MAKI 6

Te ɣɛlɛni Ziizɛ ʋa Nazɔi lai zu

1Ziizɛ ziɣini na é va kpɔɔ yui zu ná kala dopoitiɛ te daɣa ba. 2Tei sa doowo foloi ziitini, é vɛɛni ga kala‐bo boga Gala‐feli wɔtai wu. Nu lamaa te goi mɛnini maʋai wala wulo ga tiɛ. Te ɣɛni tea, “Minɛ ɣa zunui nii é fai niitiɛ ɣaazɔ ziɣia na? Kele‐ɣele sɛƃɛ ɣa ga nii maa zɔlɔ wogɛi bɛ́? Aƃɛ lii maa‐wɔlɔ‐wɔlɔ ka é kɛɛzu ŋɛ ni? 3Nii lei ɔ́ ɣɛ ga kamidai nii é ga Meele dui? Jĩi ta Joosi é vɛɛ Dudia va ta Saimɔni te liɛi lɛ ga zunui nii? A da ná seelaitiɛ lei dɔ ɣɛ vɛ ga sei?” Máʋai ɣɛni wãlasu te ma. 4Ziizɛ ɣɛni te ma, “Gala daa woo‐wo nu lɛ ga nui ƃaa ɔ́ ƃe ɣɛɛzu ma é wulo kpɔɔ yui zu wulu ta kaa yɔ̃wɔitiɛ zaama é vɛɛ kpɔɔ wɔ pɛlɛ wu vea va.” 5Ziizɛ lɛ ŋɛni tii maa‐wɔlɔ‐wɔlɔ‐kɛɛ vele ɣaani na é wulo seeƃɛ vea ɣile‐gilegitiɛ wulu é yee vɛɛni te ma te valo. 6Ta yee‐la‐ma lalai vilini ma ga ki‐gaa‐ziɛ.

Ziizɛ kala dopo puugɔ kai felegɔitiɛ wuloni é te leve

Tei na ɣɛɛni, Ziizɛ vileni taitiɛ zu yíe kala‐bo bo. 7É kala dopo puugɔ kai felegɔi lilini pɔ́ vɛ é vɛɛ sa ga te levega ga fele‐fele. Na ɣa ɣɛɛ na é gɔʋɛ‐yowũ‐ƃɛɛ ɣaa‐ƃaa ʋeeni te ya. 8É boni te ma ga te mɛ lɛ ŋɛni ta nɛpɛ siɣi ta ziɛi ʋaa ma é wulo tukpo pulu. Te mɛ lɛ daa‐mii ŋɛni ziɣi ɔɔ bɛbɛ ɔɔ te li ga naʋolo ta yiiʋɛgitiɛ zu. 9É boni te ma ga te savala kɔlɔ lɔ, kɛ̀ te mɛ lɛ li ga seɣe fele‐fele. 10É ɣɛni wɔnɔ te ma, “Vɛ nɛpɛ wa li na, pɛlɛi wa lɔ bu a yɛ bu é yɛsu wo ziɣi na. 11Vɛ nɛpɛ wa li na tɛ lɛ ɣɛ yee zeini wo wu, na ɣa ɣɛɛ na tɛ lɛ kɛɛni tɔ wo woi mɛni, wa ɣɛ na ziɣizu na, a wɔwaa ƃɛkpɛnɛ ga fifiligi é ɣɛ ga te ŋalama zeele.” 12Na ʋaa ma te liini te ƃɔɛ numaitiɛ wɔ ga te wulu ɣaa ʋe faa yowũ va. 13Te gɔʋɛ yowũ lamaa ƃɛɛni numaa wulu te gulo wu seeƃɛ vea lamaa wũmɔ te valo.

