Лукара йибкьыд Шадды Хабар 11
11
ГьӀасара шагырташис дугьӀа хӀар гьаъара
1Са хылис ГьӀасара гьилиъди дугьӀабыр гьаъара ай, гьа бегьем йишийне, сабыйды шагыртара рухьура Гьанийде:
– Илагьи, ес дугьӀабыр гьаъасды кал хӀар гьаъ. ЯхӀйе-пайгъампарара джудыбыр хӀар дыъыд шиви.
2ГьӀасара рухьура гьабишде:
– ДугьӀа гьаъади мисе гьихьяъ:
Дид!
Выды дур дуьнйады идхьуй!
Выды ПагьӀчаалыгъ выкьыхь!
3Ес гьӀар йыгъа ризкь вияъ.
4Ес гунаабыр багъыш гьаъ,
Гьис хьуйне, е ки ес писвалды выъыдбишис багъыш гьаъара.
Ихьды амзырбыр маъ.
5ГьӀасара рухьура гьабишде:
– ВаӀклаа сабыйнийихда хыди ай-га, вы выше йиркьыр гьанийихда, рухьура: «Хыди, зада бырджере хьиб хьыв вияъ. 6Захда гьемиссагьӀат рыкъӀаады хыди йиркьыр а, захда гьанийис кывысды шешин адиш». 7Гьание вада араа гъаъ гьухьус кар име: «Зы сатаъ! Рак удхур а, хынимер садхыр а, зы ки месихьде гаӀчӀур а. Задаа лаъ лузас вас хьыв вын бадаана йикисдиш?» 8Дуьзене рухьура За ваӀде, гьа хыдиваӀляа лузур ваӀс хьыв джывыхьнаки, ваӀ хъӀахъӀджаӀаӀчӀухьна, гьа чара джившир, лузур, ваӀс шивди йигад выси.
9– За рухьура ваӀде:
ягъӀаӀъ – ваӀс выси,
дуьгъуьргъе – агаси,
тӀакь-тӀакь ваъ – ваӀс аъаси,
10ГьӀар ягъӀаднийис вылцӀара,
ахтармиш гьаъадбишис алгара,
ригихда йидкьыдбишис аъара.
11Йикисиме выхьды арыди дид, духара балугъ вагъӀыйне, балгъуд ериндире ггар вылцӀад? 12Я ки, духара гъылыгъ вагъӀыйне, акьраб высды? 13Нагагь ваӀс, сертды илсанашис, гьацӀанахъун выхьды веледмашис йыхды выс, ХӀале Ад Диде ки выси Илагьиед РухӀ ягъӀадбишис!
ГьӀаса на ГьӀазаазул
14ГьӀасара йивилгара ай иблис, гьа лал даъад иблис виъий, – хьели, иблис игъивийне, лалды гьалгыри. Илсанашды кӀабалас гьӀаламат руъура. 15Са-садбише рухьура:
– Гьа ГьӀазаазул виъи, сиене иблисмыд кьухьды. Гьадире йиъи Гьанийис выр ад иблисмар йихъигасды гудж!
16Маддыбише хьуйне, Гьанийды амзырбыр гьаъас хьур, ягъӀаре Гьанийдаа ХӀалаады лышанбыр. 17Амма ГьӀасара гьабишды фикирмыклаа хабар ана, рухьура:
– Йиггад ПагьӀчаалыгъ, нагагь арабый къал викисды вишихьвна, сивере, хал ки, къал анахъун, лубкура.
18Иблис ки, видж джихьван дагьӀвие ад гедеэне, бес гьадид пагьӀчаалыгъ гебгасиме?
