Лукара йибкьыд Шадды Хабар 14
14
Фарисейед хала
1Сада кишды йыгъа ГьӀаса руъура гьанкьуудис са курдис гьацӀад фарисейяхда. Гьанийыы ул гъана выъыр ай. 2ГьӀасад къаншара сукьури са хьед гаагъӀуре ад эдеми. 3ГьӀасара Диндид магьӀалимешдаа на фарисейешдаа хулкара:
– Кишды йыгъа даваа ваъас ихтияр ама, адишме?
4Тимбыр гиидилхьере. 5ГьӀасара, лешур эзерли, хъыъыр, хала сихъилгара. Гьабишде, хьуйне, рухьура:
– Выхьды гьалды-га дух я яц къуйе идхьухьна, ваӀ гьади мадана гьабыр гъаъ эхъетӀесдишме, гъаъ кишды йыгъ йиширки?
6Тимбишдаа шешин хъухьус хъӀугъӀурдиш.
МийманваӀле йиркьыйне мыкьладкалды ера сукьа
7ГьӀаса макъыет ий, гьал джус гьилды ер кеэвелъэре ади, хьели гьабишис ихтилат гьаъара:
8– Нагагь вы туйек сес выъыхьна, йыхды ер кеэпӀес чалыш магъӀв, гьис хьуйне, минкир виъи иессияхда вахъаъ лаъ хъуд вышди йыкьаси. 9Гьа гедеэне ваӀхӀде кьӀунисинийхда сес выъыд халды сагьӀиб меджбыр йикиси вада «Ми гьа ераа сагъв» гьухьус. Гьа гедеэне вы, рыхъӀ йишир, аа гид калды ераа сухъукьуныы сывхӀыси. 10Аммане вы сес ваъади, вы йыхьыр, аа гид писды ераа сукьа. Хьели ваа дур сыхӀыд эдемиере гьухьуси вада: «Дуст, миди лаъ кал сукьа!» Гьа гедеэне мадды мийманашис ки выды къадри викиси.
11ГьӀар джу выдж лаъ гьаъадбыйды саъ йикиси,
джу выдж саъ гьаъад – лаъ йикиси.
12Выдж хала сес выъыд фарисейде ГьӀасара рухьура:
– Ва йаӀкваӀд я гьанкьуудид гъыъыр, мийманар сес ваъади, дур сымарыхӀ я хыдиймашыы, я шубаӀшыы, я бейдедбишыы, я варлы къумшийшыы. Гьис хьуйне, хьели гьабише джвер вы ки сес хъывыъыр, хатир кихъиидхьуси. 13Мийманашис цухьра беземиш гьаъади, сес ваъ касибешихда, сур-хъӀырдыбишихда, бьӀркьӀыдбишихда на тӀыркьӀыдбишихда. 14Гьа гедеэне вадаа шад йикис йикиси: гьабишдаа вас мыкьый хъаъас йикисдиш, гьадыыла уджагълиер сыраа луьхъуьздуьд йыгъа гьа кар выды хьура лузаси.
15Гьа ихтилатад ун йишир, сабыйды мийманара рухьура ГьӀасада:
– Йинчид ПагьӀчаалыгъа туйек йикисды бахтлы йиъи!
16ГьӀасара хьуйне рухьура гьанийде:
– Са эдемиере туй ваъара, балад мийманар сес ваъара ай. 17УстӀулахда сыкьӀысды вахт йибкьыйне, гьание силгара къул, мийманашде гьухьус: «Дыкьа, сиене мыс иди гьӀазыр и». 18Сиенебыр кьул геэвере кадгъӀуре. Сахьусдыние рухьура гьанийде: «За хуй лешур а, зы чараасызна гьадыхда йыхьыр гакъыр йигара. Багъышлемиш гьаъ». 19КьӀвархьусдыние рухьура: «За йицӀыб яц луьвшуьр а, гьаммыра шууна гвалах ваъарди, гьала гакъыр адиш. Багъышлемиш гьаъ». 20Хьибырхьусдыние рухьура: «За къари рыъыр а, гьадыыла йыкьас йикисдиш!» 21Къул хъиркьыр, рухьура гьааса иессиеде. Тинийс хъӀал либкьыр, рухьура къулада: «КӀыбди рых шегьерди, кучимаа на эвирмаа касибер не, чӀудукуд-чӀиридбыр на, быркьӀыдбыр на, тӀыркьӀыдбыр хана хъикьа». 22Къулара рухьура гьанийде: «За ва гьухьуд кал гъыъыр а, амма гьала ербыр мада». 23Хьели иессиере рухьура къулада: «Рых рыкъӀмыда на масалмыда хадбыр ки сиене мидиъ сес ваъ. Изды хал мийманаше ацӀый. 24Амма ваӀде рухьура, суьхьде сес выъыдбишиклаа секки изды устӀулахда сукьусдиш!»
Шувна йикиси ГьӀасад мытагьӀлимне
25ГьӀасахьван йидкыри эккед илсанашды кӀабалбыр. Ругъур, Гьание рухьура мибишде:
26– Зы джуды дидыхъаъ, ниныхъаъ, къариехъаъ, хынимешихъаъ,
шубаӀшихъаъ, ришиймашихъаъ, джуды гьӀумирдихъаъ
балана хъыджыганийдаа, Зас мутагьӀлим йикисдиш.
27Джу джуды чӀир чӀеджеркӀванийдаа, Изды джыбра джугъӀунийклаа
Изды мутагьӀлим йикисдиш.
28Нагагь ваӀклаа гьалыс-га тӀуьнтӀуьй лувза ваъас йиганахъун, гьание суьхьде сукьур йикисды харджибыр кьыле гьаъасдишме, «шийибыр гъийкъасиме» хьур гакъара? 29Дишди гедеэне, къандах йывхӀыр, бин гихьийне гвалах лаабтӀва ваъас йикисдиш. Хьели гьанийыы яхъӀ лагъуси, 30рухьура: «Мигьай, бин гихьир, бегьем гьаъас джишид!»
31ПагьӀчаагьара ки, мадды пагьӀчаагьахьван дагьӀви ваъас гъилыы гъад гедеэне, суьхьде сукьур фикир вьыъын лазим и, «йикисимихъ джудаа йицӀыд гьагъзыр эскер хана къаад гьагъзыр эскер хад пагьӀчаагьахьван дагьӀви кеэпӀес» хьур. 32Джикиснехъун, сидигыр векилер, гъехълебеси.
33Гьааса ваӀ ки диъи: вахӀде шыв ади ки хьуъ хаджаабгъумаа ваӀдаа Изды мутагьӀлимер дикис йикисдиш.
34Кьел йыхды кар виъи,
амма кьел кьилирды дад кидне аджабгыхьвна,
шыв каъаси хабыйек?
35Гьа гедеэне гьа гьидисне лазим хъӀувгъӀурдиш,
гьадидаа накьв гъӀана ваъас ки йикисдиш.
Гьа кьӀаарды хьуъ лывъара!
Убрабыр кинийис ун йикий!
موجودہ انتخاب:
Лукара йибкьыд Шадды Хабар 14: RUT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Библие мадды чӀилмыы хъывгад Институтара, 2004
