Dioni 9
9
Inkikima꞉ mendieke pa꞉ta꞉ kone handa꞉peke na yeke halina꞉ leke ki laeyekeeki
1Yesuma꞉ pota꞉na꞉ pulu hata꞉ handeekepate inkikima꞉ mendieke pa꞉ta꞉ kone leke holupiki hali handeekeme. 2Kutupa ipika꞉ disaipolo haliwekima꞉ Yesu lota꞉ pitolo alota꞉ Disao. Do mendieke pa꞉ta꞉ kone do halina꞉ leke holupiki hauta꞉ epima꞉ pa꞉la꞉ hoke hauna꞉ pa꞉la꞉pe laa ateke inkikina꞉ ekina꞉ pa꞉la꞉pe o ipika꞉ ekima꞉ kone pa꞉la꞉pe laa lota꞉ pimikime. 3Kutupa Yesuma꞉ ika꞉ pi hombo peaaso alota꞉ Do halima꞉ make ateke inkikima꞉ make ika꞉ hoke hau peleme ekina꞉ na pa꞉la꞉me. Pa Koda꞉na꞉ wele pita꞉la꞉ ekima꞉ do hali epeaasa꞉eki handena꞉yeke leke holupiki hali mendia pa꞉la꞉me leekeme. 4Hande I̱ tapaala꞉ halina꞉ eta꞉ nate a꞉pa talo haena꞉ pokatiki pumana꞉e. Timba꞉ lolo yapea꞉ka꞉na꞉ta꞉ ipika꞉ e pokaapeke na yelieke. 5I̱ kenkena꞉ a꞉pa halo dina꞉ta꞉ kenkena꞉ pa̱a̱ peaasoeki halome leekeme. 6Kotoeki laata꞉ Yesuma꞉ dopi kenkena꞉ taata꞉ kenke taapu dakole peao handeeki meaata꞉ mo halina꞉ leke pa꞉ta꞉ kitaaso hata꞉ 7ipiki pa꞉ta꞉ alota꞉ Mo hande tunkula꞉ pa ula꞉ Sailoa꞉me ikali pa꞉ta꞉ pua naka꞉ leke popeleke tanda꞉pa꞉peke laa leekeme. Koto ikali bikita꞉ Tapaala꞉me laa lo haemekeme. Koto ekina꞉ mo hali puata꞉ ipika꞉ leke popeleke tanda꞉pa ala꞉ta꞉ handolo hata꞉ la꞉ka꞉la paa epeekeme.
8Kutupa ipika꞉ da wanda꞉halima꞉ make mo pitu hata꞉ honke lea꞉tiki piekeeki opimiki wanda꞉halima꞉ make alota꞉ Do halita꞉ hande pitu hata꞉ honke lo pita꞉tiki pia꞉ hali dia꞉ya꞉ka꞉ta꞉pe laa lemekeme. 9Mandane wanda꞉halima꞉ alota꞉ Aowe. Koto hali lataa lemekepate mandane wanda꞉halima꞉ alota꞉ Dia꞉me. Do halima꞉ handeke hali kone ma꞉nda꞉ hata꞉ pa꞉la꞉me lemekeme. Koto lemekepate mo halima꞉ ipika꞉ kone alota꞉ I̱ lataa leekeme. 10Wanda꞉halima꞉ ipiki pa꞉ta꞉ lota꞉ pitolo alota꞉ Ekipa naka꞉ leke epeao pa꞉la꞉pe la lemekepate 11ika꞉ pi hombo peaaso ipikana꞉ma꞉ alota꞉ Mo hande Yesu biki leleme halima꞉ kenke dakole peao yaka lekena꞉ kitao I̱ pa꞉ta꞉ alota꞉ Mo Sailoa꞉me ikali pa꞉ta꞉ pua naka꞉ leke popeleke tanda꞉pa꞉peke lea꞉me laa koto leeke handaa I̱ pua tandepoa꞉pate ala꞉ta꞉ ala꞉ta꞉ koto kone handoa꞉me leekeme. 12Koto leeke handaa mo wanda꞉halima꞉ lota꞉ pitolo alota꞉ Koto halita꞉ hando pa꞉ta꞉ hala꞉pe la lemekepate ipikana꞉ma꞉ alota꞉ I̱ na handolome leekeme.
