Matiu 12
12
Mǝtala Sabbat
(Markus 2:23-28; Luka 6:1-5)
1A nzǝm amǝno yì acau ka, a ɓe pwari Sabbat Yesu andǝ alaggana male na aban gya nǝ ban aɓaban mǝssa. Alaggana male ka nzala walia sǝ à kutia harki kir mǝssa, à kǝ she.#12:1 Ɓalli gbal aɓa: Nggur 23:25. 2Amǝ Farisi nǝ̀ yia sǝnia ka à banggi Yesu ama, “Sǝni, gir mǝnia alaggana mo kǝ pe a pwari Sabbat ka yàl Nggurcau ma'sǝm na.”
3Sǝ pǝlǝia wia ama:
Wu ɓal gir mǝnana Dauda pa a pwari mana yì andǝ ɓwana male ka nzala walia ka re? 4Yi kutio a Nda mala Ɓakuli sǝ yì andǝ aɓwana mana ate ka à kya shak bǝredi mǝnana à tàri ɓǝ̀ duk mǝfele ka, mana ɓoaro ɓǝa li ka ɗang, ace mǝnana bǝredi ní ka nda ace apǝris nǝmurǝia.#12:4 Ɓalli gbal aɓa: 1Sam 21:1-6; Pǝris 24:9. 5Ko wu ɓal mbo aɓa Nggurcau mala Musa ama, ko ya pwari Sabbat a Ndàmǝgule mala Ɓakuli ka apǝris kǝ yâl nzongcau mala Sabbat sǝ à sǝnia nǝ cauɓikea raka?#12:5 Ɓalli gbal aɓa: Ɓal 28:9,10. 6Ən nggǝ na wun ama, ɓwa mǝnana kuti Ndàmǝgule mala Ɓakuli nǝ gulo ka nda kani. 7Ɓǝ̀ wu surǝna rǝ ɓa mǝnia yì cau mǝnana ama, “Mǝsǝswatǝr na ǝn earkiyice ka, pà gir'nkila na raka,” ɓǝ́ pa wu nǝ̀ ɓǝsǝki aɓwana mana à panǝ cau a rǝia raka.#12:7 Ɓalli gbal aɓa: Mat 9:13; Hos 6:6. 8Mim, Muna mala Ɓwa ka Mǝ nda Mǝtala Sabbat.
9Yesu nying ban mǝno ka, yi kutio aɓa ndakpapi malea. 10Ɓe ɓwabura mǝnana ɓe bui wu ka ndakam abanì. Amǝ Farisi ka, à ndarǝ alta njar à nǝ̀ kum mǝɓane mǝnana à nǝ̀ na arǝ Yesu ka. Pǝlǝa à ɗi ama, “Nggearǝì ka, Nggurcau ma'sǝm eare ama ɓǝa twalban rǝkwana a pwari Sabbat le?”
11Pǝlǝa earia wia ama, “Ɓǝ̀ ɓe kǝɓwa ata wun ndanǝ nzur male, sǝ nzur nì yi kpa a tūli a pwari Sabbat ka, ɓwe pà nǝ̀ ngga bwali nǝ̀ eamsǝi re?#12:11 Ɓalli gbal aɓa: Luk 14:5. 12Ɓwapǝndǝa ka kuti nzur. Ace mani ka Nggurcau eare ama ɓǝa amsǝ ɓwa mana nda aɓa tanni ka a pwari Sabbat.”
13Pǝlǝa banggi ɓwabure ama, “Sarǝ buo.” Ɓwabure pǝlǝa sarǝ bui, sǝ bui nyare pak pepe kǝla ɓi. 14Amǝ Farisi pǝlǝa à puro a nza à kya kurkunarǝia amur njar mǝnana à nǝ̀ kumo à nǝ̀ wal Yesu ka.
Yesu nda Guro mala Ɓakuli mana tarì ka
15Yesu yi sǝlǝia wia ka, pǝlǝa nying banì. Aɓwana pas o ate. Amǝkwano mǝnana aɓalǝia ka, Yesu yi twalia wia ban arǝkwana malea kat. 16Yi nunkiria ɓǝa kǝa ne kǝɓwa yan nda yì ɗang. 17Mǝnia ka nda lumsǝ cau mala Ishaya mǝɓangna mala Ɓakuli ka. Na ama:
18“Guro mem mǝnana
ǝn tarì ka ndya ka,
mǝnana ǝn nggǝ earce
sǝ bumam kǝ pwasǝa rǝì ka.
Mǝ nǝ tsǝki wi Bangŋo
mem amuri,
sǝ yì ka nǝ̀ hamnǝ ɓashi
mem mǝ'mǝsǝcau nì
aban aɓwana a ɓanza
ama à nǝ̀ kum amsǝban
a buam.
19Pà nǝ̀ pǝlǝki rǝì andǝ kǝɓwa,
ko nǝ̀ loasǝban ɗang;
kǝɓwa pà nǝ̀ ok gi
aɓalǝ aɓwana ɗang.
