Maqtaeq 11
11
Yorhaq-euq Zaqlanr, Yeqsur-anr Narhaq Ler-euq
Lk 7:18-35
1Khoerngae, heulof-aer pyeuflar-euq mae. Yeqsur, zaqlanr 12 ghaq-anr khoerlof-aer dawq bifghaq-euq nar-aq, meuqdeuq-anr dawqmaeq maeq-awr, maeqnaeq tsovnaeq-eu laer khoergar nae dov-ir-euq mae.
2Yorhaq, kuv-anr urluf ngae, Kali gar mrluf-eu garkawv yagaq-euq mae. Khoermirnae, aqyawf-euq zaqlanr nyiq ghaq-anr khaerghae-awr, 3Yeqsur-anr heulof-aer bi narhaq ler-euq mae, “Oe taef-a laer aer-eu khoerghaq, nawr ma lor? Maqngeur nar-aq, nga’maf yawqghaq yawq-anr parya dawq-a siq laq?”
4Yeqsur, aqyawf nyaf-anr heulof-aer aerkhof naeq-euq mae: “Nawnyaf ghof-ir-awr, yagaq-awr ya’mawr-euq deuq, Yorhaq-anr dzawrnaeq-ir-awq. 5Myavbaef mawrnyalar, kuircawv cannyalar, coiqdoi nar-eu tsawrhaq shawrlar, naqbawq deuq gaqnyalar, shir-euq tsawrhaq ghofdaef lar-awr, irshaqzaq deuq guiqlanqdawq yagaq-euq mae. 6Ngaq-euq baqda’nae sanqtif maqtif-eu tsawrhaq-aq, guiqlanqhuiq taef-a.”
7Yorhaq-euq zaqlanr deuq ghofdov-ir luf ngae, Yeqsur danqbae-awr, Yorhaq-euq garkawv tsawrhaq armaf mafma deuq-anr heulof-aer aernaeq-euq mae: “Nawmaf bawrtsanq bawrdanr-anr ir-awr aqjeq-anr haw-eu laer ir-euq le? Jaqlaer baw-eu mirnae nyaeluf-eu artof-euq arkanq-anr laq? 8Aqdir aernar-aq, nawmaf aqjeq-anr haw-ir-eu laer dov-ir-euq le? Jurgafni ghae-eu maeqtsoeq dmluf-eu tsawrhaq-anr haw-ir-euq le lor? Jurgafni ghae-eu maeqtsoeq dmluf-eu tsawrhaq-aq, sanqpaq-euq nymr-euq lafkhoer jawr-eu mae. 9Maqngeur nar-aq, nawmaf dov-ir-awr aqjeq-anr haw-ir-euq le? Miqyaer gharduq ngaeqdan-eu tsawrhaq-anr laq? Ngeur mae. Ngar, nawmaf-anr aernaeq nyar, aqyawf-aq, Miqyaer gharduq ngaeqdan-eu tsawrhaq nuideuq navmaqtser huiqdzaeq-eu mae. 10Yaerbof-euq lafkhoer boftaq-euq heudawq-aq, Yorhaq-anr aermawf-eu mae.
‘Hawde-eq. Ngar, ngaq-euq ghaqzaq ghaqkhaer-anr nawq-euq maeqhu bi’ir-awr,
Nawq-euq maeqshi garma bi shardanr-ir ma.’ (Mlk 3:1)
11“Ngar, nawmaf-anr aqdirma-aer aernaeq nyar, zaqmiq aqbur-anr nae khar daefle-euq tsawrhaq-anr nae, bartirsaq mrnaeq-eu Yorhaq navmaqtser huiqdzaeq-eu tiqghaq-iq maq dovlar haw-aq. Aerkhawf, mqtav mirkhanq-euq lafkhoer nyirdzaeq-eu ghaq khawf, Yorhaq navmaqtser huiqdzaeq-eu mae. 12Bartirsaq mrnaeq-eu Yorhaq dovle-euq yamq-anr nae iqnan keuvni, mqtav mirkhanq za’ni deuvcae caeluf-eu mae. Nuima keuv-awr deuvcae cae-eu tsawrhaq deuq-aq, deuvza luf-eu mae. 13Miqyaer gharduq ngaeqdan-eu tsawrhaq dawqtawvluf hawr-eu zanrdawq-aq, Yorhaq-euq zir-anr keuvni panmaeq taq-euq mae. 14Nawmaf hageuf ma laer nar-aq, Erlirya oe taef-a laer aertaq-euq khoer-aq, Yorhaq-anr aer-eu mae. 15Naqbawr tsof-awr khar gaqnya-eu tsawrhaq narhaq-awq!
