Jenesis 15
15
Promes we Hae God i mekem wetem Ebram
1Nao biaen long taem ya, Ebram i luk wan vison* we Hae God i soemaot long hem. Long vison ya, hem i harem we Hae God i talem long hem se, “Ebram, yu no fraet. Bambae mi mi stap blokemgud yu, blong i no gat wan samting i save kam spolem yu. Mo bambae mi givim bigfala presen long yu, from we yu stap bilif strong long mi.”
2Be Ebram i talem se, “?Hae God, yu yu Masta blong mi, be bigfala presen ya bambae i mekem wanem long mi? Mi mi no gat pikinini blong mi we bambae i holem olgeta samting we mi mi gat, slef* ya nomo blong mi Eliesa, we i man Damaskes, hem bambae i holem olgeta. 3Yu yu no givim wan pikinini long mi, nao sipos mi mi ded, slef ya nomo bambae i holem graon blong mi wetem olgeta samting we i blong mi.”
4Nao hem i harem we Hae God i talem long hem bakegen se, “Sipos yu yu ded, be slef ya bambae i no save holem olgeta samting ya. Wan stret pikinini blong yu we bambae yu yu bonem, hem bambae i holem olgeta.” 5#Rom 4.18; Hib 11.12Nao Hae God i tekem Ebram i go afsaed, i talem long hem se, “Yu lukluk i go antap long skae, yu traem kaontem ol sta. Ol pikinini we bambae oli kamaot biaen long yu, bambae oli plante olsem ol sta ya.”
6 #
Rom 4.3; Gal 3.6; Jem 2.23 Nao Ebram i bilif strong long Hae God, mo from we hem i bilif olsem, Hae God i luk hem se hem i wan stret man long fes blong hem.
7Nao Hae God i talem long hem se, “Mi mi Hae God. Mi mi lidim yu, yu aot long taon ya Uru long Babilonia, yu kam long ples ya, blong bambae mi save givim ol graon ya i go long yu.”
8Be Ebram i askem long hem se, “?Hae God, yu yu Masta blong mi, be bambae mi mi save olsem wanem se graon ya bambae i blong mi?”
9Nao Hae God i talem long hem se, “Yu go tekem wan kao, mo wan nani, mo wan man sipsip, we trifala evriwan i gat tri yia blong trifala, mo yu tekem wan sotleg,* mo wan yang nawimba, yu karem olgeta i kam long mi.” 10Nao Ebram i go tekem ol samting ya, i karem i kam long Hae God. Nao hem i kilim olgeta, mo i splitim trifala anamol ya wanwan long tu haf, mo i putum ol haf blong trifala long tu laen, we wan haf blong anamol i stap long wan saed mo nara haf blong hem i stap long nara saed. Be tufala pijin ya, hem i no splitim tufala. 11Nao ol bigfala pijin ya valja,* we oltaem oli stap kakae ol dedbodi oli kam blong oli kakae ol samting ya, be Ebram i stap ronemaot olgeta.
12 #
Job 4.13,14 Nao long taem we san i stap godaon, Ebram i slip we i slip ded olgeta, mo hem i drim se bigfala tudak i kam kavremap hem, mo hem i fraet we i fraet tumas. 13#Eks 1.1-14; Wok 7.6Nao Hae God i talem long hem se, “Ol pikinini blong yu we bambae oli kamaot biaen long yu bambae oli go stap long wan narafala kantri, we bambae oli strenja nomo long ples ya. Nao bambae oli kam slef nomo blong ol man blong kantri ya, mo ol man ya bambae oli mekem i strong tumas long olgeta, gogo kasem we fo handred yia i pas. 14#Eks 12.40,41; Wok 7.7Be mi bambae mi panisim ol man ya we bambae oli mekem olgeta i kam slef, mo taem olgeta oli kamaot long kantri ya bakegen, bambae oli karem plante gudgudfala samting blong kantri ya i kam. 15Yu bambae yu save stap longtaem, gogo kasem we yu olfala gud, nao bambae yu ded we tingting blong yu i stap kwaet, mo bambae oli berem yu long gudfala fasin. 16Be ol pikinini ya we bambae oli kamaot biaen long yu, bambae oli stap long narafala kantri ya, gogo kasem taem blong ol smol bubu blong ol smol bubu blong olgeta, from we ol rabis fasin blong ol laen* blong Amoro* we oli stap long Kenan* naoia, i no kasem fulmak blong hem yet. Taem i kasem fulmak blong hem, bambae mi mi panisim olgeta we bambae mi ronemaot olgeta, nao ol pikinini ya we bambae oli kamaot biaen long yu bambae oli kambak long ples ya bakegen.”
17Nao taem we san i draon finis mo ples i tudak, Ebram i luk we wantaem nomo, wan graonpot mo wan stik faea we i laet, tufala i kamtru long ples ya. Graonpot ya i fulap long faea, we smok blong hem i stap kamkamaot long hem, mo stik faea ya i laet strong, i stap bon. Nao tufala samting ya i pas long medel blong ol haf blong trifala anamol ya. 18#Wok 7.5Mo long dei ya nao, Hae God i mekem promes* wetem Ebram se, “Olgeta graon ya, i stat long krik ya long saot we i mak blong graon blong ol man Ijip, i go kasem Yufretes Reva long not, mi mi promes se bambae mi givim i go long olgeta we bambae oli stap kamaot biaen long yu. 19-21Ol man we oli stap holem ol graon ya naoia, i gat ol laen blong Ken, mo ol laen blong Kenas, mo ol laen blong Kadmon, mo ol laen blong Het, mo ol laen blong Perij, mo ol laen blong Amoro, mo ol laen blong Kenan, mo ol laen blong Gigas, mo ol laen blong Jebus, mo olgeta we ol man oli stap singaot olgeta se ol Refaem.*”
موجودہ انتخاب:
Jenesis 15: BBR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bislama Revised Bible © Bible Society of the South Pacific, 2012.