20Yì ka, nda ɓukɓuk
aban aɓwana mǝnana
à pànǝ rǝcandǝa raka,
sǝ nǝ̀ sǝn mǝsǝswatǝr
mala aɓwana mǝnana
à nda ɓa tanni ka,
nǝ̀ bwalia wia kam.
Nǝ̀ lidǝmbǝa nǝ pa rǝcandǝa
arǝ pe anggo
she ɓǝ̀ tsǝngŋǝna
kpata mǝsǝcau
lina murǝm ngga.
21A rǝì sǝ aɓwana kat
a ɓanza nǝ̀ tsǝkɓalǝia.”#12:21 Ɓalli gbal aɓa: Isha 42:1-4.
Yesu kuti Murǝm mala Akukwar
(Markus 3:23-24; Luka 11:17-22; 12:10)
22Pǝlǝa aɓea ɓwana yiu nǝ ɓe nte mǝnana kukwar na a rǝì sǝ mǝtalasǝ-ɓunna na ka, aban Yesu. Yesu twali wi ban kwano male, sǝ tita na cau sǝ kǝ sǝnban. 23Ɓwabunda kat ndali sǝ à na ama, “Ɓwa mǝnia ka ko nda Muna mala Dauda#12:23 Muna mala Dauda: Ko “Mǝkà Dauda.”, Mǝ'amsǝban mǝnana sǝm kundǝkiyi yiu male ka le?”
24Sǝ amǝ Farisi ka lang à ok mǝnia yì cau ka à bangŋa ama, pa ɓa ɗang, nǝ rǝcandǝa mala Baalzabul Murǝm mala akukwar sǝ kǝ pusǝki akukwar.#12:24 Ɓalli gbal aɓa: Mat 9:24; 10:25.
25Yesu surǝ ɗenyicau malea pǝlǝa nea wia ama:
Nzali mana kat aɓwana male kǝ munǝo a rǝarǝia ka # 12:25 Nzali mana kat aɓwana male kǝ munǝo a rǝarǝia ka : Ko “Ɓǝ̀ kun murǝm kǝ ɓua andǝ amǝte ka” domurǝm malea nǝ̀ kìɗìkì. Là ko ɓala mǝnana gau ka pà nǝ̀ cam ɗang. 26Ɓǝ̀ Shetan kǝ pusǝ Shetan ka, ɓala gauna a rǝì. Lang sǝ domurǝm male nǝ̀ came? 27Ɓǝ̀ ǝn nggǝ pusǝ akukwar nǝ rǝcandǝa mala Baalzabul ka, nǝ mana sǝ aɓwana ma'wun kǝ pusǝia? Yia na à nǝ̀ ɓashia wun ngga. 28Sǝ ɓǝ̀ nǝ Bangŋo mala Ɓakuli sǝ ǝn nggǝ pusǝ akukwar ka, lǝmndǝ ama Domurǝm mala Ɓakuli yina aɓalǝ wun.
29 Sǝ ɗǝm ngga, lang sǝ ɓwa nǝ̀ kutio a ɓala mala ɓwaburaɓwa nǝ̀ pwan agirkuma male sǝ ak dǝmbǝa taka abui ɗang? Ɓǝ̀ pa anggo raka pà nǝ̀ gandǝ pwan agirkuma male ɗang.
30 Ɓwa mǝnana pa atam raka nda a ɓibura nǝ mim, sǝ ɓwa mǝnana kǝ bwalam ramnggi gir raka, ndarǝ mesǝke. # 12:30 Ɓalli gbal aɓa:
Mar 9:40
. 31Ace mani ka ǝn nggǝ na wun ama, ko ya cauɓikea andǝ na caukyauwikiban mǝnana aɓwana ne amur Ɓakuli ka à nǝ̀ twalbani, sǝ ɓwa mǝnana na cau kyauwikiban amur Bangŋo mala Ɓakuli ka, à pà nǝ̀ twali wi banì ɗang. 32Ɓwa mǝnana na cau kyauwikiban amur Muna mala Ɓwa ka à nǝ̀ twali wi banì, sǝ ɓwa mǝnana na cau kyauwikiban amur Bangŋo Mǝfele ka à pà nǝ̀ twali wi banì ɗang, a ɓanza mǝnia andǝ ɓanza mǝnana nǝ̀ yiu ka.#12:32 Ɓalli gbal aɓa: Luk 12:10.
Nggun andǝ aɓǝle
(Luka 6:43-45)
33 Ɓǝ̀ nggun ɓoar ka ɓǝle gbal ka nǝ̀ ɓoaro, sǝ ɓǝ̀ nggun ngga mǝɓane na ka, ɓǝle gbal ka nǝ̀ duk mǝɓane; nggun ka à surǝ́ki arǝ ɓǝle. # 12:33 Ɓalli gbal aɓa:
Mat 7:20; Luk 6:44. 34Wun amuna baffu, lang sǝ cau mǝɓoarne nǝ̀ pur a kun wun, yi mǝnana wu ndaka amǝ'ɓealɓikea ka? Gir mǝnana nda a ɓabum ngga, nda kún banggiyi ka.#12:34 Ɓalli gbal aɓa: Mat 3:7; 15:18; 23:33; Luk 3:7; 6:45. 35Ɓwa mǝɓoarne kǝ pusǝ aɓa cau mǝɓoarne mǝnana rambǝa a ɓabumi ka, sǝ ɓwa mǝɓane gbal ka kǝ pusǝ aɓa mǝɓane mǝnana rambǝa a ɓabumi ka. 36Sǝ ǝn nggǝ na wun ama a pwari ɓashi ka aɓwana nǝ̀ bǝlki ɓa ko ya cau mǝɓane na pur a kunia ka. 37Acau mǝnana à pur a kuno ka à nda à nǝ̀ pakko ɓashi nǝia ka. À nǝ̀ amsǝo ko à nǝ̀ kuro.
