Maqtaeq 5
5
Gawqjawq-euq Khoertav Maeq-euq
Lk 6:20-23
1Yeqsur, tsawrhaq armaf mafma-anr ya’mawr ngae, gawqjawq-anr davler-awr nuir-euq mae. Khoerngae, zaqlanr deuq, aqyawf jawr-eu gar lar-euq mae. 2Khoerngae, aqyawf, khaqmae mrnga-awr aqyawf maf-anr heulof-aer maeqnaeq tsovnaeq-euq mae:
Guiqlanq Huiq-eu Tsawrhaq
3“Saflar-euq lafkhoer irshaq shaq-eu tsawrhaq deuq-aq, guiqlanq huiq-eu mae. Aqjeq mirnae aernar-aq, mqtav mirkhanq-aq, aqyawf maf-euq mae.
4“Ghawqshaq-aer ghae-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawf maf-anr bi noeqsarlar taef-a.
5“Nuima nanqyuni ghae-eu tsawrhaq deuq-aq, guiqlanq huiq-eu mae. Aqjeq mirnae aernar-aq, mirtsaq-aq, aqyawf maf-anr of-eu jeqbir mae.
6“Tsaq-awr dawr-eu jeq-anr maef-awr shuf-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawfmaf ya dzaqdaev ya dawrdaev taef-a.
7“Aqcawq-anr ghawqshaq gaqnya-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqcawq, aqyawf maf-anr ghawqshaq gaqnaeq taef-a.
8“Nuima shawrjaevni ghae-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawfmaf, Miqyaer-anr ya’mawr taef-a.
9“Tsaqler dzoerlerni mr-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawf maf-anr Miqyaer-euq zaq laer kur taef-a.
10“Tsaq-awr dawr-eu jeq-euq baqda’nae khaeq-awr khav-eu gar yadaq-eu tsawrhaq deuq-aq, guiqlanq huiq-eu mae. Aqjeq mirnae aernar-aq, mqtav mirkhanq-aq, aqyawf maf-euq mae.
11“Ngar baqda’nae aqcawq, nawmaf-anr yaeqbawq-aer aerlar, nawmaf-anr khaeqlar khavlar, maqngeur-eu gar jaqmyawf myawf-eu lafkhoer nawmaf-anr ghawqmya jeq aerdoerlar ngae, nawmaf guiqlanq huiq-eu mae. 12Laqkhaq caer-awr lurgha caergha-awq. Aqjeq mirnae aernar-aq, mq-euq khoertav nawmaf-euq mrpoeq lafsawq ghawqmya’ni jav-eu mae. Nawmaf-euq maeqhu daefyaf-euq Miqyaer gharduq ngaeqdan-eu tsawrhaq deuq-anr khawf, aqcawq, aqyawf maf-anr khoerlof-aer khaeqnaeq khavnaeq-euq mae.
Saqdeuf Hawr-eu Yawshaef
Mk 4:21-23; 9:50; Lk 8:16-18; 11:33-36; 14:33-35
13“Nawmaf-aq, mirtsaq-euq saqdeuf mae. Saqdeuf-aq, saqca tav-eu byov-ir nar-aq, aqjox-aer parbi tavlarnya nmr-mq? Saqdeuf khoer nuijeq-euq gharduq gardanr maqtsoeqni pyeuf-ir-euq mirnae, lafnyir shaevdzae-awr aqcawq nawqnawq-aer bican-eu gharduq taef-aer gardanr tsoeq-eu mae.
14“Nawmaf-aq, mirtsaq-euq yawshaef mae. Gawqjawq-euq uqdu jav-eu meuq-anr maq daeqkaqzaf nya-a. 15Tsirkhmq dof-awr, khavpuq nae moftsanq-eu zanr maqjav-a. Paeqzaq mazaq mawrnya’ni tsirkhmq ciqtaq duq-anr ciqdav taq-eu mae. 16Khoerlof-aer durni, nawmaf-euq yawshaef khawf aqcawq-euq maeqshi bibya-awq. Khoerlof-aer mr nar-aq, aqcawq, nawmaf mr-eu yawmuiq jeq-anr ya’mawr ngae, mq-euq khoertav jawr-eu nawmaf-euq Aqda-anr jaceuq taef-a.
