Лукара йибкьыд Шадды Хабар 7
7
ГьӀасара юзбашиед къул хъыъыри
1ГьӀаса, халкьдиде гьухьур йигабыр гьухьудыыла хъуъ, Капернаумди хъӀугъӀуре.
2Са юзбашияхда#7:2 ВаӀшды аскеред кьухьды. ай джус бала гирамигды са къул. Къулас едере йишир, йикьире ай, 3ГьӀасаклаа хабар вишийне, юзбашиере сидилгара Минийхда джавыдашды кьӀасдыбыр «йиркьыр къулас куьмег ви» хьур миннет хана. 4Йидкьыр ГьӀасахда мибыр миннитдис гидилхьвара:
5– Гьа эдеми куьмег вынис гид и, – рухьура гьабише. – Гьанийис ихьды халкь хъывгара, гьание и ес синагога лувза выъыд.
6ГьӀаса руъура мибишихьван. Гьабыр ледыркьара ай центурионды халда, тиние джуды хыдиймашде хана хабар сивигыйне:
– Джан Иесси, ва вас гудж мываъ. Изды хал Вы аӀчӀус лейих диш. 7Гьадыыла и зы вахда джиркьыд – Выды хал зы калдыбыр дыкьасды диш.
Ва гьихьяъ – изды къул гьади мадана хъикиси. 8Зы ки маннийды хылихьде ги, амма изды хылихьде ки эскерер ги, за сынийде гьухьуйне; «Рых», гьа руъура; маннийде «Миди йыкьа» хьуйне, гьа руъура, къулада «Мисе гьаъ» хьуйне, гьание ки гьаъара.
9ГьӀасас ми чӀилмыд ун йишийне, гьӀаламат руъура, ругъур Джухда хъуд илсанашде рухьура:
– За рухьура ваӀде, Израилди ки кине мисед инаамишвалды Зас гьувгуд диш.
10Векилешис, хала хъидкьыйне, къул ахъархьыр гьабгура.
ГьӀасара хиндадыед дух хъыъыри
11Бегедене ГьӀаса руъура Наин хьур дур гъад шегьерди. Гьанийихда хъуй мутагьӀлимер не эккед кӀабал илсанашды. 12Гьа шегьердид саргьӀатеде лийкьад гедеэне, шегьердаа гъаъ хай са хиндадыед ад са духарды майит. Гьанийихьван майитахда хъуй эккед илсанашды гьӀарасат.
13Хьыдылды гьаргуйне, Илагьиес минийды гьӀаюхь руъура.
– Мереш, – рухьура Миние.
14Бейде йыхьыр, Ми майитек кийкьара. Майит хад илсанар луьдуьбзуьре. ГьӀасара рухьура:
– Джигьил, рухьура вада, лухъуза!
15-16Джаназ лаъ хъишир, гьалгара кагъӀуре. ГьӀасара ми нинде хъывылцӀара.
Сиенебишис гичӀ йывхӀыр, Йинчихьде шукур ваъара кадгъӀуре.
– Кьухьды пайгъампар магьӀлим йишир а ихьды арыди, – рухьура гьабише. – Йинчире Гьа Джуды халкьдис куьмегне сигыр ад и.
17Минийклаады ихтилат сиене Иудеядыы на аа-уу ругъури,
ЯхӀйе-пайгъампарад суал
18ЯхӀйе-пайгъампарад мутагьӀлимеше хабар ваъара гьанийис ми сиене ихтилатмыклаа. 19ЯхӀйере сес выъыр джуды кьӀвар мутагьӀлим, сидилгара мибыр Илагьияхда худкас: «Вы йиркьыр лазимдыбыйды йиъиме, дишди е маннийихда гуьдкуьн лазим име?» 20Гьабише, йидкьыр, ГьӀасадаа хулкара;
– Хачилый ЯхӀйере сидигыдбыр диъи е худкас: «Вы йиркьыр лазимдыбыйды име, дишди е маннийхда гуьдкуьн лазим име?»
21Гьа гвалах вишир ай ГьӀасара балад илсанар ядлымыклаа азад дыъыйне, шийтӀамашде хадбишды шийтӀамар йихъигыйне, балад быркьӀыдбишис йаӀкв гьагва хъыъыйне. 22ГьӀасара джываб хъывылцӀара:
– Дырых, хабар ваъ ЯхӀйе-пайгъампарас, ваӀс гьагумыклаа на ун хъӀыхӀымыклаа:
быркьӀыдбишис гьахъабгура а,
тӀыркьӀыдбыр хъидирхьара а,
джузандыбыр темиз хъӀудире а,
бышдыбишис ун хъӀугъӀуре а,
дыркьыдбыр лаъ луьхъдуьбзуьре а,
касибешис Шадды Хабарад ун хъӀырыхӀыре а.
23Заа, шаклы джишир, инаамиш йишидбыйды бахтлы йиъи.
24ЯхӀйед векилер хъӀаадхӀыйне, ГьӀасара рухьура халкьдиде ЯхӀйе-пайгъампараклаа:
– ВаӀ гьидис къумди дыхьыдбыр диъи,
Хьыблихьде сильэре ад?
«НацӀалыхда гадкъас» хьур име?
25Бес ваӀ гьидис дыхьыд и къумди?
БытӀрад валыгмар гъад эдеми гьагусды калагур айме?
Бес бытӀрад валыг гъад эдемиер къалыма ешемиш дуруъуд дишме?
26Бес ваӀс выший гьагур йигад?
