Génesis 8
8
Ko ojts ja komtuu nyajxnë
1Ënät yë Tios ojts tja'amyetsy ja Noé ets ja jëyujkëty jënu'un ënäty jap yajpaatën mëët ja Noé ma kepy nëëwinye'epyën. Tääts tyajpëtsëëmy yë jëënpoj naaxwiiny ets ojts ëka'any ja nëë jyënajktsoony. 2Ojts y'ëtuky ja mëj nëëjut mëti'ipë ënäty jap të y'ëwa'atsyën naaxpa'tkë'p ets ja nëë tuu mëti'ipë ënäty jam të kyupëjyën tsajpwinm. Jëtu'un'äämpy ojts ja tuu nyajxnë. 3Ënät ëka'any ja nëë wäänjaty tyëtstso'onë. Ko mëko'px ja wëxtyikxy majk y'apejty kujk ënäty ëka'any ja nëë tyëtsnë. 4E ko myajkmokxmäjtsk aany ja mëwëxtujkpë ja po'o, ënät ojts ja kepy nëëwinye'epyë ëka'any nyaaxpaaty ma tu'uk ja kopk txëëwatyën Ararat. 5Ja nëë ni'ikyë ënäty jyënajk'ëtë'ëtsy ets jëtu'un tyëtsnë wäänjaty. E ko tyu'uk aany ja po'o ja mëmajkpë këxë'knëp ënäty kanaak ja kopk mëti'ipë këjxmëtyën.
6Kom wëxtyikxy xyëëw ojts ja Noé tyaj'ëwa'atsy ja kepy nëëwinye'epyë ja nyi'ëwa'atsajtën mëti'ipë ënäty të t'oytyunyën. 7Ets ojts tnajtsmatsë tu'uk yë jooky. Ja jooky je'eyë ojts kyäkminy kyäkxëpy tja'ëwxity jëna'a ja naaxwiinyëtë y'ëknitëtstu'uty. 8Ko ojts jëtu'un t'ëknajtsmatsë ja jooky, ënät ojts ok tnajtsmajtsëkyojnëpë tu'uk yë pak. Ets t'ixa'any pën kujk ënäty ja naaxwiinyëtë nyitëtstu'uty. 9Wäänë y'ijty tä ja pak jatëkok wyimpijty ma ja kepy nëëwinye'epyën. Jä'ä ko ka'ap ënäty të tpaaty ma ja pyo'kxtakn. Ja naaxwiinyëtë ka'anëm ënäty oy nyitëtstu'utynyëm. Ënät ja Noé xyajpëtsëëmy ets tyajtëjkëy ja pak maa ja kepytyëjkën nëëwinye'epyë jatëkok.
10Wëxtujk xëëw ojts yë Noé y'ëwxity ets ojts jatëkok tnajtsmatsë ja pak. 11Kujk ënäty ëka'any jyajmoonë, ko ja pak jatëkok wyimpijty. Tam t'atsëm'aty tu'kxe'enty yë ujts'aay ma y'axokxën. Jëtu'un'äämpy ojts ja Noé ëka'any t'ixy ko ja naaxwiinyëtë kujk ëka'any nyitëtstu'uty. 12Ënät ojts nän ja wëxtujk xëëw jatëkok jyaakëwxity. Tää ja pak tnajtsmajtsëy. E ko ja pak tnajtsmajtsëy tu'ukyë ojts nyëjkxnë, ka'ap ojts y'ëkwinpijnë.
13Ko ënäty ja Noé tëtujkmëko'pxtu'uk ja jyëmëjt jää ojts ja naaxwiinyëtë nyitëtstutnë. Ko tyu'uk'aany ja mëtu'kpo'opë ënät ojts ja Noé tniwë'ëntu'uty ja kyepytyëjk nëëwimye'epyë. Ets t'ijxy ko ja naaxwiinyëtë tëë ënäty nyitëtstu'uty. 14Ko ja mëmäjtskpë ja po'o y'i'px wëxtujk'aany, ja naaxwiinyëtë tëë ënäty yajxon nyitëtstutaaynyë. 15Tää ojts ja Tios kë'ëm t'ënëëmë ja Noé: 16Pëtsëëmnë ënät tyam jap ma kepytyëjkën nëëwinye'epyë mëët tu'kë'ëyë m'u'unk m'ëna'k ets m'u'unk mto'oxytyëjk ets mtsu'utëjk. 17Yajpëtsëëmta'a näjyëtu'un tu'kë'ëyë jëyujk, jënu'un jap xymyëët'atyën, joonëty, jëyujkëty mëti'ipë yujyëtyën, mëti'ipë mëpaat ja'ay tyajtsëënën ma jyëën tyëjkën ets mëti'ipë naaxwin'a'tspën. Wä'än tukye'eyëtya'atë naaxwiinyëtë ets y'u'unkëty y'ëna'këty tyajnimayëtëty ets tyajwintuktëty jëtu'un yë naaxwiinyëtë jatëkok.
18Ënät ja Noé mëët ja tyo'oxytyëjk ets ja y'u'unk y'ëna'këty ets ja tsyu'utëjk ojts pyëtsëëmta'atë jap ma ja kepy nëëwinye'epyën. 19Ojts näjyëtu'un pyëtsëëmta'atë jëyujkëty, ëwa'anëtypë ets yujyëtypë, mëti'ipë naaxwin'a'tspën ets joonëty. 20Tä yë Noé ojts tnipëjktaakë ets t'oytyuuny tu'uk wintsë'këntyakn. Yë Noé ojts yë Tios tukwintsë'ëkë jëyujk ets joonëty jëyujkëty mëti'ipë wa'atsëtyën, tu'kë'ëyë jëyujk wi'ixëty y'ixë'atën. 21Ko jyä'äjty ja xu'kën janty'oy jam Tios wyintum, ënät y'ënäny yë Wintsën: Nijëna'ajës yë naaxwiinyëtë jëtu'un nka'ëkpojknëty mëët ko ënäty yë naaxwiinyëtë ja'ay pyokymyëët'atë. Jä'ä ko yë naaxwiinyëtë ja'ay mutsknëm jëtu'un tmëtso'ontaakëtë tuuntëko'oy kajpxtëko'oyën. Yë jëyujkëty nän ka'apës nëjkx n'ëkyajkutëkooynyë, ijxtëm tyam të jyäty të kyëpetyën.
22Maanëm yë naaxwiinyëtë jyä'äjëtyën,
jää'atëp näjyëtu'un yë nipën kojën
ets tu'unën ye'eyën.
Jää'atëp yë jokx'ajtën ets tëtyk'ajtën.
Jää'atëp näjyëtu'un yë potm'ajtën ets xëkopk'ajtën.
Ets xëënyajtën mëët yë kootsajtën.
موجودہ انتخاب:
Génesis 8: QUETZMIXE
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process