. ГьӀасара хулкара гьабишдаа:

– Зы Выш йиъи рухьура халкьдире?

19Са-сабише рухьура: Вы – Хачилый ЯхӀйе-пайгъампар йиъи, маддыбише – Ильяс-пайгъампар йиъи, са-сабише рухьура: – Гьа ил ахъагъур ад эвелды пайгъампар йиъи.

20ВаӀ захда выши рухьура? – хулкара ГьӀасара.

– Вы Йинчид Мусуд йиъи, – джываб хъывылцӀара Петрара.

ГьӀасара джуды гьӀазабырмыкляа ихтилат гьаъара

21Амма ГьӀасара, гьабишде гьа ихтилат гьалысна маъ гьухьур, 22рухьура:

– Илсанашды Духарыы балад йыгъбыр йыкьаси. Гьа агъсакъалаше ки хьуъ хаагъуси, сахьусды дибиреше не Къаанунад магьӀалимеше ки. Гьа йикье гьаъаси, амма хьибыдхьусды йыгъа Гьа сыраа лухъузаси.

23Хьели ГьӀасара сиенебишде рухьура:

– Захда хъуна йыкьас йигад выш-га анахъун,

Джу выдж сиене вий,

ГьӀар йыгъа джуды хач хана йирхьыхь –

Хьели гьа Захда хъуна йиъидаана йиъи.

24Гьис хьуйне, джус джуды гьӀумир увухӀус йигание

ГьӀумир пыч ваъаси,

Джуды гьӀумир Зы бадаана пыч выъыние гьӀумирдис увухӀуси.

25Шыв хайир а эдемиес, сиене дуьнйа ки аъ сывъыр,

Выдж йикьихьна, я джус зиян йишихьна?

26Изды дур хакьас рыхъӀ йишидбыйды,

Йинчид Духарыс ки хакьас рыхъӀ йикиси

Йинчид нурди ана йиркьыйне,

Дидды на малаикмыд йаӀкваӀхьде гине йиркьыйне.

27Рухьура ваӀде, мидаа лаъ луьздуър адбишик кини диъи уьлуьмеклаа хабар викисма. Йинчид ПагьӀчаалъыгъ гьувгасдыбыр.

ГьӀасара гьыъыд ихтилат Мысахьван на Ильясыхьван

28Ми чӀелбыр гьухьудыыла хъуъ мыед йыгъ гьаадхӀыри. ГьӀаса, Петр ки хана, Янан ки, Якьуб ки, дугьӀабыр кьыле гьаъас банаа лаӀбчӀура. 29Садахьурка, дугьӀа гьаъад джигиди, Гьанийды хьесым дегиш йишири, валгымаа гъаъ нур игъидхьури. 30Джухьван ки кьӀваӀр эдеми далгара каӀчӀури, Мыса на Ильяс, 31хӀалды нур гъана йидкьыр ад. Далгыри гьабыр Иерусалимди Гьанийе кьуле выгыр йигад.

32Петр на гьанийихда хъудбыр идды некье ай, лаъ киидхьуйне, гьабишис гьабгура Гьанийыы гъад Нур на бейде хад кьӀвар эдеми. 33Тимбыр Гьанийды бейдаа хъӀудис хьур ана, Петрара рухьура ГьӀасада:

– МагьӀалим, шудаъ йыха йиъи миди ес! Дыкьа йаӀ-ваӀ хьиб чадыр сывхӀыси: Са Вас, са Мысас, са Ильясыс.

34Гьанийис джу шивди рухьуд хабар адиший. Гьа бегьем йикисмаа асый йидкьыр, джуды ахъӀан гьабишыы сивере. МутагьӀлимешис, асыйехьде гидхьур, гичӀ вырыхӀыре. 35Амма асыйяа гъаъ сесед ун руъура рухьуд: «Ми Изды Дух йиъи, Изды Векил. Гьанийихда хъадацв!»

36Сес гихъиивхьийне, ГьӀаса са выдж йиъий гимарад. МутагьӀлимеше джваӀршис гьагудиклаа гьалысна ихтилат джыъыр, сир ухӀури.

ГьӀаса на едед хыных

37Джыбра хъуд йыгъа, гьабыр банаала саъ хъидъиди, ГьӀасад рыкъӀа са гьӀараасат вуруъура. 38Садахьурка кӀабалаклаа сыние лал ваъара:

– МагьӀалим, вахьде миннет виъи, гакъ изды духарыхда! Гьа захда ад са йиъи! 39Гьанийик цӀырбыр каӀбчӀура: садахьурка гьа лал ваъара силхьере, иблисере гьанийклаа джазба кеэйере, ггаӀлдаа рухь хеэйере, сихъджигыр, зулум ваъара. 40За выды мутагьӀлимешихьде ки миннет выъыри, гьабишдаа куьмег йиширдиш.