Mo Pa꞉tisi haliwekima꞉ hande epeaeyekeeki handemekeeki
13Kutupa mo haliwekima꞉ hande amba꞉ leke holupiki hali hatuku mo Pa꞉tisi haliweki pa꞉ta꞉ waluekema꞉ mea pemekeme. 14Yesuma꞉ kenke dakole peao mo halina꞉ leke kilaake hauta꞉ Hoto Pila꞉ Natena꞉ piekeme. 15Kutupa mo Pa꞉tisi haliwekima꞉ mo hali paa lota꞉ pitolo alota꞉ Naka꞉ leketa꞉ ekipa epeao pa꞉la꞉pe la lota꞉ pimiki handaa mo halima꞉ alota꞉ Ipikana꞉ma꞉ kenke dakole piki ekima꞉ yaka lekena꞉ kitaeyeketa꞉ ikali pa꞉ta꞉ pua tandepoa꞉ ekita꞉ ameta꞉ handolome leekeme. 16Mandane Pa꞉tisi haliwekima꞉ alota꞉ Do hau pa꞉la꞉ halita꞉ mo Hoto Pila꞉ Natena꞉ pi ula꞉eki yamba꞉la꞉la꞉ ekina꞉ ipikita꞉ Koda꞉ma꞉ na tapaala꞉me lemekepate mandane haliwekima꞉ alota꞉ Dupiki wele pita꞉la꞉ ekita꞉ hoke hau pa꞉la꞉ halima꞉ ekipa piliepe la lemekeme. Koto ekina꞉ ika꞉ kone putupaalu pea pi ta꞉ta꞉ ta꞉ta꞉ lemekeme.
17Kutupa mo Pa꞉tisi haliwekima꞉ hande hali pa꞉ta꞉ hoto ma꞉nda꞉ paa lota꞉ pitolo alota꞉ Nakana꞉ma꞉ alota꞉ Yaka leke kilaeya꞉me alepateta꞉ ipiki pa꞉ta꞉ eki hone witelepe lemekeme. Mo halima꞉ hombo peaaso alota꞉ Ipikita꞉ Koda꞉na꞉ potopede halie la leekepate 18mo Diu haliwekima꞉ ipika꞉ leke holu pea hayekeeki make mo leke epeaeyekeeki make koto pi opua꞉peke kiaaso hata꞉ mo halina꞉ ateke inkiki yaapo wi la꞉ mea 19ipiliki pa꞉ta꞉ lota꞉ pitolo alota꞉ Do halita꞉ ipilika꞉ wekipe. Kutupa ipikita꞉ panake mendi pa꞉ta꞉ kone leke holupiki weki mendipe laata꞉ Kutu pia꞉ka꞉na꞉ yoluta꞉ kota꞉ ameta꞉ ekipa handolo pia꞉pe laa lota꞉ pimikime. 20Mo halina꞉ ateke inkiki yaapoma꞉ ika꞉ pi hombo peaaso alota꞉ Koto halita꞉ dika꞉ weki ya꞉la꞉pate mendia꞉ pa꞉ta꞉ kone leke holupiki weki mendia꞉ ekita꞉ hone ulupa꞉pateta꞉ 21ame ipika꞉ leke kila handa꞉la꞉eki make ipika꞉ leke kilaake hauta꞉ epima꞉ pa꞉la꞉pe. Kota꞉ dikita꞉ mata꞉la꞉me laa lepekeme. Ipiki pa꞉ta꞉ pua opua꞉pa꞉peke. Ipika꞉ bapi manuta꞉ ana꞉na꞉ hala꞉ ekima꞉ ipika꞉ kone la kilieke laa lepekeme. 22Ateke inkiki yaapoma꞉ mo Diu haliweki pa꞉ta꞉ paala꞉ma꞉ homolo hata꞉ dupa lepekeme. Mo Diu haliwekima꞉ta꞉ hali epima꞉ Yesuta꞉ hande Ketiso hala꞉me lelimi wanda꞉halita꞉ mo pi hotu haemeke da pa꞉ta꞉ na epena꞉yeke pa yokomana꞉ la pi la꞉ wieke ekina꞉ paala꞉ma꞉ homepekeme. 23Koto ekina꞉ mo toolima꞉ alota꞉ Ipika꞉ bapimanu ana꞉na꞉ hala꞉ ekima꞉ ipiki pa꞉ta꞉ pua opua꞉pe laa lepekeme.
24Kutupa hoto yaapo peao hande mendieke pa꞉ta꞉ kone leke holupiki halita꞉ mo haliwekima꞉ wi la ipiki pa꞉ta꞉ alota꞉ Koda꞉ pa꞉ta꞉ pi la꞉ witolo hata꞉ ota꞉eki lapeke laa nikana꞉ma꞉ hone uluma꞉me. Koto hande halita꞉ hoke hau pita꞉la꞉ halie la lemekeme. 25Kutupa mo halima꞉ ika꞉ pi hombo peaaso alota꞉ Ipikita꞉ hoke hau pa꞉la꞉ halipe. I̱ mata꞉la꞉me. Pa hau homeketa꞉ handolome. Amba꞉ta꞉ yaka leke holu pea haowa꞉pate ameta꞉ yaka leke kila handolome leekeme. 26Mo haliwekima꞉ ipiki pa꞉ta꞉ lota꞉ pitolo alota꞉ Neke pa꞉ta꞉ eki hau pia꞉pe. Naka꞉ leketa꞉ ekipa kilaeya꞉pe laa lota꞉ pimiki handaa 27mo halima꞉ alota꞉ Amba꞉ la kua꞉pate na opuelememe. Ekipeke pa opuluekema꞉ alemepe laa iki make mo hande halina꞉ disaipolo haliweki haluekema꞉ hone witelemepe la leekeme. 28Koto leeke handaa mo haliwekima꞉ ipiki kitaaso hata꞉ alota꞉ Neketa꞉ mo hande halina꞉ disaipolo hali halepate nikita꞉ Mosesina꞉ disaipolo haliweki haloma꞉me. 29Koda꞉ma꞉ Mosesi pa꞉ta꞉ la꞉la꞉ ekita꞉ nikana꞉ma꞉ hone uluma꞉pate koto hande halita꞉ hando pa꞉ta꞉ hao a꞉pa pa꞉la꞉pe. Niki na handoloma꞉me laa lemekeme.