Zanrdawq-euq Garkawv
17“Ngar, zanrdawq hawr-eu Miqyaer gharduq ngaeqdan-eu deuq-euq dawq-anr lavcawv le-euq nga laer taqnoeq. Ngar lavcawv le-euq maqngeur, mrbyan le-euq ma.
18Ngar, nawmaf-anr aqdirma-aer aernaeq nyar, mq hawr-eu mir byov-ir jir khawf, zanrdawq-euq lafkhoer-euq sanqbof tiq bof, tiq toeq taef-aer khawf maqbyov-ir-ar, dawqtawvluf ya byanlar taef-a. 19Khoermirnae, aqsur ghaq maqkaq, zanrdawq khofdawq-euq lafkhoer nae nyirdzaeq dzaeq-eu tiq dawq-anr maq mrcaw-aer, aqcawq-anr khawf khoerlof-aer maeqnaeq tsovnaeq nar-aq, aqyawf-aq, mqtav mirkhanq-euq lafkhoer nyirdzaeq dzaeq-eu ghaq laer yabi kur taef-a. Aerkhawf, aqsur ghaq maqkaq, aqyawf mrcaw-eu uqtaf, aqcawq khawf khoerlof-aer mrcawni maeqnaeq tsovnaeq nar-aq, aqyawf-aq, mqtav mirkhanq-euq lafkhoer yawhuiq ghaq laer yabi kur taef-a. 20Ngar, nawmaf-anr aernaeq nyar, nawmaf-euq tsaq-awr dawr-eu jeq, zanr maeq-eu deuq hawr-eu Paqliqsaer deuq navmaqtser maq myaqdzaeq nar-aq, mqtav mirkhanq-euq lafkhoer tiqjeq ghaenae-iq maqya urler-ar.
Nuima Paer-eu Garkawv
21“‘Tsawrhaq-anr taqsaef.
Tsawrhaq-anr saef-eu tsawrhaq-aq, yarkhaq dar-eu gar yadaq mae,’ (Di 20:13; Dm 5:17)
laer arhuba-euq tsawrhaq deuq-anr aernaeq taq-euq dawq, nawmaf yagaq-euq mae. 22Aerkhawf, ngar, nawmaf-anr aernaeq nyar, tiqjeq-iq garkawv maqjav-eu gar nae nuima kharpaer-eu tsawrhaq-aq, yarkhaq dar-eu gar yadaq taef-a. Aqyuif aqnyir-anr ‘Dawrga’ laer khardaeq-eu tsawrhaq-aq, khavma armur-euq#5:22 Khavma armur Armur heumur-euq lafkhoer tsawrhaq heudeuq keuq-eu mae: pirma aqyuif deuq, aqyuif aqtsu deuq hawr-eu zanr maeq-eu deuq. maeqshi yarkhaq dar-eu gar yadaq taef-a. Aqyuif aqnyir-anr ‘Aqdzawq argan’ laer khardaeq-eu tsawrhaq-aq, shiqbuir lanma miqdzaq-euq lafkhoer yadaq taef-a. 23Khoermirnae, nawr lawr-eu jeq, lawrduq-anr yurkeuv laf-awr lawr-eu laer ghae ngae, nawq-euq aqyuif aqnyir, nawq-anr nuima maqsar-eu tiqjeqnav jav-eu gar noeqdovlar nar-aq, 24lawr-eu laer ghae-eu jeq, lawrduq-euq maeqshi yurtaq yaf-awr, nawq-euq aqyuif aqnyir naeq-aer tsaqler dzoerlerni jeqhu janr-ir-awq. Khoersanr mirtsa ghoflar-awr lawrnaeq-eu jeq khoer lawrnaeq-awq.
