'Lu 24
24
:Yusu'-a' 'meh :sorn-' :dhih
(Mt 28.1-10; Mk 16.1-8; Jn 20.1-10)
1:Yee' 'doror'-dlu-a' :zai'-we-eh: an 'da-dih-a 'Sorle, 'do eh-a' zorn bo-mlai'-we-eh 'di, :yee' 'nynor⧾ :dao', deh⧾ :dao' :en po-a 'no 'jeh no, on po-a 'kpa, me-: on kpa, 'de on mu 'de :Yusu'-a' nma-dih-deh bo. 2:Yeh on nyni-a 'o, :yee' on 'ye-eh' :ka sobu' klibo:-a, on 'wluh-a 'o eh worn 'i. 3Jorwor: :yeh on pa-a 'de, :yee' on :se-' :Gwlor :baa' :Yusu'-a' 'ku 'ye 'de mor. 4:Ka an 'chihleh-eh 'i, :yee' 'yli :a bla-a 'i, on 'ye nyor⧾-kpalu⧾ 'sororn', mo-: :nyna 'o on 'bhun dih, :on :korn paa-tiei-a chleh 'yli-', :eh gweh-a dhehn 'i. 5:Yeh 'nynor⧾ :dao', on 'ye-uh'-a, :yee' :fano-a: no-uh, 'de on 'jli dih 'do 'bluhbor. 'De nyor⧾-kpalu:⧾ :dao', on :wlu 'de on bo, on 'dae:, :Eh :korn dhih, 'de a 'bhorn 'kmo :ne-nyor dih, 'de 'meheh'-nyor⧾ 'klu-' :eh? 6Or se :daa :ne. Or :sorn-' 'weh. Ti or :ne-a 'de a bo, 'de :Galali'i-bluhba ken, deh or :za-a-', a :po-dih-eh :gwluhuh' bo, 7or no-a, 'Yu an 'da-dih-a Nyor-kpalu-a' 'yu, or :korn or 'ye 'kwla :za-eh: 'de deh⧾-zon:⧾ :no-nyor⧾ bo. 'De mor, or :korn or 'ye 'o tu 'i :kor-dih-eh:. :Yee' 'do 'we-eh-a' taan neh 'di, or mu-' :sorn.
8:Yeh on 'da :ao', :yee' 'nynor⧾ :dao', on :po-dih: dhih :Yusu' :za-a-' :gwluhuh' bo 'weh. 9:Yeh on 'wluh-a 'o nma-dih-deh worn 'i, 'de on nyni-a :gwlor-', :yee' on zela: :Yusu'-a'a: bo :na-nyor⧾-a' :bhue: 'yor-eh :ne-a :due'-: 'dekorn: nyor⧾-a' klehkpeh-: deh⧾-a' klehkpeh on 'ye-a :gwluhuh', 10:Mehle' :or 'wluh-a :Magala'-: :Joa'na-: :Mehle' :or no-a 'Jeen 'de-: 'dekorn: 'nynor⧾ :noo' :on :ne-a 'o on bo-: mo-: zela: :Yusu'-a'a: dboo-nyor⧾ deh⧾ :daa :gwluhuh'. 11Jorwor: on :se-uh' dhih 'jeh-' po. On 'da :bobo-dhih: 'o, an za-a-'. 12Jorwor: :yeh :Piteh' 'worn-ih'-a, :yee' or :sorn-' 'weh, 'de or kpa ple-a' 'de nma-dih-deh worn 'i. :Yeh or nyni-a 'o eh bo, :yee' or 'jli-: dih, 'de or pobo: 'de eh 'di, or 'ye 'nena-ylii :due' 'klein'. :Yee' or mu-' :gwlor, 'de or 'chihleh-eh 'i, 'do or :porluh ken, 'do deh :eh :no-eh bo.
