2 Corinth-te 7
7
1Kong it lawmte aw, hih kamciamte i neih khit nungsang, pumpi le kha a buahsakte khempeuh panin ei le ei kisiangthosakin Pasian zahtakna tawh siangthona ah bukimin om ni.
Paul Lungnopna
2 Note lungtang sungah kote mun hong awn un. Kote kuama tungah ka khial kei uh a, kuamah siasak loin, kuamah ka zawhthawhbawl kei uh hi. 3 Note mawhpaih nadinga hih thu hong gen ka hi kei hi. Note tawh sihkhawm ahi zongin nuntak khawm nading zah dongin kote lungsim sungah note na teng uh hi, cih kong genkhol khin zo hi. 4 Note kong muang mahmah hi; note kong kisaktheihpih mahmah hi. Keimah nakpi-in kihan thawnin, kote lungmanna khempeuh ah ka lungnopna uh a dimlet hi.#2Co 6:12-13; 8:24
5 Ahang in, kote Macedonia a kong lut lai-un hih ka pumpi uh a tawlnga ngei kei hi. Ahi hangin kote kiheina peuhpeuh ah pualam ah kidona, sunglam ah launate ka tuak den uh hi. 6 Ahi hangin a kinengniamte a hehnempa Pasian in, Titus hong tunna tawh hong hehnemin, 7 ama hong tunna hang bek hi loin note in amah na hehnemna hang uh zong ahi hi. Amah in kote kiangah kei nong lunggulh uh, na dahluatna uh, kei nong lunghi mawh luatna uh thute hong gena ka lungnopna a lianzaw sem hi.#2Co 2:13
8 Lai kong khak hanga note hong dahsak ka hileh zong ka kisik kei hi. Ka kisik ta zongin kong laikhak in na lungsim uh a natsak lam ka thei a, ahi hangin tomcik sung bek ahi hi. 9 Note kong dahsak hang hi loin, na dahna un note hong kisiksakna hangin tu-in ka lung a dam hi. Ahang in, Pasian geel banga dah na hi uh hi; banglam banglam ah kote hong natsak hi lo hi. 10 Pasian lama dahna in hotkhiatna a tun kisikna piangsak a, a kisuanlah huai kei hi. Ahi hangin leitung dahna in sihna a tun hi. 11 En dih un hih Pasian lama dahna in note sungah bang cihtakna, no le no kihahsiang nop nading bang lawpna, bang ngaihdahna, bang patauhna, bang lunggulhna, bang lunghi mawhna, amaana thukhen ding a tunsak lam mu un. Hih thu tawh kisai-in bangmah peuhah na mawhpen’ lam uh na kiciansak zo uh hi. 12 Tua hi-a note kiangah ken kong gelh ta zongin a khiala gamtapa hang hi lo a, a thuakte pawl hang zong ahi tuan kei hi, ahi hangin kote tungah note na kipiak zawhna uh nomau le nomau in Pasian mai-ah na muh theih nading uh hizaw hi. 13 Hihte khempeuh hangin kote hong kihanthawn hi.#1Co 5:1-2; 2Co 2:2,4
Kote hong kihanthawn banah note khempeuh hanga Titus in lungsim thathak a ngah mana a lungdam luatna ka muh uh ciangin ka nuam diak uh hi. 14 Ama tungah note kong kisaktheihpih a, tua thu ah nong zahlaksak kei uh hi. Ahi hangin note tunga kong gente khempeuh uh a maan ahi bangin Titus tunga note kong kisaktheihpihna uh zong a maanna hong lak hi. 15 Note khempeuh in a thu mangin lau le ling kawmin amah na san uh, a ngaihsut kik ciangin amah in note hong itna a lian semsem hi. 16 Note tungah muanna a kim kong neih theih manin ka nuam hi.
موجودہ انتخاب:
2 Corinth-te 7: ZIV
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright 1994 Myanmar Center for World Mission