JOHANE 12

Jesu kushingwa mavuda aja Bethania

(Mat. 26.6-13; Mk. 14.3-9)

1Matuku arandadu imbiri ya Pasaka, Jesu ukacha Bethania muzi ghwa Lazaro, uo oremrukishireghe kufuma kwa wafu. 2Nao aho wikamkaribisha kwa vindo va nakenyi, na Marita ukakaia ukidumika; ela Lazaro orekoghe umu wa waja werekoghe kidombo mezenyi andwamweri na Jesu. 3Nao Maria ukawada chupa ya marumba gha nardo nusu lita, nagho ni gha zoghori ya ighu na ndighi; ukamdiria Jesu maghu ghake, na kumuaghia kwa iridia jake. Nyumba yose ikanuka marumba mecha.#Lk. 7.37-38 4Ela Juda Iskarioti, umu wa waja ikumi na wawi, (nao nuo moni uchaamfunya Jesu) ukaghamba, 5“Kwaki mavuda agha ghisauzwagha kwa pesa dinari maghana adadu na kunekwa wakiwa?” 6Oreghorieghe agho, si angu orewitalieghe wakiwa anduangi, ela ni iji orekoghe kitoi; na angu nuo oredwagha mfuko ghwa pesa orekoghe ukiiwa pesa rerekumbiloghe andenyi. 7Jesu ukaghamba, “Mlekenyi uhu muka; sighenyi ughiwike agho kwa wundu ghwa ituku ja mariko ghapo. 8Wakiwa moko nawo matuku ghose, ela ndemchaakaia na ini matuku ghose anduangi.”#Wuk. 15.11

Njama rem'bwagha Lazaro

9Nao iji Wayahudi wasikira angu Jesu orekoghe Bethania, wikaghenda aho; si kwa wundu ghwa Jesu tu, ela wokoni kwa wundu ghwa kummbona Lazaro uo Jesu oremrukishireghe kufuma kwa wafu. 10Na wokoni wakohani wabaa wikabonya njama em'bwagha Lazaro, 11angu kwa wundu ghwake, Wayahudi wengi werekoghe wikiwisigha awo, na kumrumiria Jesu.

Jesu kungia Jerusalemu ukizumilwa

(Mat. 21.1-11; Mk. 11.1-11; Lk. 19.28-40)

12Nakesho yaro, izungu ibaa ja wandu werechieghe kwa Ndima ya Pasaka, wikasikira angu Jesu orekoghe ukicha Jerusalemu. 13Wikafuma kummara wikidwa masawi gha mitende, na kukasa kwa lwaka wikighamba,

“Hosana!

Warasimilwa uo uchagha kwa irina ja Bwana.

Nderasimilo Mzuri wa Israeli.”#Zab. 118.25-26

14Nao iji Jesu wampata mwana wa punda, ukajoka aighu yake sa iji koni iandikilo,

15“Kusakeobua oho muzi ghwa Sioni;

Ola Mzuri wako uacha,

wajoka aighu ya mwana wa punda!”#Zek. 9.9

16Ngelo iyo wanughi wake ndeweretambukiloghe ni agho, ela iji Jesu wameria kujoswa kwa wubaa, niko wikakumbuka angu maza iri rereandikiloghe aighu yake, na angu werebonyereghe agho kwa wundu ghwake.

17Waja wandu werekwanyeghe na Jesu ngelo oremrukishagha Lazaro kufuma kwa wafu, wereghorieghe iro maza rerebonyekieghe. 18Shekeria ya ijo izungu ibaa kummara ni angu weresikireghe kukaia Jesu orebonyereghe uo mwakilimbiti. 19Nao Mafarisayo wikazerana weni na weni, “Zighanenyi seji disedimagha kubonya ilagho jingi, wurumwengu ghose ghwamnugha.”

Wagriki wamu kulola Jesu

20Korekoghe na Wagriki wamu aghadi ya wandu werechieghe Jerusalemu kutasa ngelo ya ndima. 21Wandu awo wikamchea Filipo mundu wa Bethsaida ya Galilaya, wikamzera, “Bwana, isi dakunde kummbona Jesu.” 22Filipo ukaghenda na kumghoria Andrea, nawo wose wawi wikacha na kumghoria Jesu. 23Nao Jesu ukawizera, “Ngelo emkasa Mwana wa Mdamu yameria kuvika. 24Namghoria loli, ngera mbeu ya ngano isepotokagha andonyi na kufwa, ichakaia cheni iekeri, ela ikafwa ichava viro vingi. 25Uo ujikundagha irangi jake uchajilaghasha, na uo uzamilwagha ni irangi jake aha wurumwengunyi, uchajiwika hata irangi ja kala na kala.#Mat. 10.39; 16.25; Mk. 8.35; Lk. 9.24; 17.33 26Uo ose ukundagha kunidumikia, ni suti uninughe ini, na andu nichaakaia ini, nikokoni na mdumiki wapo uchaakaia wori; mndungi ukanidumikia, uo moni uchabonyerwa ishima ni Aba.”

