MAFIYU 25

Sakpegi é vile kpea niinɛ puugɔi va

1Ziizɛ ɣɛni tea, “Gala ta masadai ɣa wulo sa mu è ɣɛ kpea niinɛ puugɔitiɛ te ta wulo laboitiɛ ziɣini ga te li ŋaza‐wulo nui luo. 2Dooluo litigɛi ɣɛ, dooluo ɣele‐ɣelegɛi. 3Ƃɔvɛlaale zɔitiɛ te litigɛi ɣɛ te ta wulo laboitiɛ ziɣini tɛ lɛ gulo ziɣini. 4Kɛ̀ niitiɛ te ɣele‐ɣelegɛi ɣɛ te gulo zɛniga ziɣini te pɛɛ ta laboitiɛ va. 5Tei ŋaza‐wulo nui yɛni na wulu, te ɣaazɔ ŋii leveni ga tiɛ. 6Kɛ̀ kpidi zaama sa seeze woo lɛɛni tiɛ ɣɛ tea, ‘A wɛlɛ! Ŋaza‐wulo nui ɣa nu! A wulo wo li túo.’ 7Kpea niinɛgitiɛ ɣaazɔ te wu ziɣi sa te ta laboitiɛ ɣaa leka ɣale. 8Titi beaitiɛ te ɣɛ kele‐ɣele beaitiɛ ma, ‘A wa wuloi ta ʋe gé vɛ, ƃɔvɛlaale gá laboitiɛ ta sa liʋisu.’ 9Kɛ̀ kele‐ɣele beaitiɛ te te woi ɣaa woteni te ɣɛ tea, ‘Ɣee ta ta lɛ zɔlɔ woga ɔ́ kulo‐ɣɛɛ wo de ɣaazɔ ʋaa ma. Nii pagɛi wo kɛ tɔ ga wo li sɔ̃wɔ‐wulo veaitiɛ wɔ vɛ wo geea ƃɔɔ ʋaa ma.’ 10Tɔwɔ tei te liini geea‐zuvɛ, ŋaza‐wulo nui vaani. Niitiɛ te ɣavele ƃɛtɛi ɣɛ te liini ŋaza‐wulo wui ɣaa‐zuvɛ ta tiɛni. Te kpogi vɛɛ sa da. 11Tei ná ta kɛɛni, kpea niinɛgi zɔitiɛ te vaani ƃalaa pɛ tiɛ ɣɛ tea, ‘Kèea, kèea, daa lao gé luo.’ 12Kɛ̀ é gaa woteni é ɣɛ tea, ‘Gaamai zu, gɛ̀ lɛ wo wɛ̃ni.’ ” 13Ziizɛ ɣɛ sa tea, “Na ʋaa ma, a ɣɛ ɣi su, ƃɔvɛlaale wɛ lɛ foloi wɛ̃ni ɔ́ nɔ ɣɛ ga siɛgi foloi ʋaa va.’

