Yohana 10
10
Mulishi.
1Kweli namiti: Ashiyeingila mwe dewa ja ngoto he kifiγwe, akikwela na hatuhu, yuja ni mubavi na mumpoko. 2Miya mweingila he kifiγwe ni mulishi ywa ngoto. 3Uyu azuγwilwa ni muluγojo; ngoto zaiva kanwa chakwe, ngoto zakwe ṅwenye aziitanga na mazina yawe, azilavya. 4Akibinda kulavya ziya zakwe ṅwenye azilongwela, ngoto zakwe zamtongela, kwa kuti zataila kanwa chakwe. 5Mtuhu nkazimtongela, miya zitamnyilika, kwa kuti nkazitaila vyanwa vya watuhu. 6Ulu lushimo Yesu azaluwaγambila, miya waja nkawataile bontokelo ja viya, awalongilevyo.
Kifiγwe.
7Yesu azalonga vituhu angwe: Kweli namiti: Imi ni kifiγwe cha ngoto. 8Woshe wanilongwelewo ni wabavi na wampoko; miya ngoto nkaziwaivile. 9Imi ni kifiγwe; ati muntu aingila hangu, atavunilwa, ataγenda akihaingila, kangi akihalawa, aone vya ja. 10Mubavi nkahaiza, aiza du, abawe, afuwe, akome; imi niizile, wainkwe nkalamo, waγenyeze vyoshe.
Mulishi mtana.
11Imi ni mulishi mtana; mulishi mtana akiinkila kwa mbuli ya ngoto. 12Mndima ashiye mulishi, ashiye ṅwenye ngoto, akiona, shuwi jikiiza, aasha ngoto, aoyilika, shuwi japakula ngoto na kuziasakanya. 13Hambu ni mndima, nkana sungu kwa mbuli ya ngoto. 14Imi ni mulishi mtana, nalaila ngoto zangu, zohe zanitaila, sa Tate avyonitaila, nami nivyomtaila Tate; 15nakiinkila kwa mbuli ya ngoto. 16Kangi nina ngoto ntuhu zishizo za iji dewa, zoshe shuti nizilete, ziive kanwa changu, ziγaluke ifyo iṅwe, mulishi muṅwe. 17Ne vyeleka, Tate akinikundisha, kwa kuti nakiinkila, kangwe niuye moyo vituhu. 18Nkakuna mwevinikundila, miya imi nikiinkila ṅwenye. Niishungulwe Kukiinkila, kangi niishungulwe kuuya moyo vituhu. Unu ni mulomo, nihokelewo kwa Tate. 19Vituhu Wayuda wazapangana kwa izi mbuli. Hambu weyae 20wawe wangi wazaγamba: Ana mzimu, alaluka, mumteγeleza ywai? 21Watuhu wazaγamba: Inu so milongele ya muntu mwelaluka, kuna mzimu wedaha kuγubwila matuntu mesho?
Ngoto za Yesu.
22Mishi ija Yelusalemu kuna nyemi ya kufukila, vikilongwa jizengiγwevyo vituhu, ni mishi ya nyota. 23Yesu azaanga mwe vikilongwa mwe banda ja Salomo. 24Wayuda wazamdenganila angwe: Utizunganya mpaaa lini? Tiγambile na kulaviliza, ati iwe u Kilisito! 25Yesu azawahitula angwe: Nizavimiγambila, kangi nkamtozesha. Ziya ndima, nizoγoshola mwe zina ja Tate, zanilongela uwona, 26miya inywi nkamtozesha, kwa kuti nkamu ngoto zangu. 27Ngoto zangu zaiva kanwa changu, naml nazitaila, zanitongela; 28naziinka nkalamo ya kale na kale, nkezeziaγe kale na kale, nkakuna ndiye azipakule mwe mkono wangu. 29Tate azininkileye ni mkulu kuzinka wosheni, nkakuna ndiye adahe kuzipakula mwe mkouo wa Tate. 30Imi na Tate ti haṅwe.
Yesu ṅwana Mulungu.
31Wayuda wazainula vituhu mawe, kangwewamhomele. 32Yesu azawalandula angwe: Nizamionyesha ndima ntana nyingi ziandukezo kwa Tate, ni ndima ani yeleka, mkinihomela mawe? 33Wayuda wazamlandula, wazamuti: Nkatikuhomela mawe kwa kuti uzazifya ndima, miya kwa kuti wamweza Mmungu, hambu u muntu, kangi wakiγalusha Mulungu. 34Yesu azawalandula angwe: Nkavigondiγwe mwe milomo yenyu kuti: Imi nizaionga: Mu walungu? 35Ati waja walongiγwawo na mbuli ya Mulungu azawaitanga walungu — kangi vigondiγwevyo nkavidaha kuushiγwa — lushe imi, 36Tate aniṅazizeye, anitumileye mwe inu shi, inywi mtanilonga kuti: Wamweza Mulungu, kuti nizalonga: Ni ṅwana Mulungu? 37Ati nasheγoshola ndima za Tate, mshenitozeshe! 38Ati naziγoshola, mkishenitozesha imi, tozeshai ziya ndima, kangwe mtailishe mwive kuti: Tate a haṅwe na imi, kangi imi ni haṅwe na Tate!
39Wazalonda vituhu kumgwila, miya azalawa mwe mikono yawe. 40Azahita vituhu na sheja jiya ja Yolodani haja hantu, ndiho Yohana akibatiza bosi, azahaikala. 41Wangi wazamubasha, wazalonga: Yohana nkana lwitangilo, aγosholelo, mbuli zoshe Yohana alongilezo za uyu, ni za kweli. 42Wangi wazamtozesha kuja.
موجودہ انتخاب:
Yohana 10: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
