Matthew 6

A Kitasamte Piakna

1"Note in thumaanna nasepte na sep uh ciangin mihing muh ding utna tawh mite mai-ah sem kei un. Tua bangin na sep uh leh vantunga om na Pa uh tung pan pahtakman na ngah kei ding uh hi.#Mt 5:16; 23:5

2 "Tua ahi ciangin a tasamte na piak uh ciangin kineihsiamte in mite pahtawi ding a ut manun synagogue-te sung le lamdungah pengkul mutin, a tangko uh bangin na hih kei un. Thutak kong geninah, amaute in pahtakman a cingin a ngah zo uh hi. 3 Ahi hangin note in a kitasamte na piak uh ciangin na taklam khut hihna, na veilam khut theisak kei un. 4 Tua ciangin a sima kihihte a mu na Pa un note pahtakman hong pia ding hi.#Ro 12:8

Thungetna

5 "Note in thu na nget uh ciangin kineihsiamte bangin na hih kei un. Amaute in mite muh theihtheih dingin synagogue-te sung le lamkabom khawngah dinsa in a ngen nuam se uh hi. Thutak kong geninah, amaute in pahtakman a cingin a ngah zo uh hi. 6 Note in thu na nget uh ciangin na inndei sunguah pai unla, kong khakin a kimu thei lo na Pa uh kiangah na ngen un. Tua ciangin a sima kihihte a mu na Pa un note pahtakman hong pia ding hi. 7 Note in thu na nget uh ciangin kammal tampi kizang leh kingah diak ding ci-a a ngaihsun lawkite bangin na guitam kei un. 8 Na Pa un na nget ma un na kisapnate uh thei ahi manin, amaute bangin na hi kei un.#Thn 5:2; Mk 11:25

9 Note in hih bangin thu na ngen un:

"‘Vantunga om kote Pa aw,

nangma min kisiangthosak ta hen;

10 na gam hong tung ta hen,

vantungah na deihna a kihih bangin,#Mt 26:39

leitung ah zong kihih ta hen.

11 Ka nisim an uh tu ni-in ko hong pia in.#Pn 3:8

12 Ko tunga hong bate ka maisak uh bangin,

kote leibate hong maisak ta in.#Mt 18:21-35

13 Zia-etna sungah hong pi kenla,#Lk 11:2-4

gilopa panin hong hukhia in.’ e#6.13 Ahikeh gitlohna pan khutgelh nunung pawlkhatah khut / ukzawhna vangliatna minthanna nang aa ahi tawntung hi. Amen . ci un.#Jas 1:13

14 Ahang in, no tunga hong mawhte na maisak uh leh vantunga om na Pa un no zong hong maisak ding hi. 15 Ahi hangin mite mawhna na maisak kei uh leh note mawhnate na Pa un hong maisak lo ding hi.#Mt 18:35

Antanna

16 "Note in an na tan uh ciangin, an a tan lam uh mite a lah nop manun a maitang uh a kilamdangsak kineihsiamte bangin na mai uh mualsak kei un. Thutak kong geninah, amaute in pahtakman a cingin ngah zo uh hi. 17 Ahi hangin note in an na tan uh ciangin na sam uh sathau nilh unla na mai uh phiat un. 18 Tua hileh an na tan lam uh mi mai-ah kilang lo dinga, a kimu lo na Pa uh maitang bekah kilang ding hi. Tua ciangin a sima kihihte a mu na Pa un note pahtakman hong pia ding hi.#Isa 58:5-7; Zec 7:5

Vantunga Goute

19 "Nget le kekseu in a siatsak theihna le gutate in luh a, a guk theihna mun hih leitungah na goute uh khol kei un. 20 Nget le kekseu in a siatsak theih lohna le gutate in luh a, a guk theih lohna mun vantungah na goute uh khol un. 21 Ahang in, na goute uh omna munah na lungsim uh zong om ding hi.#Lk 12:16-21

22 "Mittang in pumpi meivak ahi hi. Na mit a hoih leh na pumpi tung khempeuh a vak ding hi. 23 Ahi hangin na mit a siat leh na pumpi tung khempeuh a mial ding hi. No sunga om khuavak, khuamial ahileh bangzah in a mial tazen tam!#Lk 11:34-36

24 "Kuamah in tonih na semkhawm thei lo hi. Khat itin khat a mudah hiam, khat belin a khat a simmawh hiam, khat zawsang hi ding hi. Note in Pasian nasep le sum nasep na thuahkhawm thei kei ding uh hi.#Mt 19:21

Lunghimawh Kei Un

25 "Hong hilh tektek ka hi, na nuntak nading, na nek na dawn ding ahi zongin na pumpi uh ading, na silh na ten ding uh bangmah lunghimawh kei un. An sangin nuntakna thupizaw hi lo ahi hiam? Puansilh sangin pumpi thupizaw hi lo ahi hiam? 26 Huih laka leng vasate en dih un; tuate in vawh lah vawh lo, at lah at lo, ansal ah zong khol lo napi vantunga om na Pa un tuate a vak hi. Vasate sangin note manphazaw tham hi lo na hi uh hiam? 27 A lunghimawh manin a nuntak hun nai khat sung bek a sotto thei note lakah kua om ahi hiam? a#6.27 Ahikeh a tun tong khat a sot thei

28 "Bang hangin na silh na ten ding uh lunghimawh na hi uh hiam? Gamlak a unok kungte ngaihsun dih un. Na sem loin khau lah a khek kei uh hi. 29 Ahi hangin Solomon nangawn a thupina na khempeuh tawh a kizep laitakin hih unok pak khat zahin zong a kizem zo kei hi, cih kong gen hi. 30 Upna neu mite aw, tu ni-in hih lai-ah om a, zing ciangin mei-a kikhul ding gamlak lopa kung khat Pasian in tua zahin zem ahileh note, puan hong silhsak zawtham lo ding ahi hiam? 31 Tua ahi ciangin, ‘Bang i ne tam? Bang i dawn tam? Bang i silh tam?’ ci-in lunghimawh kei un. 32 Lawkite in hih nate khempeuh nakpi in a zong uh hi. Hih nate na kisap lam uh vantunga om na Pa un a thei hi. 33 Ahi hangin Pasian kumpigam le ama thumaanna zong masa un. Tua hileh hih nate khempeuh hong piathuah ding hi. 34 Tua ahi manin zingciang ading lung himawh kei un; zingciang, amah le amah kilunghimawh na ding hi. Ni khat in ama buaina khop nei ciat hi.

موجودہ انتخاب:

Matthew 6: ZIV

سرخی

شئیر

کاپی