25“Nawq-anr yarkhaq jaluf-eu ghaq naeq-aer yarkhaq dar-eu nymr-anr leluf ngae, nawnyaf-euq yawkaq yawkawr-aer lavtsaq-awq. Maq lavtsaq nar-aq, aqyawf, nawq-anr yarkhaq dar-eu ghaq-anr a’naeq taef-a. Yarkhaq dar-eu ghaq khawf nawq-anr lofpir-eu kuirlaf-anr a’naeq-awr, nawq-anr kuv-anr dawv taef-a. 26Ngar, nawq-anr aqdirma-aer aernaeq nyar, maq tsoeqtsaev-euq pyur tiq paev khardzer-eu khoer-aq, nawr, kuv-anr nae tiqjeq ghaenae-iq maqya dovle-ar.
Aqcawq Naeq-aer Banq-awr Joe-eu
27“‘Aqcawq naeq-aer taqbanq taqjoe’ (Di 20:14; Dm 5:18)
laer arhuba-euq tsawrhaq-anr aernaeq taq-euq dawq, nawmaf yagaq-euq mae. 28Aerkhawf, ngar, nawmaf-anr aernaeq nyar, zaqmiq aqbur-anr haw-awr, banqmawf joemawf-eu nuima anr-eu aqsur ghaq maqkaq, yawqha-euq nuima-euq lafkhoer zaqmiq aqbur khoerghaq naeq-aer banq-awr joeghaq-euq mae.
29Nawq-euq myavnuiv armar nuiv, nawq-anr iqbax bi mrlaf-euq ngeur nar-aq, myavnuiv khoernuiv-anr kheufdov-awr biqdzae-awq. Mawrdo dolan-aer shiqbuir lanma-anr bi bafanr ghae-eu navmaqtser, arsaer tiq saer biteq-ir-eu-aq, muiqdzaeq taef-a. 30Nawq-euq aqlaf armar laf, nawq-anr iqbax bi mrlaf-euq ngeur nar-aq, khoerlaf tovtsaev-awr biqdzae-awq. Mawrdo dolan-aer shiqbuir lanma-anr ya’ur-ir-eu navmaqtser, arsaer tiq saer bidanq-ir-eu-aq, muiqdzaeq taef-a.
Miqzaq Khof-eu
Mt 19:3-10; Mk 10:2-12; Lk 16:18
31 “ ‘Yawqha-euq miqzaq-anr khof nar-aq, aqyawf-anr khof-euq sanqbof tiq jae yabif-eu mae’ (Dm 24:1)
laer khawf aertaq-euq mae.
32Aerkhawf, aqsur ghaq maqkaq, yawqha-euq miqzaq banq-awr khaqmiq sheu-eu maqngeur-eu gar nae khofnaeq nar-aq, yawqha-euq miqzaq-anr banq-awr joe-eu tsawrhaq bipyeuf-ir ni janr-eu mae. Miqkhof khoerghaq-anr kharsheuq-eu ghaq khawf, banq-awr joe-eu mae.
Kamq-eu Garkawv
33 “ ‘Nawr maq mrnya-eu jeq-anr taqkamq. Aerkhawf, nawq nae kamq-euq lof-aer Sanqpaq Miqyaer-euq maeqshi mrbyan-awq’ (Bts 30:2; Dm 23:21-23)
laer arhuba-euq tsawrhaq-anr aernaeq taq-euq dawq, nawmaf yagaq-euq mae. 34Aerkhawf, ngar, nawmaf-anr aernaeq nyar, tiqpawf-iq taqkamq, mq-anr ghoe-awr taqkamq. Aqjeq mirnae aernar-aq, mq-aq, Miqyaer-euq nuirmanq mae. 35Mirtsaq-anr ghoe-awr taqkamq. Aqjeq mirnae aernar-aq, mirtsaq-aq, Miqyaer-euq aqkuir cawqtaqduq mae. Yeqlursaqlaeq-anr ghoe-awr nae khawf taqkamq. Aqjeq mirnae aernar-aq, Yeqlursaqlaeq-aq, huiq-eu Sanqpaq uqdzan ghaq-euq meuq mae. 36Nawq-euq uqduq-anr ghoe-awr nae khawf taqkamq. Aqjeq mirnae aernar-aq, tsaerkanr tiq kanr pyurlar, navlarni nawr maq janrnya-a. 37Nawq-euq dawq-aq, ngeur nar-aq, ‘Ngeur ma,’ maqngeur nar-aq, ‘Maqngeur’ laer taef-aer aer-awq. Khoertaf-aer dzaeq-ir-euq nar-aq, yawdoer ghaq-anr nae oe-euq mae.
