Matthew 4
4
Jisu mvo küti, Pu küdo küta, mo Pu ku küyi
1Süsa Jisu-e Satan po pu küdo tozu die Rüpüo po Pu hüzüh nhatsalü vota. 2Mo Pu tüsozho hieda mo tüzühzho hieda mvo kütasa Pu müri ta. 3Süsa küdo küti-o Puce vori die sü, No Jihova nuo zo lize kütsü hiko ce po sü die süko po tsükhrüda thiyite, zita. 4Süri pu süo küla die sü, Thümae tsükhrüda libi na mori Jihova talü küpari zü kühopüh ri na rhühyi to; zi küti thopüh müta, zita. 5Süsa Satan Pu züh rüna kümüsao lü vo die Pu po kürüsuce pilüyo bayi. 6Sidie Pu yisü; No Jihova nuo lize, ntho rütu prüte, kükrenamoli, Pu na Pu shoyimi mülü sü die, kühopühtüce zori n po rütu prü kütsü-püh yori n phe rha mo küto na puko be püh n rhapühyi tato, zi küti thopüh ma küti na. 7Jisu puce po die, no n Nyepoo Jihova küdo sü, zi küti tho püh müta zo, zita. 8Süsari, Küsüo Pu züh cejüthu kürükrü shüh pühyo vo die cejülü küdeko mo sülü thüshühthürhoko thapüh Pu ka: 9Sidie Pu yisü, No tüprü a rüsu to lize I hiko mütü püh n prüto, zita. 10Süsa Jisu puce, Satan no tatayi, kükrenamoli, no n Nyepoo Jihova libi rüsu mo Pu shoyi libi thiyi mosü, zi die tho püh kümüzü na. 11Süsa küsüo Pu kha va die tata, mo Yhie, Tüyo shoyimi vori die Pu khrühi yita.
Galileelü Jisu mhatho thürako
12Süsa Jisu mi John tüpüh küdücelü sü küva seyi die ta sü Galileelü vota. 13Sidie Pu Nazareth khava die tasü Zebulun mo Naphtali nyi taralü dzüküzho shice Kapernaumlü vo lhü bata. 14Süosü Isaiah sadzühküse-oe po püh kümüta: 15Jordan rüshi prüh küvo Zebulun cejü mo Naphtali cejü küsa mo Naphtali cejü dzüküzho sho Galileemi mülü kümoko; 16Thüma küzühlü kütako küve küzhopüh ngote; süze cejü küsa mo pu khrilü kübako yori küve prarite; zi müzü. 17Süyogwino Jisu mi mütha shühdü die, nelü küdeyite, tüyo küde münoto ba küta na, zita.
Jisu khukütümi mi da ci küyi
18Süze Jisu Galilee dzüküzho shice ta vo küzüce Pu mi küna sazühzüra nyi Simon Peter liyo kütio mo pü sazüh-o Andrew unyi khuma püh dzüküzholü kügü ta die ngo, kükrenamoli unyi-e khukütümi zo küti na. 19Mo Pu unyi yisü, A samüdziyite, I nenyi po thüma kütümi thito; zisü. 20Süzi sü mütha unyi khüma kha mha va die Pu sa müdzi ta. 21Süsari Pu sülüno ta vo küzüce sazühzüra mi kükre küna Zebedee nu James mo pu sazüh-o John unyi unyi khuma mükhu ba die ngoyi, mo Pu unyi cisü. 22Süsa unyi unyi po mo püzu-o khamha va die Pu sa müdzita.
Jisu mi mütha mo mi thi küsürho küsü
23Sidie Jisu Galilee cejü mütülü rühu die synagogueko lü mi mütha mo küde züyi küve dzühpo mika, mo thüma dolü küthi künyi lünyiko thi küsührho sü. 24Sücesü Syria cejü mütülü Pu dzüh po kümüle shüh vota; momi küthikünyi kükrekre kütiko, küsü rüpü po u kübü kütako, mülo kütako, lasako, mo thürüyozü mütü züh Puce vori mo Pu süko mütü thi küsührho sü. 25Süna Galilee lü mo Decapolislü mo Jerusalem mo Judea cejü lüri mo Jordan rü shico thüma krodepüh Pu sa müdzi tata.
موجودہ انتخاب:
Matthew 4: NAG5BSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
