Marku 7
7
Yesu Hparishe pe le tan pyam e
1Hau hkun Hparishe pe e Yerusalem mai daw law e mau-sau ka e sara pe ra wam gë, Yesu jang le zup lwi,
2Yang e lagyaw ra wam, law a chi e, a-gang-a-gawt e, zang zaw ni kaw e le myang kaw e.
3Hka-su-mu-ga-le, Hparishe pe e Yuda pe ban-shaw bang gë, a-gi su wun pe e sang-hkyang dang le chang ni akaw mu lwi, law le ra gaw za a chi pyam le gë, zang a zaw kaw.
4Gai mai law kaw-lang, gung-du a chi shi le yang maw zang a zaw kaw. Hau htaw mai, gawm, au, gi-hkaw pe le chi pyam e htaw a gaw, yang maw lawm yu lwi chang e li-htung myaw myaw ngut taw a-shi.
5Hau mu lwi, Hparishe pe e mau-sau ka e sara pe gë, “Nang e lagyaw wi a-gi su wun e sang-hkyang dang le a chang e wa, a-gang-a-gawt mu e law e zang-zaw akaw lu?” ga lwi, Yang le mi kaw e.
6Yang gë, “I-mit i pyam baw bang e. Mau sau ma ka taw e ra jung za, ‘Shi a-myu gë, yum-sing e nut ku e Ngaw le hkung-ga kaw-lang, yang maw i-mit nik-lum Ngaw e we akaw.
7Yang maw byu e dang le za li-htung kut lwi, byu le nyaw maw e, hau su mu, Ngaw le be be a kawm za pai ni akaw,’ ga lwi, nung maw e hkyaw Esaia mi-htoi dang ka taw e gë, ge ge teng be.
8Nung maw gë, Karai Kasange sang-dang le pyam taw lwi, byu e sang-hkyang dang le za chang ni akaw,” ga e.
9Yang yang maw le, “Ge ge wa nung maw e sang-hkyang dang le chang ni ra,” ga lwi, “Karai Kasang e sang dang le nung maw pyam taw bakaw.”
10“Hka-su-mu-ga-le, nang-nu-nang-wa le hkung-ga a. I-nu-i-wa le ning su gë, teng teng shi shang ga,” ga lwi, Mawshe tai taw be.
11“Ngut-kaw-lang nung maw gë, Byu yum-sing i-nu-i-wa le, nga e law ma nang waw yu e ze gë, Korban ngut le, ga tai le gë,” (Korban ga dang gë, Karai Kasang le kyang bi e jung hu ngut le.)
12“Hau htang le yum-sing i-nu-i-wa le karum ra, nung maw hkum taw akaw.
13Hau mu lwi, nung maw ap taw e sang-hkyang dang e, Karai Kasang e dang le nung maw hkin pyam taw akaw. Hau mu hkyaw myaw myaw nung maw kut ni akaw,” ga lwi, yang maw le tai e.
14Shiwa byu pe le Yang dum wut yu lwi tai e gë, “Nung maw lung-lang Nga dang le gyaw lwi, se yu ke.”
15“He lut mai byu e a-hkau shut wang law e, hai ngut-kaw-lang, yang le a-gang-a-gawt waw kut ra a ngut. Byu e a-hkau mai htaw law e kum gë, byu le a-gang-a-gawt kut pyam taw le,” ga tai e.
16“Gyaw yu ra naw dap su, aw ngut-kaw-lang, gyaw yu shang ga,” ga e.
17Hau htang shiwa byu pe e gang lum law lwi, yum hkau shut dum wang jang, Yang e lagyaw wi hau dang-ke hkyaw le Yang le mi kaw e.
18Hau mu lwi Yang yang maw le, “Hau za le nung maw a ming-be shi kaw lu? He-lut shut mai byu e a-hkau shut wang law e, hai ngut-kaw-lang, byu le a-gang-a-gawt waw kut pyam ra a ngut, nung maw a se kaw lu?
