Matta 4
4
Yesu Jaraba Dna
1A Avun Zafun Gyi-gyi-yi wa lo n Yesu yi n zhabui ntu ge Shetan wa dna wo jaraba. 2A nyipyeyi shinyi asukwo shinyi to woi gyi nyahon, mikun kwa wo gun n mwa. 3Jaraba zhinhi wa ɓe wa gna, “Ngye ho zhin Shekwoyi Nugun nu, gna akuta ye ɓa ze nyagyi.”
4Yesu wa gna wo ge, “Awo! Shekwoyi ɓeda gna yi ge nyagyi ta mi kwa gni aza wye-wyeyi m, sai dai ɓevi Shekwoyi ɓeda nya.”
5Shetan wa la wo wa lo Urushelima n woi, wa tu wo n aduwa-nyakun tukwo. 6“Gye agna,” Shetan nu gna Yesu lonu, “ntu ge ha wu ge ho zhin Shekwoyi Nugun nu, ntu ge Shekwoyi ɓeda gna ge, ‘Shekwoyi ɓa tnu amalaika ɓa kna ho to ha wu ho hi m.’ Ɓa ɓa knaho to ha lu hohin ya n na pma m.”
7Yesu wa gna wo, “Aku ka, to mwi ho Shekwoyi n naɓo gbolon.”
8N jesun Shetan wa lawo wa lo woi n ʼpe yakwo tukwo, wa wu wo anyi ʼbe gbo-gbo, m ɓa bmiya-bmiya yi. 9“Miɓa ga ho ɓa vinya,” shetan nu da lonu, “Ndai ha yashi ha ga mi mwa-mwa.”
10Yesu wa sagyi wo ge, “Lobwayi, shetan, Shekwoyi ɓeda gna, ‘Ga ho Dagayi Shekwoyi mwa-mwa, owo gmanyi nu n ho ɓavi woɓo.’ ”
11Shetan wa lo wo nya, amalaika ɓe ɓa vi Yesu ɓo.
Yesu Wa Ya Wazi Zhin
12Esa Yesu ɓo wo ge ala Yohanna dna n kurkuku, wa fa Yahudiya ʼkni wa lo Nazarati n Galili ʼkni. 13Esa fyewyi wa lo Kafarnafum n wo vivi Galili nuwan-zundna yi vivi n Zebulun ɓedo Naftali yi. 14Deye ɓo ku ɓo nu n anabi Ishaya ɓo da:
15“Zebulun ʼkni ɓedo Naftali ʼkni yi, vivi n nuwan-zundna yi, ekni nkwo mwakpa n Urdun yi, Galili sunbwa nya aba nu abyedo sase nyi, (ɓa ku ze aba agmada nya).
16“Aza nɓa ɓei sase fi n wyegma ɓaku gye buzagna dnagmayi. Ɓa ɓo sase fi n ʼkni efi nya nu. Buzangna kwa kpeya da ɓa.”
17Tunyi n sayi yi, Yesu wa ya waʼazi zhin, “Fye fa a laifi fya pmiɓe Shekwoyi aba, ntuge Shekwoyi ʼbe la wo vi.”
18Nwyihoyi woi zan-zan vivi n nuwan gbe-wato Galili nuwan zundna, wa gye eza nwo mado yi Siman (aje wo yi ge Bitrus) ɓedo Andarawus yi ɓai fi n ʼya ɓai wan abmiya na sayi, ntu ge ɓa ɓo zhin abmiya wan yi nu.
19Yesu wa yi ɓa, “Fye ɓe n gnisun n miyi miɓa wu fye shi fye ɓa wan aza.” 20Ɓa fa oɓa asa n sayi-sayi yi ɓa gni lo n woi.
21Ɓa gyi abye fyewyi, wa gye azao ngun aba Yakubu n Yohanna yi n fi n ʼya n ɓa dada yi Zebedi, ɓai zhin asa aba, wa yi ɓa ge ɓa ɓe ce. 22N sayi-sayi yi ɓa fa ɓa tnu-tnu nɓa dada yi ɓa gni lo n woi.
23Yesu wa zan-zan dna Galili ʼkni ivinya, woi wu aza dna n Yahudawayi aduwa-nyakun, woi zhin waʼazi Nabari Manayi nya ntu Eshe ʼbemi ɓo, woi ka anyasan yi doho-dohoyi pya gna. 24Nabari owo aɓo wowoyi zhin nya, kwa gnami to ge n Galili gmanyi n, har anyasanyi ɓai kun abai gbo-gbo, n nabai mwakpa ngye Suriya. Nyasan doho-dohoyi, kwo a zafun nukwoyi nu, kwo tukwo la ɓa gmiya, kwo nahinu n ɓai fifiyi-wa ka ɓa gna vinya. 25Aza yezhi n mwa begye ɓa viwo abaho-bahoi wa lo, aza ɓa kun n Galili, ɓedo azhi dnagmayi yi ngun awo, aza ɓa kun n Urushelima n Yahudiya yi har aza ɓai kun n Ur-dun kma.
موجودہ انتخاب:
Matta 4: GAW
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
