Matiu 13
13
Kanicau arǝ Mǝɓeale
(Markus 4:1-9; Luka 8:4-8)
1Àkǝ̀ pwari mǝno ka Yesu puro nying ɓala sǝ kya do a kun Garang. 2Aɓwabunda mana à yì rambǝa abanì ka à lakki kǝrkǝr gandǝa eauwe do aɓa muna-waru, sǝ aɓwana kat came a kun mur.#13:2 Ɓalli gbal aɓa: Luk 5:1-3. 3Pǝlǝa banggia wia agir pas nǝ́ kanicau. Na ama:
Mǝ'rya puro wario a ɓeale. 4Lang ndarǝ kwak mǝsǝɓeale ka aɓea sukkio amur njargula, sǝ amuna-nyal sulǝo à yì tarkia. 5Aɓea kpa a mǝsǝtali, aban mǝnana nzali pa akàm pepe raka. Zuku ka à yì sangna acemǝnana nzali banì lim ɗang. 6Lang pwari camta ka, kara à wuli. À ime acemǝnana nlerǝia bwal nzali pepe ɗang. 7Aɓea mǝsǝɓeale kpa aɓalǝ azwe. Azwe gulo à sorǝkia. 8Aɓea mǝsǝɓeale kpa amur nzali mǝɓoarne, à yì ɓǝl pas à kuti mǝsǝɓeale kusǝ gbǝman, aɓea ka kusǝ lumi-tongno-nong-mwashat, sǝ aɓea ka kusǝ lumi-tārú. 9Ɓwa mǝnana ndanǝ akiru ka ɓǝ̀ o.
Tǝr bangcau mala Yesu nǝ akanicau
(Markus 4:10-12; Luka 8:9-10)
10Alaggana male yiu abani à ɗi ama, “Ace mana sǝ a kǝ ne aɓwana cau nǝ kanicau?”
11Yesu earia wia ama:
Surǝ gir-ɓasǝmbǝra mala Domurǝm mala kuli ka à pana wuni, sǝ yia ka à pea wia ɗang. 12Aɓwana mana à kǝ kwaki kiria arǝ kanigir mem ngga à nǝ̀ pea wia ɓe sǝlǝ amur mǝnana à ndanǝi ka, sǝ à nǝ̀ kum surǝgir kpǝm. Sǝ aɓwana mana à kǝ kwaki kiria raka, kǝ mǝnana à ndanǝi ka à nǝ̀ é a rǝia.#13:12 Ɓalli gbal aɓa: Mat 25:29; Mar 4:25; Luk 8:18; 19:26. 13Mǝnia ka nda gir mana tsǝa sǝ ǝn nggǝ nea wia cau nǝ kanicau ka.
À ndanǝ amǝsǝu,
sǝ à kǝ sǝnban ɗang;
À ndanǝ akiru,
sǝ à kǝ ok cau
kpakia wia ɗang.
14 Abania ka ɓangna mala Ishaya yi lumsǝo, mana ama:
“Wu nǝ̀ nggǝ o,
sǝ pà nǝ̀ kpaka wun ɗang.
Wu nǝ̀ nggǝ sǝna,
sǝ pa wu nǝ̀ bwalte ɗang.
15 Ɓabum aɓwana mǝnia ka
jimgbǝrina;
à kǝ gandǝ okban
nǝ akiria ɗang,
sǝ yia ka à girkina amǝsǝia.
Ɓǝ̀ ana raka mǝsǝia nǝ̀ sǝnban,
à nǝ̀ okban nǝ akiria,
à nǝ̀ bwalta ɓacau
nǝ ɓabumia,
sǝ à nǝ̀ pǝlǝa,
à nǝ̀ nyare abanam,
sǝ mǝ nǝ sonzǝia.” # 13:15 Ɓalli gbal aɓa:
Isha 6:9,10.
16 Ma wun she ka mur wun ɓoaro. Acemǝnana amǝsǝ wun kǝ sǝnban, sǝ akir wun kǝ okban. 17Ən nggǝ bangga wun mǝsǝcau, amǝ'ɓangna mala Ɓakuli andǝ aɓwana mala Ɓakuli pas pak nzal sǝn gir mana wu kǝ sǝn ngga, sǝ à kumo à sǝn ɗang. À earǝna ce oe, sǝ à kumo à ok ɗang.