41– Гьай инаамиш джудгъӀуд не чӀири дишир ад илсанар! Шудаъ гьала Зы ваӀхьван хъикисдихь? Шудаъ За ваӀ гъетӀин лазим и? Гьака выды дух!

42Хыных бейде йиркьыйне, иблисере ми лука гьыъыри, джазба кеэйир. Амма ГьӀасара секин хъывыъыр иблис, хъыъыр хыных, дидды хыле хъывылцӀара. 43Сиенебишис Йинчид яхӀаа гьӀаламат руъура.

ГьӀасад чӀилмыд натыдже

Сиенебишис ГьӀасара гьаъадыы тааджиб руъудди, Гьание рухьура мутагьӀлимешде:

44– Хъадацур, За гьухьудбыйды йикӀыы хакьаъ! Илсанашды Дух илсанашды хыле хъывыси.

45Амма гьабишис гьацӀаардиший, шивди Гьание рухьуд, чӀилмыд натыдже гьабишыыла дагул виъий. Гьабыр гедылкьаардиш, гичӀинире худкас ки руъурдиш.

46МутагьӀлимешды гьӀаджет руъура, джваӀршиклаа выш кьухьа йиъиди. 47ГьӀасара, гьабише шыв фикир ваъаарди гьацӀара, лешур хыных, джуды бейдаа лаъ лузаъара. 48Хьели рухьура гьабишде:

– Гьал ми хыных Зы бадаана гьӀасаба гьыъырди,

Гьание Зы гьӀасаба гьаъара,

Гьал Зы гьӀасаба гьыъырди,

Гьание Зы Сигыд ки гьӀасаба гьаъаси.

ВаӀклаа кӀыъдыбыйды ки кьухьа и.

49Гьа гедеэне Янана рухьура ГьӀасада:

– МагьӀалим, ес са эдеми гьагури, гьание Выды дур хакьыр иблисмар йихъилгара ай. Амма е гьанийис къадагъа лихьири, гьа ехьван руъуд дишдыыла.

50– Къадагъабыр лимерихь. ВаӀхьван багьӀсе адишдыбыйды ваӀхьван йиъидаа и, – джываб хъывылцӀара ГьӀасара.

Самаритянаше ГьӀаса кьабыл гьыъырдиш

51ГьӀасад хӀале леръэсды вахт ливиркьара адыыла, Гьанийис Иерусалимди руъус йигара руъура. 52Гьание Джуды векилер хьура гине сидиргара. Тимбыр дуруъура самаритянашды мукъӀа, Гьанийис лазимды-герекды гьӀазыр гьаъас хьур. 53Амма ГьӀаса гьади кьабыл гьаъаардиш. Гьа Иерусалимди йиъине ад гьабгудыыла. 54Гьанийды мутагьӀлимеше Якьуба на Янана, гьааса йиъид гьагуйне, рухьура:

– Илагьи, йиганахъун Вас, е «хӀалаа цӀай йийир гьабыр тарг даъ» гьухьусиме?

55Амма ГьӀасара, хъуъ сукур, вылцӀаардиш гьааса гьаъас. 56Гьа гедеэне гьабыр мадды мукъӀа дуруъура.

«Кьул кивхьисды джыгаа адиш!»

57Гьабыр рыкъӀа ана, са эдемиере рухьура ГьӀасада:

– Зы вахдахъуна Ва гьили хьурди йыкьас гьӀазыр и. – 58СикӀешихда кьӀачӀбыр а, шурукмашихда – аӀкваӀлбыр, Илсанашды Духарыхда кьул кивхьисды джыгаа адиш, – джываб хъывылцӀара ГьӀасара.

Хъуъ лакъадиш!

59Маннийде хьуйне ГьӀасара рухьура:

– Йыкьа Захда хъуна.

– Гьай Илагьи, ихтияр ви суьхьде за хала хъыхьыр, дид кихьиси, – джываб вылцӀара тиние.

60Майитбыр майитмыра кихьий. Ва Йинчид ПагьӀчаалыгъаклаа хабар вияъ, – рухьура гьанийде ГьӀасара.

61Мадды эдемиере рухьура Гьанийде:

– Иесси, зы вахда хъуна йыкьаси. Амма ихтияр ви, зы суьхьде хала абишихьван гьахъагуси.

62– ГьахӀадед хыл хакьыр, хъуъ лакъадбыйды Йинчид ПагьӀчаалыгъас бакара йикисдиш, – джываб вылцӀара ГьӀасара.

موجودہ انتخاب:

Лукара йибкьыд Шадды Хабар 9: RUT

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Лукаады Шадды Хабар کے بارے میں مزید معلومات حاصل کریں