19Hka-su-mu-ga-le, Hau gë, yang e i-mit-nik-lum hkau shut wang law e a ngut. Yang e wam-hkau shut za wang law e e, yaw-saw lam jang shut dum tau htaw law e.” Hau su ga e gë, zaw-shu lung-lang ban-shaw le law-san-law-sen e ngut le.
20Ra hkyaw dum tai le gë, “Byu mai htaw law e kum gë, byu le a-gang-a-gawt waw kut pyam le.
21Hka-su-mu-ga-le, a-hkau ma byu i-mit hkau mai a ge e i-mit nyun htaw lwi, mi-we shut e, hkau e, byu sat e, su mi lu e, law hpa e, a-hkyu-a-shawp e,
22Mau e, yut e, manawn e, lu mu e, gum-rawng e, a-ngawk-a-ngak e,
23Hau a-shawp e hkyaw lung-lang gë, a-hkau shut mai htaw law lwi, byu le a-gang-a-gawt kut pyam taw le,” ga e.
Mi-we-zaw jang ma nat hkat pyam bi e
24Ahkwi Yang hau mai htaw law lwi, Turu e Sidun mau-kyaw shut je law e, yum hkau ma Yang wang lwi, hau le su-pe se ra a nau kaw-lang, a waw koi pyam.
25Hka-su-mu-ga-le, Yang e hkyaw le, a-joi-a-yung nat dap e mi-we-zaw waw e mi-we ra yu, hau jang waw gyaw lwi, je le mu, Yang e hki wang ma hki-hput-htu lwi, yang e mi-we-zaw jang ma nat le hkat pyam bi shang ga, Yang le ju-dung e.
26Hau mi-we jau gë, Heleni a-myu ma Suru-Hpiniki mi-we ngut taw le.
27Hau mu lwi, Yesu gë, “Zaw-shang wi le hë gi shaw zaw shang. Zaw-shang wi e zang yu lwi, hkwi le bi pyam le a ge,” ga lwi, yang le tai e.
28Hau mi-we yu gë, “Ngut be. Yum-sing e, hkwi pe lang, zang-hpun aw ma zaw-shang wi e zang-cham-zang-htang gn zaw akaw,” ga e, Yang le tu e.
29Yesu gë, “hau su ga tai e yan-mai, nang law a! Nat gë, nang e mi-we zaw jang mai htaw law be,” ga lwi, yang le tai e.
30Hau mu yang yum hpyang dum law e ngut lwi, hau zaw-shang gë, yup-ku htaw ma le-taw le. Nat gë, yang jang mai htaw byu law e le myang e.
31Turu mau-kyaw maidum htaw law le, Sidun le hkaw lai law lwi, Dekapoli mung-kyaw gung dung hkaw e-law lwi, Galile nawng shut e je e.
32Hau hkun naw-jit lwi, a dat nyaw e byu ra yu le, yang maw Yang jang shut shwi e-law lwi, yang e htaw ma law ke bi ra ma-tu ju dung kaw e.
33Hau mu, shiwa-hpung mai maji-shim e jaw-waw shut yang le shwi htaw yu lwi, hau yu e naw-hkyung hkau shut Yang law-nywi htau kat bi lwi,
34Mau-hkung shut byu-wu u-jang, Yang saw maw she lwi, hau yu le, “Et-hpa-hta,” ga e. Hau su ga e gë, “Hpawng law a,” ga e, ngut taw le.
35Hau mu lwi, yang e naw san-byu law le e, yang e shaw-twi bi law lwi, dang hkyang hkyang waw nyaw be.
36Hau hkyaw aw le le a tai kyaw shang ga, Yang yang maw le tai taw kaw-lang, je tai le je yang maw je hkai kyaw bum kaw e.
37Yang maw le gyai mau-ha bum kaw lwi, “Yang lung-lang le ge hkyaw waw kut le. Naw-jit bang le waw gyaw nang lwi, a dat nyaw bang le waw nyaw nang le,” ga kaw e.
موجودہ انتخاب:
Marku 7: ATB1951
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© British and Foreign Bible Society 1951