Bataize‐ɣɛɛ Jɔ̃ zaa ʋai

14Masagi Yɛloo ni mɛnini, ƃɔvɛlaale Ziizɛ lɔwɔi ziɛni. Nui taniga te ɣɛni tea, “Bataize‐ɣɛɛ Jɔ̃ ve é wu ziɣia saa ya. Nà ɣa é gaa‐ƃaa ɣɛɛ zéea ga yíɛ tii niitiɛ ɣɛ.” 15Taniga te ɣɛni tea, “Yiilaija ve.” Kɛ̀ zɔitiɛ te ɣɛni tea, “Tɔ ga Gala daa woo‐wo nu kuloai kɔnɔ ga Gala daa woo‐wo bea wɔlɔ‐zaɣagitiɛ te ɣila.” 16Kɛ̀ tei Yɛloo mɛnini, é ɣɛni tea, “Jɔ̃ nii gè wũ teveni tɔ na é wu ziɣia saa ya.” 17Yɛloo é numaa leveni te Jɔ̃ zo te gili te pili kpidi vɛlɛ wu, toku ge zei Yɛloo ƃɔɔ deɣei Fele ŋazai Yɛloodia va. Yɛloo ƃɔɔ seini ga ŋaza. 18Jɔ̃ ɣɛni Yɛloo ma, “Ɛ́ lɛ tɔ su ga è è leɣei ŋazai wulo zéea.” 19Sili ɣɛni Yɛloodia wuu zu é vile Jɔ̃ va. É ɣɛni wõizu é paa, kɛ̀ ɛ́ lɛ ŋɛni zooni. 20Ƃɔvɛlaale Yɛloo ɔ́ luo Jɔ̃ va kwɛ̃ɛ fai ma Yɛloo ƃɔɔ vɛ ga Jɔ̃ ɣɛni ga tele‐bo tuo‐wo nu é ga nui kuloai su leelaa Gala faa ma. Na ma é ɣɛni maa ƃɛɛzu. Yɛloo ɔ́ Jɔ̃ woo mɛni na, kí daa ɔ́ vili, kɛ̀ tɔwɔ ɔ́ wui lo goo ma ga kuu‐zu‐nɛɛ. 21É zolowo sa Yɛloodia ya ga tei Yɛloo ɣaa ʋoloi ziitini. Yɛloo kuu ɣaani maʋoloi nu ƃaazagitiɛ vɛ te ɣɛni ba ta sɔdasi maazu nu ƃaaza‐gitiɛ é vɛɛ Geealali nu ɣaa wuaitiɛ va. 22Tei Yɛloodia duu ŋaza nui vaani é ɣaa te vɛ ná Yɛloo yii laani ta maa wɛ̃ɛtiɛ. Yɛloo ɣɛ ma, “Fai nɛpɛ è wõini bo mà. Gà kɛ yìɛ.” 23É woto leveni zéea é ɣɛ ma, “Ŋɛnii nɛpɛ yà daa wo mà ga fe è ya, anɛɛ ƃalaa é ɣɛ ga nà masadai mazɛvɛ ɣila.” 24Ŋaza nu lomai liini é ɣɛ dée ma, “Zɛƃɛ ɣa ga daa wo?” Nà ɣɛ ma, “Bataize‐ɣɛɛ Jɔ̃ mawũgi.” 25É liini wulu ga kpize ga maa ʋilea masagi wɔ vɛ é ɣɛ ma, “Gè wõini è Bataize‐ɣɛɛ Jɔ̃ mawũgi ʋe zèea pelete wala zu ga maa ʋilea.” 26Masagi maa wõini ga tamaa. Kɛ̀ tɔwɔ koto‐levei é boni é vɛɛ maa wɛ̃ɛtiɛ te mazaƃui va ɛ́ lɛ ŋɛni wõini ɔ́ woi yɛvɛ wulu. 27Masagi kɛɛni sa maa‐ƃɛɛ zɔdasii ta va ga Jɔ̃ mawũgi ga maa ʋilea. Na ɣa ga é liini é wũ teve kpidi vɛlɛi wu. 28É vaani la pelete zu é teve ŋaza nu lomai wɔ, nà wɔ ge teve dée wɔ. 29Tei Jɔ̃ na kala dopoitiɛ te mɛnini, te vaani te mawomai ziɣi te doowu kwɔti ɣabai zu.

