MAFIYU 9

Ziizɛ seeƃɛ nui valoni

1Ziizɛ vilini kẽegi zu é ziɛ walai leve é va kpɔɔ lai zu. 2Kɛɛzu é kɛ tiɛ va pɔ́ ga nu ta zée zai ma ta kɔ́wɔ é laani ná betei zu. Tei Ziizɛ wɛlɛni ta yee‐la‐mai va, é ɣɛni seeƃɛ nui ma, “Yii lɔ, dùu. Yà ʋaa yowũitiɛ te zu ʋaa yɛga.” 3Tɔwɔ nu wɔgi é ɣɛni ɣɛɛzu, tɔ‐dɛɛ ɣala‐mɔitiɛ te taniga te ɣɛni bosu ɣi su tiɛ ɣɛ tea, “Zunui nii ɣa Gala daa ŋala‐ŋalasu.” 4Kɛ̀ ta ɣi‐gaa‐ziɛi wɛ̃ɛ pele ma Ziizɛ vɛ é ɣɛni te ma, “Zɛƃɛi é kɛɛ wo ɣi gaa ziɛzu faa yowũ ma wo yiitiɛ zu? 5Zɛƃɛ ɣa bosu ʋii ƃɛi? Tɔ ga nu ɣɛ má, ‘Yà ʋaa yowũitiɛ te zu ʋaa yɛga’ ɔɔ nu ɣɛ ma, ‘Wu ziɣi è ziɛ’? 6Kɛ̀ gà nii ɣɛɛzu kɛɛ ʋaa ma wo kwɛ̃ɛ ga gaa‐ƃaa ɣa nu ƃuse lui ya zui ɣa ga é faa yowũ zu ʋaa yɛ.” Ziizɛ ɣɛ sa kɔwɔ‐za‐ma nui ma, “Wu ziɣi è yà vetei ziɣi è li wɔ pɛlɛ wu.” 7Nà wɔ ge wu ziɣi sa é li wɔ pɛlɛ wu. 8Tei kpɔgi na vɛtɛni, te ɣɛni luozu tiɛ sa Galagi nii laa maa lɛ é na ɣavele ɣaa‐ƃaa ʋeea nu ƃuse ya.

Ziizɛ Mafiyu lilini

9Tei Ziizɛ ziɣini na é leve yíɛ li, é wɛlɛni zunu ta va dáa ga Mafiyu. É ɣɛni zeini gɔmɛti naʋolo‐wulo wɔfisii zu. Ziizɛ ɣɛni ma, “Vile pùlu.” É wu ziɣi é vile na wulu.

10Tei Ziizɛ ɣɛni laa miizu pɛlɛi wu, gɔmɛti naʋolo‐wulo vea lamaa ƃɔga zɔitiɛ te luo velei lɛ vani te vaani te vɛɛ ná kala dopoitiɛ va ta tiɛni tiɛ laa mi. 11Tei Favilesiitiɛ te wɛlɛni nii va, te ɣɛni Ziizɛ na kala dopoitiɛ ma, “Zɛƃɛi é kɛɛ wa ɣala‐mɔi ƃɔga gɔmɛti naʋolo‐wulo vea tiɛ laa mi ŋada ɣila é vɛɛ niitiɛ va te luo velei lɛ vani?” 12Kɛ̀ tei Ziizɛ mɛnini, é ɣɛni tea, “Taitiɛ te lɔtɔ zu wodoai zowo maƃala lɛ te ma, kɛni niitiɛ te zeeƃɛzu. 13A li wo Gala kɔlɔi zu woi nii zu‐wulo‐zuvɛ maa woli. Na ɣa ga tei Gala ge ɣɛni tea, ‘Gaazu‐maa‐wõi‐ɣaa ɣa mawõi wɔɔlɔi mà, ɛ́ lɛ ga zalaɣa.’ ” Ziizɛ ɣe sa tea, “Gà nii wosu, ƃɔvɛlaale gɛ̀ lɛ vaani ga gè tele‐bo tuo‐wo bea lili, kɛ̀ niitiɛ ve te luo vele lɛ vani.”

Gaa‐zaɣa‐kɛi é vile zi‐dɔɔ va

14Bataize‐ɣɛɛ Jɔ̃ na kala dopoitiɛ te vaani Ziizɛ wɔ te gaa zaɣa kɛ te ɣɛ ma, “Zɛƃɛi é kɛɛ gé vɛɛ Favilesiitiɛ va gíɛ zi dɔ ti‐ti, yà ɣala dopoitiɛ tɛ lɛ kɛɛ tɔ zi dɔ?” 15Ziizɛ ɣɛni te ma,“? Wɛ̃ɛtiɛ ta va ŋaza‐wulo wui ma, maa‐wõi ɣa zoo é loo te ma ani nɔ ŋaza‐wulo nui ɣa te woba? Siɛ ta ɣa ziiti ga te ŋaza‐wulo nui ziɣi te woba te lii la. Ta sa ta zi dɔ na maziɛ su. 16Nu lɛ seɣe‐zaɣa zu vɛɛ ga seɣe niinɛ, ƃɔvɛlaale mazu‐vɛɛgi ɣa leve ba. Na ɣa ɣɛɛ na mazaɣai zu ɣa wɔɔlɔ ma. 17Nu lɛ ƃalaa kɔnɔ dɔɔ lakpa‐ga‐niinɛ wua dɔɔ woole wɔlɔ‐zaɣa su. Ani nu ɣa kɛɛ na, goolei ɣa wuule. Na wɔ ka ɣɛɛ na dɔi ŋala‐ŋalaga ɣa na, goolei ŋala‐ŋala. Kɛ̀ dɔɔ lakpa‐ga‐niinɛi ɣa wu goole niinɛi zu, kɛɛ ʋaa ma dɔi pɛ goolei pɛ ŋada mɛ lɛ zei te ta va.”