Yesu bǝlki ɓa kanicau arǝ mǝɓeale
(Markus 4:13-20; Luka 8:11-15)
18 Wu kwaki kir wun wu ok ɓa kanicau mala mǝɓeale: 19Ɓǝ̀ ɓwa ok cau mǝɓoarne amur Domurǝm mala kuli#13:19 Domurǝm mala kuli: Ko “Domurǝm mala Ɓakuli amur aɓwana.”, sǝ ce kpaki wi raka, nda kǝla mǝsǝɓeale mana kpa a tanjargula ka. Mǝɓealɓikea kǝ yiu kǝ fwa gir mana à ɓeali a ɓabumi ka. 20Mǝsǝɓeale mǝnana kpa amur taliban ngga cam a kun ɓwa mǝnana ok ce sǝ é tu nǝ bumpwasǝa. 21Sǝ acemǝnana nlerǝi ko a nzali raka, gandǝ came banì sau ɗang. Pwari mǝnana tanni yipi wi acemǝnana paɓamuri arǝ cau mala Ɓakuli ka, nǝ̀ kaurǝ a kpa. 22Mǝnana kpa aɓalǝ azwe ka nda cam a kun ɓwa mana kǝ ok ce, sǝ bumpina arǝ alta agir mala ɓanza mǝnia andǝ swarkiban mala kume à yì marǝki sǝ à tsǝi pusǝ ɓǝle ɗang. 23Sǝ mǝnana kpa amur nzali mǝɓoarne ka cam a kun ɓwa mana ok cau mala Ɓakuli sǝ kpaki wi ka. A bui mǝnia ka pa ɓǝle gbǝman, a ɓe bui ka pa ɓǝle lumi-tongno-nong-mwashat, sǝ a ɓe ka lumi-tārú.
Kanicau amur mǝssa andǝ nkwangŋan
24Yesu nea wia ɓe kanicau ɗǝm ama:
À nǝ̀ kànì Domurǝm mala kuli arǝ ɓeɓwa mǝnana ɓeal mǝsǝɓeale mǝɓoarne a ɓaban male ka. 25Lang aɓwana na ntulo kat ka, ɓimǝbura yiu yi ɓeal nkwangŋan aɓa mǝssa, sǝ pǝlǝa o. 26Mǝssa tita bwalo, sǝ nkwangŋan pusǝrǝi.
27 Aguro mala mǝtala ɓabanì yiu abani sǝ à ɗi ama, “Ɓwamǝgule, mǝsǝɓeale mǝɓoarne na a ɓeal a ɓaban mo ka re? Sǝ ankwangŋan pur nǝ kǝshe?”
28 Sǝ na ama, “Ɓiam-mǝbura nǝ pak gir man.”
Sǝ aguro ɗi ama, “A earce ama ɓǝ̀ sǝm kya ukkia le?”
29 Sǝ earia wia ama, “Awo, acemǝnana ɓǝ̀ wu ndarǝ ukki ankwangŋan ngga, wu nǝ̀ gandǝ ukkia andǝa mǝssa. 30Wu ɗekia ɓǝa gulo a tarǝia. Pwari wale ka mǝ nǝ ne amǝturo ɓǝa tar nkwangŋan ɓǝa kurkia sǝ ɓǝa pisǝia. Sǝ mǝssa ka ɓǝa soapa mi a ba.”
Kanicau arǝ mǝsǝ musta
(Markus 4:30-32; Luka 13:18-21)
31Yesu banggia wia ɓe kanicau ɗǝm ama:
À nǝ̀ kànì Domurǝm mana a kuli ka arǝ mǝsǝ musta, mǝnana ɓeɓwa twali sǝ ɓeali a ɓaban male ka. 32Ata amǝsǝɓeale kat ka nda mǝsǝì keke kutiban ngga, sǝ ɓǝ̀ yi gulna ka kǝ gulo kǝ kuti acili agirpwala, sǝ kǝ pǝlǝ nggun mǝnana amuna-nyal mana a kuli ka à kǝ bwal ndà arǝ abui ka.
Kanicau arǝ yist
(Luka 13:20-21)
33Nea wia ɓe kanicau ɗǝm ama:
Domurǝm mala kuli ka nda kǝla yist mǝnana ɓe mɓwama twali sǝ sùrǝì andǝ muku tasau tārú, sǝ yi aki ɓa muku tsǝi vwali.
34Yesu ne aɓwana acau mǝnia ka kat nǝ akanicau. Kǝ cau pà kàm mǝnana banggia wia mana kanicau pà kàm raka. 35Pak mǝnia ka ace mǝnana ɓǝa lumsǝ cau mana mǝɓangna mala Ɓakuli bangŋa ama,
“Mǝ nǝ mǝn kunam
nǝ kanicau,
Mǝ nǝ arkia wia ɓalǝ agir
mana à nda aɓa sǝmbǝrǝa
pur a tita ɓanza ka.”#13:35 Ɓalli gbal aɓa: Ang 78:2.
Yesu bǝlki ɓa kanigir amur nkwangŋan
36Yesu ɗeki ɓwabunda a nza pǝlǝa kutio a ɓala. Alaggana male kuti ate à yì ne wi ama, “Bǝla sǝm ɓa kanicau mana amur nkwangŋan a ɓaban ngga.”
37Sǝ Yesu pǝlǝia wia ama:
Ɓwa mǝnana ɓeal mǝsǝɓeale mǝɓoarne ka nda Muna mala Ɓwa. 38Ɓaban ngga nda ɓanza, sǝ amǝsǝɓeale mǝɓoarne ka à ndaka muna mala Ɓakuli a Domurǝm male. Sǝ ankwangŋan ngga à ndaka muna mala Mǝɓealɓikea. 39Ɓibura mǝnana ɓeal nkwangŋan ngga nda Shetan. Wal-mǝsa ka nda masǝlǝata ɓanza, sǝ amǝ'walmǝsa ka à ndaka amǝturonjar mala Ɓakuli.