16“Heuzir-euq tsawrhaq-anr ngar aqgeu jeq nae sheucaev haw-eu paq nga? Aqyawf maf-aq, laevkawv-anr nuir-awr aqyawf maf-euq cawqdeuq-anr gurcawq luf-eu zaqdeuq-anr dur-eu mae:
17‘Nga’maf, nawmaf-euq gharduq lafjeq baw-eu khawf, nawmaf lafjeq maqtsawq-a. Nga’maf, nawmaf-euq gharduq tsawrngoer ngoer-eu khawf, nawmaf maqngoer-a.’ 18Yorhaq oe ngae, maqdzaq maqdawr-eu mirnae, aqcawq, ‘Aqyawf-aq, naef ur-eu tsawrhaq nga’ laer aer-eu mae. 19Tsawrhaq-euq Zaqyo oe ngae, dzaq khawf dzaq, dawr khawf dawr-eu mirnae, aqcawq, ‘Tsawrhaq heughaq-aq, jiryaef maqbeur-eu dzaqma dawrma pyeuf-eu uqtaf, jeq taf-eu tsawrhaq hawr-eu iqbaxzaq-euq cawq nga’ laer aer-eu mae. Aerkhawf, zaqsiq tsawrganr-aq, tsaq-awr dawr-eu nga laer aqyawf-euq zaqdeuq mrdov shardov laf-eu gar nae siqlar-eu mae.”
Maq Noeqpov Maq Noeqpar-eu Meuqdeuq
Lk 10:13-15
20Dzeurlaf ngae, Yeqsur nae baoq huiq-eu gardeuq ghawqmya’ni mr-euq meuqdeuq-anr jawr-eu tsawrhaq deuq, maq noeqpov maq noeqpar-eu mirnae, Yeqsur, aqyawf maf-anr heulof-aer daeq-euq mae: 21“Kawrlaqseq-or! Nawr ghawqshar shaq-aer ya ghaesaef taef-a. Baeqdzerdaq-or! Nawr ghawqshar shaq-aer ya ghaesaef taef-a. Aqjeq mirnae aernar-aq, nawmaf-euq lafkhoer mr-euq baoq huiq-eu gardeuq, Durlu meuq hawr-eu Sirdoq meuq-euq lafkhoer mr-euq lawnmr-aq, aqyawfmaf arhu nae guqdar paerzeur dm-awr, khaqlaer tawvdav tawvdav-aer noeqpov noeqpar taef-a. 22Aerkhawf, ngar, nawmaf-anr aernaeq nyar, yarkhaqdar ngae nan, Durlu meuq hawr-eu Sirdoq meuq-aq, nawmaf nav-aer maqya daq-ar. 23Gaqbeqneqoq-or! Nawr-aq, mq-anr tuvni bi ciqgor taq-euq khawf, shir-eu mirkhanq-anr yabi gheu’anr ghae taef-a. Aqjeq mirnae aernar-aq, nawq-euq meuq-anr mr-euq baoq huiq-eu gar khoerdeuq, Sordoq-euq lafkhoer mr-euq lawnmr-aq, meuq khoermeuq iqnan keuvni jav taef-a. 24Aerkhawf, ngar, nawmaf-anr aernaeq nyar, yarkhaqdar ngae nan, Sordoq meuq-aq, nawmaf nav-aer maqya daq-ar.”
Ngar Jawr-eu Gar Lar-awq
Lk 10:21-22
25Khoerngae, Yeqsur heulof-aer aer-eu mae: “Mq hawr-eu mir-euq Yawsanr pyeuf-eu Aqda-or! Ngar, nawq-anr jaceuq ma. Aqjeq mirnae aernar-aq, nawr, zaqsiq tsawrganr anr-eu tsawrhaq hawr-eu noeqdanr doe-eu tsawrhaq-anr nae garkawv heudeuq zaftaq-awr, zaqnanq deuq-anr panmaeq naeq-eu mae. 26Aqda-or! Heu-aq, nawr nuima tsaq-eu jeq pyeuf-eu mae.
27Yawqjeq navluf ngaqDa nae ngaq-anr a’naeq laf-euq mae. Aqda Miqyaer maqngeur nar-aq, Zaqyo-anr tiqghaq-iq maq siqnya-a. Zaqyo hawr-eu Zaqyo panmaeqnaeq mawf-eu tsawrhaq maqngeur nar-aq, Aqda Miqyaer-anr tiqghaq-iq maq siqnya-a.
28Khavbaev yawkan pi-awr ghaqdoer doer-eu tsawrhaq yawqghaq navluf, ngar jawr-eu gar lar-awq. Ngar, nawmaf-anr ghaqnaq bi’naq ma. 29Ngar-aq, nuima nanqyuni ghae-awr nuinanq nuiyu anr-eu ma. Nawmaf, ngaq-euq khavbaf baf-awr, ngaq-anr dzawgeuf-awq. Khoerlof-aer dzawgeuf nar-aq, nawmaf-euq nuima saflar ghaqnaq za taef-a. 30Aqjeq mirnae aernar-aq, ngaq-euq khavbaf-aq bafmuiq-awr, ngaq-euq khavbaev-aq yawpyar ma.”
موجودہ انتخاب:
Maqtaeq 11: AKA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
2018 ©
Bibles International ®
The Bible Society of Baptist Mid-Missions