To‐tuoi duu ŋaza nui ƃɔga ŋaza nui é ʋowũni Ziizɛ na seɣei va

18Tei Ziizɛ ɣɛni ƃɔɛzu ŋɛ na Jɔ̃ na kala dopoitiɛ wɔ, to‐tuo gila ge vaani pɔ́ é vile ŋibia Ziizɛ yii laavɛ yíɛ ɣɛ ma, “Dùu ŋaza nui zaa. Kɛ̀ va è yee vɛɛ bá. Yà na ɣɛɛ na zɛʋu ɣa sa a loo su.” 19Ziizɛ wu ziɣi sa, ná kala dopoitiɛ te vɛɛ bá ta tiɛni te vile púlu. 20Nii wɔgi é ɣɛni ɣɛɛzu, ŋaza nu ta ziɣini ga Ziizɛ wulu vele é va é ʋowũ ná seɣei laa yifegi va, é ga ŋaza nui nii maŋamai kɛɛni wuuzu ga kwena puugɔ kai fele. 21É boni ɣigi zu é ɣɛ tea, “Ani nɔ gà ʋowũ na ná seɣei va, gà valo.” 22Ziizɛ liteni é wɛlɛ bá é ɣɛ má, “Màmai, yii lɔ. Yà yee‐la‐mai é è valoa.” Ŋaza nui wɔ ge valo sa ga maa ʋilea. 23Tei Ziizɛ vaani to‐tuoi na pɛlɛi la, é wɛlɛni koole‐ʋɛɛ vea va na ta kpɔgi tiɛ zɔɔgi wo na. 24É ɣɛni tea, “A ziɣi vɛ, ƃɔvɛlaale ŋaza nu lomai lɛ zaani. Tɔ ŋiizu.” Te ŋɛɛni má. 25Kɛ̀ tei é kpɔgi wuloni ga ŋetea vele, é lɛɛni pɛlɛi wu é pomai zo zée va. Ŋaza nu lomai wu ziɣi sa. 26Nii mawoi ziɛni ná ligi zu ɣaazɔ.

Ziizɛ gaazu‐wuu vea felegɔ valoni

27Tei Ziizɛ ziɣini na é leve yíɛ li, gaazu‐wuu vea felegɔ te vileni púlu tiɛ bo ga woo wala tiɛ ɣɛ tea, “Deeve dui, gé ɣaazu‐maa‐wõi ɣa.” 28Tei é lɛɛni pɛlɛi wu, gaazu‐wuu veaitiɛ te vaani pɔ́ vɛ. Ziizɛ ɣɛni te ma,“? Wo siɣia ga gaama ga gà zoo gè nii ɣɛ?” Te ɣɛni ma, “Ooi, kèea.” 29Ziizɛ zɛba sa é ʋowũ te ɣaazu ɣɛzɛgitiɛ va yíɛ ɣɛ tea, “È ɣɛ velei nɔ wo laa la ga máʋai, ƃe ba é ɣɛ ŋɛ na wo vɛ.” 30Te ɣaazuvɛtiɛ wɔ te ziɣini sa ma. Ziizɛ boni te ma ga ɣaazu‐ɣili‐vele‐ma é ɣɛ te ma, “A mɛ lɛ ƃe ba nu ta nɛpɛ gɔ kwɛ̃ɛ.” 31Kɛ̀ te liini te Ziizɛ lɔwɔi ziɛ ƃɔɔ ná ligi zu wɔlɔ‐wɔlɔ ma.

Ziizɛ mumugi valoni

32Zinaitiɛ te ɣɛi ma sa liizu, numaa te vaani Ziizɛ wɔ ga mumugi nii gɔʋɛ yowũ ɣɛni púlu. 33Tei é gɔʋɛi ƃɛɛni mumugi wulu, nà laa wɔlɔni. É wuloni ga kpɔgitiɛ ga kpakpaa tiɛ ɣɛ tea, “Gɛ́ lɛ dɛ wɔlɔ‐wɔlɔ wɛlɛni nii ɣavelei ta va Yezɔi yui zu.” 34Kɛ̀ Favilesiitiɛ te ɣɛni tea, “Tɔ gɔʋɛ yowũa ƃɛɛzu numaa wulu ga gɔʋɛ yowũitiɛ ta masagi na gaa‐ƃai.”

Numaitiɛ maa‐wõi Ziizɛ zoni

35Ziizɛ liini sa taitiɛ ɣaazɔ zu ta kpaƃaitiɛ yíɛ kala‐bo bo Gala‐feli wɔtaitiɛ wu yíɛ woo niinɛ vagɔi wo é vile Gala ta masadai va yíɛ seeƃɛi pɛ balo yíɛ seeƃɛ veaitiɛ ɣaazɔ lɔtɔ zu wodo. 36Tei é wɛlɛni kpɔgitiɛ va, te ɣaazu‐maa‐wõi soni, ƃɔvɛlaale zii‐zɛlɛ ge ɣɛni te ma. Te ɣi‐to‐su lɛ ŋɛni ma. Te maʋaa wuloai ɣɛ ga baalagi niitiɛ te maazu‐vɛtɛ nu ʋaa lɛ ba. 37Kɛ́ɛ vele ɣa na ɣɛ ná kala dopoitiɛ ma, “Mɔlɔ ƃoei zu wɔɔlɔvɛ ma, kɛ̀ mɔlɔ‐leve veaitiɛ ta nɔ ga gile‐gile. 38Na ma nui pó ge ga kpalagi, a feli ga é mɔlɔ‐leve vea leve te ná mɔlɔi leve.”

موجودہ انتخاب:

MAFIYU 9: DN1971

سرخی

شئیر

کاپی