JOHANA 3

Nikodemo ak Jeso

1Ki mi chii ne po Pharisaik, ne ki kiguure Nikodemo, ki pounindet ne po Yahudik: 2ki nyo chiichooto ole mi ineendet kemoi, ak koleenji, “Rabbi, kingen keele ii kaneetindet ne punu Kamuktaindet: amu ma mi chii ne imuuchi koyai kaboorunoichu iyae inyee, ngo ma mi Kamuktaindet kobooto ineendet.”

3Kowolji Jeso koleenji, “Amwaun, iman, iman, ale, ngot koma ki sich chii eng' sigeet ne leel, koma koi imuuch kogeer laitornatetap Kamuktaindet.” 4Koleenji `Nikodemo ineendet, “Kisiktoi ano chii ye kagoosit? Imuuchi kogetyigei moetap kamet kogeny, ak kesich?” 5Kowolji Jeso koleenji, “Amwaun, iman, iman ale, ngot koma ki sich chii eng' peek ak Kabuuset ne Tiliil, koma koi imuuch komong'ji laitornatetap Kamuktaindet. 6Ne ki kisich eng' poorto ko poorto; ak ne ki kisich eng' Kabuuset ne Tiliil ko kabuuset. 7Amekwong' amu kamwaun ale, ‘Kanyool kesichok eng' sigeet ne leel.’ 8Usyin koristo ole machei, ak igase cheennyi, ago mengen ole punu, anan ole wendi. Ara uu nooto chii age tugul ne kagisich eng' Kabuuset ne Tiliil.”

9Kowolji Nikodemo koleenji, “Imuuchi kobiitunda ano tuguuchu?” 10Kowolji Jeso koleenji, “Ii kaneetindetap Israel, ameguitosi tuguuchu? 11Amwaun, iman, iman, ale kimwae ne kingen, ak kebaoryanjini ne kagegeer; amotaache paornatennyo. 12Ngamwaiwok tuguuk che po ng'wony, amoyani, omuktoi ano oyan ngamwaiwok tuguuk che po kipsengwet? 13Ma mi chii ne ki togosta kipsengwet, kobatee ineendet ne ki choorgei eng' kipsengwet, ineendet ko Weeriitap chii ne mi kipsengwet. 14#Kai 21.9 Ak ko uu ye ki igartaat Musa ereneet eng' surkwen, kigartoti ko uu nooto Weeriitap chii matiny: 15si konyoor saboondap koigeny eng' ineendet age tugul ne iyani. 16Amu ki cham Kamuktaindet ng'wony miising', kot kogoito Weeriinnyi ne ki kisich ineegei, si ma lus age tugul ne iyani ineendet, ago si konyoor saboondap koigeny. 17Amu ki ma iyookyi `Kamuktaindet Weeriit ng'wony korwookyi ng'wony; ago si kesar ng'wony eng' ineendet.”

18Ma kirwookyin chii ne iyani ineendet: ago ineendet ne ma iyani, ko kagirwookyi, amu ma iyan eng' kainetap Weeriitap Kamuktaindet ne ki kiii ineegei. 19Ak ni kirwooget, amu ki nyoonji ng'wony lapkeiyet, ak ki cham piik mesundeito kosiir lapkeiyet; amu ki yaach poisyonikwak. 20Amu wechei lapkeiyet chii tugul ne yaei yaityo, ama nyoonei ineendet ole mi lapkeiyet, si ma ng'ang'agis poisyonikyik. 21Ago nyoonei ole mi lapkeiyet ineendet ne yaei imanda, si kobiit kibarta poisyonikyik, keele ki kiyai eng' Kamuktaindet.

Komwaei Johana agobo Jeso

22Kingo pata tuguuchu konyo Jeso ak kasubikyik emet ne kiguure Judea; ak kibeni olooto kobooto icheek, ak kobatisanis. 23Ak ki ibatisanisyei Johana agine eng' Aenon ne neegitee Salim, amu ki mi peek che chaang' olooto; ak ki pwa piik, ak ki kibatisan. 24#Mat 14.3; Mar 6.17; Luk 3.19-20 Amu kitom ketoorchi Johana korgoreet.

25Ki piit anyun teebutyet eng' alak che po kasubigap Johana ak Yahudyot agobo katiliilet. 26Ak ki pwanji Johana, ak koleenji, “Rabbi, ibatisanisyei ineendet ne ki mi kobooten eng' Jordan komosin, ne ki ibaoryan agobo ineendet, ak pwaanjin ineendet `piik tugul.” 27Kowol Johana kole, “Ma koi imuuch chii kotaach kiy, ngo ma kigoochi eng' kipsengwet. 28#Jhn 1.20 Ki obaoryanjo okweeget ole ki amwa ale, ‘Ma aa Kristo’, ago oleen ki kiyokwo andoune ineendet. 29Sandet ineendet ne tinyei murereet: ago paibai miising' chorweetap sandet, ne tononi koepchin iit ineendet, amu kutitap sandet: isuldaat anyun poiboiyoninyu. 30Nyoljin ineendet koeet ne matiny, ago aming'initu.”

Ineendet ne punu parak

31Oo ineendet ne punu parak kosiir tugul: ineendet ne po ng'wony ko po ng'wony, ak ng'alaali che po ng'wony: ineendet ne punu kipsengwet ko oo kosiir tugul. 32Paoryanjin ineendet kiit ne ki kogeer ak ne ki kogas; ama mi chii ne taachei paornatennyi. 33Ineendet ne kagotaach paornatennyi ko kagonde ng'ooksennyi, kole po iman Kamuktaindet. 34Amu ng'alaali ng'aleegap Kamuktaindet ineendet ne ki iyoogu Kamuktaindet; amu ma koonu ineendet Kabuuset ne Tiliil eng' karagendoet. 35#Mat 11.27; Luk 10.22 Chamei Kwanda Weeriit, ak ki konde tuguuk tugul eunnyi. 36Tinyei saboondap koigeny ne iyani Weeriit; ama keerei saboondo ne ma kase iit Weeriit, ago tebee nereegegap Kamuktaindet paragunnyi.

موجودہ انتخاب:

JOHANA 3: KAPR

سرخی

شئیر

کاپی