:Jororn' 13
13
:Yusu' :dle or-a'a: bo :na-nyor⧾ buh⧾ dih
1:Yee' :yeh eh 'ye-a' 'Meh-a' :bla-dih: 'dlu dih-gor-a' ti no, :yee' :Yusu' yubo-eh', :ka or-a' ti-a nyni-a 'o, or 'ye-a 'noror yao 'zorn 'wluh, 'de or 'ye-a 'de or :Baa' bo mu. Or :ybeh or-a'a: nyor⧾ :on :korn-a 'de or bo-' 'weh, dha yao 'zorn. :Ka or no-a an-a' :ybeh-a', 'ka-: or no an-a' :ybeh-a' :chio'lo:, 'de eh nyni 'de eh-a' 'dlu-' :jla 'da.
2:Yeh or-: or-a'a: bo :na-nyor⧾-: on 'ye-a' 'gwie-deh di, :yee' 'ku 'kpa 'o Samor'-a'a: 'yu, an 'da-dih-a :Juda' :Ehkeh'lior :porluh ken 'weh, or 'ye :Yusu' plo. 3:Yee' :Yusu' yubo-eh', :ka or :Baa' Nyorsoa 'nyi-or 'kpih 'do deh⧾-a' klehkpeh ken. Or yubo-eh' :ke, :ka or 'wluh-a 'de or bo, 'de or mu-a 'de or bo de :mu. 4:Yee' or :sorn-' 'weh, or :nyna dih, 'do :dha an di-dih-a 'gwie-deh, 'de or :za or-a'a: :gba 'vuu dih, or 'gba 'taba. 5:Yeh or no :ao', :yee' or po 'de 'ni, 'de 'pani' 'di, 'de or 'kpa or-a'a: bo :na-nyor⧾-a' buh⧾ dih :dle-eh ken. 'De or no 'taba:, or 'gba-a, or 'slan-uh buh⧾ dih. 6:Yeh or :yeh-dih:-a Samor' :Piteh' ken, :yee' :Piteh' dhele-or-: dih, or 'dae:, :Gwlor :baa', :an mu 'on buh⧾ dih :dle :ke :e?
7'De :Yusu' 'da, Deh 'an no-a, :on se-eh yubo: :naa. Jorwor: :mor ti :zi-dih: 'o ken dih, :yee' :an mu-eh dih 'worn-:.
8'De :Piteh' 'da, 'Kei:. :On :se-' 'an buh⧾ dih :dle i, klehkpeh klehkpeh.
'De :Yusu' 'da, :Mor 'on se :on buh⧾ dih :dle, :yee' :on se 'for 'ble 'noror 'on bo.
9'De Samor' :Piteh' 'da, :Gwlor :baa', :yee' :mor eh :ne :ao', :yee' eh :se 'an buh⧾ :due' :deh, jorwor: 'an son⧾-: 'dekorn: 'an 'dlu-: en-' klehkpeh :ke.
10'De :Yusu' 'da, Nyor :or :dle-a, :yee' or-a' yau-a' klehkpeh :gweh :vlehehn'-' 'weh. :Mor or :na, :yee' deh :due' or :korn or 'ye-a' :dle, eh-: 'dhu or-a' buh⧾-'. A :gweh :vlehehn'-' 'weh. Jorwor: eh :se a-a' klehkpeh. 11Deh :korn-a dhih, or :za-a deh :daa-', eh-: 'dhu, or yubo: nyor :or mu-or :plo 'weh.
