MAK 15
15
Pilate Maikung Jisu Ta Ruikal Na
(Mit. 27:1-2,11-14; Luk. 23:1-5; Jhn. 18:28-38)
1Nietuk chama ah chungtekti thiempu hana ulien changei, rouphun ocha ngei manilim na lung akha chakka ngirra, manina Jisu ta huppa Pilate kut chunga pek ranga ruija thingso ae. 2“Jews ngei rengpa hi nang mo ae?” Pilate na sai.
Jisu na sange, “Oh weh nang na ril shuk ha ae,”
3Chungtekti thiempu na machunga dieklou rou eja rillea. 4Chuna Pilate na woihapa makolla sai. “Nangna katrong sang ang no che? anno mani na nachunga dieklou rou eja rilla am meh.” 5Chuti weta Jisu na chu sang no lutta am hi Pilate na ngak shukkae.
Jisu That Ranga Roungir
(Mit. 27:15-26; Luk. 23:13-25; Jhn. 18:39—19:16)
6Lanpina Reen changhonna mee ngei na nie lea chu raen inn sunga am mee akha hla ti hi mani talit tamange. 7Barabas ti apa hi raen inn sunga mani ram ma hulong tuilong pi karra ae, akha chu amo ha meeta that mee ae. 8Chuna hana am wairul rija na hang weta Pilate kolla amatieng hlou ma ae hekta ae ranga sai ae, 9“nangei na keita dit hi Jihudi ngei rengpa ta hla pinum ma chao ta sai,” Pilate na. 10Chungtekti thiempu ngei na anar sarukka Jisu hi makolla pe ae ti hi dange.
11Chuti weta chungtekti thiempu ngei na wairul rija ta thanum pi ah mahutta Barabas ta hla su oh. 12Pilate na sai, “Chuleh chu, nangei na Jihudi ngei rengpa ta kok hita, keina ei ae oh ta ril chau?”
13“Khrose chunga that to, amo ta” manilim na rol shukka au ae.
14Pilate na sai, “Alowa mo ae? ejongpa hrano tullu amona ae so meh?”
Chuti phao sunga mani na ringa au, “Khrose chunga thatto amo ta!”
15Pilate na akut shilveta mani lim lungdam ranga Barabas ha mani tarang hla so ae, hana amo na Jisu ta phit weta khrose chunga that ranga manita pe so ae.
Ralmee Ngaina Jisu Ta Nuiso Simso
(Mit. 27:27-31; Jhn. 19:2-3)
16Ralmee ngeina Jisu ta arengpa ruisanga ruija lutta akha chu ralmee marul, marul rachon so ae. 17Manina machunga punsan pai piweta aling kumlu jelweta malubur burpi ae. 18Hana manina mokka hita kokka thou so: “Sotta ringo Jews ngei Rengpa!” 19Manina lea, lea ah alukang raiweta amai ah chil amota shakka ahuk hrun weta mok thou so ae. 20Hana mani na amota nuiso ah punsan la-ah hou weta mapun amota seng piweta khrose chunga that rang rui ja shuk so ae.
Jisu Na Aban Jamma Khrose Chunga That Sho
(Mit. 27:32-44; Luk. 23:26-43; Jhn. 19:17-27)
21Lampi ah aming na Simon tipa maram thouwa hulok ka waklei ah ralmee ngeina nam ma mant weta Jisu kross ronpi so. (Alexander lea Ruphos hina mapa Simon Seriny thouwa.) 22Manina Jisu ta Golgotha (hina rilna chu alu saru) ti amunt na rui ah phao. 23Hana manina darkha tui lea akhatui tulweta amota pe pi, chuti weta amo na inn no ae. 24Mani na khrose chunga ban jam nutienga malinglut ha ther weta atu, atu na chang ang mo ta rawan an ae. 25Khrose chung mani that apha hi nitak apha na eenthum ta so ae. 26Amota pek maral chu mani na malu chunga hita jiekka shi ae: “JEWS NGEI RENGPA.” 27Manina amo hitta aru thei ani ta kom khross chunga aban jam shi ae ma changtienga akha na ma-oi tienga. 28(Jiekka shisha rou nujuija arengpu chu aral am mee ngei karra akha so ae ta rilleh.)
29Hana anei ah aleh ahong thingei na amo ta nuiso semso ah alu hai ah ril. “Oh nange nu athieng mokna inn hri weta rungnie nathum sunga sa angpa ha.” 30Atun “Khrose chunga tumweta nathei ah nangna kal oh!”
31Hahekta chungtekti thiempu ngei akha chu rouphun ocha ngei na kom Jisu ta ann weta nuiso ah, ril, “Amo na mee adang ta sanne ae, chuti weta mathei chakka matarang chu sanne no ae!” 32Israel, ngei rengpa hi khross chung hai thou tumma jung su oh atun chuleh ani mit makka ri lea chu anina Khrista ae ta ngoiring ange!”
Amo hitta khrose chunga ani nakom amota trongchop ril phur ae.
Jisu Thit Na
(Mit. 27:45-56; Luk. 23:44-49; Jhn. 19:28-30)
33Chuna chanutieng apha aruk hai thou wa janting apha aku takmalim ma ram lim thiemma am. 34Hana apha aku takjuija Jisu na sanrol shukka trappa ril, “Eloi, Eloi, lama sabaktani?” hina rilna chu, “Ka Chungthieng, ka Chungthieng, alo wa keita hla ah hou che?”
35Aneite ah ngirra am ahre na hita rilleh, “Ngei oh amo hi Elija ta kokka am meh!” 36Apa akhana tanna thing weta patrung athur tui lupweta ulunga thil ah arengpu inn ranga peweta ril, “Hak ri oh! Alijah na junga amota khrose heithou choi ah tum mota anina ann ri eiyo!”
37Jisu na sanrol ringa au weta mamuihla hla so ae.
38Athieng innsunga banga shi pun ha ani shukka achung tieng hai thou wa athui atreem na phao ther so ae. 39Ralmee rija hana mitpu anei takka ngirra am ah Jisu thit ha ri jui ah amo na ril, “Rou takka amohi Chungthieng asanaopa ange.”
40Aram ala takka namei ahre nakom an na am. Mani kara Magadalin Mary unga Jacob lea Josi hina manu Mary akha chu salome. 41Na numei nu ngei na Galily hai thou wa manu juija akha chu amota san na wurra hange. Mani leima tam adang ngei kom Jerushalem hai thou phao ah hang ngei kom hana am tol ae.
Jisu Ui Na
(Mit. 27:57-61; Luk. 23:50-56; Jhn. 19:38-42)
42Nani ha sem sanie rungnie ae. (ha chu sabath rungnie matienga ae.) nitlak apha nai ah wa so ae. 43Arimathiaja ram ma Josep ulien changei karra kom ajak ati shak hana amo chu Chungthieng reng ram taranga hakka am na Pilate kolla ephao ati ajak am no lutta Jisu hina pum sai wa ae. 44Jisu hi thi so weh thei ah Pilate na ngakka ralmee riha mitpu ta kokka sai, routakka Jisu thi sho jo meh. 45Ralmee riha hina mitpu kolla routakka thi so ae madangpha juija athi sa pum Josep ta pe pi so ae. 46Chuna Josep na pun mukka choi ja wa weta apum ha choija tum so, hana mukka hana hlum weta sumlung vit weta shak hlanhur sunga uiso ae. Hana amona hlanhur mai ah alung akha na humma dolla shiso. 47Madalini Mary akha chu Josi manu Mary na hoi amunt na jalpi si mo manui na ri phur ae.
موجودہ انتخاب:
MAK 15: CHOTBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