:Yusu'-a'a: bo :na-nyor⧾ 'sororn' 'ye-or
(Mk 16.12-13)
13'Do 'we-eh: :ne-a :due' 'di, :yee' nyor⧾ 'sororn' :an na-a :Yusu' bo, mo-: :an mu :gwlor an 'da-dih-a 'Imeyor 'di, :eh 'beh-dih: :eh 'ye-a' 'wluh :Julu'slehn, 'de mu 'o-a' tluh⧾ 'bor⧾ :meheh' 'sorn no. 14:Yeh an mu-a, :yee' an bla :manua: 'do deh⧾-a' klehkpeh :en :no-eh, en-' dhih bo. 15:Yeh an bla-a :manua, :yee' :Yusu'-a' 'jeh 'yor-eh-a yi-: 'de, 'de or 'kpa 'de on 'nyne-', 'de or :ne an na-dih :dha :due', an mu. 16On 'ye-or', jorwor: on se-or 'i yubo:. 17:Yeh eh no :ao', :yee' or dhele-uh-: dih, or 'da, :Eh :korn :manua a bla, 'de a na :gwie bo :eh?
:Yeh or dhele-uh-a dih, :yee' on :nyna dih 'dhuan, 'de :wehlih: ka 'di. 18:Yee' an-a' nyor :due', an 'da-dih-a :Kleo'pa, or-: dhele-or dih, or 'da, :On :due' no nyor :or 'ti :daa :Julu'slehn, :or se deh⧾ :en mu-a 'dlu bo, dha 'we 'sororn' :daa 'di yubo: :e?
19:Yeh or 'da :ao', :yee' :Yusu' dhele-uh-: dih, or 'da, Deh 'i-deh:⧾ 'o :eh?
:Yeh or 'da :ao', :yee' on 'dae:, :Yusu' :or 'wluh-a 'Nazla, or-a' dhih :oo'. Or no Nyorsoa-a' wele-eh: :po-nyor: :dee', 'de or-a' wlu-: 'dekorn: :koan-: en :ne 'kpih ken, 'do Nyorsoa-: 'dekorn: :gwlor-nyor⧾-a' klehkpeh-: ybei'. 20Or-: Nyorsoa-a' 'slaa: :za-nyor:⧾ :klaba'⧾-: 'dekorn: :a-a'a: nyor⧾ wlu 'ken :korn-nyor⧾-: on :za 'kwla, 'de 'Wloon-nyor⧾ bo, on 'ye-or' wlu 'ken chehn, or 'ye 'meh. 'De on :kor-dih-or 'o tu 'i. 21Jorwor: :a :mor :mloror', :a dhe-eh-: :gwlii' :dee', :ka eh 'dhu-or mor-' :or mu-a 'Ezlea-bluhba zelie. 'De mor, :eh 'wluh-a 'o ti deh⧾ :daa en :no-dih-eh, eh-a' 'we-eh-a' taan neh :wor :dhe dih :naa. 22'De mor :neheh' :ke, :a-a'a: 'nynor⧾-kpao'⧾ :noo', deh on :za-a-', eh-: 'ma-dih: 'de :a 'di dih. On mu 'de :Yusu'-a' nma-dih-deh bo :glaa'on zorn bo-mlai'. 23Jorwor: on :se-' or-a' 'ku 'ye. 'De on 'yle, on zela: :a :gwluhuh', on 'da, an-a' 'yli-eh 'kpa deh 'i, 'de on 'ye 'enjor-nyor⧾, mo-: zela-uh :gwluhuh' :ka or :ne-a 'kmo-'. 24:Yee' :a 'bei' :noo', mo-: mu 'de or-a' nma-dih-deh worn 'i :ke, 'de on 'ye-eh :ka :a-a'a: 'nynor⧾-kpao'⧾ no-a eh-a' :za-a' 'tene' :kpeen:. Jorwor: on :se-or' 'ye.
25:Yeh on 'da :ao', :yee' or :wlu-' 'de on bo, or 'dae:, A :mor :daa :or 'ble-a :porluh :due', :or :korn-a :porluh:⧾ :kmu-a, 'do deh⧾-a' klehkpeh Nyorsoa-a' wele-eh: :po-nyor⧾ :za-a-', en-' dhih 'jeh-' :po-eh bo. 26A se-eh yubo:, :ka Nyorsoa-a' 'taan'-yu :korn or 'ye-a deh⧾-a' klehkpeh :daa, en-' 'kle 'ye :gbor :gbor, 'de or 'ye-a dhih-a' 'i 'beh-a' 'ye 'de Nyorsoa 'bli yai' :e? 27:Yeh or 'da :ao', :yee' or zela-eh ken dih 'weh, deh⧾-a' klehkpeh :en :za-eh 'do or 'bhun, :eh tba-a 'de :Mose'-a' 'chlee-deh bo dih, 'de :eh :yeh-dih:-a Nyorsoa-a' wele-eh: :po-nyor⧾-a' klehkpeh an-a' 'chlee-deh⧾ ken.
