Matayo 5

Atʼu a raha na a shenene

(Luka 6:20-23)

1Jeso ariphoona maduu ga atʼu, wakotʼa vivi hata mwangoni achendasagala. Anafunzie achimutuwa, 2naye achiafunza gaga. 3Yiye waamba,

“Baha aratʼu adzimanyao chiroho ni achiya,

mana, ao Ufalume wa Mulungu ni wao.

4 # Isa 61:2 Baha o ashononekao vivi,

mana, Mulungu undakudzaangolangola.

5 # Zab 37:11 Baha o arumwengu,

mana, ao ndio ondahewa dunia.

6 # Isa 55:1, 2 Baha ao ario nzala yao na chʼiru yao ni kuhenda ga haki,

mana, andakudzamvunywa.

7Baha ao aaonerao mbazi anziao,

mana, Mulungu naye undaaonera mbazi.

8 # Zab 24:3, 4 Baha ao ario mwao myoyoni kʼamuna mai,

mana, ao ndio ondakwendamona Mulungu.

9Baha odzidinisa kwa kukale na reri,

mana, ao andaihiwa anangwa a Mulungu.

10 # 1 Pet 3:14 Baha ao ahenderwao mauku vivi kwa anahenda ga haki,

mana, ao uo Ufalume wa Mulungu ni wao.

11 # 1 Pet 4:14 “Ndo baha mwimwi chikala atʼu anamuhendera mauku, amuhakane na amusingizire munahenda mai gosi, kwakukala, mu anafunzi angu. 12#2 Mgu 36:16; Mahe 7:52Amuhenderapho vivyo, mwimwi hamirwani hata mupige njerejere, mana, manoso genu ni mabomu mulunguni. Vivyo bee ndivyoahendera hata ao agomvi a Mulungu omulongolera.”

Munyu na mwanga

(Mariko 9:50; Luka 14:34-35)

13 # Mar 9:50; Luk 14:34, 35 Jeso waenderera kwafunza anafunzie achiaamba, “Mwimwi munga dza munyu wa atʼu phapha duniani. Ela munyu uchikala kʼaukoza, undawudzadze kukala udzo kahiri? Uo nikukala kʼawokola na rorosi, na kwa vivyo, nikutsuphwa ukayahiwa ni achizi na njira.

14 # Joh 8:12; 9:5 “Mwimwi ndimwi murio dza mwanga wa atʼu phapha duniani, na munga dza mudzi ojengwa chidengodengoni, kwa vivyo kʼauyaya. 15#Mar 4:21; Luk 8:16; 11:33Atʼu kʼaasha taa na akarifinikʼira na daba, ela ariika dzulu-dzulu kwa hata riamwirikire atʼu osi mumo nyumbani. 16#1 Pet 2:12Ndo uricheni uo mwanga wenu wamwirikire atʼu kwa hata aone mahendo genu madzo, na phapho amulike Abayenu ariye mulunguni.”

Jeso unafunza dzulu ya Shariya ya Musa

17Jeso waamba, “Mutsʼone nákudzafuta Shariya ya Musa, hebu mafunzo ga agomvi a Mulungu. Mino tsʼidzire kudzagafuta gago, ela, nákudza kudzagachimiza. 18#Luk 16:17Ninamwambira jeri mino, mbingu na dunia zindakala na musindikizo, ela Shariya yindasala, na kʼakandafutwa hata kadona kamwenga kenye ka yiyo Shariya, hata gosi gachimire. 19Ndo mutʼu achivunza hata lagizo mwenga renye tu, na aafunze anjine kurivunza, hʼaya mutʼu yiye undatarwa ni wa musindikizo Ufalumeni kwa Mulungu. Ela yendagagwira na kufunza anjine agagwire nao, yiye undakala mubomu Ufalumeni kwa Mulungu. 20Ndo ninamwambira mino, yigwireni Shariya kuchira ao alimu a shariya enye na Afarisayo, mana, mutsʼiphohenda vivyo, bee kʼamundaphenya kamare Ufalumeni kwa Mulungu.”

Jeso unakanya kumenana

(Luka 12:57-59)

21 # Kul 20:13; Kʼumb 5:17 Jeso waamba, “Mwimwi mwasikira kukala akare enu áambwa, ‘Utsʼiulage,’ na ‘Yeyosi aulagaye nialamulwe.’ 22Ela ninamwambira mino, hata yeyosi amutsukirirwaye munziwe,#5:22 Nakala zinjine zinaonjeza: photsʼi chausa. nialamulwe vivyo. Yeyosi yendamuphurya munziwe, niaphirikwe mbere za ngambi ya Ayahudi. Na amuhakanaye munziwe, hʼaya yiye undakwendatsuphwa moho wa Jahanamu. 23Ndo uchikala utsuma ulavye sadakayo kwa Mulungu, ela phapho kare ukumbikire kukala munzio una undu nawe, 24anza kuyiricha yiyo sadakayo phapho, na wuye ukerekezane na yiye munzio, ndipho wudze, udze ulavye sadakayo. 25Na mulumbirio achikala unakuphirika kotini, erekezana naye maruru chimbere photsʼifiswa kuko kotini. Maana, uchifiswa kotini, yiye mulumbirio bee undakulavya kwa mulamuli, mulamuli akulavye kwa shikari, na yiye shikari andakutiya jela. 26Na ninamwambira jeri mino, uchitiywa kuko, kʼundalaa hata ulavye tʼatʼu yosi.”