12:Yeh or gweh-a an-a' buh⧾ dih :dle-eh 'i, :yee' or pa or-a'a: :gba 'vuu 'weh, 'de or mu 'o or 'bli ken :dhe-deh ken de, 'do :dha an di-dih-a deh. 'De or 'da, Deh 'on no-a 'do a bo, a 'worn-eh-: dih :e? 13A 'da-dih 'on, Nyor⧾ deh :torne-nyor-: 'dekorn: :Gwlor :baa'-:. Dhih 'jeh :oo', a za-a-'. 'Ka :wor eh :ne 'jeh ka. 14:Yee' :ka 'mor :or 'dhu-a a-a'a: :Gwlor :baa'-: 'dekorn: a-a'a: Nyor⧾ deh :torne-nyor-: 'de 'on :dle-a a-a' buh⧾ dih, :yee' 'ka-: a 'ye a 'bei'-a' buh⧾ dih :dle-eh no :ke. 15'On :torne: a deh :daa 'weh, a 'ye-eh' 'ye, 'de a 'ye-eh' no 'do a 'bei' bo :ke. 16Dhih 'jeh, 'an zela a :gwluhuh', 'bhoi-yu se 'i 'beh, or se 'o or-a'a: nyor :klaba'-' :zi. 'De mor dboo-nyor se 'i 'beh, or se 'o nyor :or dbo-or' :zi. 17:Yee' :ka a yubo:-a deh⧾ :daa :naa, :mor a no-ih, :yee' a mu :bhorlie' 'ye-: 'do en-' no-a' bo.
18Eh :se a-a' klehkpeh, 'on :se-' 'da. Nyor⧾ 'on gan-a 'de nyor⧾ 'klu-', 'on yubo-uh'. Jorwor: Nyorsoa-a' 'chlee-deh-a' wlu :korn on 'ye dhih 'jeh-' 'kpa, :on no-a, 'Yu :or :ne 'an kpuhba-a son⧾ ybei', or-a' 'jeh :dao', or-: 'bili: 'de 'on ya.
19'An sie ti de, 'an zela a deh :daa :gwluhuh' :dueh'leh:, 'de eh 'ye :no-eh:. :Yee' :mor eh :no-eh:, 'de a 'ye-eh' dhih 'jeh-' po nyor 'on no-a, 'on 'dhu-eh:-'. 20Dhih 'jeh, 'an zela a :gwluhuh', nyor :or kpon-a nyor 'on dbo-a dih, :yee' nyor :dao', 'mor-: 'o or kpon dih. 'De nyor :or kpon-a 'on dih, :yee' nyor :or dbo-a 'on, or-: 'o or kpon dih :ke.
:Yusu' sie ti de, or za-eh' :ka nyor-a mu-or nyor⧾ bo :plo-dih:
(Mt 26.20-25; Mk 14.17-21; Lu 22.21-23)
21:Yeh :Yusu' :za-a deh :daa-', :yee' or-a' :porluh-a 'beh-dih-or 'worn dih, 'de or :na 'bluhbor, or zela-uh :gwluhuh' deh 'jeh, or 'da, Dhih 'jeh, 'an zela a :gwluhuh', a-a' nyor :due', or-: mu 'on :plo.
22:Yeh or :za-a deh :daa-', :yee' or-a'a: bo :na-nyor⧾-a no pobo: 'de :on 'be ya, 'de :on 'be pobo: 'de :on ya. Deh no-eh, nyor :Yusu'-a 'da-a, 'de on 'nyne-', on se-or yubo:. 23:Yee' or-a'a: bo :na-yu :due' or :ybeh-a 'gabaa, or-: :ne 'o or 'bhun, 'do deh :di 'da. 24Or-: Samor' :Piteh' no 'yli, or zela: :gwluhuh', or 'ye :Yusu' dih dhele: nyor or 'da-a.
25:Yee' bo :na-yu: :dao', or 'koan'-dih: :Yusu'-: dih, 'de or dhele-or dih, or 'da, :Gwlor :baa', or-a' 'nyne :eh?
26'De :Yusu' 'dae:, :Mor 'on tba 'de 'bhlee-yor-eh 'soma' bo, nyor 'an mu-eh 'nyi-:, :yee' or-: 'o.
