Kini Pieke 8
8
Mo hande ikali tieke lomeekeeki
1Koda꞉ma꞉ta꞉ Noa pita꞉ mo sisima pa꞉ta꞉ pitimiki tapake paeyaota꞉ hone na yonka꞉laeyekeme. Ipikana꞉ma꞉ po epena꞉ leeketa꞉ mo ikali kini pea o̱ loma꞉ loma꞉ piekeme. 2Mo hande kenke oto nane a꞉liaeyeke ikali pita꞉ oli ya nane lombolu baeyeke ikali yaapo telipina꞉ a꞉mbeeketa꞉ mo lako paeyekeme. 3Kutupa mo ikalita꞉ pa 150 nate ma꞉nda꞉na꞉ta꞉ o̱ loma꞉ loma꞉ piekeme. 4Kutupa mo wataake peao kaisepona꞉ pula yaapona꞉ nate tepona꞉ mo sisimata꞉ mo A꞉ta꞉ta꞉de tokona꞉ a꞉pa wiekeme. 5Kutupa mo ikalita꞉ o̱ la꞉niatia pua kiki yaapo peao kaisepo opeeke titina꞉ natena꞉ta꞉ mo pote tumikimanu peneme yao waleekeme.
6Kutupa nate hali tieke yaapo paeyeketa꞉ Noama꞉ da ka꞉ka꞉na꞉ ma꞉nda꞉ lomba 7mo (da꞉e̱i̱nkima꞉ handeke) ba homeke ipika꞉ biki leibeni tapaeyekeme. Mo hande ba paa na la꞉ka꞉la epeeketa꞉ mo ikali o̱ la hala꞉pa꞉ wina꞉yeke pa a̱ya̱ pomu lopo hayekeme. 8Kutu pieketa꞉ Noama꞉ mo ikali o̱ la꞉niala꞉pe la handena꞉ yeke paa ba ma꞉nda꞉ melipu tapaeyekepate 9mo kenketa꞉ ikalima꞉ pa tote pea wiekeeki yalo mo melipu ipiki pita꞉peke alena꞉ dia꞉yeke handaa paa mo sisima wieke alena꞉ pa la꞉ka꞉la peekeme. Kutu pieke handaa Noama꞉ kiki hama꞉ nane pena꞉ laa mo ba handa꞉ miekeme. 10Kutupa mo hoto wataake hata꞉ nate pa yu wia haota꞉ mo hande melipu paa pena꞉ tapaeyekeme. 11Kutu pieketa꞉ mo melipuma꞉ta꞉ nate oni pambolo pulu haena꞉ ipika꞉ kake pa꞉ta꞉ mo panake olipi katake hapula Noa pa꞉ta꞉ paa epeekeme. Kutu piekeeki handaa Noama꞉ta꞉ mo ikalita꞉ o̱ la꞉niaya꞉ka꞉ta꞉me hone wiekeme. 12Kutupa Noama꞉ wataake hata꞉ natena꞉ pa hao mo melipu paa tapaeyekepate koto natena꞉ta꞉ mo hande bata꞉ paa na la꞉ka꞉la epeekeme.
13Mo Noata꞉ 601 bapi mieketa꞉ mo titina꞉ kaisepona꞉ titina꞉ natena꞉ta꞉ mo ikalita꞉ ota꞉ o̱ la꞉niayekeme. Kutu pieke handaa Noama꞉ta꞉ mo sisima a꞉mbaeyeke ale mea bao lekema꞉ lekema꞉ piekepate mo kenketa꞉ hapuma꞉ hapuma꞉ pia꞉eki handeekeme. 14Mo yaapo peao kaisepona꞉ pula tepo paeya yunki mindiki hata꞉ peao natena꞉ta꞉ mo kenketa꞉ ota꞉ hapupa peekeme.
15Koda꞉ma꞉ Noa pa꞉ta꞉ alota꞉ 16Naka꞉ wanda꞉ make naka꞉ weki tooli tooli make hama opolu bao yopupe laata꞉ 17Mo ba manuma꞉ make hoteke manuma꞉ make mendiolo mendiolo ombu haya꞉ka꞉na꞉ do kenke honiki paeyao pa꞉ta꞉ sembelena꞉ mea opolu bapee leekeme. 18Koto leeke Noa tooli make ipilika꞉ weki tooli tooli make mo sisima mina꞉pa꞉lao hama opolu bao pemekeme. 19Kutupa mo hotekemanu make bamanu make ika꞉ homeke tapake sunu lo mandakena꞉ opolu baemekeme.
Noama꞉ hoteke lia haleekeeki
20Noama꞉ta꞉ Koda꞉ pa꞉ta꞉ oloda wepiata꞉ mo ha̱i̱ na ta̱leke hotekemanu make bamanu make tapake tapakena꞉ homeke homeke lo mea tieke tonka꞉na꞉ mo olodana꞉ lu yanka haleekeme. 21Kutu pieke handaa mo lia haleeke hotekena꞉ totopo seliapoma꞉ta꞉ mo Tekehali ta꞉na꞉ homa꞉ tiayeke handaa ipika꞉ kone alota꞉ Do wanda꞉halima꞉ pu haleme ekina꞉ I̱ma꞉ do kenketa꞉ esihou pi oto pa꞉ta꞉ ota꞉ paa na wina꞉ lolueke. Pa ekipeke ika꞉ mo panake daeta꞉la꞉me ale pa꞉ta꞉ koneta꞉ hoke honemanu wilimi ekita꞉ I̱ma꞉ hone ulu ekina꞉ loa꞉me. Koto ekina꞉ I̱ma꞉ ame do pua꞉ tupa꞉ mo do kenkena꞉ pa pitiki alemanu paeyao ota꞉ paa a꞉nda꞉ na hoeyaalueke. 22Kutupa do kenke pa wina꞉ta꞉ noka꞉pa꞉la꞉ nate make ne napeke mina꞉la꞉ nate make wilieke. Kutupa make hoto paeyao kosa꞉ make titipu make nate ki make lako ki make nate make timba꞉ make ota꞉ pa u̱ pelia halieke leekeme.
موجودہ انتخاب:
Kini Pieke 8: SEMB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in