Génesis 4
4
Pa Caín shi' pa Abel
1Pa nivacle yamelhvane lhpa lhjaya Eva. Lhpa lhech pa yituma pa caaj pa lhaôs Caín pa yit'esh: “Palha caaj na yaôs. Pa Lhcaanvacle nijutyam.” 2Pa caaj shta pa Abel, lhch'nish pa Caín. Pa Abel lhcumjat'esh ti yiclonat pava tashinshtas, vooy pa Caín lhcumjat'esh ti tcôvjiyanjan.
3C'oya ti caju pava nalhus, pa yama pa nalhu ti yicha'jey pa Caín pa Lhcaanvacle pa tô'lha pa lhcavcalhaech. 4Yitsha pa Abel pa yicha'jey pa Lhcaanvacle pava vatjutsa' isis lhcles pava lhclôy tashinshtas. Pa Lhcaanvacle yovalhey pa nishamsha pa Abel pa lhcufayjat,*xq* 5taj nilhech lhjunasha ti yovalhey pa Caín pa lhcufayjat. Pa lhechesh pa suy jumje pa nôclesh pa lhtaco. 6Pa yit'esh pa Lhcaanvacle: “¿Ta lhayaash ti asuy ti nôclesh na ataco? 7Ca asnatajesh pa is, pa apôytajchisham taj ti niasnatesh, na sasch'e p'alha vatjumtaa pa ca t'aplhutaja ca naashtaj'atapee. Taj ti avaatsha ca at'esh ti t'ash'apee jô lhech.”
8Ve'lha pa nalhu, pa Caín t'alha pa lhch'inish Abel ca nit'ôtayelh, c'oya ti yamjam pa joot pa napu'elh, pa Caín pa t'eclet'a pa lhch'inish Abel pa yiclôn.*xr* 9Pa lhechesh pa Lhcaanvacle pa niy'ôs pa Caín: —¿Ta yie' ja ach'inish Abel?
Pa yicuulh pa Caín:
—Nit'e. ¿Lheclôjtajesh ca yalhecha ca yiclôvalh ja yich'inish?
10Pa yit'esh pa Lhcaanvacle:
—¿Ta t'e lhayaash ti lhasnatesh côque? Cava lhavoyey ca ach'inish, c'avanesh ti lhamjach'e na cotsjaat, tônyiy ca jasnatshem pa yivo'yeshch'e.*xs* 11Lhe'naa ti tan jayu ca acajôyshay pa chinapun jayu yiey na cotsjaat nan lhamjach'e cava lhavoyey ca ach'inish, can lhclôn avaatsha. 12Lha'ma ca acuumtaj'een na cotsjaat, tan jayu ca napecl'am ca ats'ôteyesh pa unaj. Acha'lheesh jayu ti lht'ôtay'apee na cotsjaat tanca amey pa ichayasha pa ca t'elheesh.
13Pa Caín pa yicuulh pa Lhcaanvacle:
—Yivaatsha tanca yajulhjulh na uj yiclôyitsjayash. 14Nôqueesh lhasvôôm yiey na cotsjaat, pa ya cha'lheesh jayu ti jayôtay'apee na cotsjaat pa yatôjey'am jayu shta, pa ampa yichayasha jayu shta. Pa nôque lhjunash, papi ca nasvantaj pa tsiclôn jayu.
15Taj ti yicuulh pa Lhcaanvacle:
—Pa ca naôvtaj'e papu ca naclôntaj pa ya'shesh'atapee jayu pa anclôyitsjayash pava napu'yama. Pa lhechesh pa Lhcaanvacle pa caaj pa nôclitesh pa Caín, ca jaspa ya aj ca niclôn papu ca nivantaj. 16Pa Caín pa tay'e pa yie' ti tasinôyelh'in pa Lhcaavacle pa mônlhee pa yie'in pa Nod, yiey lhum'ôcjinucjulh pa Edên.
Papi tô'lha pa Caín
17Pa Caín pa yamelhvane lhpa lhjaya, pa lhechesh pa yituma pa nivat'aj pa Enoc. Pa nijooylha pa yisnatesh pa yitsaat, pa yetônesh pan lhey pa lhaôs Enoc. 18Pa Enoc lhô'sesh pa Irad, vooy pa Irad lhô'sesh pa Mehujael, Mehujael lhô'sesh pa Metusael, pa Metusael lhô'sesh pa Lamec. 19Pa Lamec caaj papi napu' lhjayas. Ve'lha lhpa lhey Ada, vooy lhap'elh lhey Zila. 20Lhpa Ada nivat'aj pa lhaôs Jabal. Pa lhech lhtataesh papi yiesheen pa joot pava lhclôy vôcôc. 21Pa Jabal caaj pa ve'lha lhch'inish pa lhey Jubal. Pa lhech lhtataesh lhacôm'a papi yiclôquiin pa arpa shi' lhpa vat'ônjanche. 22Vooy lhap'elh Zila nivat'aj pa lhaôs Tubal-caín, pa clesanlhiy lhavoesh yisnatesh'in pava tô'lha pava utes shi' pa clesanilh. Pa Tubal-caín caaj lhpa lhch'injô lhey Naama.
23Caaj pa nalhu, pa Lamec yit'esha papi lhjayas lhpa Ada shi' lhpa Zila:
“Ach'anelhch'e jum na jayeetsha:
jaclôn ca ve'lha nivacle teya ti tsivomatan;
jaclôn ca ve'lha necjôôc teya ti tsic'ôn.
24Ja Caín napu'yama pat'ajô'jesh jayu ti
chiycaatshayeshemch'e,
pa vooy yivaatsha pa setenta y sieteesh
pat'ajô'jesh jayu ca chincaatshayeshch'eyam.”
Pa pu'janaesh lhaôs pa Adán shi' lhpa Eve
25Pa Adán pa yamelhvane lhpa lhch'acfa, pa caaj pa lhaôs pa lhey Set, pa yit'esh: “Pa Dios nijutyiy naelh yaôs nicôyôjatey ca Abel, can yiclôn ja Caín. 26Pa Set caaj yitsha pa lhaôs lhey Enós. Lhech tôlhesh'e ti nich'a t'a'lha pa lhey pa Lhcaanvacle.
Papi lhcles pa Adán
(1 Cr 1.1-4)
موجودہ انتخاب:
Génesis 4: NIVA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Nivacle Bible © Sociedades Bíblicas Unidas, 1994.