28:Yeh an 'koan'-dih-a :gwlor an mu-a 'di 'de, :yee' :Yusu'-a mu-', :eh gweh-a :ka nyor :or zi-a :deh. 29Jorwor: on 'neh-or ken 'gabaa, on 'da, :Dhe dih dha :a bo. Deh no-eh, glu-a yi gor 'da. :Yeh on za-or :gwie 'i, :yee' or :pa-dih: 'o on bo 'weh, or 'ye 'o on bo 'pehn. 30:Yeh on pa-a, :yee' or :dhe dih 'do on bo, on 'ye deh di. :Yeh on :dhe-a dih, :yee' or 'duo: 'bhlee: :kpuan'-' 'weh, or po Nyorsoa-a' 'zio, 'de or :chehn-dih-eh dih 'de or 'kwa, or 'nyi-eh on, on 'ye-eh' di. 31:Yeh or no :ao', :yee' an-a' 'yli kan-dih: 'i 'weh, 'de on yubo-or 'i. Jorwor: 'do :dha :due' 'jeh :dao', or 'ma-dih: on 'yli 'weh. 32:Yeh or no :ao', :yee' an 'chihleh-eh 'i, 'de an-a' 'jeh 'nyne-', an no, Ti or wlu-a 'de :a bo, 'de or zela-a :a Nyorsoa-a' 'chlee-deh⧾-a' dhih ken dih 'do :gwie 'i, :yee' 'mona-a :se-' :a dih 'yi-dih: :e?
33:Yee' 'do :dha :due' 'jeh :dao', on :sorn-' 'weh, 'de on mu :Julu'slehn de. 'Do :wor on :yeh-dih: :Yusu'-a'a: bo :na-nyor⧾-a' :bhue: 'yor-eh :due', :on :sie:-a 'o-: 'dekorn: nyor⧾ :noo'-: ken. 34:Yee' nyor⧾ on :yeh-dih:-a ken, on 'dae:, Keen' 'jeh ka. :Gwlor :baa' :sorn-' 'weh. Or 'wluh-dih: Samor'-: 'i.
35:Yeh nyor⧾ :dao', on 'da :ao', :yee' on 'kpa 'o an-a' ne-a' :za 'da 'weh :ke, deh :eh :no-eh 'do :gwie 'i, 'de eh 'dhu-a ti :Yusu' :chehn-dih:-a 'bhlee dih 'de or 'kwa :weh, 'de an mu-or 'i yubo:.
:Yusu' 'wluh-dih: or-a'a: bo :na-nyor⧾ 'i
(Mt 28.16-20; Mk 16.14-18; Jn 20.19-23; Nd 1.6-8)
36:Yeh on 'si-a 'o deh :daa, eh-a' :za 'da, :yee' :Yusu'-a' 'jeh 'yor-eh 'wluh-dih-uh-: 'i, 'de or :nyna 'o on 'nyne-' dih, or 'dae:, :Porluh-a' dih 'pehn-eh: 'do a bo.
37:Yee' on 'gele:-'-: dih, 'de :fano-a no-uh. Deh no-eh, :mor on :taa 'ye, :yee' on 'da 'meheh'-nyor-a' :zulu: 'o :dee', on 'ye. 38'De or 'dae: 'de on bo, :Eh :korn dhih a 'beh-dih a-a' 'jeh 'worn dih :eh? 'De a-a' :porluh⧾-a dhobo :eh? 39A pobo: 'noror 'on 'kwa-: 'dekorn: 'an buh⧾-: ya. 'An 'jeh 'yor-eh: 'o, :or :dhe dih. A 'tuh 'on dih, a 'ye-eh' 'ye. 'Meheh'-nyor-a' :zulu se 'pla⧾-: 'dekorn: 'kpa⧾-: 'ble, :ka a 'ye-a 'on, 'on :ne-a.
