Yoh 20

Akui-lë-sòṅ Yesus

Mt 28,1-10; Mk 16,1-8; Lk 24,1-12

1Amos osu ya sòndò, Maria ya Magdala akëlë a sòṅ ai ndib kidi, ndò ayen na akòg anë mvaan a sòṅ. 2Ndò azu mbil abë Simun Petrus ai abë ṅyègè mbòg ya Yesus adiṅi, nyè ai bò na: Bëvaa Nti a sòṅ, ndò biayëm ki e hom bëfudi nyè. 3Petrus ai ṅyègè mbòg bëkui a nsëṅ, bësòò a sòṅ. 4Bò bëbè bëwulugu mbil eyòṅ: Ndò ṅyègè mbòg angambara mbil avol alodo Petrus, ndò atari sòṅ kui a sòṅ, 5ndò alumbu, ayënë biyie bi mbim bidzogo, dzam da, të nyian. 6Simun Petrus fë asòò atoṅo nyè, ndò anyian a sòṅ, ayënë biyie bi mbim bidzogo, 7ai ndòmbò, dzò etoa e hom nlo ongabë; engabë ki ai biyie bi mbim bivòg, dzam da etoa mbaan e hom woe. 8Ṅyègè mbòg ya angatari sòṅ kui a sòṅ a sò hm nyian, ayënë, ayëbë fë. 9Amu hala te babë ki wog Ntilan na ayean hëbë a bëkon. 10Ndò bëyègè bëngasob.

Yesus ayene Maria Magdalena

Mk 16,9-11

11Maria angabë atëlë a sòṅ osu, ayono. A ayono ha, ndò alumbu a sòṅ ete, 12ndò ayen benglès bëbè bëbëgë mimfum biyie, bëtoa enyò e hom nlo, enyò mbòg e hom mëkol, e hom mbim Yesus ongadzogobo. 13Ndò badzo ai nyè na: A mininga, dze wayon? Nyè ai bò na: Bëvaè Nti wama, ndò mayëm ki e hom bëfudi nyè. 14Akòbògò nala, ndò avëṅan a mvus, antala Yesus atëlë, hë da të yëm na Yesus. 15Yesus nyè ai nyè na: A mininga, dze wayon? Za wadzëṅ? Mbol atsogo na e mod nyò ṅnyè asye afub te, nyè ai nyè na: A nti, ngë wa obëgë nyè, kada ma mfag ofudi nyè, ma mayi nyè kë nòṅ. 16Yesus nyè ai nyè na: A Mariam! Ndò avëṅan, nyè ai nyè a nkòbò ebrea na: Rabbuni (nala watyan na: A ṅyëgëlë). 17Yesus nyè ai nyè na: Obë ma namba, amu mabë ki bed abë tara. Këlëg a babëdzaṅ bënë, okad bò na: Mabed abë Tara ai esya waan, abë Zamba wam ai Zamba waan. 18Maria Magdalena asò hm kad bëyègè na: Mëyen Nti; e mam ma mmò akad ma.

Yesus ayene bëyègè boe

Mt 28,16-20; Mk 16,14-18; Lk 24,36-49

19A ngongogële ya amos te, amos osu ya sòndò, mimbè mifëdë e hom bëyègè bëngabë asu e wòṅ bëmbarëga Yuden, Yesus asòò, atëbë a zaṅ, nyè ai bò na: Mvoè ai mina. 20Akòbò nala, ndò alëdë bò mò moe ai mviè dzie. Bëyègè bëngatag ai ṅyënan bëngayen Nti. 21Yesus adugan dzo ai bò na: Mvoè ai mina. E kan tara angalom ma, nala ngò hm fë malom mina. 22Adzoo nala, ndò avundu bò, nyè na: Nòṅan mfufub ṅhëbë. 23E ba ya mingâvaè minsëm, mingâvaaban. E ba mingâbò të vaè, miayi laṅan.

Yesus ban Tomas

24Tomas, dzoe na Didimos, mbòg ya bë awom ai bëbè, angabë ki ai bò eyòṅ Yesus angasò. 25Bëyègè bëvòg bò ai nyè na: Biyen Nti. Nyè ai bò na: Së na mëyen biboga bi sen a mò moe, mëfudi fë onyu wama ete, mëfudi fë wò wama a mviè dzie, ma të yëbë. 26Ndò hm a mvus mëlu mwom, bëyègè boe bëtoa fë a nda ete, Tomas atoa ai bò, ndò Yesus azu, mimbè mifëdë, ndò atëbë bò a zaṅ, nyè na: Mvoè ai mina. 27Ndò azu dzo ai Tomas na: Zaag ai onyu woe ha, oyen mò mama, ozu fë ai wò woe, ofudi wò a mviè dzama, ozu hm bò ṅyëbë, të wabò bisoo. 28Tomas nyè ai nyè na: A Nti wama ai Zamba wama. 29Yesus nyè ai nyè na: Dze yë mbol oyen ma ndò wazu yëbë? Bënë mvòm, eba bayen ki, dzam da bëyëbëgë.

Yohannes akad bia asu dze atil e kalara nyò

30Yesus angabò fë abui mëndëm a mis bëyègè boe, a masëki ntilan a e kalara nyò. 31E ma mëngatilban asu yë na miyëbë na Yesus anë Kristus, mòn Zamba; miyëbë, mibëlë enyiṅ a dzoe die.

موجودہ انتخاب:

Yoh 20: NTE12

سرخی

شئیر

کاپی