ناحُوم 1
1
1نِینوؔہ کی بابت بارِ نبُوّت۔ اِلقُوشی ناحُوؔم کی رویا کی کِتاب۔:-
نِینوہ کے خِلاف خُداوند کا غُصّہ
2خُداوند غیُور اور اِنتقام لینے والا خُدا ہے ہاں
خُداوند اِنتقام لینے والا اور قہّار ہے۔
خُداوند اپنے مُخالِفوں سے اِنتقام لیتا ہے
اور اپنے دُشمنوں کے لِئے قہر کو قائِم رکھتا ہے۔
3خُداوند قہر کرنے میں دِھیما
اور قُدرت میں بڑھ کر ہے
اور مُجرِم کو ہرگِز بری نہ کرے گا۔
خُداوند کی راہ گِردباد اور آندھی میں ہے
اور بادل اُس کے پاؤں کی گرد ہیں۔
4وُہی سمُندر کو ڈانٹتا اور سُکھا دیتا ہے
اور سب ندِیوں کو خُشک کر ڈالتا ہے۔
بسن اور کرمِل کُملا جاتے ہیں
اور لُبناؔن کی کونپلیں مُرجھا جاتی ہیں۔
5اُس کے خَوف سے پہاڑ کانپتے
اور ٹِیلے پِگھل جاتے ہیں۔
اُس کے حضُور زمِین ہاں دُنیا اور اُس کی سب
معمُوری تھرتھراتی ہے۔
6کِس کو اُس کے قہر کی تاب ہے؟
اُس کے قہرِ شدِید کو کَون برداشت کر سکتا ہے؟
اُس کا قہر آگ کی مانِند نازِل ہوتا ہے۔
وہ چٹانوں کو توڑ ڈالتا ہے۔
7خُداوند بھلا ہے
اور مُصِیبت کے دِن پناہ گاہ ہے۔
وہ اپنے توکُّل کرنے والوں کو جانتا ہے۔
8لیکن اب وہ اُس کے مکان کو بڑے سَیلاب سے
نیست و نابُود کرے گا
اور تارِیکی اُس کے دُشمنوں کو رگیدے گی۔
9تُم خُداوند کے خِلاف کیا منصُوبہ باندھتے ہو؟
وہ بِالکُل نابُود کر ڈالے گا۔
عذاب دوبارہ نہ آئے گا۔
10اگرچہ وہ اُلجھے ہُوئے کانٹوں کی مانِند پیچِیدہ اور
اپنی مَے سے ترہوں
تَو بھی وہ سُوکھے بُھوسے کی طرح بِالکُل جلا
دِئے جائیں گے۔
11تُجھ سے ایک اَیسا شخص نِکلا ہے جو خُداوند کے خِلاف بُرے منصُوبے باندھتا اور شرارت کی صلاح دیتا ہے۔ 12خُداوند یُوں فرماتا ہے کہ اگرچہ وہ زبردست اور بُہت سے ہوں تَو بھی وہ کاٹے جائیں گے اور وہ برباد ہو جائے گا۔ اگرچہ مَیں نے تُجھے دُکھ دِیا تَو بھی پِھر کبھی تُجھے دُکھ نہ دُوں گا۔ 13اور اب مَیں اُس کا جُؤا تُجھ پر سے توڑ ڈالُوں گا اور تیرے بندھنوں کو ٹُکڑے ٹُکڑے کر دُوں گا۔
14لیکن خُداوند نے تیری بابت یہ حُکم صادِر فرمایا ہے کہ تیری نسل باقی نہ رہے۔ مَیں تیرے بُت خانہ سے کھودی ہُوئی اور ڈھالی ہُوئی مُورتوں کو نیست کرُوں گا۔ مَیں تیرے لِئے قبر تیّار کرُوں گا کیونکہ تُو نِکمّا ہے۔
15دیکھ جو خُوشخبری لاتا اور سلامتی کی مُنادی کرتا ہے اُس کے پاؤں پہاڑوں پر ہیں۔ اَے یہُوداؔہ اپنی عِیدیں منا اور اپنی نذریں ادا کر کیونکہ پِھر خبِیث تیرے درمِیان سے نہیں گُذرے گا۔ وہ صاف کاٹ ڈالا گیا ہے۔
موجودہ انتخاب:
ناحُوم 1: URD
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Revised Urdu Holy Bible © Pakistan Bible Society, 1970, 2010.