40:Yeh or 'da :ao', :yee' or :to 'o or-a' :kola⧾-: 'dekorn: or-a' buh⧾-: on 'ye-ih' 'ye. 41Jorwor: on :se-eh' dhih 'jeh-' po 'gboror:. Deh no-eh, eh :florn-dih-uh-: worn, 'de eh 'yi-dih-uh 'mona dih. Eh-: no-eh, 'de or dhele-uh dih, or 'da, A 'ble deh 'do di-a' bo dha mor :e? 42'De on 'nyi-or zimi-eh: on pi-a, eh-a' 'kplo. 43'De or 'duo-eh', or di-eh 'do on ybei'.
44:Yee' or 'da, Ti a-: 'mor-: :a :ne-a :dha :due', deh⧾ 'on zela: a :gwluhuh', me-: :dhe dih :naa, 'on no-a, Deh⧾-a' klehkpeh :en 'chle-eh 'do 'on 'bhun, 'de :Mose'-a' 'tele'-chlee-deh 'di-: 'de Nyorsoa-a' wele-eh: :po-nyor⧾-a' 'chlee-deh⧾ 'di-: 'dekorn: 'de :Saan'-chlee-deh 'di-: en :korn en 'ye dhih 'jeh-' 'kpa :gbor :gbor, :ka en no-a eh-a' :za-a'.
45'De or kan-dih: an-a' deh-' dih 'worn-eh 'i, on 'ye Nyorsoa-a' 'chlee-deh dih 'worn deh 'jeh. 46'De or 'da, Eh 'chle-eh:-' 'de Nyorsoa-a' 'chlee-deh 'di, eh 'da, Nyorsoa-a' 'taan'-yu-a mu 'kle 'ye-:, 'de or 'ye 'de nma-dih-deh 'di 'wluh, 'do 'we-eh-a' taan neh 'di. 47:Yee' nyor⧾-a mu or-a' tubo-wlu⧾ :po, 'de 'dawor'⧾-dlu⧾-a' klehkpeh bo, 'de or-a' 'nyne 'di, :eh tba-a :Julu'slehn dih :chio'lo:, 'de :eh mu-a, 'de on 'ye nyor⧾ :gwluhuh' zela: on 'ye an-a' deh⧾-zon⧾ dih 'tali:, 'de on 'ye 'de Nyorsoa bo 'bili:, 'de or 'ye an-a' deh⧾-zon⧾-a' dhih bo 'ma-dih:. 48A :mor mu nyor⧾ :gwluhuh' zela: 'do deh⧾ :daa, en-' dhih bo, deh no-eh, a :mor 'ye en-' dha. 49Deh :korn-a wlu 'On-ba po-a :dhama'-', 'an mu-eh a bo :dbo. :Yee' eh-a' dhih, a :dhe :Julu'slehn dih :chio'lo:, 'kpih 'ye 'de Nyorsoa 'bli yai' 'wluh, en 'ye a 'nyi-eh:.
:Yusu' mu 'de Nyorsoa 'bli yai'
(Mk 16.19-20; Nd 1.9-11)
50:Yeh :Yusu' gweh-a wlu-a' 'i, :yee' or za-uh 'o :gwlor-' 'weh, 'de on mu, on 'koan'-dih: :Behtani'i-gwlor dih :weh-beh:. :Yeh on nyni-a 'o, :yee' or :to or-a' son⧾ yai', 'de or po-uh :bhorlie' bo. 51:Yeh or 'si-a 'o an-a' :bhorlie' bo :po 'da, :yee' or 'wluh 'o on bo 'weh, 'de Nyorsoa 'duo-or', or kpa-or 'de or 'bli yai'. 52'De on :za or-a' :weheh', on 'ble 'mona: :no-eh, on mu :Julu'slehn de. 53'De an gweh-dih 'do Nyorsoa-a' 'sla ybei', 'de an po or-a' 'nyne ya 'do ti-a' klehkpeh bo.
موجودہ انتخاب:
'Lu 24: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
