MAKI 11

Ziizɛ lɛɛ‐zuvɛ Yɛlusulɛɛ

1Tei Ziizɛni te ɣɛni lɔtɔsu Yɛlusulɛɛ và, te ziitini sa taitiɛ zu te laa ga Bɛfaji ta Bɛtani, te Aale ɣizii ma. Ziizɛ zɛba sa é ná kala dopoi felegɔ leve 2é ɣɛ te ma, “A li tai zu é wo luo ɣɛɛɣi daavɛ. Wa lɛɛ na ƃɔɔ nɔ na, wa wɛlɛ soo yuwu va daa lɔgɛi nii nu lɛ dɛ zeini kɔma. A daa ʋũi wo vaa la vɛ. 3Ani nu nɛpɛ ka ɣɛ na wo ma, ‘Aƃɛi wo nii ɣɛɛzu ma?’ a ɣɛ ma, ‘Maƃala ɣa de maliɣii ma. Towaa teve wo wɔ ve wulu ga maa vilea.’ ” 4Te liini sa te wɛlɛ soo yuwui va daa lɔgɛi pɛlɛ laavɛ pele‐vɛɛgi ma te daa ʋũi. 5Numaitiɛ te ɣɛni loni na te ɣɛni te ma, “Zɛƃɛi wo soo yuwui laa ʋũisu ma?” 6Nii Ziizɛ boni kala dopo felegɔitiɛ ma te natiɛ wo te ma. Natiɛ wɔ te ƃe sa te va te lii la. 7Te vaani ga soo yuwui Ziizɛ wɔ vɛ te ta zeɣeitiɛ vɛɛ kɔma. Ziizɛ wɔ ge zei sa kɔma. 8Nu lamaa te ta zeɣeitiɛ vɛɛni pelei ma. Taniga te gulu yifega vɛɛni pelei zu. Na ɣa ga niitiɛ te te leveni dɔƃɔi zu. 9Taitiɛ te ɣɛni ga ná luo vele é vɛɛ niitiɛ va te ɣɛni ga ná wulu vele te ɣɛni lobasu tiɛ ɣɛ tea,

“Hosana! Tuuyiɛ ɣa ɣɛ nui nii ma

é vaazu de maliɣii Gala na daa‐zeigi zu!

10Tuuyiɛ ɣa ɣɛ de ɣeea Deeve na masadai ma

é vaazu vaazu!

Ƃe ba daa‐maa‐lɛɛ wo ga Gala!” 11Ziizɛ lɛɛni sa Yɛlusulɛɛ é li Gala‐feli wɔta walai wu. Tei é wɛlɛni na va leelia ga ŋɛnii ƃɔgɔpe, ta ná kala dopo puugɔ kai felegɔitiɛ te liini Bɛtani, ƃɔvɛlaale siɛgi levegɛi sa ɣɛ.

Ziizɛ gului wotoni daa ga “fi”

12Tei te ziɣini Bɛtani ga na wulu voloi, pulu ɣɛni Ziizɛ ma. 13É wɛlɛni gulu ta va woozala kpinɛi. É liini na é wɛlɛ gá va ga ani mavaa ɣɛni gá. Tei é ziilini na, ɛ́ lɛ wɛlɛni ŋɛni ta nɛpɛ ba gá é wulo malaitiɛ wulu. Ƃɔvɛlaale gului nii vaa ziɛ gɛ lɛ ŋɛni dɛ ziitini. 14É ɣɛni sa gului ma, “Nu nɛpɛ gɛ lɛ sa wɔlɔ‐wɔlɔ è ɣaa vaa mia wɔnɔ.” Ná kala dopoitiɛ te nii mɛnini.

Ziizɛ lɛɛni Gala‐feli wota walai wu

15Te vaani Yɛlusulɛɛ. Ziizɛ lɛɛni sa Gala‐feli wɔta walai wu é vɛɛ ga numai niitiɛ ƃɛɛ te ɣɛni ŋɛni zɔ̃wɔ wulozu na ta niitiɛ te ɣɛni ŋɛni ɣeeazu na. Na ɣa ɣɛɛ na é navolo‐maa‐ʋeli beaitiɛ ta leeveitiɛ lɔɔ vilini é vɛɛ wopo‐sɔ̃wɔ‐wulo veaitiɛ te zei‐ma ŋɛniitiɛ va. 16Ɛ́ lɛ ƃega ʋa bu nu nɛpɛ zeea ɔ́ leve ga ŋɛni nɛpɛ Gala‐feli wɔta walai wu. 17É te ɣala boni é ɣɛ te ma, “Kɛ̀bɛ, ponɛvɛ Gala kɔlɔi zu Gala giɛ ɣɛ tea,

‘Nà pɛlɛi laa ɣa ɣɛ ga fèli vɛlɛ

zii gaazɔ ʋaa ma,’ kɛlɛi?