30Koto ekina꞉ mo halima꞉ ika꞉ pi hombo peaaso alota꞉ Ikana꞉ma꞉ koto halita꞉ hando pa꞉ta꞉ hao a꞉pa pa꞉la꞉pe alemepateta꞉ yaka leke ipikana꞉ma꞉ kilaeya꞉me. 31Nikana꞉ma꞉ Koda꞉ma꞉ hoke wanda꞉halina꞉ pi na opita꞉la꞉ ekita꞉ handoloma꞉pate pa Koda꞉ma꞉ta꞉ ipiki pa꞉ta꞉ homu pea hata꞉ ipika꞉ hone pa꞉la꞉ hau peaaseme wanda꞉halina꞉ pita꞉ opu hala꞉me. 32Kota꞉ panake pa꞉ta꞉ ala꞉ta꞉ ala꞉ta꞉ wepieke pa꞉ta꞉ kone mo mendieke dina꞉ kone leke holupiki halina꞉ leke kilaasa꞉ ekita꞉ ma꞉nda꞉ma꞉ dupaeya꞉me pita꞉ na opoloma꞉me. 33Koto hande halima꞉ta꞉ Koda꞉ ame̱le̱ hao na epea꞉ka꞉na꞉ yoluta꞉ hau homeke a꞉nda꞉ pea꞉peke na yolo pia꞉me leekeme.
34Koto ekina꞉ mo haliwekima꞉ ipika꞉ pi hombo peaaso alota꞉ Naka꞉ ama꞉ma꞉ hokeeki tukiki pa꞉ta꞉ hata꞉ ma꞉nda꞉leke daele halima꞉ kone niki waluekema꞉ alepe lemekeme. Koto laa mo halita꞉ mo pi hotu haemeke da pa꞉ta꞉ na epena꞉yeke pao yoka ta꞉ta꞉ haena꞉ lemekeme.
Hoke ekima꞉ leke holu peaasa꞉eki
35Yesuma꞉ mo hali yoka ta꞉ta꞉ haena꞉ lelememe lemekeeki opuaata꞉ mo hali weiya handa꞉ wia ipiki pa꞉ta꞉ alota꞉ Wanda꞉halina꞉ Eiyeke pa꞉ta꞉ hone tulao halepe laa leeke handaa 36mo halima꞉ Yesuna꞉ pi hombo peaaso alota꞉ Tekehalio. Wanda꞉halina꞉ Eiyeke pa꞉ta꞉ hone tulao haluekema꞉ loa꞉me. Ipika꞉ biki la kie leekepate 37Yesuma꞉ ipiki pa꞉ta꞉ alota꞉ Ipikita꞉ amba꞉ handeme. Neke yaapo do pi pi alepe halie laa leekeme. 38Mo halima꞉ Yesu pa꞉ta꞉ alota꞉ Tekehalio. Hone tulaasome laata꞉ Yesu pa꞉ta꞉ tumiki yotuao pitiekeme.
39Kutupa Yesuma꞉ alota꞉ Do kenkena꞉ wanda꞉halina꞉ pi yokaalu puluekema꞉ epoa꞉me la leke holupiki wanda꞉halima꞉ handena꞉ make handeleme wanda꞉hali make leke holu pea haena꞉yeke epoa꞉me la leekeme. 40Mandane Pa꞉tisi haliwekima꞉ koto leekeeki opua Yesu pa꞉ta꞉ lota꞉ pitolo alota꞉ Nikita꞉ leke holupiki haliweki halemema꞉ alepe lemekepate 41Yesuma꞉ iki pa꞉ta꞉ alota꞉ Leke holupiki haliweki haemekena꞉ yoluta꞉ iki pa꞉ta꞉ hokeeki ma꞉nda꞉ na ulu pia꞉me laa kutupulu pia꞉pate ikana꞉ma꞉ alota꞉ Nikita꞉ handoloma꞉me aleme ekina꞉ iki pa꞉ta꞉ hokeeki pa ula꞉me leekeme.
موجودہ انتخاب:
Dioni 9: SEMB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