Ziizɛ nu wulu dooluo wɔ̃nɔ kuloni

30Ziizɛ na keelaitiɛ te ziɣini siɛi ma te va wulu pɔ́. Nii nɛpɛ te kɛɛni é vɛɛ kala‐bogi va te boni te te woni ma. 31É ɣɛni te ma, “A va wa letele a dii ŋadavɛ vɛ ná ɣa ɣɛ ƃu wo loowo ga ta wolo.” Ƃɔvɛlaale nu lamaa ɣɛni lɛɛzu yíɛ yii, pele lɛ ŋɛni na ƃalaa ga te laa mi. 32Te ziɣini na te vili kẽegi zu te li ta lee‐lee ŋadavɛ vɛ ná ƃu. 33Kɛ̀ tɔwɔ nu lamaa wɛlɛni te va tiɛ li te te wɛ̃ɛ. Te wuloni ná woba laitiɛ zu ga kpize te ziɛ wɔwaa te ziili na te luo. 34Tei Ziizɛ wuloni kẽegi zu, é wɛlɛni kpɔ gwala va. Te ɣaazu‐maa‐wõi soni, ƃɔvɛlaale te maʋaa wuloai ɣɛ è ɣɛ baalagitiɛ te maazu‐vɛtɛ nu ʋaa lɛ ŋɛni te va. É vɛɛni sa ga te ɣala boga ga faa lamaa. 35Tei sa foloi bɔɔlɔ kele ge leveni, ná kala dopoitiɛ te vaani pɔ́ te ɣɛ ma, “Ŋadavɛ vɛ ɣa ƃu‐ƃu. Siɛgi wɔ giɛ sa leve. 36Numaitiɛ leve vɛ ligi zu ƃalaagitiɛ zu é vɛɛ maƃaƃaitiɛ zu va te daa‐mii ŋɛni ɣeea ƃɔɔ ʋaa ma te mi.” 37Kɛ̀ Ziizɛ gaa woteni te ya é ɣɛ tea, “A daa‐mii ŋɛni leve te wɔ te mi.” Te ɣɛ ma, “Gé li gé powũ puugɔ ƃoolo‐ʋɔɔ ɣeea gé teve te wɔ te mi?” 38Kɛ̀ Ziizɛ ɣɛni te ma, “Kpoolo‐ʋɔɔ liide ɣa é wo ya? A li wo ná vɛtɛ.” Tei sa te wɛlɛni na va, te ɣɛni ma, “Kpoolo‐ʋɔɔ looluo ta feza felegɔ.” 39É boni sa ga te pɛ te zei ga ƃulu kpɛ‐kpɛ gui zu. 40Na ma natiɛ te zeini su kpɛ‐kpɛ ga wũ gile‐gile, taniga te su ga zee loolu‐loolu. 41Ziizɛ kpoolo‐ʋɔɔ looluoi ziɣini ta feza felegɔi é ɣaazu lɛ gee zu é mama fe Gala bɛ é kpoolo‐ʋɔɔ ƃumɛi zu ɣale‐ɣale é te ʋe ná kala dopoitiɛ ya ga te sei numaitiɛ laa wu. É feza felegɔi ɣaa wɛɛ te pɛ te vɛ. 42Te pɛ te miini te vile. 43Te kpoolo‐ʋɔɔ vɛnɛi yɛvɛni ta feza pɛnɛi é ɣɛ ga kpɔlɔ puugɔ kai fele. 44Taitiɛ te kpoolo‐ʋɔi miini te ɣɛni ga nu wulu dooluo zinaitiɛ zu.

Ziizɛ ziɛni ziɛi ɣa

45Na ɣɛɛni ƃɔɔ nɔ, Ziizɛ kɛ ná kala dopoitiɛ te vili kẽegi zu te ziɛi leve tuo ga zɔlaavɛ vele Bɛseeda lai zu, tɔwɔ é kpɔgi leve sa wɔ taa zu. 46Tei sa é ʋelini te ma, é lɛɛni gizii ma Gala felizu. 47Tei kpɔkɔ ziitini, kẽegi maa woozai sa ɣɛ é ziɛi zaama. Ziizɛ tɔ ɣilekpu nɔ ɣa é ɣɛni kakei ɣa. 48Ziizɛ ná vɛtɛni ga kẽe‐siai ɣɛni ƃoeizu te la, ƃɔvɛlaale fãgai ɣɛni zeizu te zu. Tei sa é ɣɛni ga gusu laa yɔɔzu, Ziizɛ ɣɛni ziɛzu ziɛi ɣa yíɛ va te wɔ vɛ. É daani wuu zu ga é leve tiɛ. 49Kɛ̀ tei te pɛtɛni yíɛ ziɛ ziɛi ɣa, te kaani ga gɔʋɛ. Te loba sa. 50Ƃɔvɛ‐laale te pɛ te pɛtɛni te zu ƃɛdɛ ge ɣale. Kɛ̀ é ƃɔɛni te wɔ ga maa ʋilea yíɛ ɣɛ tea, “A mɛ lɛ yii wulo va. Nà vee de. A mɛ lɛ luo.” 51É vilini kẽegi zu te ma fãgai ƃɔlɔ sa. É wuloni ga tiɛ é leve kɛɛzu va, 52toku ge zei ga tɛ lɛ ŋɛni kpoolo‐ʋɔi maʋai ɣaa ɣaani. Ƃɔvɛlaale maʋai ɣaa‐ɣaazu ƃai ɣɛ te vɛ.

Ziizɛ seeƃɛ ʋeaitiɛ valoni Gɛnɛsɛlɛ ligi zu

53Tei te ziɛ walai leveni, te vaani Gɛnɛsɛlɛ ligi zu. Te kẽegi la lɔni kake ma. 54Te wuloni ƃɔɔ nɔ kẽegi zu numaitiɛ te Ziizɛ wɛ̃ɛ. 55Te leve‐teveni ná ligi zu ƃɔgɔpɛ ga kpize te vɛɛ ga vaa ga seeƃɛ vea pɔ́ bebe zu vɛ nɛpɛ tɔ mɛni na ga é ɣɛni na. 56Kpaƃaitiɛ nɛpɛ é liini te zu é vɛɛ taitɛ va ta kpalagitiɛ zu tɔ va ga seeƃɛ veaitiɛ te te la nu ƃɔ‐suvɛtiɛ tiɛ pee ʋe bɛ́ ga é ƃe ƃalaa te va te ʋowũ ná seɣei mayifegi va. Tɔwɔ nu liigoitiɛ nɛpɛ te ʋowũni ba te valoni.

موجودہ انتخاب:

MAKI 6: DN1971

سرخی

شئیر

کاپی