ВаӀ рухьура, За ГьӀазаазулад гуджехьван иблисмар йилгара. 19За иблисмар ГьӀазаазулад гуджехьван йилганахъун, бес выхьды халкьдид илсанаше гьидихьван йилгара? Гьабише выъыхь выхьды диван! 20Нагагь гуьре, За Йинчид гуджехьван йилганахъун иблисмар, гьа рухьуд чӀел виъи – Йинчид ПагьӀчаалыгъ вахӀде йибкьыр а. 21Нагагь джуды халды къаривыл гьаъад эдеми гуджли не ярах хад йиъинехъун, гьанийды эменнахӀ, миче, сагъна гедгаси. 22Амма нагагь сыхӀыхьвна гьанийыы джухъаъ гуджлид, гьание ми етеси, тиние хӀаашуси джу умуд выъыр ад ярах, хьели гъӀырч гвал ваъаси.
23Захда хъудишды Изды ута узур а.
Захьван ягъмиш джаъание, кабгъура а.
24Иблис эдемиед джандаа гъаъ хъибкьыйне, гьа хьед адишды къума вугъургъара, джус кьул кывхӀысды ер гьувургара. Хьели, ыджывгыр, рухьура джу джуда: «Изды куьйнед хала хъӀувгъӀус-гва». 25Хъибкьыйне, куьйнед хал темизене не хъадхьыр ахъылгара. 26Гьа гедеэне гьадире, выхьыр, вихире джухьван йывыб джухъаъ ки писды иблис. Йидкьыр, гьабыр миди маа субкьура. Эхирки ти эдемиес адыхъаъ ки пис руъура.
27ГьӀасара гьааса рухьуди, илсанашды йыкьӀаа хьуъ са хьыдыние лал ваъара: – Бахтлы риъи Вы ухьне ухӀуд не Вас тӀитӀ кывыд!
28– Маабыйды бахтлы йиъи Аллагьад чӀилды ун убра ад на гьадыхда хъабцуд! – джываб хъывылцӀара ГьӀасара.
Лышан
29ГьӀасад аа-уу илсанар баладире бала ягъмиш дуруъура ай. Гьание рухьура гьабишде:
– Шудаъ чӀири виъи аала лаъ виъина ад къафла!
Лышан ягъӀаре а, 30Амма гьабишис са лышан ки адиш, Иона лышанаала гъайри.
Шууна Ионаклаа лышан йиширди Ниневияди ешемиш дуруъудбишис,
гьааса йиъи илсанашды Дух гьамыъды къафлыдис.
31Виригъ лывхад суруулад хьыдылды-пагьӀчаа лурзаси диван ваъади
ми къафлыдид илсанашихьван, гьабыр нагьакь даъара:
гьис хьуйне, гьа дуьнйадид ти суруула йиркьыр а
Силийманды гьакьалдыхда хъарацус.
Миди, хьуйне, Силийманыхъаъ балад а!
32Ниневияшурыер луьздеси Эхир-Кьияматад йыгъа
ми тайхьвадыхьан, гьа нагьакь ваъара:
гьабыр гунуумыдаа хъуъ луьхъуьздири, Ионад ихтилатахда хъадацур.
Миди Ионахъаъ Эккед а!
33Гьална ливилхьеэрдиш луьвкӀва выъыд шийтӀаный
гьаджагвад джигиди, я дыкӀыехьде гивилхьеэрдиш.
Ваъ, гьа ирахьваа ливилхьере,
гъараа аъ йидкьыдбишис йаӀкв гьагун бадаана!
34Улабыр – илсанад йаӀкв йиъи.
Улабыр сагъ йиъинехъун, эдемиеде йаӀкв ад гьӀасаб йиъи,
улабыр чӀири йишир анахъун, эдеми мычӀахъваӀле а.
35Иди макъыет йиш выды улабад йаӀкв леджешун бадаана
36Нагагь выды джанде йаӀкв анахъун, мычӀахъды шешин адишнехъун,
ваклаа нур кеэреэдхьваси,
вак шийтӀаныед йаӀкв кид кал.
