MAFIYU 28

Ziizɛ wu‐ziɣi ʋai saa ya

1Tei doowo foloi leveni yíɛ sa ziiti gela‐boga ma ga laali ʋolo subu, Meele Mɛdaliini ƃɔga Meele zɔi te liini ga te wɛlɛ kabai va. 2Tɔwɔ zui ƃelini ga kpakpaa. Toku ge zei ga de maliɣii na keelai wuloni gee‐zuvɛ é vile é kwɔti walai ɣili‐kili é ziɣi kaba yeɣei la é zei sa kwɔtii ƃɔɔ maazu. 3Kpɛtɛ velei wuloai ɣɛ è ɣɛ mea‐mea. Máa zeɣei yìɛ wele è ɣɛ dɛɣɛ. 4Tɔwɔ kabai maa‐ƃɛɛ veaitiɛ te luo vele ma te ƃelini te maʋaa wulo è ɣɛ poma. 5Kɛ̀ Gala ta ɣeelai ɣɛni ŋazaitiɛ ma, “A mɛ lɛ luo. Gè kwɛ̃ni ga wa Ziizɛ ɣaa ziɛzu nii te kpakoni gului ma. 6Ɛ́ lɛ vɛ, ƃɔvɛlaale é wu ziɣia è ɣɛ velei é boni la. A va wo wɛlɛ vɛ va te daani na. 7A li ga maa ʋilea wo bo ná kala dopoitiɛ ma ga é wu ziɣia saa ya. Na ɣa ɣɛɛ na tɔ liizu te luo Geealali. Ná ɣa ta pɛtɛ na. A wɛlɛ, gè boga wo ma.” 8Na ma te ziɣini kabai la ga maa ʋilea duo maazu ta kuu‐zu‐nɛɛ ƃakpa wala te li ga kpize ga te bo ná kala dopoitiɛ ma. 9Tɔwɔ ta Ziizɛni te wũini, nà ɣɛ te ma, “Wa na‐ee!” Te va sa te loo kɔ́wɔ wu. 10Ziizɛ ɣɛni sa te ma, “A mɛ lɛ luo. A li wo bo bàitiɛ ma te li Geealali. Ná ɣa ta pɛ̀tɛ na.”

Kaba maa‐ƃɛɛ veaitiɛ te mawona‐bogi

11Tei sa te ɣɛni liizu, kaba maa‐ƃɛɛ veaitiɛ te taniga te liini taa zu. Nii nɛpɛgi é ɣɛɛni te su wulo laa‐ʋaale gwalaitiɛ ma. 12Tei sa te ɣaa lɛɛni ba ŋada ɣila ta ƃɔga zuu wũgitiɛ te deʋe wo, te naʋolo ʋeeni sɔdasiitiɛ ya te ɣɛni kabai maazu vɛtɛsu. 13Te ɣɛni te ma, “A bo numaitiɛ ma ga ‘Tei gé ɣɛni ŋiizu, Ziizɛ na kala dopoitiɛ te vaani ga kpidi te mawomai wũmɔ.’ 14Ani wɔnɔ fai nii ɣa loo na gɔmɛti nu walai wui zu, gá zii la ga gé wo wulo faa ƃoei zu.” 15Na ma natiɛ te naʋoloi zoni, nii nɔ te dɛɛni ga tiɛ te na ɣɛ. É yɛga su ƃɔɔ é ziiti zai ŋɛ ni ƃalaa ma, kwona‐bo goi nii yɛzɛgɛ dɛ nɔ Dusiitiɛ zaama.

Ziizɛ wuloni ná kala dopoitiɛ ɣaazu

16Kala dopo puugɔ kai ɣilagi liini Geealali gizigi nii ma Ziizɛ ná lɛɛni ga tiɛ. 17Tei te pɛtɛni, te looni kɔ́wɔ wu. Kɛ̀ sakpe ge ɣɛni te taniga yii zu. 18Ziizɛ vaani é ɣɛ te ma, “Gaa‐ƃai ɣaazɔ é zui zu ta gee feevɛ zèea. 19Na ma a li wo zii pɛ kala bo wiɛ bataize ɣɛ ga tiɛ kèea Gala na daa‐zeigi zu, nài gè ga dúi nà daa‐zeigi zu, kèea Gala baa ŋinɛgi na daa‐zeigi zu. 20A wiɛ te ɣala bo ga te ziɛ ga fai ɣaazɔ gè wo leʋea la. A wɛlɛ! Gà ɣɛ wo woba ga ɣee nɛpɛ é yɛsu ŋeteai ɣaa‐ƃela folo ziiti.”

موجودہ انتخاب:

MAFIYU 28: DN1971

سرخی

شئیر

کاپی