Kɛ̀ wo ná ɣɛɛ ga wũmɔ vea zei‐zu.” 18Laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ te nii mɛnini. Tɔwɔ te pele ɣaa ziɛni sa ga te Ziizɛ zu ƃɔnɔ wo. Ƃɔvɛlaale te ɣɛni luozu ba, toku ge zei ga ná kala‐bogi vilini numaitiɛ ƃɔgɔpɛ ma ga ki‐gaa‐ziɛ. 19Tei kpɔkɔ ziitini, Ziizɛ ƃɔga ná kala dopoitiɛ te wuloni tai va.

Fai nu ɣa maa woli gului nii vaa zu daa ga “fi”

20Tei te ɣɛni levesu ga subu‐zubu, te wɛlɛni sa gului nii va daa ga “fi” fɔi ƃɔɔ é ziiti maŋasai ma. 21Pite ɣigi yɛni maʋai zu é ɣɛ Ziizɛ ma, “Kala‐mɔi, wɛlɛ! Gului nii è kotoni é ʋɔɔ!” 22Ziizɛ gaa woteni te ya é ɣɛ tea, “A la ga Gala! 23Gè bo wiɛ ga gaama, nu nɛpɛ ka ɣɛ gizii nii ma, ‘Ƃekpe è vili yuwu wu,’ nà wɔ ge zoo é ɣɛ bɛ́. Ani nɔ nii é boga daave la ɣigi zu ga towaa ɣɛ, tɔwɔ sakpe gɛ lɛ kigi zu, maʋai ɣa ɣɛ bɛ́. 24Na ma gè bo wiɛ, ŋɛnii nɛpɛgi wa Gala gaa zaɣa kɛ ma feli woi zu wo vɛ, a siɣi ga gaama ga wo maa zɔlɔ woga. Nà wɔ ka ɣɛɛ na wa sɔlɔ wo. 25Siɛ nɛpɛ wa ɣɛ na Gala felizu, ani nu nɛpɛ kɛɛ‐zɔ ka wo wuu zu, a su ʋaa yɛ, kɛɛ ʋaa ma wo ɣeea Gala nii é gee‐zuvɛ tɔ ƃalaa é wa ʋaa yowũitiɛ zu ʋaa yɛ. 26[Kɛ̀ ani wɛ lɛ su‐ʋaa‐yɛ boga, wo ɣeea Gala é gee‐zuvɛ tɔ ƃalaa lɛ wa ʋaa yowũitiɛ zu ʋaa yɛga.]”

Gaa‐zaɣa‐kɛi é vile Ziizɛ na gaa‐ƃai va

27Ziizɛ ƃɔga ná kala dpoitiɛ te liini Yɛlusulɛɛ kɔnɔ. Tei é ɣɛni ziɛ‐ziɛsu Gala‐feli wɔta walai wu, laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ é vɛɛ sa zuu wũgitiɛ va te vaani pɔ́ vɛ 28te ɣɛ ma, “Gaa‐ƃaa zɛƃɛ ga è fai niitiɛ ɣɛɛzu la? Ɔɔ ƃɛ ɣa é gaa‐ƃai nii ʋeea è ya ga è niitiɛ ɣɛ?” 29Ziizɛ ɣɛ te ma, “Gà gaa‐zaga‐kɛɛ wosu ga wiɛ. Ani wa gaa wote na, gaa‐ƃai gè fai niitiɛ ɣɛɛzu la gà sa gà daa wo wiɛ. 30Jɔ̃ na bataizei maʋaa wuloni Gala ta ƃaa é wuloni nu ƃuse ya? A gaa wote na.” 31Te pili‐pilini yɔɔzu tiɛ ɣɛ ɣiini ma, “Ani da ɣɛ na tea, ‘Kulovɛ Gala zeea,’ towaa ɣɛ tea, ‘Zɛƃɛi é kɛ mu wɛ lɛ Jɔ̃ woi ziɣini ga gaama?’ 32Tɔwɔ da zoo de bo ga kulovɛ nu ƃuse ya?”— Te ɣɛni luozu numaitiɛ va, ƃɔvɛlaale nui ƃɔgɔpɛ te ʋaani bu ga Jɔ̃ ɣɛni ga Gala daa woo‐wo nu ƃɔɔƃɔɔ. 33Na ma te Ziizɛ woi ɣaa woteni te ɣɛ ma, “Gɛ́ lɛ kwɛ̃ni.” Ziizɛ wɔ ge ɣɛ te ma, “Nà ƃalaa gaa‐ƃai gè fai niitiɛ ɣɛɛzu la gɛ̀ lɛ daa woga wo ma.”

موجودہ انتخاب:

MAKI 11: DN1971

سرخی

شئیر

کاپی