ГьӀасара фарисейешыы не Диндид магьӀалимешыы тахсир лиере
37ГьӀаса гьалгыр бегьем йишийне, са фарисейере сес ваъара Гьа джуды хала, гьанкьуудыбыр гьаъас. ГьӀаса йыхьыр хала, субкьура устӀулахда. 38Фарисейес гьӀаламат руъура. ГьӀаса тӀагьарат джыъыр, устӀулахда сукьур ана гьагуйне. 39Амма Илагьиере рухьура минийде:
– Гьеми ваӀ, фарисейер, гъара суруула выхьды кӀукӀуйбыр на дыкӀыйбыр темиз гьаъанахъунки, ара суруула ваӀ йикӀ чӀиридбыр на къанихдыбыр диъи. 40Лулумар! Бес гъарасур гьыъыние дишме арасур гьыъыр ад? 41КӀукӀуйма на дыкӀыйма адбыр сыйкъӀа гьаъ касибешыы – выхьды арасур ки гъарасур ки темиз йишидаа и!
42Хаджалат ваӀс, фарисейер!
ваӀ вылцӀара йицӀыбхьусды пай шыдкьыыла, рукьӀуула, мадды укьуула,
амма дуьзвалды на Йинчид хъыгынвалды йикӀыы гъамаадиш!
Йидж гьабыр гьыъыр йигара, мадды сиене ки йикӀыыла удха джыъыр!
43Хаджалат ваӀс, фарисейер!
ВаӀс синагогама араахьура сыкьӀыс йигад и,
ваӀс гьӀурмитдихьван салам выр йигара гимима.
44Хаджалат ваӀс!
ВаӀ сыл гъадишды сырбыр гьӀасаб диъи:
илсанар, хабар ки адишне, уула хьуъ дирхьара а.
45Гьа гедеэне сабыйды Диндид магьӀалимере рухьура ГьӀасада:
– МагьӀалим, ми чӀилмыра Ва ихьды хатир адгаъара!
46ГьӀасара рухьура:
– ВаӀс ки хаджалат, Диндид магьӀалимер!
ВаӀ илсанашыы лаъ кеэпӀес дживикисды бар ливилхьере.
Амма ваӀ тӀили тӀилиек кивилкьаардиш гьабишис куьмег бадаана!
47Хаджалат ваӀс!
ВаӀ пайгъампарашды сырымыы сылбыр лилхьере,
амма гьабыр йыдхӀыд выхьды дидабар диъи!
48Гьадире рухьура, ваӀ выхьды дидабашды гвалахбыр гьакь гьаъара хьур:
гьабише йыдылхӀарей пайгъампарар,
ваӀ пайгъампарашис сылбыр килхьере.
49Гьадыыла йиъи Йинчид гьакьалдире рухьуд:
«За сидигаси пайгъампарар на векилер,
сабыйдыбыр йыдхӀыси гьабише, тимбишихда хъидхьуси.
50Хьели За гьабишдаа сиене пайгъампарашды къан хъӀагъӀаси,
Дуьнйа халкь выъыдыыла хъуъды:
51Авельды къанахъаъды, Захариед къанахъаъды,
садакьабыр лирхьед кьвабад на уджуудид арыди йыхӀыд».
Йиъи, рухьура За ваӀде:
мибыйды куьлфитдис сиенемыхъаъ хъывыси!
52Хаджалат ваӀс, Диндид магьӀалимер!
ВаӀ гьацӀынид ачар выхьды джибе ихьири,
Я ваӀ аъ аӀчӀурдиш, я аӀчӀус йигад аъ сигырдиш.
53Гьааса ки гьухьур, ГьӀаса хъӀаархӀыри. ХъӀал либкьыр Гьанийыыла. Гьадыыла хъуъ фарисейер не Диндид магьӀалимер, кине-кине худкунбыр гьаъара каӀчӀури, Гьанийдаа чӀел хиибхьур, 54бейабыр гьаъас руъуд хьур.
موجودہ انتخاب:
Лукара йибкьыд Шадды Хабар 11: RUT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Библие мадды чӀилмыы хъывгад Институтара, 2004