Jeso unakanya atʼu dzulu ya kuzinga

27 # Kul 20:14; Kʼumb 5:18 Jeso waamba, “Mwimwi mwasikira kukala atʼu áambwa, ‘Utsʼizinge!’ 28Ela ninamwambira mino, hata amulolaye muche hebu mulume, na kumwazira kukala naye, bee ni kukala uhenda dambi ya uzinzi kare mwakwe moyoni. 29#Mat 18:9; Mar 9:47Ndo dzitsoro ra kulume richikuhenda uriche kunituwa, rishungulule uritsuphe kure. Ni baha kuyaza chilungocho chimwenga kuriko kukala na vilungovyo vyosi, na ukatsuphwe moho wa Jahanamu. 30#Mat 18:8; Mar 9:43Na mukonoo wa kurya uchikuhenda uriche kunituwa vivyo, utose wutsuphe kure. Ni baha kuyaza chilungocho chimwenga kuriko kukala na vilungovyo vyosi, na ukatsuphwe moho wa Jahanamu.”

Jeso unakanya marichano ga muche na mulume

(Matayo 19:9; Mariko 10:11-12; Luka 16:18)

31 # Kʼumb 24:1-4; Mat 19:7; Mar 10:4 Jeso waenderera kugomba achiamba, “Chisha atʼu áambwa, ‘Chila amurichaye muchewe, niamupʼe baruwa konyesa kukala, udzimuricha jeri.’ 32#Mat 19:9; Mar 10:11, 12; Luk 16:18; 1 Akor 7:10, 11Ela ninamwambira mino, chila amurichaye muchewe na hata kʼamugwirire na mutʼu, unamuhenda ahende dambi ya uzinzi ahwalwapho kahiri. Na hata ahwalaye yiye muche yerichwa, unazinga vivyo naye.”

Jeso unakanya dzulu ya kwapa Mulungu

33 # Alaw 19:12; Isab 30:2; Kʼumb 23:21 Jeso waenderera kugomba achiamba, “Chisha, mwimwi mwasikira vivyo kukala akare enu áambwa, ‘Uchapa kwa Mulungu, hʼaya utsʼichivunze chilaganecho chochiika. Uchapiracho Mulungu, niuchihende.’ 34#Jak 5:12; Isa 66:1; Mat 23:22Ela ninamwambira mino, vivi mutsʼape kamare. Mutsʼape mulunguni kwakukala, ni chihi cha ufalume cha Mulungu, 35#Isa 66:1; Zab 48:2hebu duniani kwakukala, ni chihiche cha kwikira magulu. Na mutsʼape Jerusalemu kwakukala, ni mudzi wa mufalume mubomu. 36Na utsʼape hata na chitswacho kwakukala, kʼwidima kuluhenda ludzere lumwenga lukale lweruphe, hebu lwiru. 37Ndo uchikala unagomba utʼu na ndivyo, amba kare, ‘Ndivyo.’ Na chikala tsʼivyo, amba kare, ‘Tsʼivyo.’ Chochosi kuchira gago, galaa kwa yuyatʼu Mui.”

Jeso unakanya dzulu ya kudziriphiza

(Luka 6:29-30)

38 # Kul 21:24; Alaw 24:20; Kʼumb 19:21 Jeso waenderera kugomba achiamba, “Mwimwi mwasikira kukala atʼu áambwa, ‘Mutʼu achimuhumbula munjine dzitso, naye nahumbulwe dsitso, na achimungʼola dzino, naye naangʼolwe dzino.’ 39Ela ninamwambira mino, vivi mutsʼimuremere gakwe mutʼu mui. Achikupiga ukofi kʼai ya kulume, uwe bee hata mugaluzire yiyo yinjine nayo apige. 40Achikala unakuphirika kotini kwa uhenza akuphoke shatiyo, muriche ahwale hata riro kotiro naro. 41Achikugaramisha kuutsukula muzigowe kʼilomita mwenga, uwe bee hata utsukule kʼilomita mbiri zenye. 42Achikuvoya-voya chitʼu, mupʼe, na achihenza kukukopa, utsʼimuremere gakwe.”

Jeso unakanya dzulu ya kwazira adawa

(Luka 6:27-28, 32-36)

43Jeso waenderera kugomba achiamba, “Mwimwi mwasikira kukala atʼu áambwa, ‘Muhenze jiranio, na mumene mudawao.’ 44Ela ninamwambira mino, ahenzeni adawa enu, na avoyereni hata ao amuhenderao mauku. 45Hendani gago, kwa hata mukale anangwa a Abayenu ariye dzulu mulunguni. Mwimwi tuwani gakwe ahendago. Yiye alavyapho dzuwa, unarilavya riamwirikire atʼu osi, adzo na ai. Mvula nayo achiyibitʼa, unayibitʼa yinye kwa atʼu osi vivyo, adzo na ai. 46Maana, muchikala mwahenza aratʼu amuhenzao nao tu, bee mukale munawirya kunoswa? Ngʼo kʼamuwirya, mana, hata atosi a kodi nao anagahenda gago! 47Na muchikala mulamusa ndugu zenu tu, mundakala kʼamuna tafauti na ataifa, mana, hata ataifa nao anagahenda gago. 48#Alaw 19:2; Kʼumb 18:13Kwa vivyo, mwimwi bee ahenzeni atʼu osi dza Abayenu Mulungu arivyo.”

موجودہ انتخاب:

Matayo 5: CHIDUR

سرخی

شئیر

کاپی