40 Kǝla mǝnana à kǝ ram nkwangŋan sǝ à nǝ̀ pisǝì a bǝsa ka, anggo sǝ nǝ̀ pa a masǝlǝata ɓanza gbal. 41Muna mala Ɓwa nǝ̀ tur amǝturonjar male, ɓǝa yi pusǝ koya gir kat mǝnana kǝ yinǝ cauɓikea, andǝ aɓwana kat mǝnana à kǝ pak gir mǝɓane aɓa Domurǝm male ka. 42À nǝ̀ ramtea aɓa bǝsa mǝnana pi kǝrkǝr ka. Aban mǝno ka à nǝ̀ ngge ɓua sǝ à nǝ̀ nggǝ nǝmnggi munabuia. 43Sǝ amǝ'ɓealɓoarna ka à nǝ̀ tǎ kǝla pwari aɓa Domurǝm mala Tárria. Ɓwa mǝnana ndanǝ kir okban ngga, ɓǝ̀ o.
Kanicau arǝ gǝna mǝnana sǝmbǝrǝ ka
44 Domurǝm mala kuli ka nda kǝla gǝna mǝnana sǝmbǝrǝa a ɓe ɓaban ngga. Ɓe ɓwa kumi sǝ sǝmbǝrǝi. Banɓoarnado tsǝi makki agirkuma male kat, yi kúr mǝno yì ɓaban ngga.
45 Ɗǝm ngga Domurǝm mala kuli ka nda kǝla mǝ'nggaliki mǝnana kǝ alta nzali ka. 46Lang yi kumǝna mǝɓoarne ka, pǝlǝa nyare o kya makki agir male kat sǝ yi kúrí.
Kanigir arǝ ndámbú
47 Ɗǝm ngga, Domurǝm mana a kuli ka nda kǝla ndámbú mǝgule mǝnana à turi a nggeamur sǝ bwal koya ulang nji kat ka. 48Lang ndámbú lumsǝna ka, amǝkpakia sunyi à yinǝi a nza. À yì do à tarki anji mǝɓoarne aɓalǝ azace, sǝ amǝɓane ka à sukkia. 49Anggo sǝ nǝ̀ pa a masǝlǝata ɓanza. Amǝturonjar mala Ɓakuli nǝ̀ yiu à nǝ̀ yia pusǝki amǝ'ɓealɓikea aɓalǝ amǝ'ɓealɓoarna 50sǝ à nǝ̀ ramta amǝ'ɓealɓikea aɓa ndabǝsa. Akàm ngga à nǝ̀ ɓua à nǝ̀ nggǝ nǝmnggi munabuia.
51Yesu ɗia ama, “Wu bwalǝna ta amǝnia yì acau ka le?”
À ear ama, “E, kpana sǝm.”
52Pǝlǝa nea wia ama “Ace mani ka, mǝ'eaulǝki Nggurcau mala Musa mǝnana à kani wi gir, kum kwar rǝǔ ace Domurǝm mala kuli ka, nda kǝla mǝtala-ɓala mǝnana kǝ pusǝ gǝna mǝbǝshe andǝ amǝ'e aɓa bah male ka.”
Amǝ Nazarat ɓinǝ Yesu
(Markus 6:1-6; Luka 4:16-30)
53Lang Yesu malǝna naki amǝnia yì akanicau ka, pǝlǝa loapi banì. 54Nyar a la male a Nazarat. Tita kani aɓwana gir aɓa ndakpapi malea. Ɓwapǝndǝa ndali sǝ à ɗiban ama, “Ake sǝ mǝnia yì ɓwa ka kum mǝnia yì sǝlǝe andǝ bangŋo mala pakki agir-ndǝlǝki ka? 55Mǝnia ka muna mala kapinta na re? Ngge nda Maryamu sǝ amǝ'eambǝi ndaka Jemis, Yisǝfu, Shiman andǝ Yahuda re? 56Sǝ amǝnggaule kat ka à pà ta sǝm akani re? Sǝ ake sǝ ɓwe man kum mǝnia yì agir kat ka?” 57Bumia lullo a rǝì, à ginǝ earnǝi.
Pǝlǝa Yesu nea wia ama, “Mǝɓangna ka, a ko ya ban ngga la kǝ pe wi gulo, sǝa ma a la male aɓalǝ aɓwana male ka, à pākiyi wi gulo ɗang.”#13:57 Ɓalli gbal aɓa: Yoh 4:43,44.
58Pakki agir-ndǝlǝki pas a la male ɗang ace ɗwanyi earnǝɓwa malea.
موجودہ انتخاب:
Matiu 13: mbu
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. and © The Nigeria Bible Translation Trust 2016