'De or tba 'de 'bhlee-yor-eh 'de 'soma' bo, or 'nyi-eh :Juda' :Ehkeh'lior, :or no-a Samor'-a'a: 'yu. 27:Yeh :Juda' 'duo:-a 'bhlee-yor-eh: :dao', :yee' 'do :dha :due' :dao', :yee' 'ku 'kpa 'o or :porluh ken 'weh. 'De :Yusu' :wlu 'de or bo, or 'dae:, Deh :an yi-a no 'da, 'dhobo:, :on 'ye-eh' no. 28Deh or :za-a-', or-a'a: bo :na-nyor⧾-a' klehkpeh :on :ne-a 'o :dha an di-dih-a deh, on :se-eh' dih 'worn, deh :korn-a dhih or :za-a deh :dao', 'de or bo. 29:Yee' :ka :Juda' no-a 'wlii dih :dhe-nyor 'do on bo, :yee' :mor an-a' :noo' :taa 'ye :dee', :yee' on 'da, :Yusu' zela-or :gwluhuh', or 'ye 'Meh-a' :bla-dih: 'dlu dih-gor-a' dii-deh:⧾ :dhen 'da mu. :Mor :noo' :taa 'ye :neheh', :yee' on 'da, :Yusu' zela-or :gwluhuh', or 'ye nyor⧾ :on se-a deh-a' :za-da 'ble, or 'ye-uh 'wlii 'nyi.
30:Yeh :Juda' 'duo:-a 'bhlee-yor-eh-', :yee' 'do :dha :due' 'jeh :dao', :yee' or 'si-: 'zorn, 'de glu gor.
'Tele' :dele'
31:Yeh :Juda' 'si-a 'zorn, :yee' :Yusu' :wlu-', or 'dae:, Nyorsoa-a yi 'yu an 'da-dih-a Nyor-kpalu-a' 'yu, dhih-a' 'i 'beh-a' 'nyi 'da :naa, 'de nyor⧾ 'ye Nyorsoa-a' dhih-a' 'i 'beh-a' 'ye 'de or ya. 32:Mor nyor⧾ 'ye Nyorsoa-a' dhih-a' 'i 'beh-a' 'de or ya, :yee' Nyorsoa-a mu :Yusu'-a' 'nyne dhih-a' 'i 'beh-a' 'nyi-: :ke. 'De mor or mu-eh bo 'dhobo:. 33'An 'nynuu-a:, ti :en :sie:-a 'o, 'de 'on 'ye-a' dha a bo 'wluh, en :se 'i :dhie:. Deh 'on zela:-a :Jueh'-nyor⧾ :gwluhuh', eh-: 'o, 'an zela a :gwluhuh' :ke. A mu 'on 'kwla⧾-' dih 'bhorn-:. 'De mor, :Dha 'an mu-a, a se 'o-a' mu-a' 'beh-dih:. 34'An 'nyi a 'tele' :dele', a :ybeh-dih:. :Ka 'on no-a a-a' :ybeh-a', 'ka-: a 'ye :ybeh-dih-eh no :ke. 35:Mor eh 'dhu a :ybeh-dih:, :yee' :gwlor-nyor⧾-a' klehkpeh, an mu-eh yubo:, :ka a 'dhu-a 'an-a: bo :na-nyor⧾-'.
:Yusu' sie ti de, 'de or :za :Piteh'-a' dhobo-dhih-'
(Mt 26.31-35; Mk 14.27-31; Lu 22.31-34)
36:Yeh :Yusu' 'da :ao', :yee' Samor' :Piteh' dhele-or-: dih, or 'da, :Gwlor :baa', dha :an mu :eh?
'De :Yusu' zela-or :gwluhuh', or 'da, :Dha 'an mu-a, :on se 'beh-dih: :on 'ye 'o 'on klei' zi :naa. Jorwor: :an mu 'on ken dih :yi 'de nya.
37'De :Piteh' 'da, :Gwlor :baa', :eh :korn dhih, 'de 'on se 'o :an-a' klei' :zi-eh 'beh-dih: :naa :eh? Eh-a' :yeh 'dhu deh-', 'an mu 'an :febeh' 'kwla :za, 'on 'ye 'meh, 'do :an-a' dhih bo.
38:Yee' :Yusu' 'da, :On 'beh-dih: :on 'ye :an-a' :febeh' 'kwla :za, 'do 'an dhih bo 'jeh ka :e? Dhih 'jeh, 'an zela :on :gwluhuh', :mor :soan'-beor 'ye zlo zorn bo-mlai', :yee' :an mu 'an dhih-' dhobo:, 'do kpor⧾ taan 'di.
موجودہ انتخاب:
:Jororn' 13: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
