Kod 3
3
Kojugu fɔlɔ
1 #
Yir 12.9; 20.2 Masa Ala tun ye kongosogo minw dan, saa le tun ka cegu n'u bɛɛ ye. Saa y'a fɔ muso ye ko: «Tiɲɛ na, Ala y'a fɔ ko aw kana yɔrɔ nin yiriw si deen dumu wa?» 2Muso y'a jaabi ko: «An be se ka yɔrɔ nin yiriw deen dumu. 3Nga yiri min be yɔrɔ nin cɛmancɛ la, Ala ko an kana ale deenw dumu, ko an kana maga a la. Ko n'o tɛ, an bena sa.» 4Saa y'a fɔ muso ye ko: «Aw tena sa. 5Ala y'a lɔn ko ni aw y'o yiri nin deen dumu loon min na, aw ɲaa bena yɛlɛ, aw bena kɛ i n'a fɔ ale, ka koɲuman ni kojugu lɔn.»
6Muso y'a ye k'o yiri nin deen ka di dumu na, ko a fana filɛ ka di, ani ko a be lɔnniya di mɔgɔ ma. A ye dɔ tigɛ k'a dumu ka dɔ di a cɛɛ ma a gɛrɛfɛ, ale fana y'a dumu.
7O tuma na, u fila bɛɛ ɲaa yɛlɛla, u y'a lɔn ko u fari lakolon lo. O kosɔn, u ye torofuraburuw kalan ɲɔgɔn na k'u yɛrɛ sutara n'o ye. 8Wuladafɛ, tile sumana waati min na, u ye Masa Ala yaalayaalatɔ mankan mɛn yɔrɔɲuman nin kɔnɔ. U dogor'a ɲa yiriw cɛma.
9Masa Ala ye cɛɛ wele k'a fɔ a ye ko: «I be min?» 10Cɛɛ y'a jaabi ko: «Ne y'i mankan mɛn yɔrɔɲuman nin na, ne siranna, ka dogo bari ne fari lakolon lo.» 11Masa Ala ko: «Jɔn y'a fɔ i ye ko i fari lakolon lo? Ne y'a fɔ i ye ko i kana yiri min deen dumu, i y'o dɔ dumu kɛ?» 12Cɛɛ y'a fɔ ko: «I ye muso min di ne ma, ale lo ye yiri nin deen dɔ di ne ma, ne y'a dumu.» 13#Kor 2nan 11.3; Tim fɔlɔ 2.14 Masa Ala y'a fɔ muso ye ko: «Mun na i y'o kɛ?» Muso y'a fɔ ko: «Saa le ye ne nigɛ, ne y'a dumu.»
14Masa Ala y'a fɔ saa ye ko: «I y'o kɛ minkɛ, i dangana begɛnw ni kongosogow bɛɛ cɛma! I bena fofo i kɔnɔbara kan, ka buguri dumu i sii bɛɛ la. 15#Yir 12.17 Ne bena e ni muso kɛ ɲɔgɔn juguw ye, k'i deenw n'a taw kɛ ɲɔgɔn juguw ye. Muso ka deen bena i kungolo ɲɔɲɔ, i ben'a cin a seen na.»
16Ala y'a fɔ muso ye ko: «Ne bena i ka deen woloko gwɛlɛya kosɔbɛ. I bena tɔɔrɔ wolowaati la. I cɛɛ nigɛ bena kɛ i la, ale bena kɛ i kuntigi ye.»
17 #
Ebu 6.8
Ala y'a fɔ cɛɛ ye ko: «I sɔnna i muso ta ma, ka yiri nin deen dumu, ne tun y'a fɔ k'a gwɛlɛya i ma ko i kana min dumu. O kosɔn, dugukolo dangana i kama. I bena baaragwɛlɛn kɛ i sii bɛɛ la ka sɔrɔ k'i daladumuni sɔrɔ. 18A bena ŋɔni ni binjugu bɔ i kama, suman le bena kɛ i ka balo ye. 19I bena i daladumuni sɔrɔ i wasiji la fɔɔ i ka kɔsegi dugukolo kɔnɔ, i bɔra min na. I ye buguri ye, i bena kɔsegi buguri la.»
20Adama y'a muso tɔgɔ la ko Awa, bari adamadenw bɛɛ bamuso lo.
21Masa Ala ye golo ta ka delekew dilan Adama n'a muso ye k'u fɛɛrɛbɔ n'o ye.
22 #
Yir 22.14
O kɔ, Masa Ala ko: «Sisan, Adama kɛra i n'a fɔ anw, ka koɲuman ni kojugu lɔn ka bɔ ɲɔgɔn na. An k'a bali janko yiri min be sii di mɔgɔ ma, a kana o deen tigɛ k'a dumu, ka to nii la kudayi.» 23O le y'a to Masa Ala y'a gwɛn ka bɔ Edɛn, yɔrɔɲuman na, ko a ka taga dugukolo sɛnɛ, a bɔra min kɔnɔ. 24A ye cɛɛ gwɛn ka bɔ yen tuma min na, a ye mɛlɛkɛ bisigi dɔw sigi yɔrɔɲuman nin kɔrɔn ɲafan fɛ, minw tɔgɔ ko *serubɛnw, ka murujan manamananin fariman di u ma janko ka yiri nin sira kɔlɔsi, min be sii di mɔgɔ ma.
موجودہ انتخاب:
Kod 3: AKKDC08
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
La Bible en Jula © Alliance Biblique du Burkina Faso, 2007.