Aɓwana alta gir'lǝmndǝa nǝ kuli
(Markus 8:11-12; Luka 11:29-32)
38Aɓea amǝ Farisi andǝ amǝkani Nggurcau ne wi ama, “Malǝm, sǝm nggǝ earce sǝn ɓe kǝgir mǝgule mǝnana nǝ̀ lǝmndǝa sǝm ama rǝcandǝa mo ka pur nǝban Ɓakuli.”#12:38 Ɓalli gbal aɓa: Mat 16:1; Mar 8:11; Luk 11:16.
39Sǝ nyesǝia wia ama:
Kǝ nza mala amǝ'ɓealɓikea andǝ amǝ'ɗwanyi surǝ Ɓakuli na à nǝ̀ alta sǝn gir'ndali ka. Sǝ ɓe kǝ gir'ndali pà kàm à nǝ̀ lǝmndǝa wun ɗang she kǝ mala mǝɓangna Yunana. # 12:39 Ɓalli gbal aɓa:
Mat 16:4; Mar 8:12. 40Kǝla mǝnana Yunana pak pwari tārú andǝ du tārú a bum nggea nji ka, anggo gbal sǝ Muna mala Ɓwa nǝ̀ pak pwari tārú andǝ du tārú aɓa nzali.#12:40 Ɓalli gbal aɓa: Yun 1:17. 41A pwari ɓashi ka amǝ Nineva nǝ̀ lo à nǝ̀ mak wun amǝ nza mǝnia. Acemǝnana à nying acauɓikea malea lang à oangna hama mala Yunana ka, sǝ ɓwa mǝnana kuti Yunana ka ndakani.#12:41 Ɓalli gbal aɓa: Yun 3:5. 42A pwari ɓashi ka Mamurǝm mala amǝ Sheba nǝ̀ lo nǝ̀ mak amǝ nza man; acemǝnana pur a ɓe nzali kuko sǝ yiu ace ok sǝlǝe mala Solomon; sǝ ɓwa mǝnana kuti Solomon ngga ndakani.#12:42 Ɓalli gbal aɓa: 1Amur 10:1-10; 2Kpa 9:1-12.
Nyare mala bangŋo mǝɓane
43 Ɓǝ̀ bangŋo mǝɓane puri rǝ ɓwa ka, pak ka kǝ gali arǝ aban mǝ'ime ace alta ban usǝlǝo, sǝ ɓǝ̀ kum raka, 44pǝlǝa nǝ̀ na ama, “Mǝ nǝ nyare a ɓala mǝnana ǝn pur kam ngga.” Sǝ ɓǝ̀ nyare yi kum ɓala na atarǝì, à esǝkini sǝ à gilǝkini ka, 45pǝlǝa nǝ̀ o nǝ̀ ngga yinǝ aɓea bangŋo tongno-nong-ɓari mǝnana à kuti nǝ ɓealɓikea ka, sǝ à nǝ̀ yia kutio à nǝ̀ do a ɓalǝi. Masǝlǝata mǝnia yì ɓwa ka nǝ̀ ɓike nǝ̀ kuti mǝdǝmbe. Anggo sǝ nǝ̀ pang nǝ nza mǝɓealɓike mǝnia.
Nggea Yesu andǝ Amǝ'eambǝi
(Markus 3:31-35; Luka 8:19-21)
46Yesu na mur banggi ɓwabunda cau sǝ ngge andǝ amǝ'eambǝi yiu à yì came a nza. À kǝ earce ama à nǝ̀ bang cau nǝi. 47Ɓe ɓwa banggi wi ama, “Sǝni, nggo andǝ amǝ'eambǝo nia came a nza ka, ama à nǝ̀ no cau.”
48Pǝlǝa Yesu pǝlǝi wi ama, “Yana nda nggem, sǝ a yana à ndaka amǝ'eambǝam?” 49Pǝlǝa lǝmndǝ bui arǝ alaggana male sǝ bangŋa ama, “Amǝnia ka à ndaka nggem andǝ amǝ'eambǝam. 50Ɓwa mǝnana kat kǝ pak gir mǝnana Tárram mana a kuli ka earkiyice ka nda mǝ'eambǝam, andǝ mǝ'nggaulem, andǝ nggem.”
موجودہ انتخاب:
Matiu 12: mbu
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. and © The Nigeria Bible Translation Trust 2016
