Yohana 4
4
Yesu na mvyele ywa Kisamaliya.
1Zumbe azaukwilwa, kuti Mafaliseyo wazaiva kuti: Yesu aγenyeza wahina, kuti: Abatiza kumzinka Yohana; 2kangi Yesu ṅwenye ne ashibatiza, ni wahina wakwe. 3Azalawa Yudeya, azahita viluhu Galileya. 4Haja shuti adwishe Samaliya. 5Azabula he muzi wa Samaliya weitangwa Sikali, ni hehi na jiya γisa, Yakobo amunkilejo ṅwanae Yosefu; kuja kuna kishima cha Yakobo. 6Yesu aitibuke kwa kuγenda, ne ahoikala he chiya kishima; ni saa mtandatu. 7Kuzaiza mvyele ywa Kisamaliya kwa teka mazi. Yesu amuti: Ninka mazi, ninywe! 8Hambu wahina wakwe ne waihitile na muja kaya kwa γula nkande. 9Yuja mvyele ywa Kisamaliya amuti: Iwe u Muyuda, imi ni mvyele ywa Kisamaliya, unilombeza zeze, nikunke vya nywa? Hambu Wayuda wana ṅwiko na viya vya Wasamaliya. 10Yesu azamhitula, azamuti: Ati wataila, Mulungu avyowainka wantu, ati wataila, kuti ni ndai uyu mwekuti: Ninka vya nywa!, wangamlombeza iwe, akakunka mazi ye moyo. 11Amuti: Zumbe, nkuna vya tekela, kangi kishima chaleha, yaja mazi ye moyo uyalavya na hi? 12U mkutu kumzinka tate yweshu Yakobo atinkileye ichi kishima? Kangi ṅwenye azanywa mumo na wanae na ṅombe zakwe. 13Yesu azalandula, azamuti: Kila mwenywa aya mazi ataona nkilu vituhu. 14Ndiye anywe mazi, niyomunka imi, nkezeaone nkilu kale na kale, miya yaja mazi, niyomunka, yataγaluka mwe ṅwili wakwe shoko ya mazi yehita kwa bula kwe nkaiamo ya kale na kale. 15Yuja mvyele amuti: Zumbe, ninka ayo mazi, kangwe nishezaona nkilu, nikiiza na kunu kwa teka! 16Azamuti: Hita, umwitange mulumewo, uize naye na kunu! 17Yuja mvyele azalandula angwe: Sina mγoshi. Yesu amuti: Uzalonga vitana, ukiγamba: Sina mγoshi. 18Hambu ne uina waγoshi washano, kangi yuja uyena naye ivi lushe, so mulumewo; aho uzalonga kweli. 19Angwe ni yuja mvyele: Zumbe, naona, kuti u mteγanyingwa. 20Watate zeshu wazavika mwe unu mulima, kangi inywi mwaγamba: Hantu ha kuvikila heagiza ni kuja Yelusalemu. 21Yesu azamuti: Mlala, tozesha, nikiγamba kuti: Hazabula, ndiho mshemvike Tate mwe unu mulima ao uko Yelusalemu! 22Inywi muvika mushivyotaila, ishwi tivika tivyotaila, kwa kuti uvunizi uanduka kwa Wayuda. 23Miya nehabule, kangi ivi lushe ha haha, ndiho waja wevika kweli wamvike Tate kimpeho na kikweli; hambu Tate yohe alonda wemvika ivyoho. 24Mulungu ni mpeho; kwa ivyoho waja wemvika shuti wamvike kimpeho na kikweli! 25Angwe ni yuja mvyele: Nataila, kuti Mesiya aiza mweitangwa Kilisito; ndiho yuja aize, atatibilikila vyosheni. 26Yesu azamuti: Ni miyo nelonga na iwe.
27Vikibula aho, wahina wakwe wazaiza, wazamaka, kuti alonga na mvyele; miya nkakuna alongileye kuti: Ulondai ao ulongai naye? 28Yuja mvyele azaasha iγa jakwe, azahita na kaya, azawati waja wantu: 29Izai, mwolele muntu aniγambileye vyoshe, naγosholavyo, ati siye Kilisito! 30Wazalawa muja kaya, wazamubasha. 31Wahina wakwe wazamhimila angwe: Mfuzi, ja! 32Azawati: Imi nina vya kuja, inywi mshivyotaila. 33Wahina wazaγambilana: Kuna amleteleye vya kuja? 34Yesu azawati: Nkande yangu ni kuγoshola, yuja anitumileye avyokunda, nibontole ndima yakwe. 35Inywi nkamlonga: Kukeshiγale myezi mine, uluki ukibula? Namiti: Inulai mesho yenyu, mwolele mbuwa, kuti ziikalaγale, zizabuza uluki lushe! 36Muluki ainkwa kitumulo chakwe, ni nkalamo ya kale na kale, aiumbikila kuwo, kangwe mwehanda na mweluka waone nyemi kiṅwe. 37Hambu iyo mbuli ni ya kweli kuγamba: Kuna mwehanda, kuna mweluka. 38Imi nizamituma, muluke, mshiγosholeho ndima; watuhu wazaγoshola ndima, inywi mzaingila mwe ndima yawe. 39Wasamaliya wangi wa uja muzi wazamtozesha kwa mbuli ya yuja mvyele, akiwalonga uwona kuti: Azaniγambila vyoshe naγosholavyo. 40Wasamaliya wakiiza kwakwe wazamhembeleza, aikale kwawe, azaikala kuja mishi mili. 41Waja watozeshewo kwa mbuli yakwe ṅwenye wazaisiiza kuγenela, 42wazamuti yuja mvyele: Lushe nkatitozesha kwa viya, ulongilevyo; hambu wenye tizaiva, tizataila kuti: kweli uyu ni mvunizi ywa inu shi.
Mfuṅwa ywa Kapelinaumu.
43Mishi mili ikizinka, azakulawa kuja, azahita Galileya. 44Kangi Yesu ṅwenye azavilongela uwona kuti: Mteγanyi nkagimbikwa kaya kwakwe ṅwenye. 45Akibula Galileya, Wagalileya wazamhokela, hambu wazaona vyoshe, aγosholevyo Yelusalemu mishi ya uja mviko; hambu wohe waihitile kwe uja mviko. 46Azaingila vituhu Kana ya Galileya, aγalamushizemo mazi mvinyo. Kuna mfuṅwa ywa zumbe, ṅwanae ni mtamu uko Kapelinaumu. 47Yuja akiiva, kuti Yesu azalawa Yudeya, azabula Galileya, azamubasha, azamhembeleza, asheele, amhonye ṅwanae, hambu azaunga kufa. 48Yesu azamuti: Mkisheona ntangilo na vimaka nkemtozeshe. 49Angwe ni yuja mfuṅwa ywa zumbe: Zumbe, sheela, ṅwanangu ashizati afe! 50Yesu munti: Hita! Ṅwanawo a moyo. Yuja muntu azatozesha inu mbuli, Yesu amlongileyo, azahita. 51Akesheela azakintana na wapuna wakwe, wazamuti: Ṅwanawo a moyo. 52Azawauza, ati ni lini, aeneho lubaluba; wazamuti: Γulo saa mfungate kiluke chizamleka. 53Ishe azataila, kuti ni haja, Yesu amlongileho: Ṅwanawo a moyo. Ne ahotozesha na chengo chakwe kigima. 54Ulu lushe ni lwitangilo lwa mbili, Yesu aγosholelo akilawa Yudeya, akihila Galileya.
موجودہ انتخاب:
Yohana 4: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
