Matthew 9
9
Jisu lasami püh thi küsührho küsü
1Süsa Jisu püzu püh lü bayi die tasü Putho Pu ra vota. 2Sücesü Yhie! Mi lasami püh püh pu zilü süyi die rhapüh Puce vori: sücesü Jisu puko kümülü ngo sü die Pu küthi-o yisü; Anu n zü veyite, n küphomako va n prü va ho, zita. 3Sücesü lüsiküseko humi ulülü no sü, thüma hio Jihova tha yozo, zibata. 4Eli Jisu puko lüdoko seyi die puko yisü, Neko dipüh na ne lülü mha küsu müdoyo la? zita. 5N küphomako va n prü vaho; zi küti küpo mo sü die tayite, zi küti küpo nyi dipüh-o po rüyikuta 6Eli neko po thümanuo cejü hilü ri mi küphoma va süyi küve küku ba küti seyi kütona; si die Pu lasao yisü; sü nzi pühyi die ta n celü vo tate, zisü. 7Süsa pu sü die ta pu celü vota. 8Süze makroo sü ngo küsüce puko malhü thita, sidie Jihova küku süsübi küti püh thüma küprü na Pu shuh ta.
Jisu Matthew ci küyi
9Süsa Jisu sülü püthü vo küzüce Matthew li küti-oe khazhonu kükhrü balü ba die pu ngoyi; mo Pu süo yisü; A sa müdzi yite, zisü. Süsa pu ri sü die ta Pu sa müdzi ta. 10Süsa Pu hi tozu die lü celü ba küyice khazhonu kükhrüko mo küphomako kükro vori die Jisu mo Pu sadziko züh bayi. 11Sücesü Phariseeko sü ngo sü die müthaküyiko yisü, Neko kümütha-o dipüh na khazhonu kükhrüko mo küphomako züh mhati mhakra yo la? zita. 12Eli Jisu süo se sü die puko yisü, küsührhomi daruküsemi süh mori ve, eli sükoe küthimi na zo; zisü. 13Neko vo die I-e rüsuküthio mori ngokümüzhe anüku, zi püh kümüta züo co seyite. Kükrenamoli, I-e kümathoko mori küphomako po thülü küdeyi küto na küvori zo.
Mvo küti mütha küsü
14Süsa John sadziko-e Puce vori die sü, Dipüh na hako mo Phariseeko tsükünu kümvo yo, mo n sadzi ko-e mvo yo mo-a? 15Jisu pukoce po die; zhosao celü küba nunekoe zhosao puko züh kübalü no ulü su die thükri thi batayo me? Eli tüsoko vori to; sücesü mi puko celü no zhosao züh tata ze puko kümvo tato. 16Süze mipüh ri khü, küsa cekhro püh kügwü mükhu yomo, kükrenamoli püh mükhu küsü khü-oe kükreo cekhro pü tato, sücesü cekhro mürüh ku vato. 17Mori mi khubühzü küsa püh thigibüh kügwükolü sü yomo, Kükrenamoli mhabüh süo ga ta to, sidie khubühzü ri rüla mo thigibühri müka vato. Süri mi khubühzü küsa püh thigibüh küsalü sü mayo, süze künanyi mükrü püh mayo.
Mülhimi püh nupü mo Jisu khüphre nyi küsüpü
18Pu sükoce mha hiko po kübalü, Yhie, Mi mhu küzho thi kütami püh vori Pu rüsu die sü, a nupü tsü cehi sate, süri no vori die n be sho püh puyo sü zote, süze pu rhühyi ta zoto. 19Süsa Jisu sü die Pu mo Pu sadziko küzüh süo müdzi vo ta. 20Sücesü Yhie, thünomi tse küriküna thüza krüh ta kütapü püh Pu sacovori die Pu khüphre nyi sü. 21Kükrenamoli pue, I Pu khünyita zori nyi sü lize müsayi ta zoto, zi die lü küta na. 22Eli Jisu rüh pra pu ngoyi die pu yisü, rülipü n züveyi tate, n kümülü tho nthi kümüsa lotsüh vaho, zisü, mo sütü lüsü thünopü müsayi ta. 23Süze Jisu mülhi süo ce tsoyi die thümako lila khu mo münyo münyi pu küzü ngoyi die; 24Pu süko yisü, neko thüthi müra süte, kükrenamoli rüli hipü sa tamo; eli züh züzo, zita. Süri süko Pu krühnyi bata. 25Eli thümako rüdü küta sa Pu celü lü die süpü be cesü, mo süpü süri ta. 26Süsa mha hio dzüh cejü süo lü mütü sevo ta.
Jisu mhücemi küna thi küsührho küsü
27Sidie Jisu thüthi sülüno tata küzüce mhücemi küna-e se zo die Puce; No David nuo, hanyi phimüzhe zo süte, zi bata. 28Süze Pu celü lüri tice, mhüce nyiri ta Puce lüri, mo Jisu unyi kütso die sü, nenyi I mha hihi thiyive li küti mülü tü me? Zisü. Unyi sü, izo, Nyepoo, zita. 29Süsa Jisu unyi mhü brü die sü, nenyi kümülü bi die thi küyi yo thiyi te, zisü. 30Süsa unyi mhü mhürho parita; mo Jisu unyi yisü, nenyi püh mipüh ceri po hite, zisü. 31Eli unyi tapra tice Pu dzüh kümüle süo püh rüna sülü mütü küza vota.
Jisu thürüküsü po kübü pü kütami püh thi küsührho küsü
32Süsa puko tapra küzüce, Yhie! Mi thürüküsü po u kübü küta zü po küthomi püh züh Puce vori. 33Sidie thürüküsüo hu küvace, süo züri po yita, mo thüma kroo u malhü thi die; mha hihi bi küti Israel mi cejülü ngo mo zolu, süzita. 34Süri, Phariseekoe sü; Pu thürüküsuko küde-o züh die thürüküsuko hu küta zo, zi die pota.
Jisu thüma kroo phimüzhe küta
35Süsa Jisu rüna nadekolü mo natsühkolü whi die puko synagogueko lü mi mütha mo tüyoküde züyiküve po püh mice sü, süze thüma dolü küthi künyi lünyiko thi küsührho vota. 36Eli Pu thüma kroo ngo küsüce, puko ngo püh Pu lü müzhe ta, kükrenamoli puko tüko u kükhü küdi bi müza mo küzaküze ta küta na. 37Süsa Pu müthaküyikoce po die, rüce-e krophi, eli, mhathomi-e tsari zo, zita. 38Süna neko yi Nyepoo po mhathomi kütsüh sü kütona shote, zisü
موجودہ انتخاب:
Matthew 9: NAG5BSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