Aqcawq-anr Janrkhof Naeq-eu
Lk 6:29-30
38 “ ‘Myavnuiv-euq poeq-aq, myavnuiv, seuq-euq poeq-aq, seuq’ (Di 21:24; Lb 24:20; Dm 19:21)
laer aertaq-euq dawq, nawmaf yagaq-euq mae. 39Aerkhawf, ngar, nawmaf-anr aernaeq nyar, tsawrdoer-anr taq caekhof. Aqcawq, nawq-euq baqba armar paw taevlar nar-aq, yawqpyawqyawq ciqdaq naeq-awr bitaev-awq. 40Aqcawq, nawq-anr yarkhaq ja-awr paerkhanq lafkhoer kanr yurmawf nar-aq, lafnyir kanr khawf biyur-awq. 41Aqsur ghaq maqkaq, nawq-anr katir-awr garma tiq lotsov bi’ir naeqlaf nar-aq, nawr, aqyawf naeq-aer nyiq lotsov keuvni ir-awq. 42Nawq-anr shar-eu tsawrhaq-anr bif-awr, nawq-anr ngaqmawf parmawf-eu tsawrhaq-anr garjaw taq jawnaeq.
Muirlar-eu Tsawrhaq-anr Gaq-awq
Lk 6:27-36
43 “ ‘Nawq-euq dawqpae jawr-eu tsawrhaq-anr gaq-awr, nawq-anr muir-eu tsawrhaq-anr byae-awq’ (Lb 19:18)
laer aertaq-euq dawq, nawmaf yagaq-euq mae. 44Aerkhawf, ngar, nawmaf-anr aernaeq nyar, nawmaf-anr muir-eu tsawrhaq-anr gaq-awr, nawmaf-anr yaqkhaer yaq-eu tsawrhaq-anr dawq ngaeqghae naeq-awq. Nawmaf-anr byae-eu tsawrhaq-anr yawmuiq jeq janrnaeq-awr, nawmaf-anr khaeqlar khavlar-awr, yaeqbawq-aer zmqlar-eu tsawrhaq-euq gharduq guiqlanq shar-awq. 45Khoerlof-aer mr nar-aq, nawmaf-aq, mq-euq khoertav jawr-eu Aqda-euq zaqdeuq pyeuf-eu mae. Aqjeq mirnae aernar-aq, aqyawf-aq, tsawrmuiq-euq gharduq khawf tsawrdoer-euq gharduq khawf nanrma bi dovlar-awr, tsaq-awr dawr-eu tsawrhaq-euq khoertav khawf, maqtsaq maqdawr-eu tsawrhaq-euq khoertav khawf uqyaer bi yaerle-eu mae. 46Nawmaf, nawmaf-anr gaq-eu tsawrhaq-anr taef-aer gaq nar-aq, aqjeq-euq mrpoeq lafsawq za-eu? Jeq taf-eu#5:46 Jeq taf-eu Tiqdeuq nav-aq, kawq taf-eu laer khawf kur-eu mae. tsawrhaq khawf khoerlof-aer janrluf-eu maqngeur-a lor? 47Nawmaf, nawq-euq aqyuif aqnyir-anr taef-aer dawqcawqpuq nar-aq, aqcawq taf-aer aqjeq dzaeq-eu le? Jeq taf-eu tsawrhaq khawf khoerlof-aer mrluf-eu maqngeur-a laq? 48Khoermirnae, mq-euq khoertav jawr-eu nawmaf-euq Aqda byan-eu lof-aer nawmaf khawf byanlar-awq.
موجودہ انتخاب:
Maqtaeq 5: AKA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
2018 ©
Bibles International ®
The Bible Society of Baptist Mid-Missions