Jesu kughora aighu ya kifwa chake

27“Idana ngolo yapo yaja wasi. Nighora wada? Niaghora, ‘Aba kunikire na ihi ngelo?’ Ii hata, nedecha kwa wundu ghwa ihi ngelo. 28Aba, jikase irina jako.” Nao lwaka lukacha kufuma mlungunyi, “Nameria kujikasa sena nichajikasa.”

29Wandu werekoghe kimusi wikalusikira ulo lwaka, na wamu waro wikaghamba, “Ni lukuwa lwadeda.” Wazima wikaghamba, “Malaika waghora nao.” 30Ela Jesu ukawizera, “Lwaka ulu ndeluchee kwa wundu ghwapo ini, ela kwa wundu ghonyu. 31Idana ngelo ya wurumwengu ughu kutanywa yavika, idana m'baa wa wurumwengu ughu uchakumbwa noko. 32Nani ngameria kujoswa aighu ya ndoenyi, nichawiruda wandu wose cha kwapo.” 33Agha oreghighorieghe kwa kuwonyera ni kifwa chifwane wada uchaafwa.

34Nao ijo izungu jikamtumbulia, “Isi daghorelwa ni Sharia edu angu Kristo uchadua kwa kala na kala. Yakaia wada oho kughora, ‘Suti Mwana wa Mdamu ujoso aighu?’ Uo Mwana wa Mdamu nani?”#Zab. 110.4; Isa. 9.7; Eze. 37.25; Dan. 7.14 35Jesu ukawitumbulia, “Mwengere ghoko andwamweri nenyo kwa ngelo vui eni. Ghendenyi iji muko na ugho mwengere, msecheserelwa ni kira, angu uo ughendagha kirenyi, ndemanyagha andu ughendagha anduangi. 36Iji muko na ugho mwengere mughurumirie; mpate kuwuya wana wa mwengere.”

Wandu kusowa irumirio

Nao nyuma ya kughora malagho agho, Jesu ukaghenda chia yake, ukakuvisa, na kukaia kula nawo. 37Hata ngera Jesu orebonyereghe awa weke mwakilimbiti wose imbiri yawo, ela ndewererumirieghe kwake anduangi, 38edeeka huwo eri malagho ghereghoreloghe ni mlodi Isaya ghipate kukatia:

“Bwana, nani oreghirumirieghe malagho ghedu?

Na ndighi ra Bwana rerewonyeroghe kwani?”#Isa. 53.1

39Kwa huwu ndeweredimieghe kurumiria, angu Isaya waghora sena:

40“Mlungu wawifunga meso ghawo,

na kurikurisha akili rawo

eri meso ghawo ghisepate kuwona,

na akili rawo risetambukilo,

wisechenighalukia, nipate kuwiboisa.”#Isa. 6.10

41Isaya oreghorieghe malagho agha angu oreghuwonieghe wubaa ghwa Jesu, nao ukaghora malagho ghake. 42Elaima sena, wengi wa vilongozi wa Wayahudi weremrumirieghe Jesu; ela kwa wundu ghwa Mafarisayo, ndewereghorieghe worinyi anduangi, angu wereobueghe kuwingwa sunagoginyi; 43sena angu werekundieghe kukaswa ni wadamu kuchumba kukaswa ni Mlungu.

Ilagho ja Jesu nijo jitanyagha

44Nao Jesu ukaghora kwa lwaka lubaa, “Mndungi ukanirumiria ini, ndenirumiriagha ini tu, ela wamrumiria uo orenidumieghe. 45Na uo uniwonagha ini, wammbona uo orenidumieghe wori. 46Ini nachee kukaia mwengere wurumwengunyi, eri uhu unirumiriagha usesigharike kirenyi. 47Uo usikiragha ilagho japo nao ndejiwadagha, simtanyagha anduangi; angu ini serechieghe kughutanya wurumwengu, ela kughukira. 48Uo unileghagha ini, nao ndewadagha malagho ghapo, oko na umu umtanyagha. Ilagho jija nijighorie, nijo jichaakaia mtanyi wake ituku ja kutua mbai. 49Angu sereghorieghe kwa nguma rapo reni anduangi, ela Aba orenidumieghe nuo oreninekieghe momu, nidede ghiao, na nighore ghiao. 50Nani namanya angu momu ghwake ni irangi ja kala na kala. Kwa huwu agho nighighoragha ni agho gheni Aba orenilaghirieghe.”

موجودہ انتخاب:

JOHANE 12: TAITA

سرخی

شئیر

کاپی