Sakpegi é vile tii‐ɣɛɛ vea saagɔitiɛ va

14Ziizɛ ɣɛni tea, “Maʋaa ɣa wulo è ɣɛ zunui nii é ɣɛni liizu siɛ ma é ná tii‐ɣɛɛ veaitiɛ lili é te lo kwéligitiɛ maʋaa ƃawola. 15É dala wulu dooluo ʋeeni te ɣila zeea, é dala wulu felegɔ ʋe zɔi ya, é zɛba é dala wulu gila fe wɔnɔ na wului ya. É feeni nɔ nu ɣile‐giledai ya è ɣɛ velei daa‐zɔ‐bo sobo ge ɣɛni la te vɛ. É li sa siɛi ma. 16Nui nii é dala wulu dooluoi maa zɔlɔ woni é liini é yaawo zei su ga maa ʋilea. Tɔwɔ é dala wulu dooluo zɔlɔ wo su wɔnɔ é vɛɛ ba. 17Vele nɔ na é ɣɛni la ga nui é dala wulu felegɔi maa zɔlɔ woni. Nà tɔ ƃalaa é dala wulu felegɔ vɛɛni wɔnɔ ba. 18Kɛ̀ nui nii é dala wulu gilagi maa zɔlɔ woni é liini é zeɣe leve zui wu é ná nu keea nu na naʋoloi loowu su. 19Tɔwɔ tei sa su woozani, tii‐ɣɛɛ veai natiɛ ta nu keea nu vaani ta tiɛni te kwéligi maʋaa ɣaa zei. 20Nui nii é dala wulu dooluoi maa zɔlɔ woni é vaani la dala wulu dooluo vɛi ba, yíɛ ɣɛ tea, ‘Kèea, dala wulu dooluo ɣa è zée laani zèea. Tɔwɔ towaa gè dala wulu do oluo ƃɛtɛɛ su wɔnɔ é vɛɛ ba.’ 21Ná nu keea nu ɣɛ ma, ‘È kɛɛni ga pagɔ. Yà ga tii‐ɣɛɛ nu vagɔ è ga tii‐ɣɛɛ nui nu ɣa laa la. È ɣɛɛ ga nui nu ɣa laa la faa wolo zu. Gà è lo ta wala maazu. Vɛɛ bà nà kuu‐zu‐nɛɛ‐wuloai zu, nài gè ga yà nu keea nu.’ 22Nii wɔnɔ dala wulu felegɔi ɣɛni zéea nà vaani yĩɛ ɣɛ tea, ‘Kèea, dala wulu felegɔ ɣa è zée laani zèea. Towaa gè dala wulu felegɔ ƃɛtɛɛ su gè pɛɛ ba.’ 23Ná nu keea nu ɣɛ ma, ‘È kɛɛ ga pagɔ. Yà ga tii‐ɣɛɛ nu vagɔ è ga tii‐ɣɛɛ nui nu ɣa laa la. È ɣɛɛ ga nui nu ɣa laa la faa wolo zu. Gà è lo ta wala maazu. Vɛɛ bà nà kuu‐zu‐nɛɛ‐wuloai zu, nài gè ga yà nu keea nu.’ 24Nui nii wɔnɔ ƃalaa é dala wulu gilagi maa zɔlɔ woni é vaani yíɛ ɣɛ tea, ‘Kèea, gè è wɛ̃ni ga nui ná faa ƃai. Yà mɔlɔ leve vɛ ɛ̀ lɛ woza vilini na, yìɛ gaa lɛ ba vɛ ɛ̀ lɛ fazani na. 25Na ma gè ɣɛni luozu gè li gè yà lala wulu gilagi loowu zui wu. Aĩ — nii é ga è weligi, so.’ 26Kɛ̀ ná nu keea nu gaa woteni é ɣɛ ma, ‘Yài ŋɛ ni è ga tuo‐vele‐yowũ lii‐ɣɛɛ nu è nɔlɔi, è ɣɛni ga kwɛ̃ɛga ga gà mɔlɔ leve vɛ gɛ̀ lɛ bilia na, vɛ wɔnɔ gɛ̀ lɛ fazani na gìɛ gaa lɛ ba na, kɛlɛi? 27Pagɛi ɣɛ mu è nà naʋoloi wu bɛ̃ɛkii ma. Gɔ̀ vaa na nii é ga kwèligi gɔ̀ maa zɔlɔ wo é vɛɛ mavili‐sui va. 28Na ma a dala wulu gilagi wulo zéea wo fe nui nii ya dala wulu puugɔi zéea. 29Ƃɔvɛlaale nui ŋɛnii ta zéea towa ta ɣa ʋe zéea é vɛɛ ba. Na ɣa ɣɛɛ na su ɣa wɔɔlɔ ma zéea. Kɛ̀ nui ta lɛ zéea, nii ƃalaa yá ɣɛ zéea ta na wulo zéea. 30Tii‐ɣɛɛ nui nii ŋɛ ni tɔnɔ lɛ ba, a pili ƃɔɔ kpidi zaama munu. Ná ɣa numaa ta ɣɛ wɔlɔzu na tiɛ yĩ gaa mi.’ ”

