KEYUM KERO 16
16
Hagar Lang Ishmael
1Abramke mime Saraibí, bím atí ome-oo obimato. Saraibí Ijipt lokke Hagar emnam pakneko kato. 2Iname, Abramme Sarai sipe poto, “Ruutum bí ngom ome-oo omadope inamem no kaasudung; no paknedem mimepe laatoka, depe imílo bíkkelok, ngo ome-ooko paalado.” Delo Abrambí Saraike agomem tatbito. 3Kanaan amonglo takying kope Abramke duudoem, bíkke méng Saraibí Ijipt mime Hagarme, Abramke éémépe laabito. 4Abramke Hagarme éémépe bomrongem, bí koo gela, ane ruutum Saraike teyolo adum-ale ibomto.
5Depeila Sarai Abramme poto, “Ngok teyoso imemnamde nokkelo kakalangka. Ngo nom éémépe, ngok paknem bito. Edílo bí koo gekadí, delo kape bí ngom adum-ale ibomkan? Ruutum bí ngonyik pénsamlo aro-aromangem kaabi kalangka.”
6Idola Abram Saraime poto, “Kaatola, nok paknede nok alag lomin duune. Nok míngkorpe no bím itoka.” Depeila, Saraibí Hagarme atímape ebín-ebon ibomla, bí dugnyok gekai.
7Shur doolungpe gína bedang delokke korong rojíkkolo Ruutum ke kotoki kone Hagarme kaaríksula, 8sikepe íngkíto, “Saraike pakne Hagar no, ingkolokda aaton delokke ingkoloda gídakne?”
Delo bí poyansuto, “Ngok ane ruutum Sarai kelok dugnyok gedung.”
9 Ruutum ke kotokide bím poto, “Nok ane ruutumlo aalat sulangkula, bík rumkílo duulangkuka.” 10Ruutum ke kotokide sikepe poto, “Nok otíng-oyinem, ngo sanam yimadupe mití-maglíngpe imoyé.” 11Delo Ruutum ke kotokide bím potoku, no kooko gedung; dem ookope oyé. No bíkke amínem Ishmael emlangka, kapeila nokke ankíla kapnamem Ruutum bí tatbito. 12“Bí moonam gado kísape yéla, bí ami mirupe, amie bík mirupe iyé, delokke agíke edung-erang lokkete mootepe yéyé.”
13Hagar agíem íngkísuto, “Ngo arope Shédíme kaala, bím kaarongemte turla yédunaya?” Depe míípala, bím lupona Ruutum dem bí sipe poto, “No kaana Shédíko.” 14Depeila Kadesh kelang Berod raadalo duuna déérung dem, Birlahairoi#16:14 Birlahairoi: Ngom Kaana, Turyarnake asi déérunge. déérung emkai.
15Hagarbí Abramme ooko obila, delok amínem Ishmael emto. 16Abramke dítak íying píínyi kolang takkéko idoem, Hagar Ishmaelme oto.
موجودہ انتخاب:
KEYUM KERO 16: adiBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.