Пайгъампарахда ийме?
Ий, ваӀс гьагудбыйды пайгъампар и,
За рухьура ваӀде, гьа пайгъампарахъаъ ки лаъ хъу.
27Гьанийклаа и Диндид дахьвдарак кид:
«Ми За сигыд илчи йиъи Выды улихьде,
Выды улихьде гаӀчӀур, Вас рахъӀ ачых ваъасды».
28Рухьура ваӀде, сиене илсанашды улмутдик кидиш
ЯхӀйе-пайгъампарахъаъ лаъ хъуд,
Амма Аллагьад ПагьӀчаалыгъа сиенебишихъаъ кӀаъды ки,
гьанийхъаъ кьухьа и.
29Сиене халкь, ЯхӀйе-пайгъампарахда хъавалцвара ад, кире ягъмиш гьаъадбыр ки кине, Йинчид наятбыр дуьздыбырна гьӀасаб гьыъыр, вуруъура ЯхӀйехда хьед йыхӀыс выс. 30Фарисейер не Диндид магьӀалимер Йинчихда хъадацус джидчӀир, ЯхӀйе-пайгъампарада хьед йыхӀыс выс дичӀеэрдиш.
ГьӀасара рухьура:
31– Гьалыхьван хидхьис йикиси Задаа ихьды вахтиндид илсанар?
Гьалык кидикара гьабыр?
32Гьабыр гиме гид хынимешик кидикара,
сабыйдыбише тимбыйдыбишде рухьура:
«Е ваӀс тутул вырыхӀырей, ваӀ мукӀбыр гьыъырдиш».
– «Е ваӀс хулбыр гьаъарай, ваӀ хаджалат гьыъырдиш».
33ЯхӀйе йиркьыри, – я улеэрдиш, я рагъаардиш –
ваӀ рухьура; «Гьа делид и!»
34Йиркьыр а Илсанашды Дух, улере ки а, рагъара ки –
ваӀ рухьура: «Тиниъга, шууды невс ади,
кире ягъмиш гьаъадбишды на мадды лак-лукад хыди и».
35Амада Йинчид Гьакьал сиенебише гьакьдына гьӀасаб выъыри.
ГьӀаса Симан хьур дур гъад фарисейды хала а
36Са фарисейере ГьӀаса гьанкьуудыбыр гьаъас джуды хала сес ваъара. 37ГьӀаса йиркьыр фарисейды хала, улесдыбыр улед джигиди субкьура. ГьӀаса фарисейды хала ад хабар вишир, миди руръура са гунаабыр кид хьыдылды, гьӀатир ки къаба ана хана. 38ГьӀасад йыкьӀахда лурзур, решере ми хьыдылды. Нагъвбыр ки сагъӀуре ГьӀасад гъилабаа. Нагъвбыр джуды кьамчӀелиймыхьван темиз хъаъара, ГьӀасад гъилабас темени-теверзахӀ гьаъара, гьӀатир гъӀывхӀа вьаъара ай ми хьыдынийе.
39Ми гвалах гьувгуйне, ГьӀаса хала сес вьъыд фарисейере фикир ваъара: «Ми эдеми гьакьды пайгъампар йиъийди, Гьанийс гьацӀасий ми хьыдылды куч риъид». 40Амма ГьӀасара рухьура гьанийде:
– Симан, зас вада са кар гьухьус йигара.
– Гьихьяъ, МагьӀалим, – рухьура тиние.
41– Са эдемияхда ай кьӀвар бырджехъан, са йиъий хьудвеш танга бырджли, са – хьцӀцӀур. 42Амма бырдж хъывыс секкинийдаа руъура адиший, гьадыыла миние гьабишис бырдж багъыш гьаъара. Гьабишиклаа гьа эдеми балана хъыгара гьилнийис йикиси?
43– Зас гьацӀад, балад бырдж кинийис, – джываб хъывылцӀара фарисейере.
44– Ва дуьзене гьӀасаб гьаъара, – рухьура ГьӀасара. Хьели, ругъур хьыдынийихда, рухьура Симанда: – Вас гьаргварама ми хьыдылды? Зы выды хала йиркьыр а, ва зада гъилабыр сидгъасды хьед выр адиш. Гьание хьуйне джуды нагъвалмыхьван Изды гьилабыр силгъара а, джуды кьамчӀелиймыхьван къуру хъаъара. 45Вадаа Зас са темени гьаъас йиширдиш, гьание Зы йиркьыдыыла хъуъ Изды гъилабас теменибыр гьаъад хьур кьадар адиш. 46Вадаа Изды кьулуу хьӀаред гъӀыйхӀа гьаъас йиширдиш, гьание Изды гъилабас гьӀатирбыр йыхӀыри. 47Гьис иди гьухьуси за вада: гьанийис Зы гьааса хъыгара, джус балад гунаабыр За багъыш гьыъыдыыла. ЦӀамды гунаабыр багъыш гыъынийис цӀамна хъыдгад и. Хьели 48ГьӀасара хьыдынийде рухьура:
– Выды гунаабыр багъыш йиъи.
49Мадды мийманаше йикӀиклаана фикир ваъара: «Гьа выши, гьание гунаабыр багъыш гьаъас?» 50Амма ГьӀасара рухьура хьыдынийде:
– Вас выды инаамишваӀликлаа куьмег а. Хъырырых салам гъана.
موجودہ انتخاب:
Лукара йибкьыд Шадды Хабар 7: RUT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Библие мадды чӀилмыы хъывгад Институтара, 2004