Ziitiɛ ta ʋaa‐wo gaa‐leve ʋai

31Ziizɛ ɣɛni tea, “Nu ƃuse lui ɣa vaa na ná bɔɔlɔlai zu Gala ta ɣeelai ɣaazɔ bá, tɔ sa a zei ná saala‐ma masa kpɔkɔgi ɣa. 32Zii ɣaazɔ ɣa ɣaa lɛ ba zíi la. Na ɣa ɣɛɛ na towaa te yee wulo kii zu è ɣɛ baala‐maazu‐vɛtɛ nu ɣa baalagitiɛ wulo biliitiɛ zaama. 33Towaa baalagitiɛ wu ga yee za‐su vele. Kɛ̀ niitiɛ te ga biliitiɛ, towaa natiɛ wu ga wɔwɔ yee‐su vele. 34Niitiɛ ta ɣɛ ga masagi yee za‐su vele, tɔ sa a ɣɛ te ma, ‘A va. Wa ɣa kèea Gala tuuyiɛ loa wo ma, kɛɛ ʋaa ma wo wo ge ɣɛ ga masadai nii kavelei ƃɛtɛi yɛga wo ʋaa ma é ziɣi ƃɔɔ ŋetea‐lɔɔ‐zei ʋolo ma. 35Ƃɔvɛlaale pulu ɣɛni mà wo daa‐mii ŋɛni ʋe zèea. Kpoale‐wõi ɣɛni mà wo kulo mà. Gè ɣɛni ga wɛ̃ɛ, wo yee zei bù. 36Tete looni mà wo màa zeɣe wulo. Gè ɣɛni zeeƃɛzu wo laali mà. Gè ɣɛni kpidi vɛlɛ wu wo va pɔ̀ vɛ.’ 37Tele‐bo tuo‐wo beaitiɛ ta sa ta gói ɣaa wote te ɣɛ ma, ‘Gé maliɣii, ʋolo ƃɛ ɣa gé wɛlɛni la yìɛ pulu é è ma gé è wɔ̃nɔ kulo? Ɔɔ kpoale‐wõi é yìɛ gé kulo yìɛ? 38Ʋolo ƃɛi kɔnɔ gé wɛlɛ la yìɛ è ga wɛ̃ɛ gé yee zei è wu? Ɔɔ tete é è ma gé è maa zeɣe wulo? 39Na ɣa wulo na su, ʋolo ƃɛ ɣa gé è vɛtɛni la yìɛ zeeƃɛ ɔɔ è kpidi vɛlɛ wu gé laali yìɛ?’ 40Masagi ɣa sa a te woi ɣaa wote é ɣɛ te ma, ‘Gè bo wiɛ ga gaama, nii nɛpɛ wo kɛɛni nui nii ƃalaa vɛ toai bu nà numaitiɛ zaama, nà ɣa na wo kɛɛni bɛ̀.’

41“Tɔ sa a bo niitiɛ ma te kɔ́wɔ yee‐su vele é ɣɛ te ma, ‘A ziɣi kòba. Wa ɣa koto é wo va. Wo li ŋabui nii zu maʋaa wɛ̃ɛ gɛ lɛ ba, nii kavele ƃɛtɛi dɛvele ʋaa ma ta ná keelaitiɛ. 42Ƃɔvɛ‐laale pulu ɣɛni mà wɛ lɛ daa‐mii ŋɛni ʋeeni zèea. Kpoale‐wõi ɣɛni mà wɛ lɛ kuloni mà. 43Gè ɣɛni ga wɛ̃ɛ wɛ lɛ yee zeini bù. Tete looni mà wɛ lɛ màa zeɣe wuloni. Gè ɣɛni zeeƃɛzu wɛ lɛ laalini ma, gè ɣɛ wɔnɔ kpidi vɛlɛ wu wɛ lɛ laalini ma.’ 44Na ɣa ɣɛɛ na ta ƃalaa ta gói ɣaa wote te ɣɛ ma, ‘Gé maliɣii, ʋolo ƃɛ ɣa gé wɛlɛni la yìɛ pulu yìɛ ɔɔ kpoale‐wõi yìɛ ɔɔ è ga wɛ̃ɛ ƃaa tete loai yìɛ ɔɔ yìɛ zeeƃɛ ɔɔ è kpidi vɛlɛ wu gɛ́ lɛ ná laa‐zɔ boni yìɛ?’ 45Towaa te woi ɣaa wote é ɣɛ te ma, ‘Gè bo wiɛ ga gaama, nii nɛpɛ wɛ lɛ kɛɛni nui nii ƃalaa vɛ toai bu niitiɛ zaama, nà ɣa na wɛ lɛ kɛɛni bɛ̀.’ 46Nà wɔ ka ɣɛɛ na, ta sa ta ziɣi na faa yɛ te va wɔlɔ‐wɔlɔ ta wɔlɔ‐wɔlɔ. Kɛ̀ zɛʋui nii kwɛ̃ɛ gɛ lɛ ba, tele‐bo tuo‐wo beaitiɛ ta nà maa zɔlɔ wo.”

موجودہ انتخاب:

MAFIYU 25: DN1971

سرخی

شئیر

کاپی